Zuda tɩʋ Pɛ Zʋzɩasɩ taanɩ
22
Zʋzɩasɩ dɛɛn jɩgɩ bɩna nana mʋ yɩ o di paarɩ dɩm. O ma jǝni Zeruzalɛm nɩ o di paarɩ dɩm o kɩ bɩna fiintɔ-dɩdʋa. O nu yɩrɩ mʋ Yedida wʋlʋ na yɩ Adaya bukɔ yɩ o nuŋi Bozekatɩ tɩn. 2 Zʋzɩasɩ tɩtʋŋa dɛɛn su Baŋa-Wɛ yi lanyɩranɩ. O yɔɔrɩ o kwe cwe sɩlʋ o nabaarʋ Davidi dɛɛn na tɔgɩ tɩn mʋ, yɩ o wʋ ywəri sɩ wʋnɩ.a3 Pɛ Zʋzɩasɩ paarɩ dim bɩna fugə-nana bɩnɩ dɩm nɩ mʋ o tʋŋɩ Azalɩa bu Safan na yɩ Mesulam naa tɩn sɩ o vu Baŋa-Wɛ digə kam nɩ. Safan dɛɛn yɩ pɛ sɔŋɔ tɔn-pʋpʋnnʋ mʋ. Zʋzɩasɩ ma ta dɩ Safan o wɩ: 4 «Zaŋɩ n vu kaanɩm nakwɩ tu Hilkiya te n ta dɩd-o sɩ o jeeli səbu kʋlʋ Wɛ-digə ni-yɩrɩna bam na joŋi nɔɔna bam tee nɩ ba tiŋi tɩn ni.b 5 O laan wʋ́ kwe-kʋ o pa balʋ na nii Baŋa-Wɛ digə kam kwɛɛm tɩtʋŋa baŋa nɩ tɩn sɩ bantʋ joŋi ba ma ŋwɩ tɩntʋŋna balʋ na wʋra ba fɔgɩ ba kwɛ digə kam tɩn. 6 Tɩntʋŋna bam kʋntʋ maa yɩ gwarʋ, dɩ lwara, dɩ kandwa-cɩrna mʋ. Ba maŋɩ sɩ ba ma səbu kʋm ba yəgi dɛ, dɩ kandwa yalʋ ba na yarɩ piu yɩra nɩ tɩn sɩ ba ma ba fɔgɩ ba kwɛ Wɛ-digə kam. 7 Kʋ na yɩ balʋ ba na wʋ́ pa-ba səbu kʋm tɩn, kʋ daɩ sɩ ba jeeli səbu kʋm ba brɩ jaja, bantʋ na yɔɔrɩ ba tʋŋɩ dɩ cɩga tɩn ŋwaanɩ.»
Hilkiya nɛ Wɛ niə tɔnɔ kʋm
8 Safan na pɛ Hilkiya pɛ kwǝrǝ kam tɩn, mʋ Hilkiya tagɩ dɩd-o o wɩ: «Wɛ niə tɔnɔ kʋm mʋ tɩntʋ a na nɛa Baŋa-Wɛ digə kam wʋnɩ.» O ma kwe-kʋ o pa‑o. Safan ma joŋi o karɩmɩ. 9 O ma joori o vu ta dɩ pɛ Zʋzɩasɩ o wɩ: «Pɛ, nmʋ dɩdɛɛra bam kwe səbu kʋlʋ ya na tigi Wɛ-digə kam nɩ tɩn ba pa balʋ na nii Baŋa-Wɛ digə kam kwɛɛm tɩtʋŋa baŋa nɩ tɩn.» 10 Safan ta ma ta dɩ pɛ wʋm o wɩ: «Kaanɩm tu Hilkiya mʋ kwe tɔnɔ kʋntʋ o pa-nɩ.» O ma karɩmɩ tɔnɔ kʋm o brɩ pɛ wʋm.
