Ba yɩ kɩ ba tɩɩna Ezipi wʋnɩ
30
Baŋa-Wɛ na tagɩ kʋlʋ tɩn mʋ tɩntʋ:«Lɛɛrʋ wʋ abam baŋa nɩ
dɩ á na yɩ yi-dɛ-nyɩna tɩn.
Wʋbʋŋa yalʋ abam na jɩgɩ á ma á tʋŋɩ tɩn daɩ amʋ wʋbʋŋa.
Abam ta maa ve á kɩ ni-mɔrɔ dɩ tɩɩnɩ dɩdonnǝ,
yɩ amʋ wʋ pɛ cwǝŋǝ sɩ á kɩ kʋntʋ.
Á kikiə yam kʋntʋ maa paɩ á yɔɔrɩ á kɩ lwarɩm
á daŋɩ da-baŋa nɩ.
2 Abam duri á vu Ezipi tɩʋ nɩ mʋ
yɩ á maŋɩ á wʋ bwe-nɩ sɩ á lwarɩ a wʋbʋŋa.
Abam ya tɩɩnɩ nɩ Ezipi tɩʋ pa-farʋ wʋm wʋ́ taa jɩgɩ abam
o kwǝlə o woro wʋnɩ mʋ.
3 Ama, Farɔn səgim jəgə kam lagɩ ka pipiri ka ji cavɩɩra mʋ ka pa abam.
Kʋ daarɩ sɩ Ezipi woro kʋm pipiri kʋ ji wʋ-cɔgɔ kʋ pa abam.
4 Á dɩdɛɛra badonnǝ maŋɩ ba wʋ Sʋan nɩ,
yɩ á tʋŋɩ badonnǝ sɩ ba vu ba yi Hanɛsɩ.
5 Dɩ kʋ dɩ, cavɩɩra mʋ lagɩ ya di Zuda tiinə bam maama,
dɩ ba na kwe ba tɩɩna ba daŋɩ tɩ-kafɛ baŋa nɩ tɩn.
Tɩʋ kʋm kʋntʋ ba jɩgɩ zǝnǝ sɩ kʋ pa-ba.
Goonə dɩ cavɩɩra yɩranɩ mʋ
kʋ lagɩ kʋ pa ba na.»
6 Wɛ kwǝrǝ mʋ tɩntʋ sɩ kʋ tɔgɩ vara balʋ na wʋ jagwiə seeni kagʋa kam wʋnɩ tɩn:
Tɩga kam kʋntʋ sɩɩnɩ ka cana yɩ daanɩm zanzan wʋra.
Nywəənu maa wʋ je sɩm maama nɩ,
kʋ wǝli dɩ bɩsankwɩ dɩdaanɩ kapɛ.
Dɩ kʋ dɩ, dɩdɛɛra kwe ba jɩjɩgɩrʋ mʋ
ba daŋɩ bɩnɛ dɩ yogondə baŋa nɩ ba tɔgɩ da
sɩ ba ja ba vu ba pa tɩʋ kʋm kʋntʋ nɔɔna.
Kʋ maa yɩ tɩʋ kʋlʋ na ba jɩgɩ nyɔɔrɩ kʋ pa-ba tɩn mʋ.
7 Ezipi tɩʋ bá wanɩ abam kʋ wǝli dɩ fɩnfɩɩn dɩ.
Kʋntʋ ŋwaanɩ mʋ amʋ kwe bəsəm a pa-kʋ,
sɩ ba taa bǝi ba wɩ: ‹Rahabɩa na je cɩmm tɩn›.
Nɔɔna balʋ na nuŋi Wɛ kwaga nɩ tɩn taanɩ
8 Pʋpʋnɩ wǝǝnu tɩntʋ maama
n tiŋi n pa nɔɔna bam.
Kɩ-tɩ tɔnɔ wʋnɩ sɩ tɩ taa tigi da jwa seeni ŋwaanɩ,
sɩ kʋ taa yɩ maana kʋ pa-ba maŋa maama.
9 Ba yɔɔrɩ ba yɩ zwabani-nyɩna mʋ,
yɩ ba soe vwan tɩtʋŋa.
