Paarɩ dɩlʋ na wʋ́ tɔgɩ cɩga tɩn
32
Nii-na! Pɛ wʋdoŋ wʋ́ ba o di o paarɩ dɩ cɩga.Tɩʋ kʋm dɩdɛɛra dɩ wʋ́ taa bʋrɩ cɩga bʋra ba pa nɔɔna.
2 Ba dɩdʋa dɩdʋa wʋ́ taa yɩ dalɩm je,
nɩ woro mʋ kwǝli nɔɔna sɩ vu-fɔrɔ yɩ ja-ba.
Baá taa nyɩ dɩ bu-tʋla mʋ kagʋa yuu nɩ
dɩ piu kʋlʋ woro na joŋi nɔɔna sɩ wɩa yɩ di-ba tɩn.
3 Balʋ na nii ba naɩ tɩn maa wʋ́ taa naɩ jaja.
Balʋ zwa dɩ na ni tɩn wʋ́ taa fɔgɩ ba cǝgǝ.
4 Nɔɔna balʋ na ba bʋŋɩ yɩ ba ŋɔɔnɩ tɩn
bʋbʋŋa wʋ́ pʋrɩ sɩ ba ta ma ba ni wəənu kuri.
Balʋ dɩ na ŋɔɔnɩ ba bibəgi tɩn wʋ́ taa ŋɔɔnɩ jasɩ.
5 Nɔɔna daa bá taa tɛ joro nɩ: o yɩ nɔɔnʋ wʋlʋ na maŋɩ dɩ zulə tɩn.
Ba bá ta tɛ dɩdaanɩ balʋ na tusi ba donnə tɩn nɩ:
Abam yɩ nɔɔna balʋ na jɩgɩ kuri tɩn mʋ.
6 Bɛŋwaanɩ, joro ŋɔɔnɩ kʋ jwərim mʋ.
O wʋbʋŋa dɩ maa jeeli lwarɩm kikiə yɩranɩ.
O ba lagɩ sɩ o taa tɔgɩ Wɛ cwǝŋǝ,
yɩ o ni-taanɩ nyɩ dɩ o twɩ Baŋa-Wɛ mʋ.
O maa yagɩ balʋ kana na jɩgɩ-ba tɩn sɩ ka ni-ba.
Kʋ ta na yɩ na-nyɔm na jɩgɩ balʋ tɩn,
o paɩ dɩ cɛ-ba mʋ.
7 Nɔɔnʋ wʋlʋ na tusi o donnə tɩn kikiə yɔɔrɩ ya yɩ pu-sɩŋa yɩranɩ mʋ.
O yǝni o je o bʋŋɩ lwarɩm mʋ,
sɩ o ma vwan o cɔgɩ nabwənə,
dɩ ba na maŋɩ ba beeri sɩ ba na ba cɩga dɩ.
8 Kʋ nan na yɩ nɔn-yɩrʋ, o bʋŋɩ wʋbʋŋ-ŋʋna mʋ.
O maa yǝni o zɩgɩ o tɩtʋŋ-ŋʋna yam kwaga nɩ.
Zeruzalɛm tɩʋ kaana bam taanɩ
9 Kaana bam na je dɩ zurim falalala tɩn,
zaŋɩ-na sɩ á cəgi a taanɩ dɩm!
Tɩʋ kʋm bukwa na ba liǝ tɩn,
cəgi-na amʋ na lagɩ a ta kʋlʋ tɩn!
10 Zɩm mʋ kʋlʋkʋlʋ ba daanɩ abam.
Nan lwarɩ-na nɩ:
bɩnɩ kʋ maɩ tɩntʋ tɩn abam wʋ́ fʋm,
yɩ á yɩra taa saɩ.
Bɛŋwaanɩ, á tweeru tɩm bá le biə.
Wʋdiiru bá kɩ sɩ á zagɩ á ja á zʋ digə.
11 Abam kaana balʋ ya na paɩ
á zʋʋrɩ dɩ yazurə mʋ tɩn,
sɩ á yɩra taa saɩ.
Bukwa balʋ na ba liǝ tɩn,
kwarɩ-na fʋʋnɩ.
Lɔɔrɩ-na á gwaarʋ tɩm,
sɩ á daarɩ á ləri á vɔ gwar-zɩnzwara á te sɩm nɩ.
12 Daŋɩ-na á jɩan á nyɔɔna nɩ wʋ-cɔgɔ ŋwaanɩ
dɩ á karɩ sɩm na cɔgɩ
yɩ á vinyə tweeru ba ləri biə tɩn ŋwaanɩ.
13 Nan keeri-na amʋ nɔɔna tɩga kam ŋwaanɩ,
sabarɩ yɩranɩ laan na jɩgɩ-ka.
Ywəəni dɛɛn mʋ wʋ tɩʋ kʋm je maama nɩ,
yɩ nɔɔna caka kʋ sam dɩm wʋnɩ.
Laan nan taá keerǝ tɩʋ kʋm ŋwaanɩ.
14 Nɔɔna wʋ́ duri ba daarɩ pɛ sɔ-fɔrɔ kʋm.
Tɩʋ kʋm kʋntʋ ya na su dɩ sɔɔ tɩn,
nɔɔn-nɔɔnʋ daa bá taa zʋʋrɩ kʋ wʋnɩ.
Kʋ dam je sɩm dɩ mɛ ba na zɩgɩ da ba yɩrɩ-kʋ tɩn maama cɔgɩ.
Kagʋa wʋʋ bɩnɛ dɩ vara yɩranɩ laan mʋ jeeri da ba di gaa.
15 Kʋʋ́ taa yɩ kʋntʋ mʋ sɩ Wɛ laan pa DƖ Joro nuŋi wɛyuu nɩ
kʋ ba dɩ́ baŋa.a
Maŋa kam kʋntʋ nɩ, kagʋa kam wʋ́ ji tɩ-ywəŋə,
yɩ tɩ-ywəŋə kam dɩ laan ji kagʋa mɛ na li dɩ tweeru tɩn.
16 Je maama nɩ nɔɔna wʋ́ taa tɔgɩ cɩga kikiə,
kagʋa yuu dɩ tɩ-ywəŋə nɩ dɩ.
17 Ba nɔn-ŋʋnnɩ kikiə wʋ́ pa zurim mʋ taa wʋra.
Ba ta wʋ́ taa je dɩ yazurə maŋa maama
ba cɩga tɩtʋŋa yam ŋwaanɩ.b
18 Amʋ nɔɔna bam wʋ́ taa zʋʋrɩ je sɩlʋ nɩ
yazurə na wʋra tɩn mʋ.
Daanɩm dɩ liǝ bá yi-ba ba sam dɩm wʋnɩ.
19 Dʋ-kambana na maŋɩ ya cɔgɩ kagʋa kam,
yɩ tɩʋ kʋm maama ba tɩga te maama dɩ,
20 abam ta wʋ́ taa jɩgɩ yu-yoŋo.
Á wʋ́ vu á du á wo-dwə bu-tʋla maama ni nɩ.
Á ta wʋ́ yagɩ á naanɩ dɩ á bɩnɛ sɩm,
sɩ dɩ taa kaagɩ dɩ beeri yɔɔ dɩ di gaa.