Baŋa-Wɛ wʋ́ waarɩ lʋgʋ baŋa
24
Nii-na! Baŋa-Wɛ mʋ lagɩDƖ cɔgɩ tɩga baŋa maama
pa ka ji di-dwəənu yɩranɩ.
DƖ maa wʋ́ ja ka ni maama DƖ jujugi,
yɩ DƖ daarɩ DƖ jagɩ ka nɔn-biə bam
DƖ yagɩ je maama nɩ.
2 Cam dɩdwɩ mʋ lagɩ dɩ yi ba maama.
Kaanɩm tu bá taa garɩ nɔn-kɔgɔ kʋm.
Sɔŋɔ tu nan bá taa garɩ o gambaa.
Kaanɩ dɩ o tɩntʋŋ-kana bá taa garɩ daanɩ.
Wʋlʋ na jɩgɩ wǝǝnu o yəgi tɩn bá taa garɩ o na yəgi-tɩ sɩ o pa wʋlʋ tɩn.
Jɩn-diru bá taa garɩ o na jɩnɩ wǝǝnu wʋlʋ tee nɩ tɩn.
Nadum dɩ bá taa garɩ nabwəm.
3 Ba lagɩ ba cɔgɩ tɩga kam maama mʋ
ba daarɩ-ka ba tiŋi yɔɔ yɩranɩ.
Baŋa-Wɛ mʋ tagɩ kʋntʋ.
4 Tɩga kam kʋgɩ mʋ yɩ gaarʋ tɩm maama kwaarɩ.
Lʋgʋ kʋm baŋa maama bwǝnǝ mʋ.
Balʋ ya na yɩ dɩdɛɛra tɩga kam maama nɩ tɩn dam ti.
5 Kʋ yɩ balʋ na zʋʋrɩ tɩga kam baŋa nɩ tɩn mʋ cɔgɩ-ka.
Bɛŋwaanɩ, ba yɔɔrɩ ba cɔgɩ Wɛ niə yam mʋ,
yɩ ba vɩn DƖ kwiə yam.
Ba ma daarɩ ba cɔgɩ ni-gonim dɩlʋ Wɛ na kɩ dɩ ba
yɩ dɩ wʋra maŋa maama tɩn.
6 Kʋntʋ ŋwaanɩ mʋ Wɛ sɔɔlɩ lwarɩm DƖ yagɩ tɩga kam nɩ.
Balʋ na zʋʋrɩ ka baŋa nɩ tɩn wʋ́ yaarɩ ba lwarɩm ŋwaanɩ.
Wɛ ma yɔɔrɩ DƖ waarɩ-ba,
pa nabiinǝ fɩɩn yɩranɩ laan daarɩ lʋgʋ baŋa nɩ.
7 Dɩvɛn dɩlʋ na ywənə tɩn laan wʋ kərə wʋnɩ mʋ,
vinyə tiu kʋm tɩtɩ cɔɔrɩ mʋ.
Balʋ ya na di ywəəni sana nyɔɔm baŋa nɩ tɩn laan kaagɩ ba ŋwanɩ mʋ.
8 Sɩnyɛ sɩm daa ba wɔɩ.
Kwɛn-kwɛɛra wʋpolo sɔɔ dɩ nan daa ba ni.
Kʋ nan na yɩ kwaanʋ, ba yagɩ tɩntʋ tam.
9 Nɔɔna daa ba nyɔ ba sana yɩ ba leenə.
Sana dɩ daa maŋɩ ba ba ywənə ba niə nɩ.
10 Tɩʋ kʋlʋ na cɔgɩ tɩn laan tigi yɔɔ yɩranɩ mʋ.
Kʋ sam dɩm maama ma fɔgɩ dɩ pɩ
sɩ nɔɔn-nɔɔnʋ yɩ zʋ dɩ wʋnɩ.
11 Nɔɔna kaagɩ tɩʋ kʋm cwe sɩm yuu nɩ mʋ
ba kaasɩ ba beeri sana sɩ ba nyɔ.
Ba ywəəni dɩm maama ləri dɩ ji wʋ-cɔgɔ.
Wʋpolo yɔɔrɩ kʋ je mʋ tɩga kam baŋa nɩ.
12 Tɩʋ kʋm laan daarɩ di-dwəənu yɩranɩ mʋ.
Kʋ manco-pɩʋ kʋm ma cɩcʋgɩ mugə-mugə.
13 Kʋ lagɩ kʋ kɩ kʋntʋ doŋ mʋ
lʋgʋ baŋa tɩɩnɩ dɩm maama nɩ.
