53
Dɩbam nan na tɔɔlɩ kwǝrǝ kalʋ tɩn,
wɔɔ ya mʋ wʋ́ sɛ nɩ: ka sɩɩnɩ ka yɩ cɩga?
Baŋa-Wɛ na brɩ DƖ dam dɩm na tʋŋɩ te tɩn,
wɔɔ nan mʋ wʋ́ sɛ-dɩ?a
2 Wɛ tɩntʋŋnʋ wʋm na bɩgɩ te tɩn
nyɩ dɩ wo-dwi na tagɩ dɩ nuŋi tɩ-kʋra nɩ te
yɩ dɩ kuru tɩm kwaarɩ tɩga nɩ tɩn mʋ.
O yibiyə ba jɩgɩ lam dɩ nɩnwaŋa
sɩ dɩ́ wʋbʋŋa vu o seeni.
O yatɩga dɩ maa ba jɩgɩ kʋlʋ dɩ́ na wʋ́ nii dɩ́ na
sɩ dɩ́ taa lag‑o kʋ ŋwaanɩ tɩn.
3 O yɩ wʋlʋ nabiinǝ na yɔɔrɩ ba goonə,
yɩ ba daarɩ ba vɩn tɩn mʋ.
O ma tiini o mɩ dɩ wʋ-cɔgɔ dɩ yaara.
Nɔɔna nyaŋ-o mʋ yɩ ba səgi ba yibiyə o tee nɩ.
Dɩ́ ma bʋŋɩ nɩ: o yɩ wo-kʋrʋ mʋ.b
4 Wʋntʋ nan mʋ joŋi dɩ́ yaara
sɩ ya taa yɩ o nyɩm.
O ma daarɩ o zɩŋɩ dɩ́ wʋ-cɔgɔ kʋm maama o yuu nɩ.
Dɩ kʋ dɩ, dɩbam bʋŋɩ nɩ kʋ yɩ Wɛ mʋ waar‑o,
pa o yaarɩ o tɩtɩ kikiə yam ŋwaanɩ.c
5 Kʋ nan na yɩ te tɩn, o nɛ zʋnnɩ dɩbam lwarɩm ŋwaanɩ mʋ.
Kʋ maa yɩ dɩbam gɛɛra yam ŋwaanɩ mʋ
o nɛ cɔgɩm dɩm kʋntʋ.
Waarɩm dɩm na wʋ́ pa dɩ́ na zurim tɩn tu wʋntʋ baŋa nɩ mʋ.
Kʋ ma tɔgɩ o fufwələ yam baŋa nɩ sɩ dɩ́ na yazurə.d
6 Dɩ́ maama tusi nɩ peeni mʋ na ywəri sɩ cwǝŋǝ wʋnɩ.
Nɔɔnʋ maama pipiri mʋ o kwe o tɩtɩ cwǝŋǝ o tɔga.
Baŋa-Wɛ laan ma kwe dɩ́ maama lwarɩm kikiǝ yam
DƖ daŋɩ wʋntʋ baŋa nɩ.
7 Ba bɛɛs-o yɩ ba daarɩ ba pa kʋ zʋ o yɩra.
Dɩ kʋ maama dɩ, o wʋ puri o ni.
O maa nyɩ dɩ pǝlbu wʋlʋ ba na vaŋɩ ba ja ba vu sɩ ba gʋ tɩn.
O ta nyɩ dɩ piə kalʋ ba na fanɩ ka kʋrʋ
yɩ ka wʋ kɩ sɔɔ tɩn.
Kʋ maama wʋnɩ o nan wʋ puri o ni o ta kʋlʋkʋlʋ.
8 Ba dɛ vwan cwǝŋǝ nɩ mʋ ba di o taanɩ
ba dɩ‑o sɩ o tɩ.
Nɔɔn-nɔɔnʋ nan wʋ kɩ o tʋʋnɩ dɩm o wʋbʋŋa nɩ.
O ŋwɩa yɔɔrɩ ka kɩ kukugə mʋ nabiinǝ tɩtarɩ nɩ.
Kʋ nan yɩ o tɩtɩ nɔɔna bam lwarɩm ŋwaanɩ mʋ o nɛ cɔgɩm.e
9 Ba dɛɛn kwe o yibeeli dɩm ba kɩ nɔn-balwaarʋ tɩtarɩ nɩ mʋ,
Nadunə bɔɔna yam tikəri nɩ mʋ ba kɩ-o da,
yagɩ yɩra nan, o dɛɛn wʋ kɩ wo-balɔrɔ.
Ba dɛɛn wʋ nɛ vwan taanɩ o ni nɩ.f
10 Dɩ kʋ dɩ, Baŋa-Wɛ mʋ maŋɩ DƖ ja wʋbʋŋa
sɩ DƖ pa kʋ zʋ DƖ tɩntʋŋnʋ wʋm yɩra dɩ yaara.
O nan na kwe o ŋwɩa o ma o kɩ lwarɩm saarɩm kaanɩm o ti,
o laan wʋ́ na dwi dɩlʋ na wʋ́ saŋɩ o kwaga tɩn
yɩ o taa jɩgɩ o ŋwɩa taan.
Baŋa-Wɛ maa wʋ́ tɔgɩ o baŋa
DƖ kɩ kʋlʋ DƖ wʋbʋŋa na jaanɩ sɩ DƖ kɩ tɩn.
11 O nan na yaarɩ o ti, o wʋʋ wʋ́ poli,
o na lwarɩ nɩ o kɩ Baŋa-Wɛ wʋbʋŋa na lagɩ kʋlʋ tɩn ŋwaanɩ.g
Baŋa-Wɛ maa wɩ:
«Amʋ tɩntʋŋnʋ wʋm wʋ́ pa nɔɔna zanzan na ba bʋra,
o na kwe ba lwarɩm dɩm o daŋɩ o tɩtɩ yuu nɩ tɩn ŋwaanɩ.
12 Kʋntʋ ŋwaanɩ mʋ amʋ wʋ́ pa o na zulə,
nɩ kʋ na maŋɩ dɩ nɔn-yɩrʋ te tɩn.
O ta wʋ́ joŋi nyɔɔrɩ dɩlʋ na maŋɩ dɩ nɔn-babɛ tɩn.
Bɛŋwaanɩ, o yɔɔrɩ o sɛ sɩ o dʋlɩ o ŋwɩa kam mʋ o yagɩ.
Nɔɔna ma pa o yɩ nɔn-balwaarʋ bam wʋnɩ dɩdʋa.
O nan zɩŋɩ nɔɔna zanzan lwarɩm o yuu nɩ mʋ,
yɩ o ta loori Wɛ o pa nɔn-balwaarʋ tɩm dɩ.»