Ba maa wʋ sɛ kwiə yalʋ Baŋa-Wɛ na pɛ-ba tɩn.
10 Ba maa tɛ dɩ sampwəri sɩm ba wɩ:
«Daa yɩ taá nii á naɩ vɩɩra!»
Ba ta maa tɛ dɩ Wɛ nijoŋnǝ bam ba wɩ:
«Daa yɩ ta-na cɩga á brɩ dɩbam!
Nan ta-na wǝǝnu tɩlʋ na ywənə pugə nɩ tɩn,
sɩ á ma á ganɩ dɩbam.
11 Ywəri-na cwǝŋǝ kam wʋnɩ,
sɩ á daa yɩ cɩ dɩ́ yigə.
Á yɩ taa ŋɔɔnɩ Yisɩrayɛlɩ dwi dɩm Wʋ-poŋo Tu wʋm taanɩ
á brɩ dɩbam.»
12 Kʋntʋ ŋwaanɩ, Yisɩrayɛlɩ dwi dɩm Wʋ-poŋo Tu wʋm nan tagɩ tɩntʋ:
«Abam sɩɩnɩ á vɩn amʋ kwǝrǝ kantʋ mʋ,
yɩ á daarɩ á sɛ vuvugə tɩtʋŋa
sɩ á taá ma á ganɩ nɔɔna.
Á na tɔgɩ kikiə yam kʋntʋ doŋ tɩn ŋwaanɩ,
13 á wʋ́ yɔɔrɩ á tʋ dɩ á bʋra mʋ.
Abam wʋ́ tʋ tɩga nɩ nɩ kəbrə na dwara
yɩ ka jɩgɩ luluə ka yɩra nɩ tɩn mʋ.
Kəbrə kam lagɩ ka da ka tʋ mʋ buri buri bɩdwɩ baŋa nɩ.
14 Abam ta lagɩ á tʋ á cɩcʋgɩ
nɩ kambiə kalʋ ba na fǝri tɩga nɩ
pa ka ji kacwi mugə-mugə yɩranɩ tɩn mʋ.
Kacuə daa bá daarɩ
sɩ ba wanɩ min-calɩ ba kwe ba kɩ ka wʋnɩ,
naa sɩ ba danɩ na ba kɩ kɔɔrʋ wʋnɩ.»
15 Yuutu Baŋa-Wɛ dɩm na yɩ Yisɩrayɛlɩ dwi dɩm Wʋ-poŋo Tu tɩn na tagɩ te tɩn mʋ tɩntʋ:
«Abam ya na ləri á wʋbʋŋa
pa á joori amʋ te,
á yaá na á vrɩm, yɩ á ta sin.
Á ya na yɩ cɩmm mʋ,
yɩ á daarɩ á salɩ amʋ yɩra nɩ,
á yaá na á dam dɩm.
Abam nan ba sɛ sɩ á kɩ kʋntʋ.
16 Abam nan bʋŋɩ á tɩtɩ nɩ mʋ á wɩ:
‹Dɩbam wʋ́ kwe dɩ́ siseŋ-nɔɔna
dɩ́ duri dɩ́ dʋna yigə nɩ sɩ dɩ́ lu!›
Cɩga tɩn, á wʋ́ sɩɩnɩ á duri sɩ á lu!
Á ta tɛ mʋ wɩ: ‹Dɩ́ siseŋ-nɔɔna bam wara,
dɩ́ wʋ́ di-sɩ mʋ dɩ́ lu.›
Cɩga tɩn, á dʋna bam nan wara ba dwe abam.
17 Á dʋna bam wʋnɩ nɔɔnʋ dɩdʋa na bagɩ tiguri-kaasa,
á nɔɔna mʋrʋ mʋ wʋ́ duri ba daarɩ‑o.
Kʋ laan na yɩ á dʋna bam banu,
ba yi sɩ ba fugi abam maama sɩ á duri á daarɩ-ba.
Sɩ kʋ kweeli tɩn, á wʋ́ duri á daarɩ á nɔɔna fɩnfɩɩn.
Baá taa yɩ ba yɩra,
nɩ daa na zɩgɩ gəli-gəli
ka zǝŋi drapoo piu yuu nɩ te tɩn.»
