Wɛ wʋ́ joŋi Zeruzalɛm tɩʋ kʋm DƖ yagɩ
52
Siyɔn tiinə bam, zaŋɩ-na dɔɔm wʋnɩ!Zaŋɩ-na wɛɛnɩ sɩ á kɩ dam á kɩ á tɩtɩ kuri nɩ!
Zeruzalɛm tɩʋ kʋlʋ na yɩ Wɛ tɩtɩ nyɩm tɩn,
kwe nɩnwaŋa gwaarʋ n vɔ n təŋə nɩ!
Bɛŋwaanɩ, dwi-gɛ tiinə balʋ na yǝri Wɛ tɩn
daa bá joori ba zʋ nmʋ wʋnɩ.a
2 Zeruzalɛm tɩʋ tiinə,
pɩpagɩ-na fogo kʋlʋ na taagɩ á yɩra yam tɩn á yagɩ,
sɩ á daarɩ á zaŋɩ wɛɛnɩ á jǝni á paarɩ baŋa nɩ.
Siyɔn tiinə balʋ ya na nɛ bɛɛsɩm tɩn,
lɩ-na capʋnnʋ tɩlʋ na lǝgi á ban nɩ tɩn.
3 Baŋa-Wɛ na tagɩ te tɩn mʋ tɩntʋ:
«Amʋ na yəgi abam a pa vərə tɩn,
ba wʋ ŋwɩ kʋlʋkʋlʋ ba pa-nɩ.
A nan na lagɩ a joori a joŋi abam,
a bá ŋwɩ səbu kʋ ŋwaanɩ.»
4 Yuutu Baŋa-Wɛ nan na tagɩ te tɩn mʋ tɩntʋ:
«Pulim nɩ tɩn, a nɔɔna bam dɛɛn ve Ezipi tɩʋ wʋnɩ mʋ ba zʋʋra.
Kʋ kwaga seeni Asiiri tiinə bam dɩ da maa jɩgɩ-ba ba yaara.
5 Bɛ nan daa mʋ jɩgɩ kʋ kɩ tɩntʋ?
Kafɛ ŋwaanɩ mʋ ba sɩɩnɩ ba kalɩ a nɔɔna bam
ba ja vu sa-tɩʋ yigə yigə.
Ba dɩdɛɛra bam maa coosi zanzan.b
Dɛ maama wʋnɩ
ba jɩgɩ amʋ yɩrɩ dɩm mʋ ba yáala.
6 Kʋntʋ ŋwaanɩ, a lagɩ a pa a nɔɔna bam lwarɩ a yɩrɩ dɩm kuri cɩga cɩga.
Dɛ dɩm kʋntʋ na yiǝ, ba ta wʋ́ lwarɩ nɩ:
kʋ yɩ amʋ Baŋa-Wɛ mʋ ŋɔɔnɩ dɩ ba,
yɩ a wɩ: ‹Nii-na amʋ da.› »
Baŋa-Wɛ na tagɩ kʋlʋ tɩn mʋ kʋntʋ.
7 Nii-na balʋ nɛ sɩm na nɔnɩ pweeru tɩm yuu nɩ
yɩ ba tɔɔlɩ kwǝrǝ tɩn vəŋə na jɩgɩ ywəəni te!
Ba maa tɛ ba wɩ: yazurə wʋ́ taa wʋ nɔɔna tee nɩ,
yɩ ba jaanɩ kwər-ywəŋə ba tui,
ba daarɩ ba tɔɔlɩ vrɩm taanɩ.
Ba maa tɛ dɩ Siyɔn tiinə bam ba wɩ:
«Abam Tu Wɛ dɩm je DƖ di DƖ paarɩ mʋ.»c
8 Cəgi-na, sɩ á wʋ́ ni á tɩʋ yɩrɩna bam na kaasɩ dɩ kwǝr-dɩa.
Ba maama kɩ daanɩ mʋ ba tɔɔlɩ ba kwǝrǝ kam dɩ wʋpolo.
Bɛŋwaanɩ, ba tɩtɩ yiǝ mʋ nɛ Baŋa-Wɛ na joori
sɩ DƖ taa zʋʋrɩ Siyɔn wʋnɩ te tɩn.
9 Zeruzalɛm tɩʋ di-dwəənu tɩm,
abam dɩ zaŋɩ-na á taá leeni wʋpolo le.
Bɛŋwaanɩ, Baŋa-Wɛ mʋ pɛ DƖ nɔɔna bam bɩcarɩ zuri,
dɩ DƖ na joŋi Zeruzalɛm tɩʋ kʋm DƖ yagɩ tɩn.
10 Baŋa-Wɛ lagɩ DƖ brɩ dwi-gɛ tiinə bam
DƖ dam-fɔrɔ kʋm na yɩ te tɩn mʋ.
Kʋ maa wʋ́ pa tɩga baŋa ni maama na
dɩ́ Tu Wɛ dɩm na wʋ́ vrɩ DƖ nɔɔna DƖ yagɩ te tɩn.
11 Nan nuŋi-na da sa-tɩʋ kʋm kʋntʋ nɩ!
Yɩ digimi-na á tɩtɩ dɩ ba wo-zɔɔna yam!
Nuŋi-na á daarɩ-ba.
Abam balʋ na zɩŋɩ Baŋa-Wɛ digə zɩla yam tɩn
maŋɩ sɩ á taá yɩ lanyɩranɩ fasɩ mʋ.d
12 Kʋ nan daɩ sɩ á wuuri á nuŋi lɩla
nɩ balʋ na duri sɩ ba lu tɩn.
Baŋa-Wɛ dɩm na yɩ abam Yisɩrayɛlɩ tiinə Wɛ tɩn
mʋ lagɩ DƖ tʋ á yigə nɩ sɩ á taá veǝ.
Dɩntʋ nan ta mʋ wʋ́ taa wʋ á kwaga nɩ
yɩ DƖ kwǝli abam je maama wʋnɩ.
Wɛ tɩntʋŋnʋ dɩm taanɩ
Baŋa-Wɛ ma ta DƖ wɩ:
13 «Amʋ tɩntʋŋnʋ wʋm tɩtʋŋa wʋ́ vu yigə.
O yɩrɩ dɩm wʋ́ zaŋɩ wɛɛnɩ pa o na zulə zanzan.
14 Kʋ nan sʋ nɔɔna zanzan balʋ na nɛ‑o tɩn mʋ.
Bɛŋwaanɩ, ba kɩ-o zʋnnɩ pa o yibiyə cɔgɩ
yɩ o daa ba jɩgɩ nabiinu nyɩnyʋgʋ o yɩra nɩ!
15 O nan ta wʋ́ yɛ tɩɩnɩ zanzan nɔɔna niə.e
Pwa dɩ wʋ́ da o ŋwaanɩ ba pu ba niə.
Bɛŋwaanɩ, kʋlʋ nɔɔna na wʋ tagɩ ba brɩ-ba tɩn mʋ ba lagɩ ba lwarɩ.
Ba maa wʋ́ ni wǝǝnu tɩlʋ ba ya na yǝri tɩ ni nɩ tɩn kuri.»f