Baŋa-Wɛ zaanɩ dɩm taanɩ
61
Yuutu Baŋa-Wɛ Joro kʋm mʋ wʋ amʋ baŋa nɩ.Bɛŋwaanɩ, DƖ tiŋi-nɩ mʋ
sɩ a tɔɔlɩ DƖ kwər-ywəŋə kam a brɩ yinigə tiinə.
DƖ tʋŋɩ-nɩ sɩ a pa balʋ wʋ na cɔgɩ tɩn na zurim,
sɩ a daarɩ a tɔɔlɩ nɩ:
balʋ nɔɔna yigə na cɩgɩ tɩn wʋ́ taa te ba tɩtɩ,
yɩ balʋ na wʋ pɩɩna digə nɩ tɩn dɩ nuŋi pooni yigə.
2 DƖ ta tʋŋɩ-nɩ sɩ a pa DƖ kwǝrǝ nuŋi nɩ:
bɩnɩ dɩlʋ Baŋa-Wɛ na wʋ́ ba DƖ fɔgɩ DƖ nɔɔna bam tɩn laan yiǝ.
Kʋ nan yɩ maŋa kalʋ DƖ na wʋ́ mɔ jɩm ba dʋna baŋa nɩ tɩn mʋ.a
DƖ ma tʋŋɩ-nɩ sɩ a pa balʋ maama na keeri wʋ-cɔgɔ ŋwaanɩ tɩn bɩcara zuri,
3 sɩ balʋ na wʋ Siyɔn tɩʋ wʋnɩ yɩ ba yigə nywanɩ tɩn na zǝnǝ.
Baá taa jɩgɩ lam mʋ ba ma ba pu ba yum,
sɩ dɩ ləri tɩntwarɩm yuu nɩ.
Ba maa wʋ́ joŋi nugə kalʋ na zɩgɩ wʋpolo ŋwaanɩ tɩn,
sɩ ka ləri ba kərə kam yuu nɩ.
Ba ta wʋ́ taa jɩgɩ tiə le ba leenə,
sɩ kʋ ləri wʋ-cɔgɔ kʋlʋ na jɩgɩ-ba tɩn yuu nɩ.
Nɔɔna wʋ́ taa jɩgɩ-ba ba bǝi nɩ:
tu-kamunnu tɩlʋ na zɩgɩ cɩga ŋwaanɩ
yɩ Baŋa-Wɛ jəri-tɩ sɩ tɩ brɩ DƖ kajannɩ dɩm jaja tɩn.
4 Bantʋ mʋ wʋ́ fɔgɩ ba lɔ faŋa faŋa tɩɩnɩ dɩm,
sɩ dɩ di-dwəənu tɩm joori tɩ zɩgɩ.
Baá joori ba lɔ tɩɩnɩ dɩlʋ ya na tʋ dɩ saarɩ kʋ daanɩ tɩn.
5 «Vərə mʋ lagɩ ba taa yɩrɩ abam peeni sɩm.
Vərə dɩ maa wʋ́ taa varɩ á karɩ sɩm,
yɩ ba tʋŋɩ á vinyə tweeru kadwi sɩm wʋnɩ ba pa abam.
6 Nɔɔna wʋ́ taa bǝi abam nɩ:
dɩbam Tu Baŋa-Wɛ tɩtɩ kaanɩm tiinə
balʋ na tʋŋɩ ba pa‑DƖ tɩn.
Baá kwe dwi-gɛ tiinə jɩjɩgɩrʋ mʋ ba ma kɔnɩ abam.
Á daarɩ á ma ba zulə yam á maa kɩ á nɩnwaŋa woŋo.
7 Abam wʋ́ na nyɔɔrɩ kuni bɩle mʋ
sɩ kʋ ləri á cavɩɩra yam yuu nɩ.
A nɔɔna bam yu-yɔlɔ kʋm wʋ́ je mʋ,
sɩ ba daarɩ ba di ywəəni ba tɩga kam ŋwaanɩ.
Baá na nyɔɔrɩ kuni bɩle mʋ ba tɩga kam baŋa nɩ.
Ba ta wʋ́ taa jɩgɩ wʋpolo sɩ kʋ taa ve maŋa kalʋ na ba ti tɩn.
8 Bɛŋwaanɩ, amʋ Baŋa-Wɛ soe sɩ cɩga kam mʋ taa tʋŋa.
A nan culi ŋwɩɩnɩ dɩ kǝm-balwaarʋ dwi maama.
A na zɩgɩ a cɩga wʋnɩ tɩn ŋwaanɩ mʋ
a lagɩ a pa ba joŋi ŋwɩɩrʋ
sɩ a daarɩ a kɩ ni-gonim dɩlʋ na wʋ́ taa wʋra maŋa maama tɩn dɩ ba.
9 Dwi-gɛ tiinə bam wʋ́ taa ye ba biə bam ni nɩ,
yɩ nɔɔna maama ni ba kwaga kam ŋwa.
Balʋ maama nan na nɛ-ba,
baá sɛ nɩ: Baŋa-Wɛ mʋ sɩɩnɩ DƖ kɩ ba yu-yoŋo.»
10 Amʋ tiini a di ywəəni a Tu Baŋa-Wɛ dɩm ŋwaanɩ.
DƖ maa paɩ a yɔɔrɩ a caka.
Bɛŋwaanɩ, DƖ pɛ a na vrɩm,
nɩ gɔrɔ mʋ DƖ kwe DƖ zʋ-nɩ.
DƖ ta ma kwe nɔn-ŋʋnnɩ DƖ pa-nɩ,
nɩ gwar-bwərə mʋ a zʋa tɩn.
A maa nyɩ dɩ kan-barʋ wʋlʋ na kwɛ o yuu
nɩ kaanɩm tiinə na kwɛ ba yum te tɩn,
naa ka-dʋʋrʋ na kwɛ o tɩtɩ dɩ kandwa-ŋʋna
sɩ o zʋ o barʋ yɩ o yɩ te tɩn.b
11 Kʋ ta nyɩ dɩ tɩga kam na paɩ wo-biə nuŋi
yɩ ba daarɩ ba kɩ wʋdiiru te tɩn.
Kʋntʋ doŋ mʋ Yuutu Baŋa-Wɛ lagɩ DƖ pa cɩga taa tʋŋa,
sɩ DƖ nɔɔna bam taa tee‑DƖ dwi-gɛ tiinə bam maama yigə nɩ.