Zeruzalɛm tɩʋ wʋ́ na zulə
60
Zeruzalɛm, zaŋɩ wɛɛnɩ, sɩ nmʋ maŋa mʋ tɩntʋ ka yiǝ.Wɩa mʋ tu ka pa n na pooni.
Kʋ nan yɩ Baŋa-Wɛ paarɩ-zulǝ yam mʋ nyɩ n baŋa nɩ.
2 Nii mʋ! Lim mʋ kwǝli tɩga baŋa maama
yɩ dɩ li dwi-gɛ tiinə bam.
Kʋ nan na yɩ nmʋ, Baŋa-Wɛ tɩtɩ mʋ nyɩ pooni n baŋa nɩ.
DƖ paarɩ-zulǝ yam dɩ brɩ jaja n baŋa nɩ.
3 Dwi-gɛ tiinə wʋ́ ba ba zʋ n pooni dɩm wʋnɩ.
Pwa dɩ maa wʋ́ ba sɩ ba da ba na á tɩga kam na pʋʋrɩ te tɩn.a
4 Kwǝni n yuu sɩ n nii kʋlʋ na jɩgɩ kʋ kɩ je maama nɩ tɩn.
Nɔɔna bam maama tɔgɩ daanɩ ba maa bɩɩnɩ n te.
N bu-baara bam nuŋi yigə yigə nɩ ba bɩɩnɩ.
Ba maa pəgi n bukwa bam ba maa joorə.
5 Nmʋ laan na nɛ kʋntʋ maama, n wʋʋ wʋ́ poli,
yɩ n yɩra taa saɩ dɩ wʋpolo,
dɩ n na jɩgɩ tɩɩra ba ŋwaanɩ tɩn.
Ba nan wʋ́ zɩŋɩ sa-tɩɩnɩ dɩm jɩjɩgɩrʋ ba ja ba ba ba pa‑m,
sɩ dwi-gɛ tiinə bam jɩjaanɩ ji nmʋ nyɩm.
6 Yogondə zanzan wʋ́ ba ya su nmʋ laŋa kam,
ya na yɩ Madɩan tɩʋ yogondə dɩ Efa tɩʋ yogondə.
Seba tiinə bam dɩ́ wʋ́ tɔgɩ ba ba
yɩ ba zɩŋɩ səbu-sɩŋa dɩ wǝǝnu tɩlʋ lwǝm na ywǝmmǝ tɩn ba ja ba ba.
Baá taa leeni ba tee Baŋa-Wɛ.b
7 Ba ta wʋ́ ja Kedarɩ tɩʋ var-mumugu maama ba ba ba pa nmʋ,
yɩ ba daarɩ ba kɩ Nebayɔtɩ tɩʋ pi-balɩ sɩm n jɩŋa nɩ.
Ba laan wʋ́ kwe-sɩ ba ma kɩ kaanɩm a bimbim dɩm baŋa nɩ,
yɩ a sɛ a joŋi-sɩ.
Kʋ maama wʋ́ pa a tɩtɩ di-ŋʋna kam na zulə zanzan.
8 Bɛɛ mʋ tɩntʋ tɩ ve marɩ-marɩ tɩ bɩɩnɩ?
Tɩ maa nyɩ dɩ kunkwǝǝnu na dʋlɩ te wɛɛnɩ tɩn,
yɩ tɩ ta nyɩ dɩ kunkwənə balʋ na jaanɩ ba maa ve ba pwǝru tɩn.
9 Tɩ yɩ nabwǝǝru tɩlʋ na nuŋi Tarsisi pipiu ŋwaanɩ
yɩ tɩ tɔgɩ nɩnɩʋ baŋa tɩ bɩɩnɩ tɩn mʋ.
Balʋ na zʋʋrɩ nɩnɩʋ ni tɩɩnɩ dɩm nɩ tɩn
kɩ ba tɩɩna amʋ wʋnɩ.
Nabwǝǝru tɩm kʋntʋ zɩgɩ yigə yigə nɩ
tɩ jɩgɩ nmʋ Zeruzalɛm nɔn-biə bam mʋ tɩ maa bɩɩna.
Səbu-poŋo dɩ səbu-sɩŋa nan mʋ wʋ tɩ wʋnɩ,
ba na jɩgɩ-tɩ ba bɩɩnɩ
sɩ ba ma ba zuli n Tu Baŋa-Wɛ dɩm
na yɩ Yisɩrayɛlɩ dwi dɩm Wʋ-poŋo Tu wʋm tɩn.
Bɛŋwaanɩ, wʋntʋ yɔɔrɩ o pa nmʋ na paarɩ-zulǝ mʋ.
10 Vərə mʋ lagɩ ba fɔgɩ ba lɔ n kabri sɩm ba zɩgɩ,
yɩ ba pwa dɩ maa wʋ́ taa tʋŋɩ ba pa‑m.
A ya dɛ a ban-zɔŋɔ ŋwaanɩ mʋ a cɔgɩ‑m.
A zaanɩ dɩm ŋwaanɩ nan,
a daa wʋ́ duri n ŋwaŋa.
11 Nmʋ tɩʋ niə yam wʋ́ taa pʋrɩ ya yagɩ mʋ wuu.
Maŋa maama wʋnɩ, ba bá pɩ-ya ba zɩgɩ,
wɩa nɩ, naa tɩtɩɩ nɩ dɩ.
Kʋntʋ mʋ wʋ́ pa cwǝŋǝ sɩ ba ja dwi-gɛ tiinə bam jɩjɩgɩrʋ
ba ba ba zʋ n tɩʋ kʋm wʋnɩ ba pa‑m.