11 Pɛ Zʋzɩasɩ na ni Wɛ niə tɔnɔ kʋm cɩbarɩ tɩn mʋ o wʋʋ cɔgɩ zanzan.c O ma ja o gwaarʋ o kaarɩ. 12 O ma daarɩ o ta dɩ kaanɩm tu Hilkiya, dɩ Safan bu Ahikam, dɩ Mikaya bu Akbɔrɩ, dɩ o tɔn-pʋpʋnnʋ Safan, kʋ wǝli dɩ Asaya na yɩ pɛ wʋm yɩra tɩntʋŋnʋ tɩn o wɩ: 13 «Ve-na Wɛ-digə kam á loori Baŋa-Wɛ kʋlʋ na pʋpʋnɩ tɔnɔ kʋntʋ wʋnɩ tɩn ŋwaanɩ, sɩ dɩ́ wanɩ dɩ́ lwarɩ DƖ wʋbʋŋa. Kɩ-na kʋntʋ á pa amʋ, dɩ Zuda tiinə bam maama. Baŋa-Wɛ banɩ mʋ yɔɔrɩ dɩ wiirə dɩbam baŋa nɩ, bɛŋwaanɩ dɩ́ nabaara bam wʋ tʋŋɩ ba tɔgɩ niə yalʋ na pʋpʋnɩ dɩbam ŋwaanɩ tɔnɔ kʋntʋ wʋnɩ tɩn.»
14 Hilkiya, dɩ Ahikam, dɩ Akbɔrɩ, dɩ Safan, kʋ wǝli dɩ Asaya maama ma zaŋɩ ba vu Zeruzalɛm jə-dʋŋa laŋa kam nɩ sɩ ba na dɩ Wɛ ni-joŋ-kana kalʋ yɩrɩ na yɩ Hulida tɩn. O maa yɩ Tikiva bu Salum kaanɩ mʋ. Tikiva dɩ dɛɛn yɩ Harasɩ wʋlʋ na nii pɛ wʋm gwaarʋ baŋa nɩ tɩn bu mʋ. Nɔɔna bam ma ŋɔɔnɩ dɩ Hulida. 15 O dɩ ma lǝri-ba o wɩ: «Baŋa-Wɛ dɩm na yɩ Yisɩrayɛlɩ tiinə Wɛ tɩn kwǝrǝ mʋ tɩntʋ: Ve-na a ta dɩ nɔɔnʋ wʋlʋ na tʋŋɩ abam amʋ tee nɩ tɩn nɩ: 16 ‹Baŋa-Wɛ kwǝrǝ mʋ tɩntʋ: Amʋ wʋ́ pa lɛɛrʋ yi n tɩʋ kʋm dɩ kʋ nɔn-biə bam maama, sɩ kʋ maŋɩ dɩ kʋlʋ maama na pʋpʋnɩ tɔnɔ kʋntʋ wʋnɩ yɩ Zuda tɩʋ pɛ wʋm karɩmɩ tɩn. 17 Bɛŋwaanɩ, Zuda tiinə bam vɩn amʋ mʋ yɩ ba daarɩ ba kaanɩ wa-yɔɔrʋ. Ba ma zaŋɩ a banɩ dɩ ba jɩa na kɩ jwǝnǝ yalʋ tɩn. Kʋntʋ ŋwaanɩ a ban-lʋm dɩm wʋ́ tʋ tɩʋ kʋntʋ baŋa nɩ. Dɩ nan bá fɔgɩ dɩ zuri maŋa dɩ maŋa 18 Kʋ nan na yɩ Zuda pɛ wʋm tɩtɩ na tʋŋɩ abam amʋ tee nɩ sɩ á lwarɩ Baŋa-Wɛ wʋbʋŋa tɩn, Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ dɩd-o tɩn mʋ tɩntʋ: Kʋ na yɩ taanɩ dɩlʋ na wʋ tɔnɔ kʋm wʋnɩ yɩ n ni-dɩ tɩn, 19 amʋ nɛ nmʋ wʋʋ na cɔgɩ yɩ n tu n tɩtɩ amʋ yigə nɩ dɩ n na ni nɩ a banɩ zaŋɩ tɩʋ kʋntʋ dɩ kʋ nɔɔna bam baŋa nɩ tɩn. N ta ma maanɩ nɩ: kampwəl-balwara mʋ wʋ tɩʋ kʋm baŋa nɩ yɩ kʋʋ́ tʋ kʋ saarɩ. Nmʋ nan na kaarɩ n gwaarʋ yɩ n keeri amʋ yigə nɩ tɩn ŋwaanɩ, amʋ ni nmʋ loro kʋm. 20 Kʋntʋ ŋwaanɩ amʋ wʋ́ pa‑m cwǝŋǝ sɩ n tɩ n tɩtɩ tʋʋnɩ, sɩ n yɩ na lɛɛrʋ tɩlʋ a na wʋ́ pa tɩ yi tɩʋ kʋntʋ tɩn.› »
Tɩntʋŋna bam ma ja Wɛ ni-joŋ-kana kam kwǝrǝ ba joori ba vu ba pa Pɛ Zʋzɩasɩ.