Baŋa-Wɛ wʋ́ joŋi dwi-gɛ tiinə
56
Baŋa-Wɛ na tagɩ te tɩn mʋ tɩntʋ:«Taá ye-na sɩ á pa cɩga kam zɩgɩ,
sɩ á taá kɩ kʋlʋ na tɔgɩ cwǝŋǝ tɩn.
Bɛŋwaanɩ, kʋ bá daanɩ sɩ a joŋi abam a yagɩ,
yɩ a pa cɩga taa tʋŋa jaja.
2 Balʋ na yɔɔrɩ ba sɛ ba kɩ wǝǝnu tɩntʋ tɩn mʋ jɩgɩ yu-yoŋo,
nɩ ba na ye a siun dɛ dɩm ni nɩ,
sɩ ba yɩ cɔgɩ dɩ cullu tɩm,
yɩ ba vɩn sɩ ba kɩ lwarɩm dwi maama.»
3 Dwi-gɛ tu wʋlʋ na tu o kwe o tɩtɩ o salɩ Baŋa-Wɛ yɩra nɩ, kʋ tu yɩ ta nɩnɛɛnɩ, «Baŋa-Wɛ wʋ́ pa pʋpwara taa tigi amʋ dɩ DƖ tɩtɩ nɔɔna bam tɩtarɩ laŋa nɩ.» Ba na lwɩ nɔɔnʋ wʋlʋ tɩn dɩ yɩ ta nɩnɛɛnɩ, «Amʋ yɩ wo-kʋrʋ mʋ.»
4 Baŋa-Wɛ nan na tagɩ te tɩn mʋ tɩntʋ:
«Kʋ na yɩ balʋ ba na lwɩ-ba tɩn,
bantʋ na tɔgɩ a siun dɛ cullu tɩm,
yɩ ba kɩ kʋlʋ na wʋ́ poli a wʋʋ tɩn,
ba ta na yɔɔrɩ ba jɩgɩ a ni-gonim dɩm cɩga cɩga,
5 amʋ laan wʋ́ pa ba na jǝŋǝ je a tɩtɩ digə kam nɩ.
A maa wʋ́ pa ba na yɩrɩ
na garɩ ba ya na jɩgɩ bu-baara dɩ bukwa
sɩ nɔɔna guli ba gulə te tɩn.
A maa wʋ́ pa-ba yɩrɩ dɩlʋ na wʋ́ taa wʋra wuu
yɩ dɩ bá fɔgɩ dɩ je.
6 Kʋ ta na yɩ vərə balʋ na tu ba salɩ amʋ Baŋa-Wɛ yɩra nɩ
sɩ ba taa tʋŋɩ ba pa-nɩ tɩn,
bantʋ na soe a yɩrɩ dɩm yɩ ba zuli-nɩ,
ba ta daarɩ ba ye a siun dɛ dɩm ni nɩ,
sɩ ba yɩ cɔgɩ ba tɩtɩ dɩ cullu tɩm,
ba maa na yɔɔrɩ ba jɩgɩ a ni-gonim dɩm cɩga cɩga,
7 bantʋ mʋ a lagɩ a ja-ba a yi a piu kʋlʋ na yɩ lanyɩranɩ fasɩ tɩn,
sɩ ba di ywəəni amʋ digə kam wʋnɩ.
A laan maa wʋ́ sɛ a joŋi ba zwɛɛm pɛɛra,
dɩ kaanɩm dɩlʋ maama ba na kɩ a bimbim dɩm baŋa nɩ tɩn.
Bɛŋwaanɩ, baá taa bǝi amʋ sɔŋɔ kʋm nɩ:
«Wɛ-loro digə mʋ dwiə yam maama ŋwaanɩ.»a
8 Yuutu Baŋa-Wɛ nan mʋ yɩ dɩlʋ na lagɩ Yisɩrayɛlɩ tiinə balʋ ya na jagɩ je maama nɩ tɩn DƖ kɩ daanɩ.
Dɩntʋ mʋ tagɩ DƖ wɩ:
«Amʋ ta wʋ́ la nɔɔna badonnǝ mʋ a ba a wǝli da,
yɩ kʋ daɩ balʋ a na maŋɩ a la a kɩ daanɩ tɩn yɩranɩ.»b
Wɛ bwɛ nɔn-balwaarʋ
9 «Ba-na abam ga-vara bam maama!
Nuŋi-na gaa wʋnɩ dɩ kagʋa wʋnɩ á ba á di á su!
10 Balʋ na jɩgɩ a nɔɔna bam ba nii tɩn yɩ lilwǝ mʋ.
Ba maa yǝri kʋlʋkʋlʋ kuri.
Ba ta nyɩ dɩ kakuri sɩlʋ niə na pugi tɩn mʋ,
ba warɩ sɩ ba we.
Ba yɔɔrɩ ba tigi ba dwɛ dɩndwɩa yɩranɩ mʋ.
Ba maa tiini ba soe dɔɔm zanzan.
11 Ba fra yam yɔɔrɩ ya daga
nɩ kakuri fra na yɩ te tɩn mʋ.
Ba ba fɔgɩ ba di ba sui.
Ba maa yɩ nayɩra balʋ yiǝ na wʋ pʋʋrɩ tɩn.
Ba maama kɩ ba na lagɩ te tɩn mʋ,
yɩ ba daarɩ ba beeri nyɔɔrɩ ba pa ba tɩtɩ.
12 Ba maa kaagɩ ba tɛ ba brɩ daanɩ ba wɩ:
‹Dɩ́ vu dɩ́ nyɔ sana!
Pa-na sɩ dɩ́ nyɔ sa-dɛɛra dɩ́ su dɩ́ wʋbʋŋa.
Zɩm dɩ jwa nan bá taa garɩ daanɩ,
yɩ dɩ́ jwa wʋ́ di ywəəni sɩ kʋ ja gaalɩ.› »