Zuda tɩʋ Pɛ Manasɩ taanɩ
21
Manasɩ dɛɛn jɩgɩ bɩna fugə-yale mʋ yɩ o di paarɩ dɩm. O ma jǝni Zeruzalɛm nɩ o di paarɩ o kɩ bɩna fiinnu-yanu. O nu yɩrɩ mʋ Hefiziba. 2 Manasɩ dɛɛn tʋŋɩ lwarɩm o cɔgɩ Baŋa-Wɛ yigə dɩ o na lwǝni tɩtʋŋ-zɔɔna yalʋ dwi-gɛ tiinə na yǝni ba kɩ yɩ Wɛ zəli-ba tɩga kam nɩ DƖ daarɩ DƖ pa Yisɩrayɛlɩ tiinə bam jǝni tɩn. 3 O joori o lɔ jwǝnǝ kaanɩm je sɩlʋ o ko Ezekɩasɩ dɛɛn na cɩcʋgɩ o yagɩ tɩn mʋ o zɩgɩ. O ma lɔ bimbinə o zɩgɩ Baalɩ jwəm zulə ŋwaanɩ o daarɩ o cwi Asera nyɩnyʋgʋ daa nɩnɛɛnɩ Yisɩrayɛlɩ tɩʋ pɛ Akabɩ dɛɛn na kɩ te tɩn. O ma tiiri o zuli calɩcwɩ sɩm dɩ. 4 O dɛɛn ta lɔgɩ jwǝnǝ kaanɩm bimbinə mʋ o zɩgɩ Baŋa-Wɛ digə kam nɩ. Baŋa-Wɛ ya tagɩ jǝgǝ kam kʋntʋ taanɩ mʋ wɩ: «Zeruzalɛm yɩ tɩʋ kʋlʋ wʋnɩ nɔɔna na wʋ́ taa zuli a yɩrɩ da tɩn mʋ.» 5 O ta lɔgɩ bimbinə mʋ Baŋa-Wɛ digə kam kʋnkwallʋ tɩle tɩm wʋnɩ sɩ nɔɔna taa maɩ ba zuli calɩcwɩ sɩm. 6 O ma ja o tɩtɩ bu o zwɛ mim wʋnɩ o ma o kɩ kaanɩm.a O ma kɩ vʋra, dɩ yi-nara tɩtʋŋa, o tiŋi nɔɔna yɩ ba bəi nɔɔna jwəəru, o ta tɔgɩ liri mwaanʋ tiinə kwaga. O dɛɛn tiini o tʋŋɩ lwarɩm o cɔgɩ Baŋa-Wɛ yigə pa Baŋa-Wɛ banɩ zaŋɩ dɩd-o.7 Manasɩ dɛɛn pɛ ba sarɩ Asera nyɩnyʋgʋ daa mʋ yɩ o kwe-ka o zɩgɩ Baŋa-Wɛ digə kam nɩ o jɩgɩ o kaana.b Baŋa-Wɛ dɛɛn taga je sɩm kʋntʋ taanɩ dɩ Davidi, dɩ o bu Solɔmɔn o wɩ: «Digə kantʋ na zɩgɩ Zeruzalɛm nɩ tɩn mʋ yɩ jǝgǝ kalʋ amʋ na kuri Yisɩrayɛlɩ dwiə yam maama wʋnɩ sɩ nɔɔna taa zuli amʋ yɩrɩ da sɩ kʋ ta ve maŋa maama. 8 Yisɩrayɛlɩ tiinə bam na yɔɔrɩ ba tɔgɩ kwiə yalʋ a na pɛ-ba tɩn, yɩ ba sɛ niə yalʋ a na tɔgɩ Moyisi baŋa a pa-ba tɩn maama, amʋ bá pa cwǝŋǝ sɩ nɔɔna zəli-ba sɩ ba nuŋi da tɩga kalʋ amʋ na pɛ ba nabaara bam tɩn.» 9 Zuda dwi tiinə bam nan wʋ sɛ Baŋa-Wɛ ni dɩm. Manasɩ ma ja-ba o vu o dɩ tusim wʋnɩ. Ba ma tiini ba tʋŋɩ lwarɩm sɩ kʋ dwǝni lwarɩm dɩlʋ dwi-gɛ tiinə na yǝni ba kɩ yɩ Wɛ cɔgɩ-ba DƖ daarɩ DƖ kwe ba tɩga kam DƖ pa Yisɩrayɛlɩ tiinə bam tɩn.c
