Wɛ wʋ́ joŋi Yisɩrayɛlɩ tiinə bam DƖ yagɩ
27
Maŋa kam kʋntʋ na yiǝ, Baŋa-Wɛ lagɩ DƖ kwe DƖ sʋ-lɔŋɔ kʋm, kʋ niə na di lanyɩranɩ dɩ fʋʋnɩ tɩn mʋ. DƖ maa wʋ́ waarɩ bɩsankwe-kɩnkagelɩ dɩm yɩrɩ na yɩ Prənyoŋo yɩ ka tiini ka duri yɩ ka pipiri tɩn. DƖ laan maa wʋ́ gʋ nɩnɩʋ wʋʋ jur-kamunu kʋm kʋntʋ.2 Dɛ dɩm kʋntʋ na yiǝ,
dɩ́ wʋ́ leeni dɩ́ ta vinyə tweeru kara kalʋ na lana tɩn taanɩ wɩ:
3 Amʋ Baŋa-Wɛ tɩtɩ mʋ nii ka baŋa nɩ.
A maa paɩ na yi-ka maŋa dɩ maŋa.
A yɔɔrɩ a yɩrɩ-ka mʋ wɩa dɩ tɩtɩɩ maama
sɩ nɔɔn-nɔɔnʋ yɩ wanɩ-ka o ja o cɔgɩ.
4 A banɩ wʋ zaŋɩ ka ŋwaanɩ.
Nɔɔnʋ nan ya na pɛ ga-balwaarʋ dɩ sabarɩ li-ka,
amʋ yaá nuŋi sɩ a jeeri kʋ tu dɩ najara,
yɩ a zwɛ tɩ maama nyɔ!
5 Kʋ na dagɩ nɩ o ga kwe amʋ o maa kɩ o səgim jəgə,
o maŋɩ sɩ o kɩ ni-mɔrɔ dɩ amʋ.
Cɩga tɩn, o maŋɩ sɩ o ba sɩ dɩ́ kɩ ni-mɔrɔ mʋ daanɩ.
6 Maŋa nan bɩɩnɩ sɩ Zakɔbɩ dwi dɩm kugu ja tɩga.
Yisɩrayɛlɩ tiinə bam maa wʋ́ kwi vɔɔrʋ yɩ ba lə biə.
Tiu biə balʋ bantʋ na wʋ́ lə tɩn
mʋ wʋ́ jagɩ ba yi lʋgʋ baŋa je maama.
7 Baŋa-Wɛ pɛ kʋ zʋ Yisɩrayɛlɩ tiinə bam yɩra
nɩ DƖ na kɩ te dɩ balʋ ya na jɩgɩ-ba ba bɛɛsɩ tɩn mʋ na?
DƖ nan wʋ gʋ Yisɩrayɛlɩ tiinə bam
sɩ kʋ yi DƖ na kɩ te dɩ balʋ ya na jɩgɩ-ba ba gʋɩ tɩn.
8 DƖ nan na waarɩ Yisɩrayɛlɩ tiinə bam te tɩn,
DƖ zəli-ba pa ba vu sa-tɩʋ mʋ yigə yigə.
Kʋ yɔɔrɩ kʋ nyɩ nɩ wa-puli seeni vu-dɩʋ mʋ
DƖ kwe DƖ maa kalɩ-ba DƖ yagɩ da.
9 Kʋ na wʋ́ kɩ te yɩ Wɛ kwe Zakɔbɩ dwi tiinə bam lwarɩm
DƖ ma cɛ-ba sɩ ba tusim dɩm maama saarɩ tɩn mʋ tɩntʋ:
Ba maŋɩ sɩ ba lɔ ba kandwa yam
ba na mɛ ba ji kaanɩm bimbinə tɩn mʋ,
ba daarɩ ba cʋ-ya mugə-mugə.
Ba nan ta daɩ sɩ ba yagɩ Asera nyɩnyʋgʋ dɛ sɩm
sɩ sɩ taa zɩgɩ sɩ zɩga je nɩ.
10 Tɩʋ kʋlʋ ya na lɔgɩ kʋ pɩ dɩ dam tɩn
laan jigi di-dwəənu mʋ.
Kʋ nɔn-biə bam ma nuŋi ba daarɩ-kʋ ba zɩgɩ
nɩ kagʋa mʋ tɩn.
Naanɩ laan kaagɩ dɩ di gaa je sɩm kʋntʋ nɩ
yɩ dɩ daarɩ dɩ tigi da dɩ siə.
Dɩ ma yɔɔrɩ dɩ di kʋ tweeru vɔɔrʋ tɩm maama nyɩlamm.
11 Tweeru tɩm nɛ jigi da-kʋrɩ mʋ
yɩ sɩ bwəri sɩ tʋ tɩga nɩ.
Kaana maa ve da ba twɛ-sɩ sɩ ba ma dwe mim.
Kʋ na yɩ te tɩn, nɔɔna bam kʋntʋ swan muri.
Kʋntʋ ŋwaanɩ ba Kəru wʋm bá duri ba yibwənə.
O ta bá kɩ-ba yu-yoŋo,
dɩ o na maŋɩ o naanɩ-ba tɩn dɩ.
12 Maŋa kam na yiǝ, Baŋa-Wɛ wʋ́ zɩgɩ Efratɩ bugə kam ni nɩ mʋ DƖ waarɩ DƖ nɔɔna bam nɩ DƖ na frɩ mɩna te tɩn, sɩ DƖ vu DƖ yi Ezipi bu-tʋla kam seeni. DƖ laan maa wʋ́ la abam Yisɩrayɛlɩ tiinə bam dɩdʋa dɩdʋa DƖ kɩ daanɩ. 13 Maŋa kam kʋntʋ nan na yiǝ, baá wu nabɔnɔ wɛ wɛ, sɩ ba bəŋi Yisɩrayɛlɩ tiinə balʋ maama ba ya na kalɩ ba vu ba yagɩ Asiiri dɩ Ezipi tɩɩnɩ dɩm wʋnɩ yɩ ba daanɩ da tɩn. Bantʋ maa wʋ́ ba ba zuli Baŋa-Wɛ piu kʋlʋ DƖ na pɔɔrɩ DƖ pa DƖ tɩtɩ Zeruzalɛm tɩʋ kʋm wʋnɩ tɩn.a