Baŋa-Wɛ wʋ́ duri DƖ nɔɔna yibwənə
18 Kʋ nan na yɩ te tɩn,
Baŋa-Wɛ ta lagɩ sɩ DƖ kɩ abam yu-yoŋo mʋ.
DƖ ma yɔɔrɩ DƖ ti DƖ yigə sɩ DƖ duri abam yibwənə.
Bɛŋwaanɩ, Baŋa-Wɛ yǝni DƖ bʋrɩ cɩga bʋra mʋ.
Balʋ na kɩ ba tɩɩna dɩ DƖ tɩn tiini ba jɩgɩ yu-yoŋo.
19 Nɔɔna daa wʋ́ taa zʋʋrɩ Siyɔn nɩ. Abam daa yɩ taá keeri-na Zeruzalɛm tɩʋ nɩ. Baŋa-Wɛ wʋ́ duri á ŋwaŋa nɩ á na keeri á loori-DƖ. DƖ na yɔɔrɩ DƖ ni á kərə kam, DƖ wʋ́ ləri abam loro. 20 Baŋa-Wɛ sɩɩnɩ DƖ kwe yaara dɩ cam mʋ DƖ pa abam, sɩ tɩ ji á ni-wʋdiu, dɩ á na sɩ á nyɔ. Wʋlʋ na jɩgɩ Wɛ zaasɩm dɩm o zaasɩ abam tɩn daa bá səgi o tɩtɩ. Á yiǝ wʋ́ yɔɔrɩ ya na‑o. 21 Abam na ywəri cwǝŋǝ yɩ á vu jazɩm seeni, naa jagwiə seeni dɩ, á wʋ́ ni kwǝrǝ na zɩgɩ á kwaga nɩ ka ŋɔɔnɩ dɩ abam ka wɩ: «Cwǝŋǝ kam mʋ tɩntʋ á yigə nɩ. Ve-na ka wʋnɩ.» 22 Kʋ na yɩ á jwǝnǝ yalʋ ba na kwe səbu-poŋo dɩ səbu-sɩŋa ba gɔgɩrɩ-ya tɩn, abam laan maa wʋ́ taa nii-ya nɩ ya yɩ weeru mʋ á yigə nɩ. Á wʋ́ dʋlɩ-ya á yagɩ, nɩ á na kɩ te dɩ wo-zɔɔna tɩn mʋ, yɩ á ta dɩ-ya nɩ: «Lagɩ-na je dɩ́ yigə nɩ.»
23 Abam na dugi á wo-dwə, Baŋa-Wɛ wʋ́ pa dʋ-ŋwɩ nɩ sɩ á wʋdiiru kɩ lanyɩranɩ, sɩ á zagɩ wʋdiiru zanzan. Maŋa kam kʋntʋ na yiǝ, á vara dɩ wʋ́ na pwələ yala-yala sɩ ba taa di ga-zuru da. 24 Na-bɛ dɩ bɩnɛ sɩlʋ na tʋŋɩ á karɩ sɩm nɩ tɩn tɩtɩ wʋ́ taa di mɩna yalʋ ba na caarɩ mɩn-swaanʋ tɩm lanyɩranɩ ba yagɩ ba daarɩ-ya tɩn mʋ. 25 Maŋa kam kʋntʋ nɩ á wʋ́ yɔɔrɩ á di á dʋna sɩ ba dalɩm je sɩm vaarɩ sɩ tʋ tɩga nɩ. Na maa wʋ́ taa burǝ pweeru dɩ zwǝǝnu maama yuu nɩ ba duri ba tu tɩga nɩ barɩ-barɩ. 26 Cana kam wʋ́ pɩɩrɩ pa ka pooni dɩ wɩa pooni taa maɩ daanɩ. Wapuli dɩm dɩ wʋ́ tiini ka nyɩ ka wǝli da kuni bɩrpɛ, nɩ da yarpɛ pooni na lagɩ dɩ kɩ daanɩ te tɩn. Kʋntʋ maama wʋ́ kɩ nɩ Baŋa-Wɛ na tu DƖ toŋi DƖ nɔɔna kwi sɩlʋ na bwəri tɩn, yɩ DƖ daarɩ DƖ pa ba fufwələ yam fɔgɩ tɩ kwɛ.
