Davidi tɩʋ Zeruzalɛm taanɩ
29
Areli, nmʋ mʋ yɩ tɩʋ kʋlʋ wʋnɩ Davidi dɛɛn na zʋʋrɩ tɩn,Lɛɛrʋ nan wʋ́ yi tɩʋ kʋm kʋntʋ nɔɔna bam!
Abam na laga,
taá di-na á candi sɩm bɩnɩ maama.
2 Amʋ Baŋa-Wɛ nan lagɩ a kɩ jara dɩ Areli tiinə bam mʋ.
Baá taa keeri mʋ, yɩ ba ŋwana.
Amʋ wʋ́ pa tɩʋ kʋm ji nɩ bimbim dɩlʋ ba na zwɛ wǝǝnu
ba ma kɩ kaanɩm da tɩn mʋ.
3 Amʋ tɩtɩ mʋ lagɩ a jeeri tɩʋ kʋm dɩ najara.
A maa wʋ́ kaagɩ kʋ maama a pu,
yɩ a daarɩ a lɔ taala a yǝri kʋ yɩra nɩ sɩ a di-kʋ.
4 Abam wʋ́ ba tɩga mʋ
yɩ á taá tigi da á ŋɔɔna.
Á ŋwaŋa kam wʋ́ nuŋi tɩɩrʋ wʋnɩ sɩ ka zaŋɩ fɩnfɩɩn.
Á wʋ́ taá waasɩ tɩga-tɩga nɩ cirǝ na ŋɔɔnɩ te tɩn.
5 Abam dʋna kɔgɔ kʋm wʋ́ taa daga nɩ fogo mʋ te.
Ba nan wʋ́ ji nɩ swannʋ, viu na kalɩ-tɩ kʋ ja je tɩn.
Bɩdwɩ baŋa nɩ mʋ
6 Paŋwa Tu Baŋa-Wɛ nan lagɩ DƖ da DƖ ba.
DƖ maa wʋ́ tɔgɩ dɩ dʋa bagɩm, dɩ tɩga sisiŋim, dɩ sɔɔ zanzan DƖ ba.
DƖ ta wʋ́ ba dɩ vu-fɔrɔ dɩ kʋ fufugim,
dɩ mim na di wǝǝnu bilǝm-biləm te tɩn mʋ.
7 Kʋ na yɩ dwi-gɛ tiinə jar-kərə balʋ na tu sɩ ba zaŋɩ najara dɩ Areli,
yɩ ba kaagɩ tɩʋ kʋm dɩ kʋ dam je sɩm maama ba pu tɩn,
bantʋ wʋ́ je lɩla, nɩ nɔɔnʋ na zaŋɩ dɔɔnɩ wʋnɩ
yɩ o dɩndwɛ je te tɩn mʋ.
8 Kʋʋ́ kɩ nɩ kana na cɛ nɔɔnʋ
pa kʋ tu dwɛ nɩ: o jɩgɩ wʋdiu mʋ o di.
O maa na dɔ o zaŋɩ tɩn, o kana kam ta wɔɛ.
Kʋ ta nyɩ nɩ na-nyɔm na jɩgɩ nɔɔnʋ wʋlʋ
yɩ kʋ tu dwɛ nɩ o jɩgɩ na mʋ o nyɔa.
O maa na zaŋɩ dɔɔm nɩ,
o yɔɔrɩ o lagɩ o bəri mʋ dɩ na-nyɔm.
Kʋ nan wʋ́ kɩ kʋntʋ doŋ mʋ
dɩ dwi-gɛ tiinə jar-kərə balʋ na tu
ba zaŋɩ najara dɩ Siyɔn piu kʋm tiinə tɩn.
9 Nan yagɩ-na sɩ kʋ sʋ abam, sɩ á taá zɩgɩ yǝǝu.
Pa-na sɩ á yiǝ dwe, sɩ á yɩ taá naɩ.
Taá bəri-na, yɩ kʋ daɩ á na bugi sana tɩn ŋwaanɩ.
Ta á ve-na cwǝŋǝ yuu dɩ gaa,
yɩ kʋ daɩ nɩ kʋ tɔgɩ sa-dɛɛra baŋa nɩ mʋ.
10 Baŋa-Wɛ pɛ á tiini á dɔ á kɛ mʋ.
DƖ ta ma ja á nijoŋnǝ bam yiǝ yam DƖ kwǝni.
DƖ ma pa ba kwǝli abam sampwəri sɩm dɩ yum.a
11 Kʋ na yɩ te tɩn, Wɛ na vɩɩrɩ taanɩ dɩlʋ DƖ brɩ abam tɩn nyɩ dɩ ba na pʋpʋnɩ bɩtarɩ sɩlʋ ba kɩ tɔnɔ wʋnɩ, yɩ ba daarɩ ba kwǝni kʋ ni tɩn mʋ. Nmʋ na kwe-kʋ n pa tɔnɔ tu yɩ n ta dɩ kʋ tu n wɩ: «A loori-m! Karɩmɩ tɔnɔ kʋntʋ sɩ a cəgi,» kʋ tu wʋ́ ləri mʋ nɩ: «Amʋ ba wanɩ-kʋ a karɩmɩ, kʋ ni na məəni tɩn ŋwaanɩ.» 12 N nan na kwe-kʋ n pa wʋlʋ na yǝri tɔnɔ tɩn, yɩ n ta dɩd-o n wɩ: «A loori-m! Karɩmɩ tɔnɔ kʋntʋ sɩ a cəgi,» kʋ tu wʋ́ ləri mʋ wɩ: «Amʋ yǝri tɔnɔ kara.»
13 Baŋa-Wɛ nan taga DƖ wɩ:
«Nɔɔna bantʋ zuli amʋ dɩ ba ni mʋ,
yɩ ba yǝni ba ta nɩ: ba sɛ amʋ ni.
Ba wʋbʋŋa nan tǝrǝ amʋ tee nɩ.
Ba na paɩ amʋ zulə te tɩn maama yɩ kafɛ mʋ,
kʋ na tɔgɩ nabiinǝ wʋbʋŋa cullu tɩn ŋwaanɩ.
14 Kʋntʋ ŋwaanɩ mʋ a daa wʋ́ joori
a kɩ wo-kɩnkagɩla a saŋɩ daanɩ sɩ kʋ sʋ-ba zanzan.
Swan tiinə bam wʋbʋŋa maama wʋ́ je mʋ,
sɩ yi-pʋrɩ-nyɩna bam dɩ yi-pʋrʋ kʋm ji kafɛ.»b
15 Lɛɛrʋ wʋ́ yi balʋ na kʋ tɩga ba zʋʋrɩ
sɩ ba səgi ba wʋbʋŋa Baŋa-Wɛ yigə nɩ tɩn.
Bantʋ tʋŋɩ ba tɩtʋŋa lim nɩ mʋ yɩ ba bʋŋɩ ba wɩ:
«Wɔɔ mʋ naɩ dɩbam?
Wɔɔ mʋ ye dɩ́ na jɩgɩ kʋlʋ dɩ́ kɩ tɩn ni nɩ?»
16 Abam nan kwaanɩ sɩ á pa na mʋ duri tuntulə.
Kamɔgɔ dɩ kʋ mɔrʋ, wɔɔ mʋ dwe?
Nyɩnyʋgʋ wʋ́ wanɩ kʋ ta dɩ kamɔ-mɔrʋ wʋm wɩ:
«Kʋ daɩ nmʋ mʋ kɩ nɩ» na?
Kambiə dɩ nan wʋ́ wanɩ o ta wʋlʋ na mɔɔnɩ-ka tɩn taanɩ ka wɩ:
«Wʋlʋ na kɩ-nɩ tɩn yǝri kʋlʋkʋlʋ» na?
17 Kʋ daa bá daanɩ sɩ Liban kagʋa kam na li dɩ tweeru tɩn
pipiri ka ji kara.
Kara kalʋ maa na lana dɩ varɩm tɩn
dɩ wʋ́ pipiri ka ji kagʋa.
18 Maŋa kam kʋntʋ nan na yiǝ,
zwa-kwarʋ wʋ́ ni tɔnɔ kʋm wʋ taanɩ dɩm.
Lilwǝ na je lim-nyɔrɩsɩ wʋnɩ tɩn yiǝ wʋ́ puri
sɩ ba na kʋlʋ na jɩgɩ kʋ kɩ tɩn.c
19 Nabwənə laan maa wʋ́ joori ba di ywəəni Baŋa-Wɛ ŋwaanɩ.
Yinigə tiinə dɩ maa wʋ́ kɩ wʋpolo
Yisɩrayɛlɩ dwi dɩm Wʋ-poŋo Tu wʋm ŋwaanɩ.d
20 Wʋ-lʋn-nyɩna wʋ́ je.
Kamun-nyɩna dɩ daa maa bá taa wʋra.
Balʋ maama na jɩgɩ pu-sɩŋa kikiə pugə ba je tɩn dɩ dwi wʋ́ saarɩ.
21 Bantʋ maa jɩgɩ ba donnǝ ba sʋga.
Ba maa jaanɩ cɩga ba juə sɩ cɩga bʋra yɩ taa tʋŋa,
yɩ ba fɔ vwan pa cɩga tiinə ba naɩ ba bʋra.
22 Baŋa-Wɛ mʋ yɩ dɩlʋ na joŋi Abraham DƖ yagɩ tɩn. DƖ nan tɛ tɩntʋ mʋ dɩ Zakɔbɩ dwi tiinə bam:
«Cavɩɩra daa bá ja Zakɔbɩ dwi tiinə bam,
sɩ ba yum taa vɩɩla.
23 Ba na nii ba naɩ ba biə bam na daga te ba tɩtarɩ nɩ,
yɩ ba yɩ balʋ amʋ mʋ na kwe a pa-ba tɩn,
ba laan wʋ́ zuli amʋ yɩrɩ dɩm.
Baá taa nɩgɩ amʋ wʋlʋ na yɩ Zakɔbɩ dwi tiinə Wʋ-poŋo Tu wʋm tɩn.
Ba maa wʋ́ da kʋ ŋwaanɩ ba taa kwarɩ amʋ wʋlʋ na yɩ Yisɩrayɛlɩ tiinə Wɛ dɩm tɩn.
24 Balʋ na cɔgɩ ba wʋbʋŋa nɩ tɩn laan maa wʋ́ na yi-pʋrʋ.
Balʋ dɩ na soe pʋmpʋna tɩn wʋ́ sɛ sɩ ba joŋi zaasɩm.»