64
Nmʋ ya na kɔɔrɩ wɛyuu kʋm n kɩ dáa nɩ,
yɩ n laan tu n ba tɩga baŋa,
pweeru tɩm maama ya bá taa sisiŋi mʋ nmʋ yigə nɩ na?
2 Kʋ yaá taa yɩ nɩ mim na jaanɩ da-kʋrɩ
pa na cʋrɩ dɩ baŋa nɩ te tɩn.
Nmʋ dɩ nan tu sɩ n pa dwi-gɛ tiinə bam yɩra taa saɩ,
n dʋna na wʋ́ lwarɩ n yɩrɩ dɩm dam tɩn ŋwaanɩ.
3 N dɛɛn na kɩ wo-kɩnkagɩla yalʋ
dɩ́ na ba tɩɩnɩ ya tɩɩna tɩn,
n tɩtɩ mʋ tu n ba,
yɩ pweeru tɩm yɔɔrɩ tɩ sisiŋi n yigə nɩ.
4 Kʋ nan maŋɩ kʋ nuŋi faŋa mʋ
yɩ nɔɔn-nɔɔnʋ wʋ ni Wɛ dɩdoŋ na nyɩ dɩ nmʋ tɩn ŋwa.
Kʋ maa wʋ tʋ ba zwa nɩ,
yɩ ba yiǝ dɩ ta wʋ nɛ nmʋ doŋ.
Nmʋ nan tʋŋɩ n wǝli balʋ na kɩ ba tɩɩna dɩ nmʋ tɩn mʋ.
5 Nmʋ yǝni n wǝli balʋ na paɩ cɩga tʋŋa dɩ ba wʋ-yoŋo,
yɩ ba daarɩ ba tɔgɩ n cwe sɩm tɩn mʋ.
Dɩbam nan tiini dɩ́ tusi mʋ taan,
pa n banɩ zaŋɩ dɩ́ baŋa nɩ.
Kʋntʋ tɩn, dɩ́ wʋ́ wanɩ dɩ́ na vrɩm tɩta seeni mʋ?
6 Lwarɩm mʋ loŋi dɩbam yɩra maama pa dɩ́ digimi.
Dɩ́ na maŋɩ dɩ́ kwaanɩ dɩ́ tʋŋɩ cɩga te dɩ,
dɩ́ tɩtʋŋ-ŋʋna ta nyɩ dɩ gɔrɔ kʋlʋ na digimi tɩn.
Dɩ́ lwarɩm dɩm maa wʋ́ kalɩ dɩbam maama ya ja je,
nɩ vɔɔrʋ tɩlʋ na kwaarɩ yɩ viu pa tɩ je te tɩn.
7 Nɔɔn-nɔɔnʋ nan ba bǝi n yɩrɩ dɩm
sɩ n zǝni kʋntʋ tu.
Ba maa ba kwaana sɩ ba ja n naga.
Bɛŋwaanɩ, n mɛ n kwaga n ya dɩbam mʋ,
yɩ n daarɩ n yagɩ dɩbam
pa dɩ́ maŋɩ dɩ́ lwarɩm dɩm dam kuri nɩ.
8 Dɩ kʋ dɩ, Dɩ́ Tu Baŋa-Wɛ, nmʋ ta mʋ yɩ dɩbam Ko.
Dɩbam nyɩ dɩ dɔgɔ mʋ n jɩŋa nɩ.
Nmʋ ma n yɩ kamɔ-mɔrʋ wʋm.
Nmʋ mʋ kwe n jɩŋa n mɔ dɩbam pa dɩ́ wʋra.a
9 Baŋa-Wɛ, nan yɩ tiini n pa n banɩ zaŋɩ dɩ dɩbam sɩ kʋ kɛ jɩŋa.
Yɩ tan yɔɔrɩ n guli dɩ́ lwarɩm dɩm gulə maŋa maama.
A loori-m! Nii dɩbam dɩ ŋwaŋa,
sɩ dɩbam maama yɩ nmʋ nɔɔna mʋ.
10 Tɩɩnɩ dɩlʋ nmʋ na kuri sɩ dɩ taa yɩ n nyɩm tɩn laan jigi kagʋa mʋ.
Siyɔn piu kʋm tɩtɩ jigi kagʋa.
Cɩga tɩn, Zeruzalɛm tɩʋ yɩ di-dwəənu yɩranɩ mʋ.b
11 Kʋ ta na yɩ dɩ́ Wɛ-digə kam na yɩ lanyɩranɩ fasɩ
yɩ ka jɩgɩ nɩnwaŋa pa dɩ́ kwə dɛɛn zuli‑m ka wʋnɩ tɩn,
ba tu ba zwɛ-ka dɩ mim ba dɩ tɩga nɩ mʋ.
Kʋ ma pa wǝǝnu tɩlʋ maama dɩ́ wʋbʋŋa ya na tigi tɩ baŋa nɩ tɩn
laan yɔɔrɩ tɩ cɔgɩ.
12 Baŋa-Wɛ, tɩntʋ maama nan na jɩgɩ tɩ kɩ tɩn,
n yigə tǝrǝ mʋ na?
N ta wʋ́ maŋɩ da cɩmm mʋ,
yɩ n jɩgɩ dɩbam n waara sɩ kʋ kɛ dɩ́ jam na?