Wɛ le-kǝm
25
Amʋ Tu Baŋa-Wɛ, nmʋ mʋ yɩ amʋ Wɛ.A zǝŋi n yɩrɩ dɩm wɛɛnɩ mʋ,
yɩ a daarɩ a tee nmʋ.
Bɛŋwaanɩ, n yɔɔrɩ n tɔgɩ cɩga baŋa nɩ mʋ
n bʋŋɩ n ja faŋa faŋa sɩ n kɩ wo-kɩnkagɩla
yɩ n sɩɩnɩ n jɩgɩ-ya n kɩ.
2 Nmʋ pɛ tʋ-fɔrɔ kʋm laan ji kandwa-pɩsɩɩnɩ mʋ.
Tɩʋ kʋlʋ ya na lɔgɩ kʋ pɩ dɩ dam tɩn laan ma ji di-dwəənu.
Sɔ-fwaarʋ tɩlʋ vərə na lɔgɩ tɩn daa tǝrǝ,
yɩ ba daa bá wanɩ-tɩ ba fɔgɩ ba lɔ ba zɩgɩ.
3 Kʋntʋ nan mʋ te pa dwiə yalʋ nɔɔna na dana tɩn maŋɩ sɩ ba zuli‑m.
Tɩɩnɩ dɩlʋ nɔɔna na yɩ vɩɩna tɩn maa wʋ́ taa kwarɩ-m.
4 Yinigə tiinə yǝni ba səgi n woro kuri nɩ mʋ.
N ma n yɩ dalɩm je n pa nabwənə ba cam maŋa nɩ.
Nmʋ yɩ woro mʋ cɩga cɩga vu-dɩʋ maŋa nɩ.
N ta ma n yɩ pwəŋə n kwǝli nɔɔna sɩ wɩa yɩ yi-ba.
Cɩga tɩn, wʋ-lʋn-nyɩna yɔɔrɩ ba parɩ dɩbam mʋ vɩra-vɩra
nɩ vu-fɔrɔ na tiini kʋ magɩ kəbrə yɩ kʋ yɩ te tɩn.
5 Ba kǝm dɩm ta nyɩ nɩ kagʋa yuu fʋnyʋgʋ na yɩ te tɩn mʋ.
Nmʋ ma n cɩ dɩ́ dʋna bam tiguri-kaasa pa ka ba ni,
kʋ nyɩ dɩ kunkoŋo na kwǝli wɩa dam pa zurim wʋra te tɩn mʋ.
Wʋ-lʋn-nyɩna bam daa maa warɩ ba le sɩm sɩ ba leeni.
6 Paŋwa Tu Baŋa-Wɛ nan lagɩ DƖ kɩ candi-fara mʋ
piu kʋntʋa yuu nɩ,
DƖ pa lʋgʋ baŋa dwi tiinə bam maama.
Sana dɩ wʋdiiru wʋ́ bugi candiə kam wʋnɩ,
sɩ ba di wʋdi-laarʋ dwi dwi, yɩ ba nyɔ dɩvɛn sa-ŋʋna.
7 DƖ nan lagɩ DƖ zɩgɩ piu kʋntʋ yuu nɩ mʋ
sɩ DƖ dwanɩ nipugu kʋlʋ na kwǝli dwi-gɛ tiinə bam maama tɩn.
DƖ ta wʋ́ lɩ gɔrɔ kʋlʋ na kaagɩ kʋ pu tɩɩnɩ dɩm tɩn
DƖ yagɩ dáanɩ.
8 DƖ maa wʋ́ yɔɔrɩ DƖ cɔgɩ tʋʋnɩ dam
sɩ kʋ taa ve maŋa kalʋ na ba ti tɩn.
Yuutu Baŋa-Wɛ ta wʋ́ weeri nɔɔna bam maama yi-na
sɩ ba daa yɩ taa jɩgɩ yi-nwana.
O maa wʋ́ pa cavɩɩra yalʋ DƖ nɔɔna bam na nɛ
lʋgʋ baŋa je maama nɩ tɩn je.b
Baŋa-Wɛ mʋ tagɩ kʋntʋ.
9 Maŋa kam kʋntʋ nan na yiǝ, ba laan wʋ́ taa tɛ ba wɩ:
«Cɩga ŋwaanɩ, dɩbam Wɛ mʋ tɩntʋ.
Dɩ́ ma kwe dɩ́ cɩga maama dɩ́ pa‑DƖ,
yɩ DƖ joŋi dɩbam DƖ yagɩ.
Baŋa-Wɛ dɩm mʋ tɩntʋ.
Dɩ́ kwe dɩ́ cɩga dɩ́ sɩɩnɩ dɩ́ pa‑DƖ mʋ.
Nan pa-na sɩ dɩ́ taa jɩgɩ wʋpolo
yɩ dɩ́ di ywəəni DƖ vrɩm dɩm ŋwaanɩ.»
10 Baŋa-Wɛ yi pagɩ piu kʋntʋ baŋa nɩ mʋ
sɩ DƖ taa yɩrɩ kʋ nɔɔna bam.
Kʋ daarɩ kʋ na yɩ Moabɩ tiinə bam,
DƖ lagɩ DƖ nɔnɩ-ba mʋ DƖ sɩn tɩga nɩ,
nɩ ba na nɔnɩ ga-kʋrrʋ ba sɩn bulu wʋnɩ te tɩn.
11 Moabɩ tiinə laan maa zɩgɩ goŋo kʋm kʋntʋ wʋnɩ
ba te ba jɩan wɛɛnɩ, nɩnɛɛnɩ nayeenə na zaŋɩ ba jɩan wɛɛnɩ
sɩ ba pugi na tɩte tɩn.
Wɛ nan wʋ́ pa ba fiə kam ji kafɛ,
dɩ ba na maŋɩ ba kɩ swan dɩ ba jɩan te maama dɩ.
12 DƖ ta wʋ́ pa ba dam je kabri sɩm tʋ tɩga nɩ buri buri!
Sɩ maama wʋ́ ja tɩga mʋ,
yɩ ba daarɩ ba nɔnɩ-sɩ ywalɩ-ywalɩ
sɩ sɩ ji fogo yɩranɩ.