Tiiri tɩʋ taanɩ
23
Kwǝrǝ kantʋ wʋra Tiiri tɩʋ kʋm ŋwaanɩ mʋ:Taá keeri-na, naboro coonə balʋ na nuŋi Tarsisi
yɩ á beeri pipiu ŋwaanɩ tɩn!
Bɛŋwaanɩ, Tiiri tɩʋ kʋm cɔgɩ mʋ.
Kʋ sam dɩm maama cɔgɩ.
Je daa tǝrǝ sɩ nabwǝǝru tɩm zʋ tɩ zɩgɩ da.
Kʋ yɩ Kitimia nɩ mʋ ba ni kwǝrǝ kam kʋntʋ.b
2 Taá yɩ cɩmm, abam balʋ na zʋʋrɩ nɩnɩʋ kʋm ni nɩ tɩn.
Abam Sidɔn tɩʋ pipimpiinə bam mʋ tʋŋɩ nɔɔna
sɩ ba tɔgɩ nɩnɩʋ kʋm baŋa ba kɩ pipiu pa á duni.
3 Ba ma beeri na-fara bam baŋa nɩ
ba kɩ pipiu dɩ tɩɩnɩ dɩlʋ na yɩ yigə yigə tɩn.
Ba ma vu ba yi Sihora dɩ Nili bwi sɩm
ba yəgi wʋdiiru tɩlʋ na kɩ dáanɩ tɩn
ba ja ba joori sɔŋɔ.
4 Sidɔn tɩʋ tiinə bam, á laan wʋ́ na á cavɩɩra!
Bɛŋwaanɩ, nmʋ Sidɔn tɩʋ nɛ dam nɩnɩʋ kʋm ŋwaanɩ,
yɩ nɩnɩʋ kʋm laan nan vɩ‑m yɩ kʋ wɩ:
«Kʋ nyɩ dɩ amʋ ta wʋ vri pugə sɩ a lʋ biə.
Amʋ nan wʋ kɔnɩ biə sɩ ba kɩ nɔɔna,
kʋ na yɩ bəkəri naa bɩsankam dɩ.»
5 Ezipi tiinə na ni kʋlʋ na yi Tiiri tɩʋ tiinə tɩn,
ba yɩra wʋ́ sɔɔrɩ zanzan.
6 Kwaanɩ-na sɩ á bɛ á yi Tarsisi sɩ á nii.
Keeri-na á wʋ-cɔgɔ ŋwaanɩ,
abam balʋ na zʋʋrɩ nɩnɩʋ kʋm ni nɩ tɩn.
7 Bɛɛ mʋ kɩ tɩʋ kʋntʋ ba na cwi faŋa faŋa tɩn?
Kʋ dɛɛn pɛ á na ywəəni lanyɩranɩ,
yɩ kʋ nɔɔna jagɩ ba vu yigə yigə
ba zʋʋrɩ tɩɩnɩ dɩdonnǝ nɩ.
8 Wɔɔ mʋ jǝni o bʋŋɩ lwarɩm kikiə yantʋ
sɩ o ma o cɔgɩ Tiiri tɩʋ kʋm?
Kʋ ya yɩ tɩʋ kʋlʋ na pɛ nɔɔna di paarɩ mʋ.
Balʋ dɛɛn na pipi kʋ wʋnɩ tɩn yɩ dɩdɛɛra mʋ,
yɩ lʋgʋ baŋa nɔɔna maama nɩgɩ-ba.
9 Kʋ nan yɩ Paŋwa Tu Baŋa-Wɛ mʋ bʋŋɩ sɩ DƖ cɔgɩ-ba.
DƖ ma kɩ kʋntʋ sɩ DƖ zʋʋrɩ-ba tɩga nɩ dɩ ba nɩnwaŋa kam,
sɩ kʋ pa nɔn-yum dwi maama tu ba tɩtɩ tɩga nɩ.
10 Abam Tarsisi tiinə bam,
laan taá varɩ-na á tɩga kam
nɩ ba na kɩ te Nili bugə kam ni nɩ tɩn.
