Wɛ wʋ́ mɔ jɩm nɔɔna baŋa nɩ
63
Wɔɔ mʋ tɩntʋ o nuŋi Edɔm tɩʋ Botisera seeni o maa bɩɩnɩ?O maa bɩɩnɩ yɩ o zʋ gar-nasʋnnʋ cwɛ-cwɛ.
Wɔɔ mʋ kʋntʋ yɩ o zʋ nɩnwaŋa gwaarʋ?
Kʋ tu nuŋi dɩ o dam-fɔrɔ o ve mʋ.
«Kʋ yɩ amʋ mʋ bɩɩnɩ kʋntʋ.
A kwǝrǝ kam brɩ vrɩm taanɩ mʋ,
yɩ a jɩgɩ dam sɩ a joŋi nɔɔna a yagɩ.»
2 Bɛ nan mʋ kɩ yɩ n gwaarʋ tɩm nan yɩ nasʋnnʋ kʋntʋ?
Nmʋ nyɩ dɩ wʋlʋ na nɔnɩ vinyə tiu biə pa ba nyʋa nuŋi tɩn mʋ.
3 «Kʋ na yɩ te tɩn, amʋ yɩranɩ mʋ nɔnɩ Vinyə tiu biə bam,
yɩ nɔɔn-nɔɔnʋ wʋ nuŋi lʋgʋ baŋa dwi tiinə bam wʋnɩ
sɩ o ba o wǝli-nɩ.
A ban-zɔŋɔ kʋm ŋwaanɩ mʋ a yɔɔrɩ a nɔnɩ a dʋna bam.
Ba jana bam ma caŋɩ ba kɩ a gwaarʋ tɩm yɩra nɩ,
yɩ kʋ laan pa tɩ sɩɩnɩ kʋntʋ.
4 Bɛŋwaanɩ, a kɩ a wʋbʋŋa nɩ sɩ a waarɩ a dʋna bam mʋ,
sɩ a daarɩ a joŋi a nɔɔna bam a yagɩ.
5 A maa nii je maama yɩ nɔɔn-nɔɔnʋ tǝrǝ sɩ o wǝli-nɩ.
Kʋ sʋ-nɩ dɩ a na wʋ nɛ nɔɔnʋ sɩ o wǝli-nɩ tɩn.
A nan tɔgɩ a tɩtɩ dam ŋwaanɩ mʋ a wanɩ-ba.
A ban-lʋm dɩm mʋ pɛ a di-ba.
6 A banɩ na zaŋɩ kʋntʋ tɩn,
a nɔnɩ lʋgʋ baŋa tɩɩnɩ dɩm baŋa nɩ mʋ.
A ma pa ba nyɔ a ban-lʋm dɩm sana ba su,
yɩ a daarɩ a lo ba jana bam a yagɩ tɩga nɩ.»
Wɛ zaanɩ dɩm taanɩ
7 Amʋ wʋ́ ta Baŋa-Wɛ sono kʋlʋ na ba ti tɩn taanɩ mʋ,
dɩ DƖ kikiə yalʋ na maŋɩ sɩ nɔɔna tee‑DƖ ya ŋwaanɩ tɩn taanɩ,
sɩ kʋ tɔgɩ dɩ DƖ na kɩ kʋlʋ maama DƖ pa dɩbam tɩn.
DƖ nan sɩɩnɩ DƖ da DƖ zaanɩ dɩm ŋwaanɩ mʋ DƖ kɩ wo-kamunə
DƖ pa Yisɩrayɛlɩ tiinə bam.
Kʋ yɩ DƖ na jɩgɩ ba ŋwaŋa
yɩ DƖ yɔɔrɩ DƖ so-ba tɩn ŋwaanɩ mʋ DƖ kɩ kʋntʋ.
8 Baŋa-Wɛ ma ta DƖ wɩ:
«Ba sɩɩnɩ ba yɩ amʋ tɩtɩ nɔɔna mʋ.
Ba nan daa bá fɔ vwan ba pa-nɩ.»
Kʋntʋ tɩn DƖ ma ji ba Vrɩnʋ.
9 Ba dɛɛn na wʋ yaara wʋnɩ tɩn,
DƖ dɩ tɔgɩ DƖ yaarɩ mʋ.
DƖ ma tɔgɩ DƖ tɩtɩ malɛka kam baŋa DƖ joŋi-ba DƖ yagɩ.
DƖ sono dɩ DƖ ŋwaŋa kam ŋwaanɩ mʋ DƖ vrɩ-ba.
