Waarɩm dɩ vrɩm taanɩ
Baŋa-Wɛ tagɩ DƖ wɩ:
65
«Balʋ na wʋ bwe amʋ bwiə tɩnmʋ a pɛ-ba cwǝŋǝ sɩ ba lwarɩ-nɩ.
A ta ma lɩ a tɩtɩ
a brɩ balʋ na wʋ beeri a je tɩn.
Tɩʋ kʋlʋ nɔɔna na wʋ bəŋi a yɩrɩ sɩ a wǝli-ba tɩn
mʋ a tagɩ dɩ ba a wɩ: ‹Nii-nɩ da yoo!›
2 Maŋa maama wʋnɩ amʋ yɔɔrɩ a twɩ a jɩn mʋ
sɩ a jeeri a nɔɔna bam,
dɩ ba na maŋɩ ba yɩ zwabani-nyɩna te tɩn dɩ.
Ba nan kaagɩ ba ve cwe sɩlʋ na wʋ maŋɩ tɩn wʋnɩ mʋ,
yɩ ba kɩ wǝǝnu tɩlʋ ba tɩtɩ wʋbʋŋa na lagɩ tɩn.a
3 Ba ma yǝni ba kɩ ba cɔgɩ a yigə
yɩ cavɩɩra ba jɩgɩ-ba.
Ba soe sɩ ba taa kɩ kaanɩm ba paɩ jwǝnǝ mʋ
liri mwaanʋ tiinə kara wʋnɩ.
Ba ta daarɩ ba zwɛ wǝǝnu tɩlʋ lwǝm na ywǝmmǝ tɩn ba pa-ya
bimbinə yalʋ ba na mɛ wara ba lɔ tɩn baŋa nɩ.
4 Tɩtɩɩ nɩ ba ma ve yibeelǝ je nɩ,
yɩ ba səgi ba tɩtɩ gugwəəru wʋnɩ.
Ba ma daarɩ ba di tǝrǝ,
yɩ ba furi wo-zɔɔna dwi dwi nwana nyʋa ba kabǝli sɩm wʋnɩ.
5 Dɩ kʋ maama dɩ, ba ta yǝni ba tɛ ba brɩ daanɩ mʋ ba wɩ:
‹Ja n tɩtɩ sɩ n yɩ fʋfɔ n yi a yɩra,
sɩ amʋ yɩ lanyɩranɩ fasɩ mʋ Wɛ ŋwaanɩ a dwe nmʋ!›
Nɔɔna bam kʋntʋ nan nyɩ dɩ nyʋa na zʋ a mʋmwa wʋnɩ,
naa mim dɩlʋ na wʋra dɛ dɩm maama wʋnɩ yɩ dɩ ba dwe tɩn mʋ.
6 Nan nii-na! A wʋbʋŋa na jaanɩ sɩ a kɩ kʋlʋ tɩn
maŋɩ kʋ pʋpʋnɩ kʋ tigi a yigə nɩ sɩ:
A daa bá taa yɩ cɩmm.
A lagɩ a mɔ a jɩnɩ maama mʋ ba yuu nɩ,
sɩ kʋ maŋɩ dɩ ba kikiə yam na yɩ te tɩn.
7 Ba maŋɩ sɩ ba ŋwɩ ba tɩtɩ lwarɩm
dɩ ba kwə lwarɩm dɩm jɩnɩ maama mʋ.»
Baŋa-Wɛ mʋ tagɩ kʋntʋ.
«Bɛŋwaanɩ, ba kɩ kaanɩm ba pa jwǝnǝ pweeru yum nɩ,
yɩ ba ta kɩ kʋntʋ doŋ ba ma cɔgɩ a yɩrɩ
zwəənu tɩm baŋa nɩ.
Kʋntʋ ŋwaanɩ amʋ dɩ wʋ́ pa kʋ zʋ ba yɩra mʋ
sɩ a mɔ a jɩnɩ maama ba yuu nɩ.
Kʋ nan wʋ́ maŋɩ dɩ ba tɩtʋŋa na yɩ te tɩn mʋ.»
8 Baŋa-Wɛ na tagɩ te tɩn mʋ tɩntʋ:
«Nɩ nyʋa ta na yǝni ba wʋ tiu bu-zɔgɔ wʋnɩ
yɩ nɔɔna tɛ ba wɩ: ‹Yɩ cɔgɩ-kʋ,
sɩ kʋ ta jɩgɩ nyɔɔrɩ kʋ pa‑m› te tɩn,
kʋntʋ mʋ amʋ dɩ wʋ́ kɩ dɩ a tɩntʋŋna bam.
