Ni-vɔrɩ dɩlʋ na tɔgɩ cwǝŋǝ tɩn taanɩ
Baŋa-Wɛ maa wɩ:
58
«Kaasɩ dɩdaanɩ kwər-dɩa!Yɩ ta n cɩm.
Pa n kwǝrǝ zaŋɩ nɩ n wʋra n wui nabɔnɔ mʋ tɩn.
Ta dɩ a nɔɔna Zakɔbɩ dwi tiinə bam
ba zwabaniə kikiə na yɩ te tɩn,
sɩ ba lwarɩ ba na kɩ lwarɩm yalʋ tɩn.
2 Dɛ maama wʋnɩ ba fʋfɔ ba twɛ amʋ te mʋ.
Ba maa brɩ ba tɩtɩ nɩ: ba sɩɩnɩ yiǝ
sɩ ba lwarɩ amʋ kwiə yam.
Ba kaagɩ ba kɩ nɩ ba yɩ nɔɔna balʋ na tɔgɩ cwǝŋǝ
yɩ ba wʋ yagɩ ba Tu Wɛ dɩm niə yam tɩn mʋ.
Ba maa tɛ dɩ amʋ nɩ: a bʋrɩ cɩga bʋra a pa-ba,
nɩ ba yɩ balʋ na soe sɩ ba dɩ Wɛ mɩ daanɩ tɩn mʋ.
3 Ba ta bwe amʋ mʋ ba wɩ:
‹Bɛŋwaanɩ mʋ dɩ́ vɔgɩ dɩ́ niə,
yɩ nmʋ ba nii dɩ́ seeni?
Bɛɛ mʋ kɩ yɩ dɩ́ na tu dɩ́ tɩtɩ te tɩn,
nmʋ wʋ maanɩ kʋ ni nɩ?›
Nii-na! Abam na yǝni á vɔ ni maŋa kalʋ nɩ tɩn,
á ta kɩ á wʋbʋŋa na lagɩ kʋlʋ tɩn,
yɩ á bɛɛsɩ balʋ na tʋŋɩ ba pa abam tɩn mʋ.
4 Abam ni-vɔrɩ dɩm yǝni dɩ kweeli dɩ najara dɩ ni-kantɔgɔ mʋ.
Á maa soe sɩ á taá magɩ daanɩ dɩ ja-gulə.
Abam na yǝni á vɔ ni te kʋntʋ tɩn,
á bʋŋɩ nɩ: amʋ wʋ́ cəgi á wɛ-loro kʋm mʋ na?
5 Á bʋŋɩ nɩ: a wʋʋ poli dɩ ni-vɔrɩ dɩm kʋntʋ doŋ mʋ na?
Kʋ maŋɩ sɩ nɔɔna zʋʋrɩ ba tɩtɩ tɩga nɩ dɛ dɩdʋa yɩranɩ wʋnɩ,
yɩ ba cɔɔlɩ ba yum tɩga nɩ,
nɩ gaarʋ mʋ goori na?
Kʋ ta maŋɩ sɩ nɔɔna lwarɩ gwar-zɩnzwara
sɩ ba pəni da dɩ tɩntwarɩm wʋnɩ mʋ na?
Abam jɩgɩ kʋntʋ mʋ á bǝi ni-vɔɔm na?
Á bʋŋɩ nɩ: amʋ Baŋa-Wɛ wʋʋ poli
dɩ dɛ dɩm kʋntʋ kikiə mʋ na?
6 Amʋ nan na beeri ni-vɔrɩ dɩlʋ doŋ tɩn mʋ tɩntʋ:
Kʋ maŋɩ sɩ abam joŋi balʋ ba na vanɩ-ba cɩga tɩn mʋ á yagɩ,
sɩ á daa yɩ taá bɛɛsɩ balʋ na tʋŋɩ ba paɩ abam tɩn.
Kʋ ta na yɩ balʋ na wʋ cam wʋnɩ tɩn,
sɩ á bwǝli capʋnnʋ tɩlʋ na lǝgi ba ban nɩ tɩn á yagɩ,
sɩ ba taa te ba tɩtɩ.
7 Amʋ ta lagɩ sɩ á pɔɔrɩ á wʋdiu mʋ á pa kana na jɩgɩ balʋ tɩn,
sɩ á daarɩ á pa yinigə tiinə balʋ na ba jɩgɩ tigə je tɩn pwələ
sɩ ba taa tigə á sam nɩ.