Faŋa faŋa tɩn mʋ DƖ gɔ-ba DƖ zɩŋɩ taan.a
10 Dɩ kʋ dɩ, ba ta nuŋi Wɛ kwaga nɩ mʋ,
pa DƖ Joro kʋm wʋʋ cɔgɩ.
Kʋ ma pa DƖ pipiri DƖ ji ba dʋnʋ,
yɩ DƖ daarɩ DƖ kɩ jara dɩ ba.
11 Wɛ nɔɔna bam laan ma guli faŋa kam gulə,
dɩ kʋ na yɩ te Moyisi dɩ o kwaga nɔɔna bam maŋa kam nɩ tɩn.
Ba ma bwe daanɩ ba wɩ:
«Bɛɛ mʋ kɩ yɩ wʋlʋ dɛɛn na tɔgɩ Yisɩrayɛlɩ tiinə bam yigə
yɩ ba bɛ nɩnɩʋ kʋm pa Moyisi yɩrɩ-ba tɩn daa tǝrǝ?
Wʋlʋ dɛɛn na pɛ o Joro kʋm wʋ ba tee nɩ tɩn daa bɛ?
12 Wʋntʋ dɛɛn mɛ o dam-fɔrɔ kʋm o tɔgɩ Moyisi baŋa nɩ
o pɔɔrɩ nɩnɩʋ kʋm bɩle yɩ Yisɩrayɛlɩ tiinə bam bɛ.b
Kʋ ma pa Wɛ na yɩrɩ dɩlʋ na wʋra maŋa maama tɩn.
13 Dɩntʋ dɛɛn mʋ dɛ ba yigə
yɩ ba zʋ na-luŋə wʋnɩ ba bɛ.
Ba maa nyɩ dɩ siseŋ-nɔɔna balʋ na wurigi kagʋa yuu nɩ tɩn.
Ba wʋ tri ba tʋ tɩga nɩ.
14 Baŋa-Wɛ Joro kʋm dɩ dɛɛn pɛ ba na siun,
nɩ naanɩ na tɔgɩ bolo wʋnɩ dɩ kɛ tɩn.
Kʋntʋ mʋ nmʋ dɛɛn nii n nɔɔna bam baŋa nɩ,
sɩ n na yɩrɩ dɩlʋ na tiini dɩ lana tɩn n pa n tɩtɩ.
15 Baŋa-Wɛ, nan zɩgɩ wɛyuu nɩ,
jǝgǝ kalʋ na yɩ lanyɩranɩ fasɩ yɩ ka jɩgɩ paarɩ-zulǝ tɩn,
n tiiri n nii kʋlʋ na jɩgɩ kʋ kɩ dɩbam tɩn.
Nmʋ yi-sɩɩna dɩ n dam-fɔrɔ kʋm daa bɛ?
Bɛɛ mʋ yɩ n yigə daa tǝrǝ dɩ́ wʋnɩ sɩ n duri dɩ́ ŋwaŋa?
16 Nmʋ nan mʋ yɩ dɩbam Ko.
Dɩ́ nabaarʋ Abraham na maŋɩ o yǝri dɩbam,
yɩ dɩ́ ko Yisɩrayɛlɩ yigə na tǝrǝ dɩ́ wʋnɩ dɩ,
nmʋ Baŋa-Wɛ ta wʋ́ tan yɩ dɩbam Ko mʋ.
Kʋ nuŋi faŋa tɩn, n yɩrɩ dɩm mʋ yɩ dɩbam Vrɩnʋ.
17 Baŋa-Wɛ, bɛŋwaanɩ mʋ n sɛ
pa dɩ́ pipiri dɩ́ ywəri n cwǝŋǝ kam nɩ?
N ta pɛ dɩ́ wʋ kɩ dam mʋ,
pa dɩ́ daa ba kwarɩ-m.
Joori n ba n wǝli dɩbam,
sɩ dɩ́ yɩ n tɩntʋŋna mʋ.
Dɩ́ maa yɩ dwiə yalʋ n na kuri sɩ ba taa yɩ nmʋ nyɩm tɩn.
18 Maŋa fɩnfɩɩn wʋnɩ n tɩtɩ nɔɔna bam ya te n tɩga kam mʋ.
Nan nii, dɩ́ dʋna laan mʋ tu
ba nɔnɩ n tɩtɩ digə kam baŋa nɩ.
19 Kʋ yǝni kʋ kɩ nɩ dɩbam ga daɩ nmʋ nɔɔna mʋ,
naa nmʋ ga ba te dɩbam mʋ
sɩ n ta n nii dɩbam baŋa nɩ.»