Baŋa-Wɛ wʋ́ waarɩ lʋgʋ baŋa tɩɩnɩ dɩm
66
Baŋa-Wɛ na tagɩ te tɩn mʋ tɩntʋ:«Wɛyuu kʋm mʋ yɩ amʋ paarɩ jangɔŋɔ.
Kʋ daarɩ tɩga baŋa kam maa yɩ
amʋ na cwi a nɛ mɛ tɩn.
Abam wʋ́ wanɩ á kɩ tɛ mʋ á lɔ digə á pa-nɩ?
Jǝgǝ kɔɔ mʋ amʋ wʋ́ vu a pəni da a sin?a
2 Amʋ tɩtɩ jɩan mʋ a mɛ a kɩ wǝǝnu tɩntʋ maama.
Tɩ ma da kǝm dɩm kʋntʋ baŋa nɩ tɩ sɩɩnɩ tɩ wʋra.»
Baŋa-Wɛ mʋ tagɩ kʋntʋ.
«Nɔɔnʋ wʋlʋ nan a yigə na wʋ o wʋnɩ tɩn mʋ tɩntʋ:
Kʋ yɩ wʋlʋ na tu o tɩtɩ tɩga nɩ,
yɩ o wʋʋ cɔgɩ dɩ o lwarɩm kikiǝ,
yɩ o nɩgɩ amʋ taanɩ dɩm tɩn mʋ.b
3 Kʋ nan na yɩ te tɩn,
nɔɔna bam kɩ ba tɩtɩ wʋbʋŋa na lagɩ te maama tɩn mʋ.
Wʋlʋ na kwe na-bɩa o ma kɩ kaanɩm o pa-nɩ,
kʋ tu ba garɩ wʋlʋ na gʋ nabiinu tɩn.
Wʋlʋ dɩ na kwe piə o kɩ kaanɩm o pa-nɩ,
kʋ tu dɩ ba garɩ wʋlʋ na kwe kakurə o bwəri ka ban
sɩ o kɩ kaanɩm tɩn.
Wʋlʋ dɩ na kɩ wʋdiu kaanɩm o pa-nɩ,
kʋ tu ta ba garɩ wʋlʋ na jaanɩ tǝrə jana o ba o kɩ kaanɩm tɩn.
Wʋlʋ na zwɛ wǝǝnu tɩlʋ lwǝm na ywǝmmǝ tɩn sɩ o zuli-nɩ,
kʋ tu ba garɩ wʋlʋ na wʋra o kaanɩ jwəm tɩn.
Bantʋ dwi dɩm maama nan kuri
sɩ ba taa kɩ wo-zɔɔna kʋntʋ doŋ mʋ
nɩ ba wʋbʋŋa na lagɩ te tɩn.
4 Amʋ dɩ nan wʋ́ kuri sɩ a pa kʋ ni-ba mʋ
yɩ a pa kʋlʋ ba na vaɩ tɩn ba ba baŋa nɩ.
Bɛŋwaanɩ, a na bǝŋi-ba tɩn, nɔɔn-nɔɔnʋ wʋ ləri-nɩ.
A maa na ŋɔɔnɩ dɩ ba tɩn,
nɔɔn-nɔɔnʋ wʋ cəgi a taanɩ dɩm.
Ba nan yɔɔrɩ ba kɩ lwarɩm mʋ ba cɔgɩ amʋ yigə,
yɩ ba kuri kʋlʋ a na vaɩ tɩn ba pa ba tɩtɩ.»
5 Abam balʋ na paɩ Baŋa-Wɛ taanɩ dɩm saɩ á yɩra tɩn,
cəgi-na DƖ kwǝrǝ kam.
Á cʋrrʋ tɩm na culi abam tɩn mʋ pɛ
ba dʋlɩ abam ba yagɩ amʋ yɩrɩ dɩm ŋwaanɩ,
yɩ ba daarɩ ba tɛ ba wɩ:
«Pa-na sɩ Baŋa-Wɛ na zulə,
sɩ dɩ́ wanɩ dɩ́ na DƖ na wʋ́ pa á wʋ poli te tɩn!»
Kʋ nan yɩ bantʋ mʋ lagɩ ba di ba cavɩɩra.
6 Cəgi-na sɔɔ na zaŋɩ tɩʋ kʋm je maama nɩ te,
sɩ á wʋ́ ni sɔɔ na zɩgɩ Wɛ-digə kam seeni kʋ zaŋa!
Kʋ nan yɩ Baŋa-Wɛ kwǝri mʋ dwana
sɩ DƖ mɔ jɩna DƖ dʋna baŋa nɩ.
