Baŋa-Wɛ yi pagɩ Siyɔn baŋa nɩ
62
Siyɔn tɩʋ nɔn-biə bam ŋwaanɩ mʋ,amʋ bá taa yɩ cɩmm.
A na beeri Zeruzalɛm tɩʋ kʋm zǝnǝ tɩn,
a bá maŋɩ da kʋntʋ.
A maa lagɩ sɩ cɩga taa tʋŋa tɩʋ kʋm wʋnɩ jaja,
nɩ wɛ na sɩŋɩ dɩ puli te tɩn,
sɩ kʋ nɔɔna bam na vrɩm
nɩ min-mɔɔlɩ na di dɩ zaŋɩ te tɩn.
2 Zeruzalɛm, dwi-gɛ tiinə bam wʋ́ nii ba na
cɩga na tʋŋɩ n wʋnɩ te tɩn.
Pwa maama dɩ wʋ́ na nmʋ nɩnwaŋa kam.
Nɔɔna wʋ́ taa jɩgɩ yɩrɩ-dʋʋrɩ mʋ ba maɩ ba bəŋi‑m.
Dɩ nan wʋ́ taa yɩ yɩrɩ dɩlʋ
Baŋa-Wɛ tɩtɩ mʋ na wʋ́ kwe DƖ pa nmʋ tɩn.
3 N na wʋ Baŋa-Wɛ jɩŋa nɩ tɩn,
nmʋ wʋ́ tan jɩgɩ paarɩ-zulǝ n pa‑DƖ,
nɩ paarɩ yipugə mʋ te.
4 Ba daa bá taa jɩgɩ-m ba bǝi nɩ:
‹Tɩʋ kʋlʋ Wɛ na swe kʋ ni nɩ tɩn›a.
Ba nan bá pa n tɩga kam yɩrɩ nɩ:
‹Kaanɩ wʋlʋ ba na yagɩ tɩn›.
Ba laan wʋ́ taa jɩgɩ-m ba bǝi nɩ:
‹A yi pagɩ o baŋa nɩ› mʋ.
N tɩga kam yɩrɩ maa wʋ́ taa yɩ,
‹Kaanɩ wʋlʋ na zʋ barʋ tɩn›.
Bɛŋwaanɩ Baŋa-Wɛ jɩgɩ wʋpolo dɩdaanɩ nmʋ mʋ,
kʋ yɩ nmʋ tɩga kam mʋ ba wʋ́ di ba maa kɩ kaanɩ.
5 Nmʋ nɔɔna bam wʋ́ taa jɩgɩ wʋpolo sɩ ba taa zʋʋrɩ nmʋ wʋnɩ,
nɩ nɔn-dʋŋʋ na di kabwəm o ma ji o kaanɩ te tɩn mʋ.
Nmʋ Tu Wɛ dɩm dɩ maa wʋ́ di ywəəni nmʋ ŋwaanɩ,
nɩ kan-barʋ na jɩgɩ wʋpolo dɩ o ka-dʋʋrʋ te tɩn.
6 Zeruzalɛm, amʋ kwe yɩrɩna mʋ a zɩgɩ n tɩʋ kabri sɩm baŋa nɩ.
Bantʋ bá fɔgɩ ba pu ba niə wɩa dɩ tɩtɩ maama nɩ.
Abam balʋ na yǝni á keeri á loori Baŋa-Wɛ tɩn,
yɩ sin-na maŋa dɩ maŋa.
7 Á nan yɩ pa-na Baŋa-Wɛ pwələ sɩ DƖ sin,
kʋ na daɩ nɩ DƖ joori DƖ pa Zeruzalɛm tɩʋ kʋm fɔgɩ kʋ zɩgɩ,
pa kʋ yɩrɩ zaŋɩ tɩga baŋa je maama nɩ.
8 Baŋa-Wɛ dugi durə mʋ kʋ tɔgɩ DƖ dam dɩm ŋwaanɩ
yɩ DƖ wɩ:
«Amʋ daa bá kwe abam wʋdiiru tɩm
a pa á dʋna sɩ ba di ba daarɩ abam.
Vərə dɩ nan daa bá nyɔ dɩvɛn balʋ á na yaarɩ á na tɩn.
9 Kʋ nan na yɩ te tɩn,
balʋ na gwe ba wʋdiiru ba zʋ digə tɩn mʋ wʋ́ di-tɩ,
yɩ ba daarɩ ba zuli Baŋa-Wɛ.
Balʋ dɩ na gwəri vinyə tiu biə bam tɩn
wʋ́ zʋ amʋ wara-je kʋnkwallʋ tɩm mʋ
ba nyɔ dɩvɛn balʋ ba tɩtɩ na kɩ tɩn.»
10 Tɔgɩ-na tɩʋ kʋm niə yam á nuŋi kʋ wʋnɩ!
Ba-na á kwɛ cwǝŋǝ kam á pa nɔɔna bam.
Fɔgɩ á lɔ-na pɩmpalɩ dɩm,
sɩ á daarɩ á bibili kandwa-zana yam á yagɩ dáa nɩ.
Zəŋi-na drapoo wɛɛnɩ sɩ lʋgʋ baŋa tɩɩnɩ dɩm maama na.
11 Baŋa-Wɛ pɛ DƖ kwǝrǝ yi tɩga baŋa ni maama mʋ, yɩ DƖ wɩ:
«Ta-na á brɩ Siyɔn nɔn-biə bam nɩ:
‹Nii-na! Yuutu Baŋa-Wɛ dɩm maa bɩɩnɩ dɩ baarɩ mʋ!
DƖ nan te nɔɔna dɩ dam-fɔrɔ mʋ.
Nii-na. DƖ jɩgɩ DƖ ŋwɩɩrʋ mʋ DƖ bɩɩna.
Nyɔɔrɩ dɩlʋ DƖ na nɛ tɩn maa tɔgɩ DƖ yigə dɩ veǝ.› »
12 Ba maa wʋ́ taa bǝi bantʋ nɩ:
‹Nɔɔna balʋ na yɩ wʋ-poŋo tiinə Wɛ ŋwaanɩ tɩn›,
dɩ ‹Nɔɔna balʋ Baŋa-Wɛ na vrɩ tɩn›.
Ba ta wʋ́ taa bǝi nmʋ Zeruzalɛm tɩʋ nɩ:
‹Tɩʋ kʋlʋ nɔɔna na jɩgɩ kʋ fra tɩn›,
dɩ ‹Tɩʋ kʋlʋ ba na wʋ nuŋi ba yagɩ-kʋ tɩn›.