Wɛ jɩgɩ DƖ nɔɔna bam sono
54
Baŋa-Wɛ na tagɩ te tɩn mʋ tɩntʋ:«Nmʋ Siyɔn tɩʋ kʋm, laan ta n leeni le!
Nmʋ nan nyɩ dɩ ka-dʋgʋ mʋ
yɩ n wʋ jaanɩ pugə n lʋ bu.
Dɩ kʋ dɩ, nan ta kaasɩ wɔnɔ kaasa sɩ n daarɩ n tan caka.
Bɛŋwaanɩ kaanɩ wʋlʋ barʋ ya na yag-o tɩn
laan wʋ́ ba o taa jɩgɩ biə,
sɩ kʋ dwǝni kaanɩ wʋlʋ dɩ o barʋ ta na wʋ daanɩ tɩn.a
2 Pa n pwələ kam taa yalma.
Kʋ na yɩ n vwe dɩm,
vaŋɩ dɩ gwaarʋ tɩm sɩ tɩ twɩ tɩ kɩ da.
Yɩ kwarɩ yawɔrɔ.
Vaŋɩ n vwe dɩm ŋʋnɩ sɩ sɩ kɩ dɩdwaarʋ
sɩ n daarɩ n kwaarɩ paara yam ya je nɩ.
3 Bɛŋwaanɩ, nmʋ sisənə wʋ́ yalɩ
ya yi jazɩm seeni dɩ jagwiə seeni maama mʋ.
Nmʋ nɔn-biə bam lagɩ ba di tɩɩnɩ dɩdonnǝ mʋ,
yɩ ba zəli dɩ nɔɔna sɩ ba laan taa zʋʋrɩ dɩ wʋnɩ.
4 Nan yɩ tan kwarɩ fʋʋnɩ, sɩ n bá di cavɩɩra.
Yɩ tan liǝ nɩ: baá na n kuri,
sɩ kʋ bá kɩ kʋntʋ.
Kʋ na yɩ cavɩɩra yalʋ nmʋ na nɛ n nɔn-dʋnnɩ maŋa nɩ tɩn,
nmʋ wʋ́ swe ya swiə.
N daa bá guli n ya na yɩ kadəm
yɩ nɔɔna gooni‑m te tɩn gulə.
5 Bɛŋwaanɩ, nmʋ Kəru wʋm mʋ yɩ n barʋ.
Wʋntʋ yɩrɩ nan mʋ yɩ Paŋwa Tu Baŋa-Wɛ.
Yisɩrayɛlɩ dwi dɩm Wʋ-poŋo Tu wʋm mʋ yɩ n Vrɩnʋ.
Wʋntʋ nan ta mʋ te tɩga baŋa ni maama.
6 Baŋa-Wɛ wʋ́ bǝŋi-m sɩ n joori n ba DƖ te,
nɩ kabwəm wʋlʋ ya na zʋ barʋ o nɔn-dʋnnɩ maŋa nɩ
yɩ o barʋ wʋm yag-o lɩla,
pa o je o yɩranɩ dɩ wʋ-cɔgɔ te tɩn mʋ.»
Nmʋ Tu Wɛ dɩm mʋ tagɩ kʋntʋ.
7 «Amʋ yagɩ nmʋ sɩ n tan yɩ n yɩranɩ
maŋa fɩnfɩɩn wʋnɩ mʋ.
Kʋ nan yɔɔrɩ kʋ vaŋɩ-nɩ mʋ pa n jɩgɩ ŋwaŋa n pa-nɩ.
A laan ma ja‑m a joori a tɩtɩ tee nɩ.
8 A banɩ ya na zaŋɩ dɩ nmʋ tɩn
mʋ pɛ a səgi a yibiyə dɩ nmʋ maŋa fɩnfɩɩn wʋnɩ.
A nan wʋ́ tɔgɩ a sono kʋlʋ na ba ti tɩn baŋa nɩ mʋ
sɩ a duri nmʋ ŋwaŋa.»
Baŋa-Wɛ dɩm na yɩ n Vrɩnʋ tɩn mʋ tagɩ kʋntʋ.
