Wɛ nɔɔna bam wʋ́ di ywəəni
35
Wʋpolo wʋ́ yi kagʋa je sɩm mɛ na na tǝrǝ tɩn.Tɩ-kʋra kam wʋ́ di ywəəni,
ga-punnu na wʋ́ kwi tɩ nuŋi da dɩ zurim tɩn ŋwaanɩ.
2 Je sɩm kʋntʋ wʋ́ tiini sɩ kɩ punnu zanzan,
pa sɩ taa caka dɩ wʋpolo.
Tɩga kam wʋ́ kɩ lam,
nɩ Liban pweeru tɩm na yɩ te tɩn.
Ka nɩnwaŋa dɩ wʋ́ nuŋi jaja,
nɩ Karmɛlɩ dɩ Sarɔn je sɩm na yɩ te tɩn mʋ.
Nɔɔna laan maa wʋ́ na Baŋa-Wɛ paarɩ-zulǝ yam,
dɩ DƖ kajaanɩ dɩm na yɩ te tɩn.
3 Nan joori-na á pa sɩ jɩan yalʋ ya na bwəni tɩn,
joori ya na dam,
sɩ á daarɩ á pa sɩ nadoonə yalʋ ya na saɩ tɩn
joori ya taa jɩgɩ dam.a
4 Á ta dɩ balʋ bɩcara ya na magɩ tɩn nɩ:
«Ja-na baarɩ sɩ á yɩ taá fʋna.
Sɩ á Tu Wɛ dɩm lagɩ DƖ ba
sɩ DƖ brɩ DƖ ban-zɔŋɔ mʋ,
yɩ DƖ daarɩ DƖ mɔ jɩm á dʋna baŋa nɩ.
DƖ nan wʋ́ kɩ kʋntʋ mʋ sɩ DƖ vrɩ abam DƖ yagɩ.»
5 Lilwǝ yiǝ laan maa wʋ́ puri
yɩ zwa-kwarʋ dɩ zwa yam pʋrɩ.b
6 Gwaarʋ dɩ wʋ́ faŋɩ wɛɛnɩ,
nɩ wəŋə doŋ tɩn,
yɩ mɩmaarʋ dindəlimi dɩ wʋ́ taa waɩ dɩ ŋɔɔnɩ pʋrɩ-pʋrɩ.
Na dɩ wʋ́ taa buri ba bugi kagʋa yuu,
yɩ nabarɩ dɩ taa wʋ tɩ-kʋra kam nɩ sɩ durǝ.
7 Kasʋlʋ kʋlʋ wɩa kam ya na yɔɔrɩ ka jɩgɩ ka magɩ tɩn
laan wʋ́ ji bugə mʋ kʋ taa tigə.
Tɩ-kʋra kam nɩ, buli-yiə wʋ́ taa taɩ
ya nuŋi je maama nɩ.
Je sɩlʋ maama ga-kakuri ya na tigi da tɩn,
ga-zuru, dɩ nancan-gullu, dɩ sangɛ mʋ laan wʋ́ taa wʋra.
8 Cwəŋə wʋ́ pəni sɩ nɔɔna taa tɔgɩ da ba veǝ.
Baá taa bə-ka nɩ: «Cwə-ŋʋŋa» mʋ.
Balʋ na jɩgɩ digiru Wɛ cullu tɩm seeni tɩn
bá wanɩ ba tɔgɩ ka wʋnɩ.
Bɛŋwaanɩ, balʋ na tɔgɩ Wɛ cwǝŋǝ tɩn yɩranɩ mʋ ve ka wʋnɩ.
Jwəəru bá na cwǝŋǝ sɩ ba beeri ka wʋnɩ.
9 Nywəənu bá taa wʋ cwǝŋǝ kam kʋntʋ nɩ.
Ga-vara balʋ na jaanɩ nɔɔna tɩn dɩ bá tɔgɩ da.
Tɩntʋ maama maŋɩ tɩ bá twɛ da.
Wɛ na vrɩ balʋ DƖ ja nuŋi cam wʋnɩ tɩn
mʋ wʋ́ tɔgɩ da ba taa veǝ.
10 Baŋa-Wɛ na joŋi balʋ DƖ yagɩ tɩn
wʋ́ tɔgɩ da ba joori sɔŋɔ.
Ba maa wʋ́ joori ba zʋ Siyɔn tɩʋ kʋm wʋ
yɩ ba leeni dɩ wʋpolo.
Ywəəni dɩlʋ na ba ti tɩn mʋ wʋ́ taa yɩ ba nyɩm.
Ba wʋpolo kʋm wʋ́ tiini kʋ gaalɩ,
yɩ ba wʋ-cɔgɔ dɩ ba kərə kam wʋ́ je.