Zuda tɩʋ pɛ Manasɩ taanɩ
33
Manasɩ dɛɛn jɩgɩ bɩna fugə-yale mʋ yɩ o di paarɩ dɩm. O ma jǝni Zeruzalɛm nɩ o di paarɩ o kɩ bɩna fiinnu-yanu. 2 Manasɩ dɛɛn tʋŋɩ lwarɩm o cɔgɩ Baŋa-Wɛ yigə mʋ, dɩ o na lwǝni tɩtʋŋ-zɔɔna yalʋ dwi-gɛ tiinə na yǝni ba kɩ yɩ Wɛ zəli-ba tɩga kam nɩ DƖ daarɩ DƖ pa Yisɩrayɛlɩ tiinə bam jǝni tɩn. 3 O joori o lɔ jwǝnǝ kaanɩm je sɩlʋ o ko Ezekɩasɩ dɛɛn na cɩcʋgɩ o yagɩ tɩn mʋ o zɩgɩ. O ma lɔ bimbinə o zɩgɩ Baalɩ jwǝnǝ zulə ŋwaanɩ o daarɩ o cwi Asera nyɩnyʋgʋ dɛ. O ma tiiri o zuli calɩcwɩ sɩm dɩ. 4 O dɛɛn ta lɔgɩ jwǝnǝ kaanɩm bimbinə mʋ o zɩgɩ Baŋa-Wɛ digə kam nɩ. Baŋa-Wɛ ya tagɩ jǝgǝ kam kʋntʋ taanɩ mʋ nɩ: «Zeruzalɛm yɩ tɩʋ kʋlʋ nɔɔna na wʋ́ taa zuli a yɩrɩ da maŋa maama tɩn mʋ.» 5 Manasɩ ta lɔgɩ kaanɩm bimbinə mʋ Baŋa-Wɛ digə kam kʋnkwallʋ tɩle tɩm wʋnɩ sɩ nɔɔna taa maɩ ba zuli calɩcwɩ sɩm. 6 O ma ja o tɩtɩ biə o zwɛ mim wʋnɩ o ma o kɩ kaanɩm Bɛn-Hinom bolo kʋm nɩ. O ma kɩ vʋra, dɩ yi-nara, dɩ liri mwaanʋ tɩtʋŋa, o ta tɔgɩ ciciri vʋra, dɩ liri mwaanʋ tiinə kwaga. O dɛɛn tiini o tʋŋɩ lwarɩm o cɔgɩ Baŋa-Wɛ yigə pa Baŋa-Wɛ banɩ zaŋɩ dɩd-o.7 Manasɩ dɛɛn pɛ ba sarɩ jwəm nyɩnyʋgʋ mʋ yɩ o kwe-kʋ o zɩgɩ Wɛ digə kam nɩ o jɩgɩ o kaana. Wɛ dɛɛn tagɩ je sɩm kʋntʋ taanɩ dɩ Davidi, dɩ o bu Solɔmɔn DƖ wɩ: «Digə kantʋ na zɩgɩ Zeruzalɛm nɩ tɩn mʋ yɩ jǝgǝ kalʋ amʋ na kuri Yisɩrayɛlɩ dwiə yam maama wʋnɩ sɩ nɔɔna taa zuli amʋ yɩrɩ da sɩ kʋ ta ve maŋa maama. 8 Yisɩrayɛlɩ tiinə bam na yɔɔrɩ ba tɔgɩ kʋlʋ kʋm maama amʋ na pɛ-ba ni sɩ ba kɩ tɩn, yɩ ba na sɛ niə dɩ kwiə yalʋ maama a na tɔgɩ Moyisi baŋa a pa-ba tɩn, amʋ daa bá zəli-ba sɩ ba nuŋi da tɩga kalʋ amʋ na pɛ ba nabaara bam tɩn.» 9 Manasɩ nan yɔɔrɩ o ja Zuda dɩ Zeruzalɛm tiinə bam o vu o dɩ tusim wʋnɩ mʋ. Ba ma tiini ba tʋŋɩ lwarɩm sɩ kʋ dwǝni lwarɩm dɩlʋ dwi-gɛ tiinə na yǝni ba kɩ yɩ Wɛ cɔgɩ-ba DƖ daarɩ DƖ kwe ba tɩga kam DƖ pa Yisɩrayɛlɩ tiinə bam tɩn.a
