57
Balʋ na kwarɩ Wɛ tɩn yǝni ba tɩ,
yɩ nɔɔna yigə tǝrǝ kʋ wʋnɩ.
Balʋ na kɩ cɩga tɩn yǝni ba je mʋ,
yɩ nɔɔn-nɔɔnʋ yǝri kʋ kuri.
Nɔɔna warɩ sɩ ba lwarɩ nɩ: Wɛ mʋ kwe-ba DƖ ja DƖ kɛ
sɩ lwarɩm yɩ yi-ba.
2 Balʋ na yɔɔrɩ ba tɔgɩ cwǝŋǝ tɩn nan na tɩga,
ba yǝni ba na yazurə mʋ,
yɩ ba daarɩ ba sin.
3 Abam balʋ na nuŋi vʋra dwi dɩm wʋnɩ tɩn,
fʋfɔ-na á yi amʋ te!
Á yɩ ka-tʋla dɩ ka-bwəəru biə mʋ!
4 Bran mʋ abam jɩgɩ á kɩ á mwana?
Bran mʋ á kəŋi á niə yalɩyalɩ
á jɩgɩ-ba á twɩa?
Abam nan yɔɔrɩ á yɩ zwabani-nyɩna dwi,
dɩ vwa-fɔra yɩranɩ mʋ.
5 Á na zuli á jwǝnǝ tu-kamunnu tɩtarɩ nɩ te tɩn,
á tigi tweeru maama kuri nɩ á kɩ boorim kikiə mʋ.
Á daa ta ma kwe á biə á kaanɩ-ba bwəəlu tɩm nɩ,
mɛ gugwəəru na wʋ pweeru tɩm wʋnɩ tɩn.
6 Abam yǝni á tu bwəəlu kurə nɩ
á beeri kandwa-sɩswələ sɩ ya ji á jwǝnǝ.
Yantʋ mʋ á soe sɩ á taá zulə.
Abam ma yǝni á kwe wo-nyɔɔrʋ pɛɛra
á lo ya baŋa nɩ,
yɩ á ta pa-ya muni pɛɛra.
Á nan bʋŋɩ nɩ: á wʋ́ taá kɩ tɩntʋ maama,
sɩ amʋ ta taa yɩ cɩmm mʋ na?
7 Abam ta yǝni á diini piu maama yuu mʋ á kɩ boorim kikiə
dɩ á na kaanɩ á jwǝnǝ yam te tɩn.
8 Abam ta yǝni á zʋ á di sɩm wʋnɩ á pɩ sɩ niə,
yɩ á zɩgɩ á jwǝnǝ nyɩnyʋrʋ da.
Á ma vɩn amʋ yɩ á daarɩ á sɛ á pa jwǝnǝ.
Á ma á yɔɔrɩ á tɔgɩ ya baŋa á kɩ sar-pwəgə,
dɩ á na tʋ sarɩ wʋnɩ á tigi dɩ balʋ á fra na zʋʋra tɩn.
9 Abam ta ma kwe nugə dɩ wǝǝnu tɩlʋ lwǝm na ywǝmmǝ tɩn zanzan
á ja á vu sɩ á ma á zuli pɛ wʋma.
Á ma tʋŋɩ á nɔɔna sɩ ba vu yigə yigə ba nii,
kʋ na maŋɩ kʋ yɩ curu nɩ mʋ dɩ.
10 Abam na ve taan á beeri wa yadonnə te tɩn pɛ á bwəni mʋ.
Dɩ kʋ dɩ, á ta wʋ sɛ sɩ á ta wɩ: «Kʋ ba jɩgɩ kuri.»
Á ma joori á na dam-dʋʋrɩ á pa á tɩtɩ,
sɩ á wanɩ á kɩ á wʋbʋŋa yam na lagɩ te tɩn.
11 Abam nan kwarɩ fʋʋnɩ dɩ jwəm dɔɔ mʋ
pa á daa ba jɩgɩ amʋ cɩga?
Bɛŋwaanɩ mʋ abam daa ba guli amʋ gulə,
á nan maŋɩ á ba bʋŋɩ amʋ wʋbʋŋa dɩ?
A na daanɩ yɩ a wʋ kʋrɩsɩ abam tɩn ŋwaanɩ mʋ,
á daa ba kwarɩ-nɩ na?
12 Abam na kɩ kikiə yalʋ yɩ á bʋŋɩ nɩ ya tɔgɩ cwǝŋǝ tɩn,
amʋ wʋ́ pa ya nuŋi jaja,
yɩ á bá na nyɔɔrɩ ya baŋa nɩ.