Balʋ na gɛ gwaarʋ sɩ ba zʋ tɩn,
sɩ á pa-ba tɩdonnǝ.
Abam cʋrrʋ maa na lagɩ sɩ á wǝli-ba,
sɩ á yɩ vri á kwaga á ya-ba.a
8 Abam nan na tɔgɩ kikiə yam kʋntʋ doŋ,
amʋ zaanɩ dɩm wʋ́ ba á baŋa nɩ mʋ,
nɩ wa-puli wɩa na yǝni ka nuŋi jaja te tɩn.
Á maa wʋ́ na á zurim lɩla.
Á nɔn-ŋʋnnɩ kikiə dɩ wʋ́ nuŋi ya taa ve á yigə nɩ,
sɩ Baŋa-Wɛ paarɩ-zulǝ yam dɩ taa kwǝli abam kwaga.
9 Abam laan maa na loori kʋlʋ maama Baŋa-Wɛ tee nɩ,
DƖ wʋ́ ləri abam yɩ DƖ kɩ lɩla DƖ ta wɩ: ‹Nii-na nɩ da.›
Abam maŋɩ sɩ á kwe á kǝm-cɛɛrɩ dɩm á dʋlɩ á yagɩ,
sɩ á daa yɩ bwɛ daanɩ, naa á co da-kwaga.
10 Á ta maŋɩ sɩ á taá paɩ kana na jɩgɩ balʋ tɩn wʋdiu,
yɩ á daarɩ á wǝli balʋ na wʋ cam wʋnɩ tɩn.
Á na kɩ wǝǝnu tɩm kʋntʋ doŋ,
á wʋ́ pa pooni da dɩ ba
yɩ á pooni dɩm lagɩ dɩ zəŋi lim wʋnɩ mʋ,
sɩ kʋ taa nyɩ dɩ wɩa kʋ paɩ abam.
11 Maŋa maama mʋ Baŋa-Wɛ wʋ́ taa nii á baŋa nɩ.
Tɩ-kʋra nɩ mɛ seeni wɩa na dana tɩn,
mʋ DƖ lagɩ DƖ pa abam á na gɛ wǝǝnu tɩlʋ tɩn,
sɩ á yɩra yam fɔgɩ ya kɩ dam.
Á wʋ́ taá nyɩ dɩ gaarɩ dɩlʋ ba na yagɩ na zanzan da tɩn mʋ,
naa buli-yi dɩlʋ na na ba kɔɩ tɩn mʋ.
12 Abam dwi dɩm wʋ́ fɔgɩ ba lɔ tɩʋ kʋm di-dwəənu tɩm mʋ.
Ba nan lagɩ ba cwi ba sam dɩm
kəbri sɩlʋ na maŋɩ sɩ wʋra faŋa faŋa tɩn baŋa nɩ mʋ.
Ba laan wʋ́ taa jɩgɩ abam ba bǝi nɩ:
‹Kabri kwɛɛm lwara›,
dɩ ‹Cwə-farɩ dɩ sam lwara› mʋ.
13 Abam nan maŋɩ sɩ á taá ye siun dɛ cullu tɩm ni nɩ,
sɩ á yɩ kɩ á wʋbʋŋa na lagɩ te tɩn dɩ wʋnɩ,
dɩ na yɩ lanyɩranɩ fasɩ dɩ pa-nɩ tɩn ŋwaanɩ.
Á ta wʋ́ pa siun dɛ dɩm taa tigi á bɩcara nɩ,
yɩ á nɩgɩ-dɩ, dɩ na yɩ amʋ Baŋa-Wɛ nyɩm tɩn ŋwaanɩ.
Á laan wʋ́ pɔɔrɩ-dɩ sɩ dɩ taa yɩ dɩ yɩra,
sɩ á kwe-dɩ á pa amʋ.
Abam daɩ sɩ á kɩ abam tɩtɩ wʋbʋŋa na lagɩ te,
naa á ŋɔɔnɩ bɩtar-yɔɔrʋ dɩ wʋnɩ.
14 Á na sɩɩnɩ á kɩ kǝm dɩm kʋntʋ doŋ,
á laan wʋ́ di ywəəni amʋ Baŋa-Wɛ ŋwaanɩ.b
A maa wʋ́ pa á yɩrɩ zaŋɩ tɩga kam maama nɩ,
yɩ á di nyɔɔrɩ tɩga kalʋ a na kwe a pa á nabaarʋ Zakɔbɩ tɩn baŋa nɩ.»
Baŋa-Wɛ ni dɩm mʋ kʋntʋ.