Baŋa-Wɛ sənim ləŋə
26
Maŋa kam kʋntʋ nɩ, baá taa leeni ləŋə kantʋ mʋ Zuda tɩʋ kʋm wʋnɩ:Dɩbam tɩʋ kʋm tiini kʋ dana mʋ.
Baŋa-Wɛ mʋ vrɩ tɩʋ kʋm cam wʋnɩ DƖ yagɩ,
nɩ kʋ yɩ kabri dɩ taala mʋ cɩgɩ-kʋ tɩn.
2 Pʋrɩ-na tɩʋ kʋm niə yam,
sɩ dwi dɩlʋ nɔɔna na yɩ nɔn-ŋʋna tɩn zʋ kʋ wʋnɩ.
Ba yɩ balʋ na yɔɔrɩ ba jɩgɩ cɩga tɩn mʋ.
3 Baŋa-Wɛ, wʋlʋ na kɩ o wʋ-dɩdʋa dɩ nmʋ,
yɩ o wʋbʋŋa zɩgɩ cɛpɩ,
nmʋ wʋ́ pa kʋ tu taa jɩgɩ bɩcar-zuru cɩga cɩga.
4 Kwe-na á wʋ-dɩdʋa á pa Baŋa-Wɛ,
sɩ kʋ taa ve maŋa maama.
Bɛŋwaanɩ, Baŋa-Wɛ mʋ yɩ piu kʋlʋ dɩbam na wʋ́ dalɩ tɩn.
5 Kʋ na yɩ balʋ na zʋʋrɩ baŋa baŋa je sɩm nɩ tɩn,
DƖ lagɩ o zʋʋrɩ-ba tɩga nɩ mʋ.
DƖ ma pa ba tʋ-fɔrɔ kʋm tʋ tɩga nɩ buri buri,
yɩ DƖ daarɩ DƖ nɔnɩ-kʋ ywalɩ-ywalɩ
pa kʋ ji fogo.
6 Nɔɔna mʋ jɩgɩ-kʋ ba nwana ba sɩn tɩga nɩ.
Bantʋ maa yɩ yinigə tiinə,
dɩ balʋ na nɛ yaara tɩn.
7 Baŋa-Wɛ, nmʋ yǝni n pa nɔn-ŋʋna cwǝŋǝ tigi mʋ jasɩ.
N ma n yɩrɩ-ba dɩ ba vəŋə
sɩ ba yɩ tri ba tʋ tɩga nɩ.
8 Baŋa-Wɛ, dɩbam tɔgɩ nmʋ kwiə yam mʋ
yɩ dɩ́ tɩɩna maama wʋ nmʋ wʋnɩ.
Woŋo kʋlʋ na jɩgɩ dɩ́ fra tɩn
maŋɩ sɩ nmʋ yɩrɩ dɩm taa jɩgɩ zulə mʋ.
9 Amʋ fra yɔɔrɩ ya wʋ nmʋ wʋnɩ mʋ tɩtɩɩ dɩm maama nɩ.
Tɩga dɩ nan na jɩgɩ ka pʋʋrɩ dɩ,
a ta wʋ́ taa bʋŋɩ nmʋ wʋbʋŋa mʋ.
Nmʋ kwiə yam na joŋi lʋgʋ baŋa ni maama,
nabiinǝ wʋ́ lwarɩ cwe sɩlʋ na tɔgɩ cɩga tɩn.
10 Nmʋ yɔɔrɩ n kɩ zaanɩ mʋ n kɩ nɔn-balwaarʋ yuu nɩ.
Dɩ kʋ dɩ, ba ba zaasɩ cɩga tɔgɩm.
Ba na maŋɩ ba zʋʋrɩ nɔn-ŋʋna tɩʋ wʋnɩ dɩ,
ba ta soe sɩ ba taa kɩ lwarɩm mʋ,
yɩ ba ba nɩgɩ Baŋa-Wɛ paarɩ dɩm.
11 Baŋa-Wɛ, nmʋ twɩ n jɩŋa sɩ n waarɩ-ba mʋ.
Dɩ kʋ dɩ, ba ta ba naɩ kʋ na yɩ te tɩn.
Nan pa ba lwarɩ nɩ n yi pagɩ n nɔɔna bam baŋa nɩ,
sɩ cavɩɩra ja-ba.
