Lwarɩm kikiə taanɩ
Bwɛɛm
59
Cɩga ŋwaanɩ tɩn, kʋ daɩ nɩ Baŋa-Wɛ dam muri mʋsɩ DƖ wanɩ DƖ vrɩ abam DƖ yagɩ.
DƖ nan daɩ zwa-kɔgɔ sɩ á ta wɩ:
DƖ wʋ ni á kərə kam mʋ.
2 Kʋ nan na yɩ te tɩn, abam lwarɩm kikiǝ mʋ cɩgɩ cwǝŋǝ
yɩ ya pɔɔrɩ abam dɩ á Tu Wɛ dɩm daanɩ.
Á lwarɩm dɩm mʋ pɛ DƖ kwǝli DƖ yibiyə dɩ abam,
yɩ DƖ ba ni á loro kʋm.
3 Bɛŋwaanɩ, abam yɔɔrɩ á yɩ nɔn-gʋra mʋ.
Á jɩan yam maa mɩ dɩ lwarɩm tɩtʋŋa
yɩ á niə yam dɩ mɩ dɩ vwan fɔm.
Á ta maa soe sɩ á taa ŋɔɔnɩ pu-sɩŋa bɩtarɩ á paɩ á donnǝ.
4 Nɔɔn-nɔɔnʋ ba saŋɩ o doŋ dɩ cɩga
taanɩ dim jəgə nɩ.
Nɔɔn-nɔɔnʋ ba di sarɩya yam dɩ cɩga.
Ba nan soe ganɩm mʋ dɩ vwan fɔm dɩ.
Ba yǝni ba jeeli jara mʋ
sɩ lwarɩm kikiə puli ya taa daga.
5 Ba wʋbʋŋa yam nyɩ dɩ kapɛ cɩcara mʋ.
Wʋlʋ na di-ya, oó tɩ mʋ.
Ya dɩdʋa maa na lɔga,
kapaa mʋ wʋ́ nuŋi da.
Ba na jeeli cɔgɩm te tɩn
nyɩ dɩ didoŋkogo na sɔ didoŋkogo pogo te tɩn mʋ.
6 Ba nan warɩ sɩ ba kwe didoŋkogo pogo tɩm kʋntʋ ba nyaanɩ gwaarʋ dɩ.
Bantʋ na tʋŋɩ tɩtʋŋa yalʋ tɩn ba wǝli nɔɔna
sɩ ba ma ba kwǝli ba tɩtɩ.
Ba jɩgɩ lwarɩm kikiə yɩranɩ mʋ ba kɩ,
yɩ ba jɩa tɩtʋŋa dɩ maa yɩ nakɔɔrɩ yɩranɩ.
7 Ba yɔɔrɩ ba wuuri mʋ dɩ lwarɩm kǝm.
Ba maa yɩ lɩla sɩ ba gʋ balʋ na wʋ maŋɩ sɩ ba tɩ tɩn.
Ba wʋbʋŋa yɔɔrɩ ya yɩ lwarɩm yɩranɩ mʋ.
Ba cwe sɩm maama maa yɩ cɔgɩm yɩranɩ.
8 Bantʋ yǝri bɩcar-zuru na yɩ woŋo kʋlʋ tɩn.
Ba tɩtʋŋa maama ba tɔgɩ cɩga.
Ba pipiri ba cwe sɩm pa sɩ gugwǝli mʋ.
Wʋlʋ maama na ve sɩ wʋnɩ tɩn yǝri yazurə na yɩ te tɩn.a
Lərim
9 Kʋ yɩ kʋntʋ ŋwaanɩ mʋ dɩ́ wʋ nɛ dɩ́ bʋra,
yɩ vrɩm dɩ wʋ tu dɩ́ tee nɩ.
Dɩ́ ya je dɩ́ tɩɩnɩ pooni mʋ,
yɩ je maama yɩ lim yɩranɩ kʋ paɩ dɩbam.
Dɩ́ laan maa yɔɔrɩ dɩ́ taana lim-nyɔrɩsɩ wʋnɩ,
wɩa na tǝrǝ dɩ́ tee nɩ tɩn ŋwaanɩ.
10 Dɩ́ nyɩ dɩ lilwǝ balʋ na kaagɩ ba taanɩ kəbrə yɩra nɩ tɩn mʋ.
Dɩ́ jɩgɩ dɩ́ tɩtɩ dɩ́ tri dɩ́ tʋɩ wɩa tɩtarɩ nɩ,
nɩ kʋ ga yɩ wa-zʋʋrɩ maŋa mʋ tɩn.
Dɩ́ na maŋɩ dɩ́ wʋ nɔn-babɛ tee nɩ mʋ dɩ,
dɩ́ ta bwǝnǝ nɩ twa mʋ te.
11 Dɩ́ yɔɔrɩ dɩ́ ŋuuni nɩ nywənkuri mʋ te.
Dɩ́ ta maa keeri ŋwaŋa yɩranɩ
nɩ kunkwən-pulə tɩn.
Dɩ́ na lagɩ sɩ dɩ́ na dɩ́ bʋra tɩn,
dɩ́ nan wʋ nɛ-ka.
Dɩ́ ta na tɩɩnɩ sɩ dɩ́ na vrɩm tɩn,
dɩ yɔɔrɩ dɩ yɩ yigə yigə dɩdaanɩ dɩbam mʋ.
12 Bɛŋwaanɩ, dɩ́ zwabaniə kikiə yam tiini ya gaalɩ Wɛ yigə nɩ.
Dɩbam lwarɩma yam jɩgɩ dɩdaanɩ dɩbam mʋ.