10 Baŋa-Wɛ dɛɛn kaanɩ Manasɩ dɩ o nɔɔna bam ba lwarɩm kikiǝ yam ŋwaanɩ, yɩ ba wʋ cəgi.b 11 Baŋa-Wɛ ma pa Asiiri tɩʋ pɛ jar-kərə dɩdɛɛra bam cwǝŋǝ sɩ ba ba ba jeeri Zuda tiinə bam dɩ jara. Ba ma wanɩ-ba yɩ ba daarɩ ba ja Manasɩ ba puri o mʋmwa ba lə gwələ da. Ba ta ma kwe canna capʋnnʋ ba vɔ‑o yɩ ba vaŋ-o ba ja ba vu Babilɔnɩ. 12 O na wʋ yaara wʋnɩ kʋntʋ tɩn, mʋ o tu o tɩtɩ o Tu Baŋa-Wɛ dɩm na yɩ o nabaara bam Wɛ tɩn yigə nɩ, o loori‑DƖ sɩ DƖ duri o yibwənə. 13 Wɛ ma sɛ Manasɩ loro kʋm pa DƖ duri o ŋwaŋa yɩ DƖ pa‑o cwǝŋǝ sɩ o daa joori Zeruzalɛm o di paarɩ da. Kǝm dɩm kʋntʋ ma pa Manasɩ lwarɩ nɩ Baŋa-Wɛ mʋ sɩɩnɩ DƖ yɩ Wɛ cɩga cɩga.
14 Kʋntʋ maama na kɩ kʋ kɛ tɩn, Manasɩ ma fɔgɩ o lɔ pooni yigə kəbrə kam na wʋ Davidi tɩʋ kʋm wa-puli seeni tɩn, kʋ na zɩgɩ je sɩlʋ na bwələ dɩ Giyɔn buli-yi dɩm tɩn, sɩ kʋ vu kʋ yi Kale Ni dɩm. O ta ma kwɛ kəbrə kalʋ na kaagɩ Ofɛɛlɩ piu kʋm seeni tɩn o daŋɩ ka baŋa nɩ. O ma kwe jar-kərə dɩdɛɛra o zɩgɩ Zuda tɩɩnɩ dɩlʋ na lɔgɩ dɩ pɩ tɩn maama wʋnɩ sɩ ba taa yɩrɩ-dɩ.
15 O ta yɔɔrɩ o lɩ wa-yɔɔrʋ nyɩnyʋrʋ mʋ dɩdaanɩ jwəm dɩlʋ o ya na zɩgɩ Wɛ-digə kam nɩ tɩn. O ta ma lɩ kaanɩm bimbinə yalʋ maama ya na lɔgɩ ya zɩgɩ Wɛ digə kam nɩ, dɩ Zeruzalɛm ni maama nɩ tɩn. O ma ja tɩ maama o nuŋi tɩʋ kʋm dáa nɩ o dʋlɩ o yagɩ. 16 Manasɩ laan ma fɔgɩ o kwɛ Baŋa-Wɛ kaanɩm bimbim dɩm o zɩgɩ, yɩ o daarɩ o kwe yazurə pɛɛra, dɩ le-kǝm pɛɛra o kaanɩ dɩ baŋa nɩ o pa Baŋa-Wɛ. O dɛɛn ma pa Zuda tiinə bam ni sɩ ba zuli Baŋa-Wɛ dɩm na yɩ Yisɩrayɛlɩ tiinə Wɛ tɩn. 17 Nɔɔna bam nan ta kɩ kaanɩm mʋ wara-je sɩdonnǝ bimbinə baŋa nɩ. Kʋ yɩ ba Tu Baŋa-Wɛ dɩm yɩranɩ mʋ ba jɩgɩ ba kaanɩ je sɩm kʋntʋ nɩ.
18 Manasɩ dɛɛn na di paarɩ yɩ o kɩ wǝǝnu tɩlʋ tɩn, dɩ o na loori Wɛ te tɩn, kʋ wǝli dɩ sampwəri sɩm na tɔgɩ Yisɩrayɛlɩ tiinə Baŋa-Wɛ dɩm yɩrɩ ŋwaanɩ ba ta kʋlʋ dɩd-o tɩn, ba pʋpʋnɩ tɩ maama ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ. 19 Kʋ nan na yɩ Manasɩ na loori Wɛ te dɩ Wɛ na sɛ o loro kʋm te tