Lɛɛrʋ wʋ́ yi Efrayim dwi tiinə bam
28
Lɛɛrʋ wʋ́ yi Efrayim dwi tiinə tɩʋ kamunu kʋm,dɩ kʋ sa-nyɔra bam na jɩgɩ fiə kʋ ŋwaanɩ te tɩn.
Kʋ maa nyɩ nɩ punnu tɩlʋ nɩnwaŋa na lagɩ ka ti tɩn mʋ.
Kʋ lam dɩm wʋ́ je lɩla.
Tɩʋ kʋm zɩgɩ tɩ-ywəŋə bolo baŋa seeni mʋ.
Kʋ nɔɔna bam maa nyɔ sana ba bugə,
yɩ ba jɩgɩ tɩɩra ba tɩʋ kʋm ŋwaanɩ.
2 Nii-na dɩ́ Yuutu Wɛ dɩm nan lagɩ DƖ tʋŋɩ dɩdɛɛrʋ
na tiini o jɩgɩ dam tɩn mʋ sɩ o ba ba baŋa.
Kʋ tu wʋ́ magɩ-ba o dɩ tɩga nɩ,
nɩ dʋ-kambana naa vu-fɔrɔ na tui kʋ cɔgɩ wǝǝnu te tɩn.
Kʋ ta wʋ́ kɩ nɩ na-fara na cuuri
yɩ kʋ coori wǝǝnu kʋ viirǝ te tɩn mʋ.
3 Efrayim tɩʋ sa-nyɔra bam na jɩgɩ tɩɩra dɩ kʋlʋ tɩn mʋ,
ba lagɩ ba nɔnɩ-kʋ ba sɩn tɩga nɩ.
4 Ba tɩʋ kʋm sɩɩnɩ kʋ zɩgɩ tɩ-ywəŋə bolo baŋa nɩ.
Dɩ kʋ dɩ, kʋ lam dɩm, dɩ kʋ nɩnwaŋa kam maama laan wʋ́ je mʋ.
Kʋʋ́ taa nyɩ nɩ mɔɔla na bɩgɩ tɩ ti
yɩ tɩ maŋɩ sɩ ba su-tɩ ba dɩ tɩga nɩ tɩn mʋ.
Nɔɔnʋ na nɛ-tɩ yɩ o gwəri dɩ o jɩŋa,
oó yɔɔrɩ o kwe-tɩ o magɩ o ni nɩ mʋ.
5 Maŋa kam kʋntʋ na yiǝ, Paŋwa Tu Baŋa-Wɛ tɩtɩ
mʋ wʋ́ pa DƖ nɔɔna balʋ ta na daarɩ tɩn
taa jɩgɩ nɩnwaŋa dɩ lam lanyɩranɩ.
Kʋʋ́ taa nyɩ dɩ Dɩntʋ mʋ yɩ ba paarɩ yipugə.
6 DƖ maa wʋ́ kwe cɩga wʋbʋŋa DƖ pa balʋ na di nɔɔna taanɩ tɩn,
sɩ ba ma-ya ba bʋrɩ cɩga bʋra ba pa nɔɔna.
Kʋ ta na yɩ balʋ na zɩgɩ tɩʋ kʋm mancwəənu niə yam nɩ
ba cʋ sɩ ba dʋna yɩ zʋ tɩn,
Wɛ wʋ́ pa bantʋ dɩ taa jɩgɩ baarɩ.
7 Balʋ na kaagɩ ba zuuli je maama sana nyɔɔm ŋwaanɩ tɩn mʋ tɩntʋ:
Wɛ kaanɩm tiinə dɩ nijoŋnǝ bam tɩtɩ mʋ kɩ kʋntʋ.
Ba ma yǝri ba tɩtɩ je yɩ ba bəri,
ba na bugi dɩ sana tɩn ŋwaanɩ.
Kʋntʋ ŋwaanɩ ba warɩ ba lwarɩ wǝǝnu tɩlʋ
Wɛ na lɩ DƖ brɩ-ba tɩn lanyɩranɩ.
Ba nan na wʋra ba di nɔɔna taanɩ,
ba ba zɩgɩ wʋbʋŋ-dɩdwɩ baŋa nɩ.
8 Ba yɔɔrɩ ba twanɩ mʋ ba cɔgɩ ba jǝŋǝ je sɩm maama.
Jǝgǝ dɩdʋa tɩtɩ wʋ daarɩ yɩ ba wʋ digimi-ka.