9 «Amʋ tee nɩ, kʋ nyɩ dɩ a dɛɛn na kɩ te
Nowe maŋa kam nɩ tɩn mʋ.
A dɛɛn tagɩ a du mʋ nɩ:
a daa bá pa na-fara li lʋgʋ kʋm.
A laan nan ta tagɩ a du mʋ nɩ:
a banɩ bá zaŋɩ nmʋ baŋa nɩ,
a nan bá bwɛ nmʋ dɩ.b
10 Pweeru tɩm na maŋɩ tɩ sisiŋi
yɩ zwəənu tɩm dɩ je mʋ dɩ,
amʋ brɩ a bá dwanɩ a sono kʋm nmʋ baŋa nɩ.
A nan bá kwanɩ ni dɩlʋ a na goni dɩ nmʋ bɩcar-zuru ŋwaanɩ tɩn.»
Baŋa-Wɛ dɩm na jɩgɩ nmʋ ŋwaŋa tɩn mʋ tagɩ kʋntʋ.
11 Nmʋ yɩ tɩʋ kʋlʋ vu-dɩʋ na puri n baŋa nɩ
yɩ nɔɔn-nɔɔnʋ tǝrǝ sɩ o pa n bɩcarɩ zuri tɩn mʋ.
Nii mʋ! Amʋ nan wʋ́ kwe kandwa-ŋʋna dwi dwi mʋ
a fɔgɩ a lɔ nmʋ je sɩm.
A lagɩ a ma Safiiri mʋ a cwi n kabri-kuri kam.
12 Rubi kandwa-ŋʋna mʋ a ta wʋ́ ma a lɔ n dam je sɩm,
sɩ n mancwəənu niə yam dɩ taa yɩ kandwa-ŋʋna yɩranɩ.
Nmʋ kabri sɩm dɩ tɩtɩ wʋ́ taa yɩ kandwa-ŋʋna tɩlʋ na jɩgɩ lʋnnɩ tɩn mʋ baá ma ba lɔ-sɩ.
13 Amʋ Baŋa-Wɛ tɩtɩ mʋ lagɩ a brɩ nmʋ nɔn-biə bam,
sɩ ba taa kwarɩ-nɩ yɩ ba yazurə wʋ́ tiini ya taa daga.
14 Cɩga na tʋŋɩ n wʋnɩ tɩn mʋ wʋ́ pa n kuri ja tɩga lanyɩranɩ.
Yaara wʋ́ taa yɩ yigə yigə dɩ nmʋ,
sɩ kʋ pa n yɩ tan kwarɩ fʋʋnɩ.
Lɛɛrʋ dwi maama dɩ bá twɛ nmʋ te.
15 Tɩʋ kʋlʋ nɔɔna na li nmʋ dɩ najara,
kʋ daɩ amʋ mʋ pɛ-ba cwǝŋǝ sɩ ba kɩ kʋntʋ.
Wʋlʋ maama nan na kɩ jara dɩ nmʋ,
kʋ tu wʋ́ ba o sɛ o pa‑m.
16 «Nii mʋ! Kʋ na yɩ luru wʋlʋ na wiiri mim o kɩ o yɔrɔ kuri nɩ
sɩ o wanɩ o lu najara zɩla yalʋ na jɩgɩ ni tɩn,
kʋ yɩ amʋ mʋ kɩ kʋntʋ tu.
Amʋ nan ta mʋ kɩ nɔn-babɛ sɩm dɩ,
sɩ ba taa jɩgɩ vuvugə kikiə ba kɩ.
17 Ba nan na ti najara zɩlɩ dɩlʋ maama yigə
sɩ ba ma-dɩ ba jeeri‑m, kʋ brɩ kʋ bá tʋŋɩ.
Ba daa na kwaanɩ sɩ nmʋ tʋ dɩ n bʋra,
nń ŋɔɔnɩ n joŋi n tɩtɩ n yagɩ.
Baŋa-Wɛ tɩntʋŋna na wʋ́ joŋi nyɔɔrɩ dɩlʋ tɩn mʋ kʋntʋ.
Amʋ nan mʋ wʋ́ pa ba na ba bʋra.»
Baŋa-Wɛ mʋ tagɩ kʋntʋ.