Dɩ́ na tusi mɛ maama nɩ tɩn yɔɔrɩ kʋ tigi mʋ jaja.
Dɩ́ yɔɔrɩ dɩ́ sɛ nɩ
dɩ́ kɩ dɩ́ sa n yigə nɩ mʋ.
13 Dɩ́ zwabaniə gaalɩ
yɩ dɩ́ ta lɔ dɩ́ Tu Baŋa-Wɛ wʋm kwaga nɩ.
Dɩ́ ma pipiri dɩ́ kwɛ sɩm dɩ́ ya‑DƖ.
Dɩ́ ta pɛ bɛɛsɩm dɩ vuvugə ba dɩ́ donnǝ baŋa.
Dɩ́ maa na yǝni dɩ́ bʋŋɩ vwan yalʋ tɩn mʋ dɩ́ kaagɩ dɩ́ fɔɩ.
14 Nɔɔna daa maa ba bʋrɩ cɩga bʋra.
Nɔn-ŋʋnnɩ kikiə yɩ dáa dáa mʋ dɩ dɩ́ tɩʋ kʋm.
Cɩga tɩn kʋ nyɩ dɩ cwe sɩm yuu nɩ tɩtɩ dɩ,
ba magɩ gulu mʋ ba lɩ lanyɩranɩ kǝm dɩ́ tɩʋ kʋm wʋnɩ.
15 Cɩga daa tǝri je je nɩ.
Wʋlʋ maama maa na vɩn sɩ o tʋŋɩ lwarɩm,
baá gilimi kʋ tu sɩ ba ja-o mʋ.
Baŋa-Wɛ bʋra bʋrɩm
Baŋa-Wɛ ma nii DƖ na kʋ na yɩ te tɩn,
yɩ DƖ wʋʋ cɔgɩ zanzan
dɩ cɩga bʋrɩm daa na tǝrǝ tɩn.
16 DƖ maa na nii tɩn, DƖ nɛ nɩ nɔɔnʋ tǝrǝ ba wʋnɩ,
sɩ kʋ tu ŋɔɔnɩ o pa balʋ na wʋ yaara wʋnɩ tɩn.
DƖ yɩra ma sɔɔrɩ kʋ ŋwaanɩ.
Kʋntʋ ŋwaanɩ, Dɩntʋ tɩtɩ laan zʋ taanɩ dɩm wʋnɩ.
DƖ na zɩgɩ DƖ tɩtɩ cɩga wʋnɩ tɩn ma pa DƖ na dam
sɩ DƖ joŋi-ba DƖ yagɩ.
17 Kʋ na yɩ te tɩn, nɔn-ŋʋnnɩ mʋ DƖ kwe DƖ kwǝli DƖ nyɔɔnɩ.
DƖ ma kwe vrɩm DƖ ji yicəgə DƖ pu DƖ yuu nɩ.b
DƖ ta ma kwe ka-yiri-jɩna mʋ DƖ ji cwǝŋǝ o vɔ-ka,
yɩ DƖ daarɩ DƖ kwe yi-sɩɩna DƖ daŋɩ tɩ baŋa nɩ
nɩ gɔrɔ mʋ DƖ daŋɩ DƖ yɩra nɩ tɩn.
18 DƖ nan lagɩ DƖ mɔ jɩna ba baŋa nɩ,
sɩ kʋ tɔgɩ dɩ ba kikiə na yɩ te tɩn mʋ.
Kʋntʋ tɩn, DƖ banɩ wʋ́ zaŋɩ DƖ dʋna baŋa nɩ,
pa DƖ mɔ jɩna bantʋ baŋa nɩ,
kʋ na maŋɩ kʋ yɩ vərə balʋ na zʋʋrɩ nɩnɩʋ kʋm ni nɩ tɩn dɩ.
19 Balʋ na zʋʋrɩ wa-zʋʋrɩ seeni tɩn wʋ́ taa kwarɩ Baŋa-Wɛ yɩrɩ dɩm.
Balʋ na wʋ wa-puli seeni tɩn dɩ wʋ́ zuli‑DƖ,
DƖ paarɩ-zulǝ yam ŋwaanɩ.
DƖ nan lagɩ DƖ li-ba nɩ na-fara na fufugi te
dɩ Baŋa-Wɛ na pɛ viu dʋlɩ ba baŋa nɩ tɩn mʋ.
20 Baŋa-Wɛ na tagɩ te tɩn mʋ tɩntʋ:
«Vrɩnʋ wʋm nan wʋ́ ba Siyɔn tɩʋ kʋm nɩ,
sɩ o joŋi Zakɔbɩ dwi dɩlʋ na vɩn ba lwarɩm dɩm tɩn o yagɩ.
21 Amʋ nan na goni ni dɩ a nɔɔna bam te tɩn mʋ tɩntʋ: Amʋ Joro kʋm na wʋ abam baŋa nɩ tɩn, kʋ daa bá viiri kʋ daarɩ abam. Amʋ bɩtarɩ sɩlʋ a na kɩ abam ni nɩ tɩn dɩ bá fɔgɩ sɩ ti abam dɩ á biə bam niə nɩ. Sɩ nan ta bá ti á biə dwi dɩm dɩ niə nɩ. Sɩ wʋ́ taa wʋ á tee nɩ mʋ taan, sɩ kʋ taa ve maŋa kalʋ na ba ti tɩn.»c
Baŋa-Wɛ na tagɩ kʋlʋ tɩn mʋ kʋntʋ.