Ta pa n ban-lʋm dɩm tʋ ba baŋa nɩ,
nɩ kʋ na maŋɩ sɩ n dʋna na waarɩm dɩlʋ tɩn.
12 Baŋa-Wɛ, nmʋ mʋ wʋ́ pa dɩ́ jǝni dɩ yazurə.
Bɛŋwaanɩ, tɩtʋŋa yalʋ maama dɩ́ na kɩ tɩn
yɩ nmʋ mʋ kɩ n pa dɩbam.
13 Dɩ́ Tu Baŋa-Wɛ, dɩdɛɛra badonnǝ dɩ ya sɩɩnɩ ba ba ba te dɩbam.
Dɩ́ nan yɔɔrɩ dɩ́ tɩɩgɩ nmʋ yɩrɩ dɩm yɩranɩ baŋa nɩ mʋ.
14 Dɩdɛɛra bam kʋntʋ tɩga,
yɩ ba daa bá joori ba bi.
Ba cirǝ daa bá zaŋɩ wɛɛnɩ.
Bɛŋwaanɩ, nmʋ mʋ waarɩ-ba, pa ba yɔɔrɩ ba na cɔgɩm.
N ma n pa ba yɩrɩ saarɩ nabiinǝ yigə nɩ.
15 Baŋa-Wɛ, nmʋ pɛ dɩbam tɩʋ kʋm yalɩ mʋ kʋ kɩ yigə nɩ.
N yalɩ dɩ́ tɩga kam mʋ je maama wʋnɩ,
pa n yɩrɩ dɩm na zulə zanzan.
16 Baŋa-Wɛ, nmʋ nɔɔna bam loori zǝnǝ mʋ n tee nɩ,
kʋ na zʋ ba yɩra tɩn ŋwaanɩ.
Nmʋ na vaŋɩ ba zwa dɩ cam tɩn,
mʋ ba pipiri ba ba n te dɩ wɛ-loro.
17 Baŋa-Wɛ, kʋ kɩ nɩ kaanɩ na vri pugə sɩ o lʋ
yɩ o yɔɔrɩ o yaarɩ dɩ cam te tɩn mʋ.
Mʋ dɩbam na yaarɩ te n yigə nɩ.
18 Cɩga tɩn, dɩ́ jaanɩ pugə
yɩ dɩ́ yɩ bɩlɩ-bɩlɩ mʋ sɩ dɩ́ lʋ.
Kʋ nan nyɩ dɩ viu yɩranɩ mʋ dɩ́ joori dɩ́ lʋ.
Dɩbam wʋ wanɩ dɩ́ vrɩ dɩ́ tɩʋ kʋm dɩ́ yagɩ.
Dɩ́ wʋ daarɩ kwaga sɩ ba jwa joŋi tɩga kam ba taa te.
19 Abam twa bam nan wʋ́ joori ba bi.
Ba yɩra yam daa wʋ́ zaŋɩ ya na ŋwɩa.
Balʋ na tigi tɩga kuri nɩ tɩn wʋ́ joori ba zaŋɩ
ba taa caka dɩ wʋpolo.
Nɩ nyɔnɔ na yǝni kʋ pa tɩga na zurim zɩzɩŋa nɩ te tɩn,
cirǝ daa ta wʋ́ zaŋɩ tɩga kam nɩ,
ba joori ba na ŋwɩa.
20 Amʋ nɔɔna bam, zʋ-na á di sɩm wʋnɩ.
Pɩ-na sɩ ni á maŋɩ da á səgi maŋa fɩnfɩɩn wʋnɩ,
sɩ kʋ taa nii Wɛ ban-lʋm dɩm na zuri.
21 Nii-na! Baŋa-Wɛ nuŋi DƖ jǝgǝ kam nɩ mʋ DƖ bɩɩna.
DƖ nan lagɩ DƖ waarɩ lʋgʋ baŋa nɔɔna bam mʋ
ba lwarɩm ŋwaanɩ.
Tɩga kam laan wʋ́ pa nɔn-gʋra na logi jana balʋ ka baŋa nɩ tɩn lwarɩ jaja.
Ka daa bá səgi balʋ ba na gʋ tɩn ka kuri nɩ.