Lʋgʋ baŋa dwi tiinə taanɩ
34
Abam dwi-gɛ tiinə, fʋfɔ-na á twɛ sɩ á cəgi.Nɔɔna na wʋ je maama tɩn pʋrɩ-na á zwa.
Tɩga kam baŋa maama
dɩ balʋ na zʋʋrɩ ka wʋnɩ tɩn maŋɩ sɩ ba cəgi,
kʋ wǝli dɩ lʋgʋ baŋa wǝǝnu dwi maama.
2 Baŋa-Wɛ banɩ zaŋɩ dɩ dwi-gɛ tiinə bam maama mʋ.
DƖ wʋʋ ma fuli dɩ ba jar-kərə bam.
DƖ yɔɔrɩ DƖ pɔɔrɩ-ba DƖ zɩgɩ dáa nɩ sɩ ba na cɔgɩm mʋ.
DƖ maa wʋ́ pa ba dʋna gʋ-ba ba ti.
3 Ba maa wʋ́ kwe ba twa bam ba dʋlɩ ba yagɩ,
sɩ ba yɩra yam lwəm zaŋɩ tagɩ-tagɩ.
Ba jana dɩ maa wʋ́ faarɩ pweeru je sɩm maama.
4 Wɛyuu calɩcwɩ sɩm maama wʋ́ je,
yɩ ba pri wɛyuu kʋm tɩtɩ nɩ ba na pri sara te tɩn.
Calɩcwɩ sɩm maama wʋ́ taa tʋɩ tɩga nɩ mʋ,
nɩ Vinyə tiu vɔɔrʋ naa kapʋrʋ vɔɔrʋ na kwaarɩ
yɩ tɩ siiri tɩ tʋɩ tɩga nɩ te tɩn.a
5 Baŋa-Wɛ maa wɩ:
«A sʋ-lɔŋɔ kʋm maŋɩ kʋ tʋŋɩ kʋ fra kʋ su wɛyuu nɩ.
Nii-na! A laan wʋ́ kwe-kʋ a ma a waarɩ Edɔm tiinə bam mʋ.
Bantʋ yɩ balʋ a na pɔɔrɩ a zɩgɩ dáa nɩ
sɩ ba yɔɔrɩ ba na cɔgɩm tɩn mʋ.»
6 Baŋa-Wɛ sʋ-lɔŋɔ kʋm maama yɔɔrɩ kʋ yɩ jana yɩranɩ mʋ.
Vara lara dɩ maa taagɩ kʋ maama.
Kʋ nyɩ dɩ peeni dɩ bʋnɩ jana,
kʋ wǝli dɩ pi-balɩ tapwal-biə bam lara mʋ taagɩ-kʋ.
Bɛŋwaanɩ, Baŋa-Wɛ lagɩ DƖ kɩ kaanɩm mʋ Botisera tɩʋ nɩ.
DƖ maa wʋ́ gʋ nɔɔna zanzan Edɔm laŋa kam nɩ.
7 Ba dɩdɛɛra bam wʋ́ yɔɔrɩ ba tɩ,
dɩ ba na nyɩ dɩ na-balɩ sɩlʋ na warɩ sɩ ja tɩn mʋ.
Ba nɔn-babɛ sɩm na dana nɩ nabɛ te tɩn dɩ wʋ́ tɔgɩ ba tɩ.
Ba jana mʋ wʋ́ bugi ba tɩga kam maama.
Ba yɩra lara dɩ maa wʋ́ ji pʋpɔnɔ ka pɔɔnɩ-ka.
8 Bɛŋwaanɩ, Baŋa-Wɛ lɩ dɛ mʋ
sɩ DƖ ba DƖ zǝni Siyɔn tiinə bam.
Bɩnɩ dɩm kʋntʋ wʋnɩ DƖ lagɩ DƖ yiri jɩnɩ
ba dʋna bam baŋa nɩ mʋ.
