Lɛɛrʋ dɩ zǝnǝ taanɩ
33
Lɛɛrʋ lagɩ tɩ yi abam balʋ na kaagɩ á cɔgɩ amʋ nɔɔna bam tɩn mʋ.Nɔɔn-nɔɔnʋ ta wʋ cɔgɩ abam!
Lɛɛrʋ wʋ́ yi abam dɩ á na baarɩ nɔɔna kwaga nɩ tɩn.
Nɔɔn-nɔɔnʋ ya ta wʋ baarɩ abam kwaga!
Abam nan na cɔgɩ tɩɩnɩ dɩdonnǝ á ti,
mʋ ba laan wʋ́ cɔgɩ abam dɩ.
Abam bɩbara kam na ti maŋa kalʋ nɩ tɩn
mʋ ba laan lagɩ ba baarɩ á dɩ kwaga.
2 Dɩ́ Tu Baŋa-Wɛ, pa n zaanɩ dɩm ba dɩ́ baŋa,
sɩ dɩ́ tɩɩna wʋ nmʋ wʋnɩ mʋ.
Zɩzɩŋa maama nɩ pa dɩbam dam.
Ta pa dɩ́ na vrɩm cam maŋa nɩ.
3 Nmʋ na pɛ tiguri-kaasa zaŋɩ,
tɩɩnɩ maama nɔɔna wʋ́ duri mʋ sɩ ba lu.
N ma n na zaŋɩ wɛɛnɩ,
dwi-gɛ tiinə wʋ́ jagɩ saɩ mʋ.
4 Dɩ́ dʋna bam,
nɩ kayɩrɩ na yǝni sɩ dəlimi kara sɩ ja tɩga te tɩn,
kʋntʋ mʋ nɔɔna wʋ́ pɛ á jɩjɩgɩrʋ ba ja viiri,
sɩ kʋlʋkʋlʋ daa yɩ daarɩ.
5 Baŋa-Wɛ yɩrɩ dɩm mʋ zaŋɩ wɛɛnɩ.
DƖ maa zʋʋrɩ wɛyuu kʋm baŋa je sɩm nɩ.
DƖ nan wʋ́ pa Siyɔn tiinə bam taa tɔgɩ cɩga dɩ nɔn-ŋʋnnɩ kikiə yɩranɩ.
6 Woŋo kʋlʋ maama na kɩ abam,
Baŋa-Wɛ mʋ wʋ́ zɩgɩ á kwaga nɩ dɩ dam.
DƖ ta wʋ́ vrɩ abam cam wʋnɩ DƖ yagɩ,
sɩ á taá tiini á jɩgɩ swan dɩ yǝno lanyɩranɩ.
Balʋ na kwarɩ Baŋa-Wɛ tɩn,
wo-laarʋ tɩntʋ mʋ wʋ́ taa yɩ ba lʋnnɩ wǝǝnu.
7 Nii-na! Dɩ́ nɔn-babɛ sɩm tɩtɩ coosi
dɩ́ tɩʋ kʋm cwe sɩm yuu nɩ mʋ.
Dɩ́ na tʋŋɩ balʋ sɩ ba kwɛ wǝǝnu tɩn
dɩ keeri mʋ dɩ wʋ-cɔgɔ.
8 Nɔɔna duri ba daarɩ cwə-farɩ sɩm mʋ.
Cwə-vələ daa ba tɔgɩ pɩmpala yam nɩ ba veǝ.
Nɔɔnʋ na kɩ ni-mɔrɔ dɩ o doŋ,
oó cɔgɩ-dɩ mʋ.
Ba ta gooni balʋ na paɩ maana taanɩ dim baŋa nɩ mʋ.
Ba daa maa ba nɩgɩ nɔɔn-nɔɔnʋ dɩ.
9 Tɩga kam maama kʋgɩ mʋ yɩ ka ta lɩɩrɩ.
Liban tweeru tɩm dɩ kwaarɩ mʋ
yɩ cavɩɩra di tɩʋ kʋm.
Sarɔn tɩ-ywəŋə kam dɩ jigi kagʋa mʋ.
Basan dɩ Karmɛlɩ je sɩm tweeru vɔɔrʋ ma siiri.
10 Baŋa-Wɛ na tagɩ te tɩn mʋ tɩntʋ:
«Maŋa laan nan yi sɩ a zaŋɩ a tʋŋɩ.
Kʋ yi sɩ a pa a yɩrɩ dɩm zaŋɩ wɛɛnɩ,
sɩ a joŋi zulə nɔɔna tee nɩ.
11 Abam na jaanɩ swannʋ pugə,
ga-kʋrrʋ mʋ wʋ́ ji bu wʋlʋ á na wʋ́ lʋ tɩn.
Mʋmwa viu kʋlʋ á na sin á yagɩ tɩn
maa wʋ́ ji mim dɩ zwɛ abam.
12 Kʋʋ́ pa á tɩʋ tiinə bam zwɛ kulə mʋ,
nɩ sabarɩ na zwɛ yɩ sɩ ji tɩntwarɩm te tɩn.
13 Abam balʋ tɩɩnɩ na wʋ yigə yigə tɩn,
lwarɩ-na tɩtʋŋ-kamunnu tɩlʋ amʋ na kɩ tɩn.
Abam balʋ dɩ na bwələ tɩn,
taá ye-na nɩ: a dam dɩm daga zanzan!»
14 Lwarɩm-kərə balʋ na wʋ Siyɔn nɩ tɩn
wʋra ba tʋ dɩ fʋʋnɩ mʋ.