9 Ba ta tɛ mʋ ba wɩ: «O kwaanɩ sɩ o brɩ nɔɔnʋ wɔɔ mʋ?
Wɔɔ mʋ o wʋra o maŋɩ wǝǝnu sɩ kʋ tu ni tɩ kuri?
O pa dɩ́ yɩ bu-sɩsɩn sɩlʋ ba na kwǝri yɩlɩ lele tɩn mʋ na?
10 Bɛŋwaanɩ o paɩ niə mʋ o daŋɩ-da-baŋa nɩ,
o pa cullu mʋ o daŋɩ-da-baŋa nɩ,
o ta tɩntʋ doŋ, o ta joori o ta tɩntʋ doŋ.»
11 Kʋ nan na yɩ te tɩn, Wɛ lagɩ DƖ tɔgɩ dwi-gɛ tiinə baŋa nɩ
sɩ DƖ ma ta-vəri mʋ DƖ ŋɔɔnɩ dɩ DƖ nɔɔna bam.
12 DƖ ya tagɩ dɩ ba mʋ DƖ wɩ:
«Abam wʋ́ sin jǝgǝ kam kʋntʋ nɩ mʋ.
Balʋ na bugi tɩn wʋ́ ba ba jǝni ba sin».
DƖ ta ma ta DƖ wɩ: «Abam siun je mʋ tɩntʋ.»
Dɩ kʋ dɩ, ba wʋ sɛ DƖ ni dɩm kʋntʋ.a
13 Kʋntʋ ŋwaanɩ nan mʋ Baŋa-Wɛ kwǝrǝ daa wʋ́ yi-ba nɩ:
«O paɩ niə mʋ o daŋɩ-da-baŋa nɩ,
o pa cullu mʋ o daŋɩ-da-baŋa nɩ,
o ta tɩntʋ doŋ, o ta joori o ta tɩntʋ doŋ.»
Sɩ kʋ pa ba na veə sɩ ba magɩ ba naga ba tʋ ba kwaga tɩtarɩ nɩ ba cɩcʋgɩ ba tɩtɩ.
Sɩ kʋ pa ba tʋ cɩkʋ wʋnɩ sɩ ba ja-ba pa ba tʋ ba dʋna jɩŋa nɩ.
Zeruzalɛm tɩʋ taanɩ
14 Abam nɔn-lwɛɛna balʋ na nii Zeruzalɛm tiinə baŋa nɩ tɩn,
cəgi-na Baŋa-Wɛ na jɩgɩ kwǝrǝ kalʋ sɩ DƖ ta dɩ abam tɩn.
15 Abam yɔɔrɩ á tɛ mʋ wɩ:
«Dɩbam goni ni mʋ dɩ tʋʋnɩ,
yɩ dɩ́ daarɩ dɩ́ kɩ ni-mɔrɔ dɩ curu.
Kʋntʋ ŋwaanɩ, lɛɛrʋ na yɔɔrɩ tɩ yi dɩ́ tɩʋ kʋm,
nɩ na-fara na cuuri kʋ coori wǝǝnu te tɩn dɩ,
tɩ bá wanɩ dɩbam tɩ kɩ kʋlʋkʋlʋ.
Bɛŋwaanɩ, dɩbam səgi vwan woro kuri nɩ mʋ,
yɩ ka-ganɩ-nɔɔna ji dɩ́ dalɩm je.»
16 Kʋntʋ ŋwaanɩ, Yuutu Baŋa-Wɛ na tagɩ te tɩn mʋ tɩntʋ:
«Nii-na, amʋ lagɩ a cwi kabri-kuri mʋ Siyɔn nɩ.
Ka maa yɩ kandwɛ dɩlʋ na yɩ cɩga cɩga yɩ dɩ kwaarɩ tɩga nɩ tɩn.
Dɩ tiini dɩ jɩgɩ kuri, pa digə kam dana.
Wʋlʋ maama nan na salɩ dɩ yɩra nɩ,
kʋ tu ba liǝ dɩ kʋlʋkʋlʋ.b
17 Amʋ na wʋ́ cwi digə kam kuri te tɩn,
amʋ wʋ́ kwe cɩga dɩ nɔn-ŋʋnnɩ mʋ a ma maŋɩ-ka
nɩ tɩ yɩ lwara ŋʋnɩ mʋ te.
Dʋ-kambana mʋ wʋ́ ba ya coori á vwan yam ya ja ya je,
yɩ na-fara dɩ ba kʋ li á na səgi mɛ tɩn.