Bɛŋwaanɩ, abam daa ba jɩgɩ je sɩlʋ
á na wʋ́ kɩ pipiu da tɩn.
11 Baŋa-Wɛ tɩtɩ mʋ twɩ DƖ jɩŋa nɩnɩʋ kʋm baŋa nɩ,
pa lʋgʋ baŋa tɩɩnɩ dɩm sisiŋi.
DƖ pɛ ni sɩ kʋ vu Kaananc laŋa kam seeni,
yɩ DƖ wɩ ba cɔgɩ bantʋ dam je sɩm maama.
12 DƖ ma ta dɩ Sidɔn tiinə bam DƖ wɩ:
«Abam ywəəni dim dɩm ti mʋ,
ba na cɔgɩ abam lam tɩn ŋwaanɩ.
Abam na maŋɩ á bɛ á vu Kitimi,d
á ta bá na siun da.»
13 Fɔgɩ-na á nii Babilɔnɩ tɩʋ kʋm. Kʋ nɔɔna bam daa ba jɩgɩ yuu! Asiiri tiinə bam pɛ kʋ ji ga-vara zʋʋrɩm je mʋ. Ba ya lɔgɩ taala mʋ ba yǝri tɩʋ kʋm kəbrə yɩra nɩ, yɩ ba daarɩ ba tɔgɩ da ba zʋ ba vaarɩ kʋ sɔ-fwaarʋ tɩm ba dɩ tɩga nɩ. Ba ma pa kʋ ji di-dwəənu yɩranɩ kʋ tigə.
14 Taá keeri-na, abam nabwəəru tɩm tiinə balʋ na nuŋi Tarsisi
yɩ á beeri pipiu ŋwaanɩ tɩn,
á dam je sɩm maama na cɔgɩ tɩn ŋwaanɩ.
15 Maŋa kam kʋntʋ na yiǝ, baá kwe bɩna fusɩrpɛ ba ma swe Tiiri tɩʋ kʋm swiə. Bɩna yam kʋntʋ wʋnɩ mʋ pɛ wʋm maŋɩ sɩ o di paarɩ. Maŋa kam kʋntʋ nan na ti, kʋ lagɩ kʋ kɩ Tiiri tɩʋ kʋm nɩ ka-tʋla kalʋ ba na tɛ o taanɩ ləŋə wʋnɩ ba wɩ:
16 «Ka-tʋla kalʋ ba na swe n swiə tɩn,
nan kwe kɔnɔ sɩ n ta n kaagɩ tɩʋ kʋm wʋnɩ n veǝ.
Kwaanɩ sɩ n ta kɔnɔ kʋm lanyɩranɩ,
sɩ n ta n leeni ləŋ-ywe.
Kʋntʋ mʋ wʋ́ pa nɔɔna daa guli n gulə.»
17 Bɩna fusɩrpɛ yam na ti, Baŋa-Wɛ yigə daa wʋ́ joori ka taa wʋ Tiiri tɩʋ kʋm nɩ. Kʋ nɔn-biə bam daa wʋ́ na nyɔɔrɩ ba tɩtʋŋa baŋa nɩ. Ba ta wʋ́ kwe ba tɩtɩ ba yəgi ba pa lʋgʋ baŋa tɩɩnɩ dɩm maama, nɩ ka-tʋla na kɩ te dɩ baara tɩn. 18 Dɩ kʋ dɩ, nyɔɔrɩ dɩlʋ ba na wʋ́ na ba pipiu kʋm baŋa nɩ tɩn, baá kwe ba pa Baŋa-Wɛ mʋ. Ba bá kwe ba jɩjɩgɩrʋ tɩm ba səgi, naa ba tiŋi-tɩ jwa ŋwaanɩ. Tɩ nan wʋ́ wǝli sɩ balʋ na zuli Baŋa-Wɛ tɩn na wʋdiiru zanzan, dɩ gwar-laarʋ.