Kʋʋ́ taa nyɩ dɩ tweeru biə gwərim maŋa na yǝni ka yi,
pa ba pʋrɩ tiu kʋlʋ ba ja tɩga te tɩn mʋ.
Ba laan maa wʋ́ larɩ tiu biə fɩnfɩɩn balʋ na daarɩ da tɩn.
14 Balʋ na wʋ wa-zʋʋrɩ seeni tɩn wʋ́ leeni dɩ wʋpolo.
Baá kaasɩ dɩ kwǝr-dɩa ba tee Baŋa-Wɛ.
15 Kʋntʋ ŋwaanɩ abam balʋ na zʋʋrɩ wa-puli seeni tɩn
zuli-na Baŋa-Wɛ.
Abam balʋ maama na zʋʋrɩ nɩnɩʋ kʋm ni nɩ tɩn
dɩ zəŋi-na Baŋa-Wɛ dɩm na yɩ Yisɩrayɛlɩ tiinə Wɛ tɩn yɩrɩ.
16 Tɩga baŋa ni maama nɩ mʋ dɩ́ ni ba na leenə
ba wɩ: «Cɩga Tu wʋm maŋɩ dɩ zulə.»
Amʋ nan ma ta a wɩ: «A wʋʋ yɔɔrɩ kʋ cɔɔrɩ mʋ!
Lɛɛrʋ yi-nɩ yoo!
Nɔɔna nuŋi ba donnǝ kwaga nɩ mʋ.
Ba bɩbarɩ-kikiə yam dɩ maa fɔgɩ ya ve yigə.»
17 Lɛɛrʋ, dɩ gwəənu, dɩ cɩgɩrʋ mʋ tigi
sɩ tɩ ja abam balʋ na zʋʋrɩ tɩga baŋa nɩ tɩn.
18 Wʋlʋ na kwaanɩ o lu vuvugə kam wʋnɩ,
kʋ tu wʋ́ vu o tʋ goŋo wʋnɩ mʋ.
Wʋlʋ maa na wanɩ o bɛ goŋo kʋm wʋnɩ,
cɩkʋ mʋ wʋ́ ja kʋ tu.
Bɛŋwaanɩ, cɔgɩm zanzan wʋ́ nuŋi wɛyuu nɩ.
Tɩga kam kugu je dɩ maa wʋ́ sisiŋi.
19 Lulooru wʋ́ bagɩ tɩga kam yɩra nɩ
pa ka yarɩ bɩle.
Ka ta wʋ́ tiini ka sisiŋi dɩ dam.
20 Tɩga kam nan kaagɩ ka yuŋi je maama nɩ mʋ,
nɩ sa-nyɔrʋ na bəri te tɩn.
Ka maa zuuli je maama nɩ nɩ viu na jɩgɩ vwe
kʋ magɩ yɩ kʋ yɩ te tɩn.
Nɔɔna bam lwarɩm yɔɔrɩ ya cɔgɩ tɩga kam mʋ,
pa ka tʋ bʋrʋ-tʋ-tʋ,
yɩ ka daa bá zaŋɩ wɛɛnɩ.
21 Maŋa kam kʋntʋ na yiǝ,
Baŋa-Wɛ lagɩ DƖ waarɩ dɩdɛɛra balʋ na wʋ wɛyuu nɩ ba tʋŋɩ tɩn mʋ.
Kʋ nan na yɩ tɩga baŋa nɩ,
DƖ lagɩ DƖ waarɩ pwa balʋ na jɩgɩ dam ba di da tɩn mʋ.
22 DƖ ta wʋ́ ja ba maama DƖ kalɩ DƖ kɩ daanɩ mʋ
yɩ DƖ daarɩ DƖ pɩ-ba pɩɩna digə nɩ.
Ba na maŋɩ da ba daanɩ fɩɩn,
DƖ laan wʋ́ yɔɔrɩ DƖ waarɩ-ba.
23 Wɛ wʋ́ kwǝli cana kam pooni.
Wapuli dɩm dɩ wʋ́ pipiri ka ji lim.
Bɛŋwaanɩ, Paŋwa Tu Baŋa-Wɛ mʋ wʋ́ jǝni Siyɔn piu kʋm yuu nɩ
DƖ di paarɩ Zeruzalɛm tɩʋ kʋm wʋnɩ.
Tɩʋ kʋm nakwa bam maa wʋ́ na DƖ paarɩ-zulǝ yam.