Ba pwa bam dɩ́ wʋ́ tɔgɩ da ba sɛ ba pa‑m.c
12 Tɩʋ kʋlʋ tiinə na vɩn sɩ ba zʋ abam dam kuri nɩ,
bantʋ wʋ́ na cɔgɩm mʋ pa ba je tɩga kam baŋa nɩ.
13 Baá zɩŋɩ Liban tɩʋ wo-laarʋ mʋ ba ja ba ba pa nmʋ.
Tɩntʋ yɩ ba tu-dɩdwaarʋ da-ŋʋnnʋ tɩm dwi maama.
Ba laan wʋ́ kwe-tɩ ba fɔgɩ ba kwɛ a digə kam,
sɩ a jǝŋǝ je taa jɩgɩ nɩnwaŋa lanyɩranɩ.
14 Balʋ dɛɛn na jɩgɩ-m ba bɛɛsɩ tɩn biə wʋ́ ba ba tiiri nmʋ yigə nɩ.
Balʋ dɩ ya na jɩgɩ-m ba gooni tɩn maa wʋ́ kuni doonə tɩga nɩ ba pa‑m.
Ba laan wʋ́ taa bǝi n yɩrɩ nɩ:
‹Baŋa-Wɛ tɩtɩ tɩʋ kʋm›,
dɩdaanɩ ‹Siyɔn na yɩ Yisɩrayɛlɩ dwi dɩm Wʋ-poŋo Tu wʋm tɩn tɩʋ›.
15 Nmʋ dɛɛn yɩ tɩʋ kʋlʋ nɔɔna na culi,
yɩ ba vaɩ sɩ ba tɔgɩ n seeni ba kɛ tɩn mʋ.
A nan lagɩ a pa nɔɔna taa jɩgɩ nmʋ mʋ ba kɩ tɩɩra
sɩ kʋ taa ve maŋa maama.
Nmʋ wʋ́ pa nɔɔna maama dɩ ba biə taa jɩgɩ wʋpolo zamaanɩ dɩ zamaanɩ maama.
16 Sa-tɩɩnɩ dɩ pwa mʋ lagɩ ba taa nii n baŋa nɩ,
nɩ bu nu na jɩg-o o kɔnɩ te tɩn.
Nmʋ laan wʋ́ lwarɩ nɩ: amʋ Baŋa-Wɛ mʋ yɩ n Vrɩnʋ.
A maa yɩ Zakɔbɩ dwi tiinə Dam Tu wʋm
na wʋ́ vrɩ‑m o yagɩ tɩn.
17 Nmʋ ya na tɩɩnɩ canna tɩn,
a lagɩ a pa‑m səbu-sɩŋa mʋ.
Nmʋ ya na tɩɩnɩ luuru tɩn,
a maa wʋ́ pa‑m səbu-poŋo.
A ta wʋ́ kwe canna a pa‑m sɩ kʋ ləri dɛ yuu nɩ,
yɩ a daarɩ a pa‑m luuru sɩ tɩ ləri kandwa yuu nɩ.
A lagɩ a pa yazurə mʋ taa yɩ tɩʋ kʋm dɩdɛɛrʋ.
Nɔn-ŋʋnnɩ dɩ maa wʋ́ taa yɩ n yuutu.
18 Jara sɔɔ daa bá taa kɩ n tɩ-niə yam nɩ.
Cɔgɩm dɩ vuvugə nan bá zʋ n sisənə yam maama nɩ.
Nmʋ tɩʋ kabri sɩm yɩrɩ laan mʋ wʋ́ taa yɩ ‹Vrɩm›,
yɩ ni-bwəəru tɩlʋ na pɩ tɩʋ kʋm tɩn yɩrɩ taa yɩ ‹Wɛ Tiə›.
19 Nmʋ daa bá ta n lagɩ wɩa sɩ ka pa‑m pooni wɩa maŋa nɩ,
naa sɩ cana kam dɩ taa pa‑m pooni tɩtɩɩ nɩ.
Bɛŋwaanɩ, n Tu Baŋa-Wɛ tɩtɩ mʋ wʋ́ ji pooni
dɩlʋ na nyɩ n baŋa nɩ maŋa maama tɩn.
Dɩntʋ tɩtɩ mʋ wʋ́ pa n ta n jɩgɩ paarɩ-zulǝ lanyɩranɩ.d
20 Wɛ dɩm daa bá tʋ dɩ pa‑m.
Cana kam dɩ nan daa bá tu kuri nmʋ laŋa kam nɩ.
Baŋa-Wɛ dɩm tɩtɩ mʋ wʋ́ taa yɩ pooni
DƖ nyɩ n baŋa nɩ maŋa maama.
Nmʋ wʋ-cɔgɔ maŋa kam laan wʋ́ ti.
21 Maŋa kam kʋntʋ nɩ mʋ
nmʋ nɔn-biə bam maama wʋ́ taa tɔgɩ cɩga cwǝŋǝ.
Ba laan wʋ́ joŋi tɩga kam ba taa te wuu.
Amʋ tɩtɩ nan mʋ lagɩ a jəri-ba dɩ a jɩan,
sɩ ba ta ba nuŋi yɩ ba brɩ a nɩnwaŋa kam jaja.
22 Wʋlʋ na muri ba wʋnɩ tɩn wʋ́ ji sɔ-yuu kamunu.
Wʋlʋ dɩ na yɩ balaŋa tɩn dɩ wʋ́ puli o ji tʋ-fɔrɔ.
Amʋ mʋ yɩ Baŋa-Wɛ dɩm.
Maŋa kam na yiǝ, Aá kɩ wǝǝnu tɩntʋ maama lɩla.