9 Edɔm bu-tʋlɩ sɩm wʋ́ ji kʋtaalɩ mʋ.
Ba tɩʋ kasʋlʋ dɩ maa wʋ́ ji ciribi.
Mim maa wʋ́ ja ba tɩga kam maama,
nɩ mim na jɩgɩ kʋtaalɩ dɩ di te tɩn.
10 Wɩa dɩ tɩtɩ maama wʋnɩ, tɩʋ kʋm mim bá dwe.
Dɩ nyʋa kam dɩ wʋ́ taa zaŋɩ wɛɛnɩ mʋ wuu.
Ba tɩga kam wʋ́ taa tigi yɔɔ yɩranɩ mʋ,
tɩʋ kʋm wʋ́ taa wʋ wʋ-cɔgɔ wʋnɩ mʋ zamaanɩ dɩ zamaanɩ maama.
Nɔɔn-nɔɔnʋ daa bá tɔgɩ ba tɩga kam nɩ o kɛ.
11 Kunkwəəru, dɩ bacangaarʋ, dɩ vara dwi dwi
mʋ wʋ́ taa te je sɩm kʋntʋ.
Baŋa-Wɛ lagɩ DƖ twɩ DƖ jɩŋa Edɔm tɩga kam baŋa nɩ,
sɩ DƖ maŋɩ-ka yɩ DƖ daarɩ DƖ jeeli ka cɔgɩm dɩm.
DƖ maa wʋ́ pa tɩga kam taa tigi yɔɔ yɩranɩ.
12 Edɔm tɩʋ yigǝ tiinǝ bam daa bá na pɛ
sɩ kʋ tu taa nii kʋ baŋa nɩ.
Ba nakwa bam maama wʋ́ je mʋ.
13 Sabarɩ mʋ wʋ́ joŋi ba sɔ-fwaarʋ tɩm.
Bʋmbwaanʋ dɩ ga-balwaarʋ dɩ maa wʋ́ cəŋi ba dam je sɩm maama.
Tɩʋ kʋm laan maa wʋ́ taa yɩ mɛ
ga-kakuri dɩ kunkwəəru na zʋʋrɩ tɩn.
14 Ga-digəbiə dɩ wiirə mʋ wʋ́ taa tɔgɩ daanɩ ba beeri wʋdiiru.
Twarʋ maa wʋ́ taa kaagɩ da tɩ keerǝ,
yɩ tɩtɩɩ wo-kʋrrʋ laan taa tigi di-dwəənu tɩm gugwəəru wʋnɩ.
15 Kʋ yɩ dáanɩ mʋ bɩsankwɩa dɩ wʋ́ kɩ ka pogo da,
yɩ ka dɩ ka cɩcara da.
Ka cɩcara yam maa wʋ́ lwe
sɩ ka taa jɩgɩ ka biə ka nii da.
Kʋ nan ta yɩ dáanɩ mʋ,
duurə bam dɩ wʋ́ kikili daanɩ.
16 Á nan kwe-na Baŋa-Wɛ tɔnɔ sɩ á karɩmɩ á nii!
Kʋ kʋlʋkʋlʋ ba lagɩ kʋ ko.
Kʋlʋ maama na tagɩ tɩn, kʋ lagɩ kʋ kɩ mʋ.
Bɛŋwaanɩ, Baŋa-Wɛ mʋ pɛ ni dɩm kʋntʋ,
yɩ Dɩntʋ Joro kʋm mʋ lagɩ kʋ la-tɩ kʋ ja jeeri daanɩ.
17 Baŋa-Wɛ mʋ pɔɔrɩ tɩga kam DƖ pa-tɩ.
DƖ ma maŋɩ je sɩlʋ tɩ maama na wʋ́ taa zʋʋrɩ tɩn.
Kʋ nan na zɩgɩ dwi dɩdwɩ nɩ sɩ kʋ yi dwi dɩdoŋ tɩn,
tɩ wʋ́ lɛɛrɩ tɩ taa zʋʋrɩ daanɩ mʋ maŋa maama.