27 Nii-na! Baŋa-Wɛ zɩgɩ yigə yigə mʋ DƖ bɩɩnɩ,
yɩ DƖ yɩrɩ dɩm paarɩ-zulǝ nii kʋ naɩ jaja.
DƖ wʋ tiini kʋ fuli mʋ yɩ nyʋa zaŋa guli-guli.
Ban-lʋm taanɩ dɩlʋ na nuŋi DƖ ni nɩ tɩn
yɩ nɩ min-vʋgʋ na di wǝǝnu bugi-bugi te tɩn mʋ.
28 DƖ na sin DƖ mʋmwa viu,
kʋ nyɩ dɩ na-fara na fufugi
ba di ba maŋɩ nɔɔnʋ ban seeni tɩn mʋ.
DƖ maa jɩgɩ dwi-gɛ tiinə bam DƖ cɔga
nɩ DƖ zɛ-ba yɔlɔ nɩ mʋ te.
DƖ ta maa kɩ-ba nɩ DƖ na kwe gara DƖ kɩ ba niə nɩ,
sɩ DƖ pa ba ywəri ba cwǝŋǝ wʋnɩ te tɩn mʋ.
29 Wɛ nɔɔna bam, abam nan wʋ́ di ywəəni, nɩ á na yǝni á di candiə á ma á zuli Wɛ yɩ á leeni le tɩtɩɩ nɩ te tɩn. Á wʋ́ kɩ wʋpolo sɩ kʋ nuŋi á bɩcara nɩ, nɩ á na magɩ kɔgɔ á diini Baŋa-Wɛ piu kʋm tɩn mʋ, sɩ á vu á zuli wʋlʋ na yɩ Yisɩrayɛlɩ tiinə piu tɩn, yɩ nɔɔna wui wi ba tɔgɩ á yigə ba veǝ. 30 Baŋa-Wɛ maa wʋ́ bagɩ dɩ kwǝr-dɩa, pa nɔɔna lwarɩ DƖ na jɩgɩ nɩnwaŋa dɩ dam te tɩn. DƖ ta wʋ́ twɩ DƖ jɩŋa sɩ DƖ waarɩ nɔɔna DƖ ban-lʋm dɩm ŋwaanɩ. DƖ maa wʋ́ fugi-ba dɩ min-vʋgʋ na di bugi-bugi tɩn, dɩ vu-fɔrɔ, dɩ dʋa bagɩm, dɩ dʋ-kambana. 31 Baŋa-Wɛ kwǝrǝ na zaŋɩ kʋntʋ, fʋʋnɩ wʋ́ tiini dɩ ja Asiiri tiinə bam. DƖ lagɩ DƖ kwe da-lɔŋɔ mʋ DƖ magɩ-ba DƖ dɩ tɩga nɩ. 32 Kʋ na wʋ́ kɩ te tɩn, Baŋa-Wɛ wʋ́ taa tiini DƖ dʋlɩ-ba ja-guli-zana mʋ sɩ DƖ kɩ jara dɩ ba. DƖ na kwe DƖ da-lɔŋɔ kʋm sɩ DƖ ma DƖ waarɩ-ba maŋa dɩ maŋa, nɔɔna wʋ́ taa wɔɩ sɩnyɛ yɩ ba taɩ kwaanʋ wʋpolo ŋwaanɩ. 33 Bɛŋwaanɩ, Baŋa-Wɛ nan maŋɩ DƖ kwɛ jǝgǝ ba na wʋ́ zwɛ twa da tɩn. Ba ti yigə sɩ ba zwɛ Asiiri tɩʋ pɛ wʋlʋ na tɩgɩ tɩn yɩra dáanɩ. Mim je sɩm kʋntʋ luunə, yɩ sɩ ta yalma dɩ. Ba ma tiŋi dɛ zanzan ba kɩ da sɩ mim taa di bilǝm-biləm. Baŋa-Wɛ nan na sin DƖ mʋmwa viu, kʋ nyɩ dɩ ciribi mʋ nyɩɩnɩ yɩ kʋ duri nɩ bugə tɩn. Kʋ laan maa wʋ́ taa jɩg-o kʋ di bugi-bugi!