18 Ni-gonim dɩlʋ á na kɩ dɩ tʋʋnɩ dɩ curu tɩn
daa bá taa jɩgɩ kuri.
Lɛɛrʋ tɩm na tu á baŋa, nɩ na-fara na coori wǝǝnu te tɩn,
tɩ lagɩ tɩ yɔɔrɩ tɩ cɔgɩ abam mʋ.
19 Lɛɛrʋ tɩm nan lagɩ tɩ taa tui
sɩ tɩ ja abam tɩ je.
Kʋʋ́ taa kɩ abam kʋntʋ mʋ zɩzɩŋa maama nɩ,
dɩ wɩa dɩ tɩtɩ maama nɩ.»
Abam na ni Wɛ kwǝrǝ kam kʋntʋ kuri,
kʋʋ́ pa fʋʋnɩ mʋ tiini dɩ zʋ abam.
20 Á bá na siun, nɩ nɔɔnʋ sara kam na tiini ka yɩ kukugə
sɩ o pəni da te tɩn,
naa o gar-jalɩ dɩm dɩ na tiini dɩ yɩ mɩmɩna
sɩ o ma-dɩ o kukwəri o tɩtɩ te tɩn.
21 Baŋa-Wɛ nan daa wʋ́ da DƖ nuŋi,
nɩ DƖ dɛɛn na kɩ te Perazim piu yuu nɩ tɩn.
DƖ banɩ daa ta wʋ́ zaŋɩ,
nɩ kʋ dɛɛn na kɩ te Gabawɔn bolo kʋm tɩga nɩ tɩn.
DƖ nan na lagɩ DƖ kɩ te tɩn wʋ́ taa yɩ wo-kɩnkagɩlɩ.
DƖ lagɩ DƖ kɩ tɩtʋŋ-vərə mʋ á tɩtarɩ nɩ.
22 Kʋntʋ ŋwaanɩ, daa yɩ taá jɩgɩ-nɩ á lwɛa.
Kʋ na daɩ kʋntʋ, á cam dɩm wʋ́ puli zanzan.
Paŋwa Tu Baŋa-Wɛ dɩm nan maŋɩ DƖ pa-nɩ kwǝrǝ DƖ wɩ:
DƖ ti DƖ yigə mʋ sɩ DƖ cɔgɩ á tɩga kam maama.
23 Nan fɔgɩ-na á cəgi sɩ á ni amʋ kwǝrǝ kam.
Taá ye-na sɩ á wanɩ á ni a na tɛ kʋlʋ tɩn.
24 Valʋ na yɔɔrɩ o cɛ soori,
o bá taa varɩ taan yɩ o wʋ dugi kʋlʋkʋlʋ.
25 O nan na palɩsɩ kara kam o ti,
o laan wʋ́ dʋlɩ o wo-dwə biə bam mʋ ka baŋa nɩ.
O ta wʋ́ du mɩna dwi dwi da,
sɩ kʋ maŋɩ dɩ tɩga kam na yɩ te tɩn,
yɩ o daarɩ o du wʋdiiru tɩdonnǝ o kara kam niə nɩ.
26 Kʋ nan yǝni kʋ yɩ Wɛ mʋ brɩ valʋ wʋm
pa o ye o na wʋ́ taa kɩ te tɩn.
27 Kʋ na yɩ dwə-biə mʋ o pɛ,
o bá kwe luu-zɔŋɔ o tuuri tɩ baŋa nɩ
naa o magɩ-tɩ dɩ da-lɔŋɔ.
O nan wʋ́ ma da-mɩmɩna mʋ o frɩ-tɩ
sɩ o lɩ tɩ wo-biə bam.
28 Kʋ nan na yɩ mɩna, baá frɩ-ya lanyɩranɩ.
Ba nan bá kɩ kʋntʋ taan
sɩ ya cʋ yɔlɩ-yɔlɩ nɩ muni na yɩ tɩ tɩn.
Ba na tuuri luu-zɔŋɔ ya baŋa nɩ,
ba nan bá mumugi-ya.
29 Valʋ yǝno kʋm kʋntʋ maama nuŋi Paŋwa Tu Baŋa-Wɛ tee nɩ mʋ.
Wɛ maa jɩgɩ swan cɩga cɩga,
yɩ DƖ brɩ nabiinǝ kʋlʋ na maŋɩ sɩ ba taa kɩ tɩn.