10 Baŋa-Wɛ ma tɔgɩ DƖ nijoŋnǝ bam baŋa o ta DƖ wɩ: 11 «Zuda pɛ Manasɩ tiini o tʋŋɩ tɩtʋŋ-zɔɔna kʋ ja gaalɩ. O ma tʋŋɩ lwarɩm sɩ kʋ dwǝni Amɔɔrɩ tiinə balʋ dɛɛn na maŋɩ ba wʋra yɩ Yisɩrayɛlɩ tiinə bam laan ba tɩn na kɩ te tɩn.d O ma pa Zuda tiinə bam dɩ cɔgɩ dɩ ba na tɔgɩ ba kaanɩ o jwǝnǝ yam tɩn. 12 Kʋntʋ ŋwaanɩ Baŋa-Wɛ dɩm na yɩ Yisɩrayɛlɩ tiinə Wɛ tɩn taga tɩntʋ mʋ nɩ: ‹Amʋ wʋ́ pa lɛɛrʋ yi Zeruzalɛm tɩʋ nɔn-biə bam dɩ Zuda tiinə bam maama sɩ kʋ kɩ balʋ na wʋ́ ni kʋ ŋwa tɩn yǝǝu. 13 Amʋ wʋ́ waarɩ Zeruzalɛm tiinə bam sɩ kʋ maŋɩ dɩ a dɛɛn na kɩ te dɩ Samari tiinə bam dɩ ba pɛ Akabɩ dwi dɩm tɩn. Amʋ wʋ́ saarɩ Zeruzalɛm tiinə bam a yagɩ, nɩ ba na zarɩ zʋŋa ba guguni ka wʋʋ yɩ ba pipiri ka ni ba pu tɩga nɩ te tɩn mʋ.e 14 Amʋ nan ta wʋ́ vɩn a nɔɔna balʋ ta na daarɩ tɩn yɩ a kwe-ba a kɩ ba dʋna jɩŋa nɩ sɩ ba di-ba ba daarɩ ba vrɩ ba jɩjɩgɩrʋ. 15 Amʋ wʋ́ kɩ kʋntʋ bɛŋwaanɩ ba tiini ba tʋŋɩ lwarɩm ba cɔgɩ a yigə yɩ ba zaŋɩ a banɩ. Kʋ zɩgɩ maŋa kalʋ ba nabaara bam na nuŋi Ezipi tɩʋ nɩ tɩn ba maŋɩ ba kɩ kʋntʋ mʋ sɩ kʋ ba kʋ yi zɩm.› »
16 Manasɩ dɛɛn ta pɛ nɔn-ŋʋna zanzan ga ba ŋwɩa pa ba jana taagɩ Zeruzalɛm tɩʋ kʋm ni maama. O kɩ lwarɩm dɩm kʋntʋ mʋ o wǝli dɩ o ya na maŋɩ o kɩ te o pa Zuda tiinə bam tusi ba cɔgɩ Baŋa-Wɛ yigə tɩn.
17 Manasɩ dɛɛn na di paarɩ yɩ o kɩ wǝǝnu tɩlʋ tɩn, dɩ o tɩtʋŋa yam maama, kʋ wǝli dɩ o na kɩ lwarɩm yalʋ tɩn, ba pʋpʋnɩ-tɩ ba tiŋi Zuda Tɩʋ Pwa Cɩbarɩ tɔnɔ kʋm wʋnɩ. 18 Manasɩ ma tɩ yɩ o vu o kwə te. Ba ma kwe‑o ba kɩ o sɔŋɔ kadugə kam nɩ. Kʋ dɛɛn yɩ Yuza kadugə mʋ. O bu Amɔn ma ləri o yuu nɩ o ji pɛ.
Zuda tɩʋ Pɛ Amɔn taanɩ
19 Amɔn dɛɛn jɩgɩ bɩna fiinle-yale mʋ yɩ o di paarɩ. O ma jǝni Zeruzalɛm nɩ o di paarɩ dɩm o kɩ bɩna yale. O nu yɩrɩ mʋ Mesulemɛtɩ wʋlʋ na yɩ Haruzi bukɔ yɩ o nuŋi Yotiba tɩn. 20 Amɔn dɛɛn tʋŋɩ lwarɩm o cɔgɩ Baŋa-Wɛ yigə mʋ nɩ o ko Manasɩ na kɩ te tɩn. 21 O ko tɩtʋŋ-naga kam mʋ o yɔɔrɩ o kwe. O dɛɛn kaanɩ jwǝnǝ yalʋ o ko dɛɛn na kaanɩ tɩn yɩ o tiiri o zuli-ya mʋ. 22 Amɔn mɛ o kwaga mʋ o ya Baŋa-Wɛ dɩm o nabaara na zuli tɩn. O ma vɩn sɩ o tɔgɩ Baŋa-Wɛ cwǝŋǝ kam.
23 Amɔn tɩtɩ tɩntʋŋna bam ma lɔ o kwaga nɩ ba kɩ ni daanɩ yɩ ba gʋ-o pɛ sɔŋɔ kʋm nɩ. 24 Zuda tɩʋ nɔn-biə bam dɩ ma zaŋɩ ba gʋ balʋ maama na lɔgɩ Amɔn kwaga nɩ tɩn. Ba ma tiŋi Amɔn bu Zʋzɩasɩ pa o ləri Amɔn yuu nɩ o di paarɩ.