Zeruzalɛm tɩʋ taanɩ
22
Kwǝrǝ kantʋ mʋ wʋra tɩʋ kʋlʋ yɩrɩ na yɩ ‹Vɩɩrɩm Bolo› tɩn ŋwaanɩ:Bɛɛ mʋ jɩgɩ kʋ kɩ á tɩʋ kʋm nɩ,
pa nɔɔna bam maama di ba sam nayuni?
2 Bɛɛ mʋ kɩ yɩ ba sɔɔ zaŋɩ tɩʋ kʋm je maama nɩ,
yɩ ba kaasɩ ba yaga dɩ wʋpolo?
Balʋ na tɩgɩ abam tɩʋ kʋm wʋnɩ tɩn
wʋ tɔgɩ jara-kǝm baŋa nɩ mʋ ba tɩ.
3 Abam tɩʋ yigǝ tiinǝ bam maama duri mʋ
sɩ ba lu najara yam wʋnɩ.
Ba yɔɔrɩ ba sɛ bwəm ba pa ba dʋna bam mʋ
yɩ najara yam ta wʋ yi-ba.
Abam wʋnɩ balʋ maama ya na kwaanɩ
sɩ ba liisi ba dʋna yigə nɩ tɩn,
ba ta nɛ-ba mʋ yɩ ba ja ba maama!
4 Kʋntʋ ŋwaanɩ amʋ dɩ laan maa wɩ:
«Yagɩ-nɩ kʋntʋ cɩmm,
sɩ a keeri lanyɩranɩ a nɔɔna bam ŋwaanɩ.
Nɔɔn-nɔɔnʋ yɩ gwi-nɩ dɩ a kərə kam,
Bɛŋwaanɩ, cɔgɩm mʋ yɔɔrɩ dɩ yi a nɔɔna bam.»
5 Paŋwa Tu Baŋa-Wɛ dɩm lɩ dɛ mʋ DƖ tiŋi
dɩ na jɩgɩ sɔɔ, dɩ vuvugə, dɩ cam,
sɩ DƖ pa dɩ yi Vɩɩrɩm Bolo kʋm.
Dɩ maa yɩ dɛdoŋ nɩ ba na wʋ́ kuusi tɩʋ kʋm kabri mʋ,
sɩ kʋ nɔn-biə bam kərə sɔɔ zaŋɩ kʋ yi pweeru je sɩm tɩn.
6 Elam tɩʋ tiinə ma kwe ba cɩkwarʋ tɩm
ba nuŋi dɩ ba jara-kǝm tərikooru,
dɩ ba sise diinə maama.
Kiiri tɩʋ tiinə dɩ ti ba najara cɩ-kwɛn sɩm yigə mʋ.
7 Kʋ na yɩ abam bwəəlu tɩlʋ ya na kɩ wʋdiiru lanyɩranɩ tɩn,
najara sise-tərikooru laan mʋ su tɩ maama sɩ najara kɩ.
Balʋ maa na dɔgɩ siseŋ-nɔɔna yuu nɩ tɩn
dɩ ma vu ba cəŋi tɩʋ kʋm manco-pɩʋ ni.
8 Zuda tɩʋ da ba jɩgɩ dalɩm je sɩ ba ma cɩ ba tɩtɩ.
Maŋa kam kʋntʋ nɩ,
abam bʋŋɩ sɩ á lɩ najara zɩla yalʋ
ya na tigi ‹Kagʋa› digə kam nɩ tɩn mʋ.
9 Abam nɛ nɩ Davidi tɩʋ kabri sɩm
su dɩ lulooru zanzan.
Á ma la na á zɩgɩ kuri seeni bugǝ kʋm nɩ,
sɩ á daarɩ á mɔ-ba.
10 Á ma jeeli Zeruzalɛm tɩʋ sam dɩm ni
yɩ á daarɩ á yigi dɩ dɩdonnǝ á dɩ tɩga nɩ,
sɩ á ma á fɔgɩ á lɔ tɩʋ kabri sɩm sɩ sɩ taa dana.
11 Á ta kʋgɩ goŋo mʋ á yagɩ kabri sɩle sɩm tɩtarɩ nɩ
sɩ á taá kɩ na balʋ na nuŋi nafɩr-doŋə kam wʋnɩ tɩn dáanɩ.
Dɩ kʋ dɩ, abam yigə nan tǝrǝ dɩ wʋlʋ na pɛ wǝǝnu tɩntʋ kɩ tɩn.
Á maa wʋ nɩgɩ wʋlʋ na bʋŋɩ tɩ wʋbʋŋa faŋa faŋa tɩn.
12 Maŋa kam kʋntʋ nɩ,
Paŋwa Tu Baŋa-Wɛ dɩm nan ya tagɩ dɩ abam mʋ
sɩ á kan yi-na
yɩ á ta keeri wʋ-cɔgɔ ŋwaanɩ,
sɩ á daarɩ á ceeri á yum,
yɩ á kwe gwar-zɩnzwara á zʋ.