A nan bá cɔgɩ ba maama.
9 Amʋ wʋ́ pa Zakɔbɩ na dwi,
yɩ a ta pa Zuda dɩ na kwaga,
pa ba joŋi amʋ pweeru laŋa kam ba taa te.
Nɔɔna balʋ a na kuri tɩn mʋ wʋ́ taa te-tɩ,
yɩ dáanɩ mʋ a tɩntʋŋna bam wʋ́ taa zʋʋra.
10 Sarɔn laŋa kam wʋ́ ji je sɩlʋ nɔɔna na kalɩ ba peeni ba veǝ
sɩ sɩ taa di gaa tɩn.
Nɔɔna maa wʋ́ kalɩ ba naanɩ ba ja ba vu Akɔɔrɩ bolo kʋm nɩ,
sɩ dɩ na wʋdiu yɩ dɩ daarɩ dɩ sin da.
Je sɩm kʋntʋ wʋ́ taa yɩ a nɔɔna balʋ
na kwaanɩ sɩ ba lwarɩ-nɩ tɩn nyɩm mʋ.b
11 Kʋ nan na yɩ abam balʋ na vɩn amʋ Baŋa-Wɛ
yɩ á ba lagɩ sɩ á zuli-nɩ a tɩtɩ piu kʋm baŋa nɩ tɩn,
a lagɩ a cɔgɩ abam mʋ.
Á yǝni á kwe wʋdiiru dɩ sana dwi dwi mʋ,
á ma á zuli á wa-yɔɔrʋ tɩm,
tɩ yɩra na yɩ ‹Yu-yoŋo wɛ›, dɩ ‹Jwa taanɩ wɛ› tɩn.
12 Amʋ jwa seeni wʋ́ pa abam tɩ jara wʋnɩ.
Abam wʋnɩ nɔɔnʋ maama wʋ́ kuni doonǝ yɩ ba gʋ-o.
Bɛŋwaanɩ, a na bəŋi abam tɩn, á wʋ ləri-nɩ.
A ma ŋɔɔnɩ dɩ abam
yɩ á wʋ cəgi a taanɩ dɩm.
Á nan yɔɔrɩ á kɩ lwarɩm mʋ á cɔgɩ amʋ yigə,
yɩ á kuri kʋlʋ a na vaɩ tɩn á pa á tɩtɩ.»
13 Yuutu Baŋa-Wɛ nan na tagɩ te tɩn mʋ tɩntʋ:
«Amʋ tɩntʋŋna bam wʋ́ taa di ba sui mʋ,
yɩ kana nan jɩgɩ abam ka gʋɩ.
A tɩntʋŋna bam maa wʋ́ taa nyɔ ba sui ba wʋbʋŋa,
yɩ na-nyɔm jɩgɩ abam dɩ ni.
A tɩntʋŋna bam wʋ́ taa caka dɩ wʋpolo,
yɩ cavɩɩra nan yɔɔrɩ ya ja abam.
14 Amʋ nɔɔna bam wʋ́ leeni wʋpolo le dɩ ba bɩcara maama.
Kʋ nan na yɩ abam, á wʋ́ tiini á keeri dɩ kwǝr-dɩa,
dɩ á bɩcɔŋɔ na pogili tɩn ŋwaanɩ.
15 A nɔɔna bam a na kuri tɩn na lagɩ ba sɔɔlɩ lwarɩm ba pa nɔɔnʋ,
mʋ baá bəŋi á yɩrɩ ba yagɩ kʋ tu yɩra nɩ.
Yuutu Baŋa-Wɛ wʋ́ pa abam tɩ,
sɩ kʋ na yɩ DƖ tɩtɩ nɔɔna bam,
DƖ wʋ́ kwe yɩrɩ dɩdoŋ DƖ pa-ba.
16 Lʋgʋ baŋa nɩ wʋlʋ maama na yǝni o bʋŋɩ sɩ o loori Wɛ sɩ DƖ kɩ-ba lanyɩranɩ,
kʋ tu wʋ́ kɩ kʋntʋ Cɩga Tu Wɛ dɩm yɩrɩ ŋwaanɩ mʋ.
Lʋgʋ baŋa nɩ wʋlʋ nan na bʋŋɩ sɩ o goni ni,
kʋ tu dɩ wʋ́ kwe Cɩga Tu Wɛ dɩm yɩrɩ o du.
