Lɛɛrʋ wʋ́ yi balʋ na salɩ Ezipi yɩra nɩ tɩn
31
Lɛɛrʋ wʋ́ yi balʋ na kaagɩ ba ve Ezipi tɩʋ sɩ ba beeri zǝnǝ,yɩ ba daarɩ ba tɩɩgɩ siseŋ-nɔɔna baŋa nɩ tɩn.
Bantʋ tɩɩna daŋɩ ba sise-tərikooru baŋa nɩ mʋ
tɩ na daga tɩn ŋwaanɩ.
Ba tɩɩna ta daŋɩ ba sise diinə baŋa nɩ,
ba na jɩgɩ baarɩ tɩn ŋwaanɩ.
Ba yigə nan tǝri Yisɩrayɛlɩ dwi dɩm Wʋ-poŋo Tu wʋm wʋnɩ.
Ba ba loori Baŋa-Wɛ sɩ DƖ zǝni-ba.
2 Baŋa-Wɛ nan jɩgɩ swan!
DƖ waɩ DƖ paɩ lɛɛrʋ yi nɔɔna.
DƖ maa ba joori DƖ ni dɩm kwaga nɩ.
Kʋ na yɩ nɔɔna balʋ dwi maama na tʋŋɩ lwarɩm tɩn,
kʋ wǝli dɩ balʋ na zɩgɩ ba kwaga nɩ tɩn,
DƖ lagɩ DƖ zaŋɩ ba baŋa nɩ mʋ DƖ waarɩ-ba.
3 Ezipi tiinə bam nan yɩ nabiinǝ mʋ sɩ ba daɩ Wɛ.
Ba siseŋ-nɔɔna maa jɩgɩ yɩ-daa,
sɩ sɩ daɩ jwəəru tɩlʋ tʋʋnɩ na warɩ dɩ ja tɩn.
Baŋa-Wɛ nan na twɩ DƖ jɩŋa sɩ DƖ waarɩ-ba,
tɩʋ kʋlʋ nɔɔna ya na jɩgɩ dam tɩn wʋ́ tri ba tʋ tɩga nɩ mʋ.
Balʋ dɩ na beeri zǝnǝ ba tee nɩ tɩn dɩ maa wʋ́ tʋ,
pa ba maama laan tɔgɩ daanɩ ba je.
4 Baŋa-Wɛ dɩ ma ta tɩntʋ dɩ amʋ DƖ wɩ:
«Amʋ Baŋa-Wɛ wʋ́ kɩ nɩ nyoŋo mʋ suurə,
naa nyoŋ-pwalaa na nɛ nwanɩ yɩ ka ŋuuni te tɩn.
Nayɩrɩ-kɔgɔ na gilimi daanɩ sɩ ba zəli-kʋ
yɩ ba kaasɩ te maama dɩ,
kʋ bá fʋm.
Ba sɔɔ kʋm bá pa kʋ yɩra taa saɩ.
Paŋwa Tu Baŋa-Wɛ dɩ wʋ́ fʋʋrɩ DƖ cu kʋntʋ doŋ mʋ,
sɩ DƖ kɩ najara Siyɔn piu kʋm yuu nɩ.
5 Kʋ nyɩ dɩ zuŋə na lwarɩ ka vwana
ka cɩcara baŋaa nɩ tɩte tɩn mʋ,
kʋntʋ mʋ Paŋwa Tu Baŋa-Wɛ dɩ lagɩ
DƖ taa kwǝli Zeruzalɛm.
DƖ wʋ́ cɩ tɩʋ kʋm sɩ cam yɩ yi-kʋ,
yɩ DƖ daarɩ DƖ joŋi-kʋ DƖ yagɩ,
DƖ maa wʋ́ tɔgɩ kʋ baŋa nɩ DƖ kɛ
sɩ DƖ vrɩ kʋ nɔɔna bam DƖ yagɩ.»
6 Yisɩrayɛlɩ tiinə bam, pipiri-na á joori Baŋa-Wɛ te, dɩ á ya na yɔɔrɩ á kwe a kwaga á ya‑DƖ te dɩ. 7 Maŋa kam kʋntʋ na yiǝ, abam dɩdʋa dɩdʋa wʋ́ vɩn jwǝnǝ yalʋ á na cɔgɩ á ma á tɩtɩ jɩan á kwe səbu-poŋo dɩ səbu-sɩŋa á kɩ-ya tɩn.
8 «Asiiri tiinə bam wʋ́ tɩ najara wʋnɩ.
Kʋ nan daɩ nabiinǝ sʋ-lwaanʋ mʋ lagɩ tɩ gʋ-ba.
Kʋ yɩ Wɛ sʋ-lɔŋɔ kʋm mʋ lagɩ kʋ gʋ-ba.
Ba jar-kərə bam wʋ́ kwaanɩ sɩ ba duri ba lu.
Wʋlʋ na wanɩ-ba tɩn wʋ́ fɩn ba nɔn-dʋnnʋ tɩm
o dɩ tɩtʋŋ-cɛɛra wʋnɩ.
9 Baá duri ba daarɩ ba dam je sɩm,
fʋʋnɩ na jaanɩ-ba tɩn ŋwaanɩ.
Ba dɩdɛɛra bam na nɛ jara-kǝm drapoo na zǝŋi wɛɛnɩ tɩn,
ba wʋbʋŋa wʋ́ vugimi mʋ yɩ fʋʋnɩ zʋ-ba.»
Baŋa-Wɛ na tagɩ kʋlʋ tɩn mʋ kʋntʋ.
DƖ maa yɩ dɩlʋ na tarɩgɩ mim Siyɔn piu yuu nɩ,
yɩ DƖ dwe mini-fɔrɔ Zeruzalɛm tɩʋ kʋm wʋnɩ tɩn.