Balʋ na vɩn Wɛ cwǝŋǝ tɔgɩm tɩn yɩra maa saɩ pɔm-pɔm,
yɩ ba tɛ ba wɩ:
«Dɩbam wʋnɩ wɔɔ mʋ wʋ́ wanɩ o taa zʋʋrɩ
jǝgǝ kalʋ mim na wʋra dɩ di dɩ cɔgɩ tɩn?
Wɔɔ mʋ wʋ́ wanɩ o zɩgɩ
mim dɩlʋ na bá dwe maŋa dɩ maŋa tɩn yigə nɩ?»
15 Kʋ nan yɩ wʋlʋ na tɔgɩ cwə-laa
yɩ o yɔɔrɩ o tɛ cɩga tɩn mʋ.
Kʋ tu ba sɛ sɩ o pini nɔɔna sɩ o ma o duni,
yɩ o ba sɛ o joŋi wǝǝnu vwa-tɩtʋŋa baŋa nɩ.
O ba gwaanɩ dɩ balʋ na kɩ bana sɩ ba gʋ nɔɔna tɩn.
O nan brɩ o ba sɛ sɩ o tʋŋɩ lwarɩm.
16 Nɔɔnʋ na yɩ kʋntʋ doŋ,
kʋntʋ tu je mʋ yɩ liǝ ba jɩg-o.
Kʋ nyɩ dɩ o dalɩ piu mʋ.
Maŋa maama wʋnɩ, wʋntʋ ba gaɩ o ni-wʋdiu,
na-nyɔm dɩ nan bá ja-o.
17 Abam wʋ́ nii á na pɛ wʋm na je dɩ paarɩ-zulǝ,
yɩ o paarɩ laŋa kam jagɩ ka yi je maama.
18 Á laan ma á wʋ́ bʋŋɩ wǝǝnu tɩlʋ ya na pɛ abam fʋʋnɩ tɩn wʋbʋŋa
sɩ á ta wɩ: «Dɩdɛɛra yigə tu wʋm bɛ?
Wʋlʋ na fɩn o joŋi lampoo dɩ́ tee nɩ tɩn wʋ yən nɩ mʋ?
Dɩdɛɛrʋ wʋlʋ na zɩgɩ o yɩrɩ tɩʋ kʋm tɩn dɩ bɛ?»
19 Abam nan daa bá na kamun-nyɩna bam kʋntʋ maŋa dɩ maŋa.
Ba yɩ balʋ taanɩ na yɩ dɩ yɩra yɩ á ba ni dɩ kuri tɩn mʋ.
Ba na ŋɔɔnɩ te tɩn nyɩ dɩ ba bibəgi mʋ.a
20 Nii-na Siyɔn tɩʋ kʋm!
Kʋ yɩ mɛ dɩ́ na di dɩ́ candi sɩm da tɩn mʋ.
Abam na nii á na Zeruzalɛm tɩʋ kʋm,
á wʋ́ na wɩ kʋ zɩgɩ cɛpɩ mʋ,
nɩ vwe dɩlʋ na ba bɩbɩgɩ tɩn.
Ba bá wanɩ ba gɔ vwe dɩm kʋntʋ paara.
Dɩ yɩra ŋʋnɩ dɩ nan bá kɔ sɩ dɩ cɔgɩ.
21 Dáanɩ mʋ Baŋa-Wɛ laan wʋ́ taa yɩ dɩ́ Dam Tu.
Bu-tʋlɩ kamunə dɩ nabarɩ wʋ́ taa duri sɩ kɛa
je sɩm kʋntʋ nɩ mʋ.
Pwələ nan bá taa wʋra sɩ dɩ́ dʋna bam ja ba nabwǝǝru
ba ba dáanɩ ba yɛ ba kɛ.
Nabor-kamunnu bá wanɩ tɩ tɔgɩ da tɩ kɛ.
22 Bɛŋwaanɩ, Baŋa-Wɛ mʋ wʋ́ joŋi dɩbam DƖ yagɩ.
DƖ yɩ dɩlʋ na bʋrɩ dɩbam bʋra tɩn mʋ.
DƖ maa paɩ dɩbam DƖ niə yam sɩ dɩ́ taa tɔga.
Dɩntʋ mʋ yɩ dɩ́ pɛ.b
23 Kʋ na yɩ abam naboro kʋm,
kʋ garyi ŋʋnɩ sɩm daa wʋ vɔgɩ diŋ-diŋ,
yɩ kʋ tɩtarɩ bəŋə kam daa ba zɩgɩ dəki.
Kʋntʋ tɩn, viu daa warɩ kʋ yigi garyi dɩm
sɩ naboro kʋm taa yɛ na kʋ veǝ.
Abam nan wʋ́ ba á vrɩ á dʋna bam jɩjɩgɩrʋ á cɛ á pa daanɩ.
Gwaarʋ dɩ wʋ́ na ba pʋpwara,
jɩjɩgɩrʋ tɩm na wʋ́ taa daga zanzan tɩn ŋwaanɩ.
24 Nɔɔn-nɔɔnʋ daa bá taa zʋʋrɩ Siyɔn tɩʋ nɩ
sɩ kʋ tu ta wɩ: «A ba jɩgɩ yazurə mʋ.»
Balʋ na zʋʋrɩ da tɩn,
Wɛ wʋ́ kwe ba lwarɩm DƖ yagɩ DƖ cɛ-ba.