13 Abam nan na keeri á lagɩ zǝnǝ,
á jwǝnǝ yam wʋ́ wanɩ ya wǝli abam na?
Viu tɩtɩ yɩranɩ yi sɩ kʋ kalɩ-ya kʋ ja kʋ je.
Siun fɩnfɩɩn yɩranɩ mʋ wʋ́ kalɩ-ya kʋ ja kʋ kɛ.
Kʋ daarɩ wʋlʋ na salɩ amʋ Baŋa-Wɛ yɩra nɩ,
kʋ tu wʋ́ joŋi tɩga kam o taa te,
yɩ o daarɩ o taa zuli-nɩ a tɩtɩ piu kʋm baŋa nɩ.
Balʋ wʋʋ na cɔgɩ dɩ ba lwarɩm tɩn wʋ́ sin
14 Ba maa wɩ:
«Fɔgɩ á tiŋi-na cwəŋə kam!
Guri-na kandwa-cəllə yam maama
sɩ a nɔɔna na cwǝŋǝ ba kɛ.»
15 Baŋa-Wɛ wʋ wɛyuu baŋa baŋa mʋ yɩ DƖ ba jɩgɩ doŋ.
DƖ maa ŋwɩ maŋa maama, yɩ DƖ yɩrɩ dɩm yɩ lanyɩranɩ fasɩ.
Dɩntʋ nan tagɩ tɩntʋ mʋ:
«Amʋ sɩɩnɩ a jǝni wɛyuu je sɩm nɩ
mɛ na yɩ lanyɩranɩ fasɩ tɩn mʋ.
Dɩ kʋ dɩ, amʋ nan zɛ a ta wʋra dɩdaanɩ
nɔɔnʋ wʋlʋ ba na bɛɛsɩ tɩn,
nɔɔnʋ wʋlʋ bʋbʋŋa na cɔgɩ tɩn,
sɩ a pa balʋ wʋrʋ na cɔgɩ tɩn joori ba na wʋpolo,
a pa balʋ ba na bɛɛsɩ tɩn bɩcɔŋɔ joori kʋ na wʋpolo.
16 A bá yɔɔrɩ a taa bwɛ a nɔɔna taan.
A banɩ dɩm nan bá taa wʋ ba baŋa nɩ wuu.
Kʋ na daɩ kʋntʋ, nabiinǝ nagwələ wʋ́ yɔɔrɩ ya tɩ mʋ,
dɩ kʋ na maŋɩ kʋ yɩ amʋ mʋ pɛ ba jɩgɩ ŋwɩa tɩn dɩ.
17 Ba na tusi ba wo-swənə ŋwaanɩ tɩn, mʋ a banɩ zaŋɩ dɩ ba.
A ma waarɩ-ba yɩ a daarɩ a səgi a yibiyə ba tee nɩ.
Dɩ kʋ dɩ, ba ta yɔɔrɩ ba kɩ zwabaniə
nɩ ba wʋbʋŋa na lagɩ te tɩn mʋ.
18 Amʋ sɩɩnɩ a na ba kikiə na yɩ te tɩn.
A nan ta wʋ́ pa ba na zurim.
Amʋ wʋ́ tʋ ba yigə nɩ sɩ ba lwarɩ cwǝŋǝ kam,
yɩ a daarɩ a pa ba bɩcara zuri.
19 A ta wʋ́ kɩ amʋ tiə yam ba ni-vɔɔrʋ tɩm baŋa nɩ.»
Baŋa-Wɛ daa ta maa wɩ:
«Kʋ na yɩ balʋ na wʋ yigə yigə tɩn,
dɩ balʋ na bwələ tɩn dɩ,
amʋ wʋ́ pa ba bɩcara zuri.
A maa wʋ́ pa ba na zurim.b
20 Kʋ daarɩ, nɔn-balwaarʋ nyɩ dɩ nɩnɩʋ wʋ na-ŋʋnɩ mʋ
na jaanɩ sɩ diini wɛɛnɩ yɩ siun tǝrǝ sɩ kʋ pa sɩ tʋ.
Sɩ maa yɔɔrɩ sɩ dʋlɩ weeru dɩ bwəru sɩ yaga.»
21 Amʋ Tu Wɛ dɩm na tagɩ te tɩn mʋ tɩntʋ:
«Nɔn-balwaarʋ tɩm bá fɔgɩ ba sin.»