Bɛŋwaanɩ, faŋa faŋa lɛɛrʋ tɩm daa tǝrǝ
yɩ amʋ dɩ swe tɩ ni nɩ mʋ.
Wɛyuu-dʋŋʋ dɩ tɩ-dʋŋa taanɩ
17 Nii-na! Amʋ lagɩ a naanɩ wɛyuu-dʋŋʋ mʋ,
yɩ a kɩ tɩ-dʋŋa dɩ.
Ba laan wʋ́ swe pulim wǝǝnu tɩm ni nɩ.
Ba maŋɩ ba bá bʋŋɩ tɩ wʋbʋŋa.c
18 Nan taá jɩgɩ na wʋpolo
dɩ amʋ na lagɩ a naanɩ wǝǝnu tɩlʋ tɩn,
yɩ á taá caka maŋa maama.
Bɛŋwaanɩ, amʋ wʋ́ naanɩ Zeruzalɛm
sɩ kʋ pa nɔɔna na ywəəni.
Kʋ nɔn-biə bam dɩ wʋ́ pa wʋpolo taa tui.
19 Amʋ yi wʋ́ taa pagɩ Zeruzalɛm tɩʋ kʋm baŋa nɩ,
yɩ a nɔɔna bam dɩ ja ywəəni ba ba ba pa-nɩ.
Ba daa bá taa keerǝ, naa ba kanɩ yi-na
tɩʋ kʋm kʋntʋ wʋnɩ maŋa dɩ maŋa.
20 Ba daa bá fɔgɩ ba na bu-balaŋa o na tɩga o biini maŋa nɩ.
Nankwɩn dɩ nan bá tɩ yɩ sɩ wʋ yi sɩ maŋa.
Nɔɔnʋ na tɩga bɩna bi maŋa nɩ,
baá ta wɩ: bu mʋ joori.
Wʋlʋ nan na tɩga yɩ o wʋ yi bɩna bi,
baá ta wɩ: Wɛ sɔɔlɩ lwarɩm DƖ yagɩ kʋ tu yuu nɩ mʋ.
21 Maŋa kam kʋntʋ nɩ,
nɔɔna wʋ́ lɔ ba sam yɩ ba zʋ dɩ wʋnɩ.
Ba maa na jəri ba vinyə tweeru karɩ,
baá di tɩ biə bam.
22 Ba daa bá lɔ sam sɩ nɔɔna badonnǝ zʋ dɩ wʋnɩ,
naa ba jəri tweeru sɩ nɔɔna badonnǝ di tɩ biə.
Bɛŋwaanɩ, a nɔɔna bam ŋwɩa dɩ laan wʋ́ taa daanɩ mʋ,
nɩ tweeru na yǝni dɩ daanɩ te yɩ dɩ tʋ tɩn.
Amʋ na kuri balʋ tɩn wʋ́ daanɩ lʋgʋ kʋm nɩ,
sɩ ba di ba tɩtʋŋa yam nyɔɔrɩ.
23 Ba bá tʋŋɩ kafɛ ŋwaanɩ.
Ba nan bá lʋ biə sɩ ba biə bam na lɛɛrʋ.
Bɛŋwaanɩ, Baŋa-Wɛ lagɩ DƖ kɩ DƖ nɔɔna bam yu-yoŋo mʋ,
ba dɩ ba dwi dɩm maama.
24 Amʋ wʋ́ ləri ba loro,
yɩ ba ta wʋ bǝŋi-nɩ.
Ba ta na wʋra ba ŋɔɔnɩ dɩ amʋ tɩn,
mʋ a lagɩ a sɛ ba loro kʋm a pa-ba.
25 Wiiru dɩ pǝlbu wʋ́ taa zɩgɩ jǝgǝ dɩdʋa nɩ ba di.
Nyoŋo dɩ maa wʋ́ taa di gaa,
nɩ na-bɩa na kɩ te tɩn.
Bɩsankwɩa nan wʋ́ yɔɔrɩ ka taa di kasʋlʋ yɩranɩ mʋ.
Amʋ tɩtɩ piu kʋm na yɩ lanyɩranɩ fasɩ tɩn nɩ mʋ
nɔɔn-nɔɔnʋ daa bá kɩ o doŋ zʋnnɩ,
naa o kɩ o cɔgɩ woŋo baŋa nɩ.»d
Baŋa-Wɛ mʋ tagɩ kʋntʋ.