Baŋa-Wɛ maa wɩ:
7 «Kaanɩ ta na wʋ yaarɩ dɩ o pugə,
oó lʋ bu na?
O pugə kam nan na wʋ vri ka ti,
oó wanɩ bəkərə o lʋ na?
8 Yən nɩ mʋ abam ni kǝm dɩntʋ doŋ?
Wɔɔ mʋ fɔgɩ o ni wǝǝnu tɩntʋ ŋwa?
Ba kwe dɛ dɩdʋa ba lɔ tɩʋ ba zɩgɩ na?
Tɩʋ kɔɔ nan mʋ wʋ́ wanɩ kʋ da kʋ taa wʋra?
Siyɔn tɩʋ kʋm nan nyɩ dɩ kaanɩ wʋlʋ na vri pugə
yɩ o lʋ o biə bam lɩla tɩn mʋ.
9 Maŋa kam na yi sɩ ba lʋ a nɔɔna bam,
amʋ wʋ́ cɩ nɩ: ba bá nuŋi na?
Amʋ daa wʋ́ sɛ sɩ a pɩ pugə kam cwǝŋǝ,
yɩ a ya pɛ ni sɩ o lʋ na?»
Abam Tu Baŋa-Wɛ na tagɩ te tɩn mʋ kʋntʋ.
10 Abam balʋ maama na soe Zeruzalɛm tɩʋ kʋm tɩn,
tɔgɩ-na dɩ kʋ nɔn-biə bam maama sɩ á kɩ wʋpolo.
Abam balʋ ya na ŋwanɩ á pa-kʋ tɩn,
tiini á di-na ywəəni tɩʋ kʋm yu-yoŋo ŋwaanɩ.
11 Bɛŋwaanɩ, á wʋ́ tɔgɩ Zeruzalɛm ŋwaanɩ á di ywəəni zanzan.
Tɩʋ kʋm wʋ́ taa jɩgɩ abam kʋ kɔna,
nɩnɛɛnɩ nu na kɔnɩ o biə
pa ba ŋɔgɩ yɩlɩ ba sui te tɩn.
12 Baŋa-Wɛ tagɩ tɩntʋ mʋ yɩ DƖ wɩ:
«Amʋ wʋ́ pa Zeruzalɛm tɩʋ kʋm na yazurə
nɩ bu-tʋla na duri barɩ-barɩ te tɩn mʋ.c
Lʋgʋ baŋa tɩɩnɩ dɩm jɩjɩgɩrʋ wʋ́ ba tɩ su tɩʋ kʋm,
nɩ bugə na su ka pɛɛlɩ te tɩn.
Kʋntʋ tɩn, tɩʋ kʋm wʋ́ kɔnɩ abam,
yɩ kʋ daarɩ kʋ təli abam,
nɩ kaanɩ na pəgi o bu
yɩ bu wʋm dɩ tigi o nu wʋm nɛ baŋa nɩ te tɩn.
13 Amʋ dɩ lagɩ a pa á bɩcara zuri
nɩ bu nu na jɩg-o o nii te tɩn mʋ.
Á wʋ́ yɔɔrɩ á taá jɩgɩ bɩcar-zuru Zeruzalɛm tɩʋ kʋm ŋwaanɩ.»
14 Á ma á na nɛ nɩ wǝǝnu tɩntʋ jɩgɩ tɩ kɩ,
á wʋpolo kʋm wʋ́ gaalɩ.
Á wʋ́ joori á na dam-dʋʋrɩ, nɩ gaarʋ na kwin te tɩn.
Baŋa-Wɛ tɩntʋŋna bam laan maa wʋ́ lwarɩ jaja nɩ:
DƖ sɩɩnɩ DƖ wʋ ba tee nɩ.
DƖ dʋna bam nan wʋ́ lwarɩ DƖ ban-lʋm na wʋ ba baŋa nɩ te tɩn.
15 Nii-na! Baŋa-Wɛ tɔgɩ dɩ min-fɔrɔ mʋ DƖ maa bɩɩna.
DƖ sise-tərikooru tɩm nan wurigi mʋ tɩ bɩɩnɩ dɩ fʋra
nɩ viu na kɩ te tɩn.
DƖ lagɩ DƖ pa DƖ ban-lʋm dɩm mʋ tʋ nɔɔna baŋa nɩ lɩla,
yɩ DƖ tɔgɩ min-vʋgʋ baŋa nɩ DƖ bwɛ-ba.d
16 Bɛŋwaanɩ, Baŋa-Wɛ lagɩ DƖ kwe mim dɩ sʋ-lɔŋɔ mʋ,
DƖ ma DƖ waarɩ nabiinǝ maama.