13 Nan nii abam na kɩ wʋpolo yɩ á cakɩ te!
Á kaagɩ á gʋɩ naanɩ dɩ peeni mʋ sɩ á ma á di candiə.
Á maa jɩgɩ nwana zanzan á dʋna,
yɩ á daarɩ á nyɔ sana!
Abam laan maa tɛ á wɩ: «Pa-na sɩ dɩ́ taa di dɩ́ ni nɩ,
Bɛŋwaanɩ dɩ́ yǝri dɩ́ jwa wʋ́ tɩ na.»a
14 Amʋ ni Paŋwa Tu Baŋa-Wɛ na tagɩ DƖ wɩ: «Amʋ brɩ a bá kwe ba lwarɩm dɩntʋ a cɛ-ba sɩ kʋ maŋɩ kʋ yi ba tʋʋnɩ dɩ.» Yuutu Baŋa-Wɛ na tagɩ te tɩn mʋ kʋntʋ.
15 Paŋwa Tu Baŋa-Wɛ tagɩ tɩntʋ mʋ DƖ wɩ:
«Ve Sebɩna te, wʋlʋ na nii pɛ sɔŋɔ kʋm kikiə maama baŋa nɩ tɩn, sɩ n ta dɩd-o á wɩ: 16 Nmʋ brɩ n pa n yɩ wɔɔ mʋ? Ba kɩ n nabaara badonnǝ yo, sɩ n vu n lagɩ n tɩtɩ yibeeli pɛ-sɔŋɔ yibeelǝ je sɩm nɩ n tiŋi mʋ na? Bɛɛ mʋ yɩ n vu n bɔɔrɩ bɔɔnɩ piu kʋm nɩ wɛ wɛ, yɩ n sarɩ siun je n tɩtɩ ŋwaanɩ.
17 A nɔɔnʋ, nan ta n ye nɩ: Baŋa-Wɛ mʋ lagɩ sɩ DƖ ja‑m DƖ vuvugi DƖ dʋlɩ DƖ yagɩ dɩ dam. 18 DƖ wʋ́ ja‑m DƖ kukuli DƖ kɩ daanɩ nɩ gəli doŋ tɩn, yɩ DƖ laan dʋlɩ‑m DƖ yagɩ tɩga kalʋ na tiini ka yalma tɩn wʋnɩ. Nmʋ ma n wʋ́ tɩ dáanɩ, yɩ n sise-tərikooru tɩlʋ na pɛ‑m zulə tɩn dɩ maŋɩ da. Nmʋ nan yɩ wʋlʋ na tiini n yáalɩ n tu wʋm sɔŋɔ kʋm tɩn mʋ.
19 Amʋ Baŋa-Wɛ nan lagɩ a lɩ‑m mʋ n tɩtʋŋɩ dɩm baŋa nɩ, sɩ n ga zulə yalʋ ya na tɔgɩ dɩ tɩtʋŋɩ dɩm tɩn. 20 Maŋa kam na yiǝ, amʋ wʋ́ bəŋi a tɩntʋŋnʋ Hilkiya bu Eliyakɩm.b 21 A maa wʋ́ pa‑o cwǝŋǝ sɩ o taa zʋʋrɩ nmʋ gwaarʋ tɩm, yɩ o daarɩ o vɔ nmʋ garyi kam o təŋə nɩ, yɩ a kwe n dam dɩm a pa‑o. O laan maa wʋ́ ji Zeruzalɛm nɔn-biə bam, dɩ Zuda dwi tiinə bam maama ko. 22 A lagɩ a kwe Davidi paarɩ dɩm borbu mʋ a kɩ o jɩŋa nɩ. O maa na jaanɩ wʋbʋŋa sɩ kʋlʋ kɩ, nɔɔn-nɔɔnʋ bá wanɩ o pipiri o bʋbʋŋɩ dɩm. O nan na wɩ kʋlʋ bá kɩ, nɔɔn-nɔɔnʋ warɩ sɩ o pa kʋ kɩ.c 23 A nan ta wʋ́ pa o kuri ja tɩga mʋ, nɩ ba na pagɩ paarɩ dɩlʋ tɩga nɩ tɩn. Kʋntʋ tɩn Eliyakɩm mʋ wʋ́ ja zulə o ba o pa o ko sɔŋɔ kʋm maama. 24 O digə tiinə nan wʋ́ kwe ba cana maama ba gwəri wʋntʋ mʋ. Baá taa palɩ ba tɩtɩ o yɩra nɩ mʋ, nɩ ba na pagɩ cɩnɩ kəbrə yɩra nɩ yɩ ba palɩ kambi dɩ kabǝli dɩ baŋa nɩ te tɩn.»
25 Paŋwa Tu Baŋa-Wɛ ta ma ta DƖ wɩ: «Maŋa kam nan na yiǝ, cɩnɩ dɩm wʋ́ kʋrɩ dɩ tʋ tɩga nɩ. Wǝǝnu tɩlʋ maama ya na lǝgi dɩ yɩra nɩ tɩn maa wʋ́ parɩ tɩ tʋ tɩga nɩ.» Baŋa-Wɛ na tagɩ te tɩn mʋ kʋntʋ.