Ba-na Baŋa-Wɛ te!
Baŋa-Wɛ tagɩ DƖ wɩ:
55
«Abam balʋ maama na-nyɔm na jɩgɩ tɩn,ba-na á nyɔ na!
Á na maŋɩ á ba jɩgɩ səbu dɩ, ta ba-na!
Yəgi-na kʋlʋ á na lagɩ tɩn á di!
Abam na lagɩ sana dɩ nayɩla, ba-na á joŋi!
Tɩ maama yɩ zaanɩ mʋ.
Á bá ŋwɩ kʋlʋkʋlʋ tɩ ŋwaanɩ.a
2 Bɛɛ mʋ yɩ á bʋŋɩ sɩ á cɔgɩ səbu
wǝǝnu tɩlʋ na daɩ wʋdiu cɩga cɩga tɩn baŋa nɩ?
Kʋ na yɩ wǝǝnu tɩlʋ na ba zuri kana tɩn,
bɛŋwaanɩ mʋ abam wʋ́ tʋŋɩ taan sɩ á wanɩ á na-tɩ?
Cəgi-na amʋ taanɩ dɩm, sɩ á beeri wʋdi-ŋʋŋʋ á di.
Kʋntʋ mʋ wʋ́ pa á ni á wʋdiu kʋm ywəəni.
3 Ba-na amʋ te, sɩ á daarɩ á pʋrɩ á zwa sɩ á cəgi.
Abam na cəgi amʋ taanɩ dɩm, á wʋ́ na ŋwɩa cɩga cɩga.
Bɛŋwaanɩ, a lagɩ a kɩ ni-gonim dɩlʋ na wʋ́ taa wʋra maŋa maama tɩn mʋ dɩ abam,
sɩ kʋ brɩ sono kʋlʋ a dɛɛn na jɩgɩ dɩ Davidi
yɩ kʋ bá cɔgɩ maŋa dɩ maŋa tɩn mʋ.
4 Nii-na! A dɛɛn kur‑o mʋ
sɩ o pa dwi-gɛ tiinə lwarɩ a dam dɩm na yɩ te tɩn.
A ta ma pa o ji ba yigə tu yɩ o te-ba.
5 Abam wʋ́ tʋŋɩ á bəŋi tɩɩnɩ dɩlʋ á ya na yǝri tɩn nɔɔna,
yɩ ba dɩ wʋ́ kɩ lɩla ba ba ba sɛ á beeri dɩm.
Baá kɩ kʋntʋ abam Tu Baŋa-Wɛ dɩm ŋwaanɩ.
Dɩntʋ mʋ yɩ Yisɩrayɛlɩ dwi dɩm Wʋ-poŋo Tu wʋm,
yɩ o pa á na nɩnwaŋa lanyɩranɩ.»
6 Abam ta jɩgɩ cwǝŋǝ sɩ á na Baŋa-Wɛ,
nan kwaanɩ-na sɩ á lwarɩ-DƖ.
Bəŋi-na DƖ yɩrɩ yɩ DƖ ta bwələ sɩ DƖ sɛ á beeri dɩm.
7 Nɔn-balwaarʋ maŋɩ sɩ ba dʋlɩ ba kikiə yam ba yagɩ mʋ,
sɩ pu-sɩŋ-nyɩna dɩ yagɩ ba wʋbʋŋ-balwaarʋ tɩm.
Bantʋ laan na pipiri ba vu ba yi dɩbam Tu Baŋa-Wɛ te,
DƖ laan wʋ́ duri ba ŋwaŋa,
yɩ DƖ daarɩ DƖ yagɩ ba lwarɩm DƖ ma DƖ cɛ-ba.
8 Baŋa-Wɛ na tagɩ te tɩn mʋ tɩntʋ:
«Cɩga tɩn, amʋ wʋbʋŋa dɩ abam wʋbʋŋa daɩ bɩdwɩ.
Abam nan na ve cwe sɩlʋ wʋnɩ tɩn daɩ amʋ cwe sɩm.
9 Nɩ wɛyuu kʋm dɩ tɩga baŋa kam na pɔɔrɩ daanɩ te tɩn,
kʋntʋ mʋ amʋ cwe sɩm wʋ wɛɛnɩ
yɩ abam nyɩm wʋ kuri nɩ.
Amʋ wʋbʋŋa yam dɩ maa wʋ abam wʋbʋŋa yam yigə nɩ.
10 Kʋ ta nyɩ dɩ dʋa
na zɩgɩ wɛyuu nɩ ka tui tɩga kam nɩ
yɩ ka ba joori kafɛ te tɩn mʋ.
Kʋ maŋɩ sɩ ka bugi tɩga kam mʋ
sɩ gaa dɩ tweeru kwin tɩ kɩ biə.
Tɩ biə bam maa wʋ́ ji wo-dwə tɩ pa vala,
dɩ wʋdiu sɩ nɔɔna di.
11 Kʋ yɩ bɩdwɩ mʋ dɩ taanɩ dɩlʋ na nuŋi amʋ ni nɩ tɩn.
Dɩ bá joori dɩ ba a te kafɛ.
Kʋ nan maŋɩ sɩ dɩ kɩ a wʋbʋŋa na laga te maama tɩn mʋ,
sɩ dɩ kɩ dɩ su a na tʋŋɩ-dɩ sɩ dɩ kɩ te tɩn.»
12 Abam wʋ́ nuŋi sa-tɩʋ kʋm nɩ dɩ wʋpolo mʋ
sɩ á joori sɔŋɔ dɩ bɩcar-zuru.
Á na ma á kɛa, pweeru dɩdaanɩ pi-kum maama
wʋ́ ta kaasɩ wʋpolo kaasa mʋ abam yigə nɩ.
Kʋ daarɩ yɩ tweeru tɩlʋ maama na wʋ kagʋa nɩ tɩn
wʋ́ taa magɩ jɩan mʋ wʋpolo ŋwaanɩ.
13 Sabarɩ ya na wʋ mɛ maama tɩn
laan wʋ́ ji tu-ŋʋnnʋ jǝgǝ mʋ.
Swannʋ tɩlʋ na kɩ biə tɩn
mʋ wʋ́ ləri sabar-mangwəli yuu nɩ.
Kənə yantʋ mʋ wʋ́ pa Baŋa-Wɛ joŋi yɩrɩ DƖ pa DƖ tɩtɩ.
Kʋ nan yɩ mɩmaŋɩ na wʋ́ taa wʋra maŋa maama
yɩ dɩ bá cɔgɩ kɔtaa tɩn mʋ.