Baŋa-Wɛ maa wʋ́ tɔgɩ kʋ baŋa nɩ DƖ gʋ nɔɔna zanzan.
17 Baŋa-Wɛ na tagɩ te tɩn mʋ tɩntʋ:
«Amʋ wʋ́ yɔɔrɩ a cɔgɩ balʋ na kwɛ ba tɩtɩ yɩ ba daarɩ ba pɛ da kwaga ba pu ba zʋʋrɩ tangwana wʋnɩ ba zuli-ya tɩn. Bantʋ yǝni ba di nwana yalʋ na wʋ maŋɩ tɩn, nɩ tǝrǝ, dɩ baywə, dɩ wo-zɔɔna tɩdonnǝ. 18 A maŋɩ a ye ba kənə dɩ ba wʋbʋŋa maama na yɩ te tɩn mʋ. A nan lagɩ a la lʋgʋ baŋa tɩɩnɩ dɩm dɩ dwi tiinə maama mʋ a kɩ daanɩ, pa ba ba ba na a paarɩ-zulǝ yam na yɩ te tɩn.
19 A ta wʋ́ kɩ tɩtʋŋ-kamunu mʋ ba tɩtarɩ nɩ, yɩ a daarɩ a tʋŋɩ ba balʋ na daarɩ tɩn sɩ ba vu dwi-gɛ tiinə te. Kʋ maa yɩ Tarsisi tiinə te, dɩ Puli tiinə, dɩ Luudi tiinə na ye cɩna tam tɩn, dɩ Tubalɩ tiinə, dɩ Zwavan tiinə te, kʋ ta wǝli dɩ nɩnɩʋ ni tɩɩnɩ dɩm, dɩ mɛ maama ba ta na wʋ ni amʋ yɩrɩ dɩm ŋwa tɩn mʋ. Ba laan wʋ́ pa dwi-gɛ tiinə bam kʋntʋ lwarɩ a paarɩ-zulǝ yam na daga te tɩn. 20 Ba maa wʋ́ ja abam cʋrrʋ tɩlʋ maama na daarɩ lʋgʋ baŋa tɩɩnɩ dɩm wʋnɩ tɩn ba joori ba ba Zeruzalɛm yo ba pa-nɩ. Nɔɔna bam nan wʋ́ di siseŋ-nɔɔna, dɩ sise-tərikooru, dɩ bɩna-sise, dɩ yogondə baŋa nɩ mʋ ba joori ba ba. Baá ja-ba ba ba amʋ piu kʋlʋ na yɩ lanyɩranɩ fasɩ tɩn nɩ, nɩ ba yɩ pɛɛra mʋ ba kwe ba pa-nɩ. Kʋʋ́ taa yɩ nɩnɛɛnɩ Yisɩrayɛlɩ tiinə na yǝni ba kɩ te yɩ ba kwe ba muni pɛɛra ba kɩ zʋn-laarʋ wʋnɩ ba ja ba ba sɩ ba zuli-nɩ a digə kam nɩ te tɩn. 21 A maa wʋ́ kuri nɔɔna ba wʋnɩ sɩ ba taa yɩ kaanɩm tiinə, sɩ badonnǝ dɩ taa yɩ Levi tiinə na wʋ́ tʋŋɩ ba pa-nɩ tɩn.» Baŋa-Wɛ mʋ tagɩ kʋntʋ.
22 Baŋa-Wɛ ta na tagɩ te tɩn mʋ tɩntʋ:
«Amʋ na wʋ́ naanɩ wɛyuu-dʋŋʋ kʋm dɩ tɩ-dʋŋa kam sɩ tɩ taa wʋra a yigə nɩ maŋa maama tɩn, kʋntʋ doŋ mʋ abam biə bam dɩ wʋ́ taa wʋra maŋa maama, sɩ á yɩrɩ dɩm yɩ je lʋgʋ baŋa nɩ.e 23 Nabiinǝ maama wʋ́ taa tui sɩ ba zuli amʋ maŋa maama wʋnɩ, cana dɩ cana maama, dɩ Wɛ siun dɛ maama wʋnɩ dɩ. 24 Ba nan na maa nuŋi pooni, baá na balʋ na vɩn amʋ tɩn na tɩga yɩ ba yɩra tigi pwələ nɩ te tɩn. Tʋa kam na mu ba yɩra yam tɩn bá na tʋʋnɩ. Mim dɩlʋ na jɩgɩ-ba dɩ zwɛ tɩn dɩ nan bá dwe. Baá taa yɩ wo-zɔɔna mʋ nabiinǝ maama yigə nɩ.»f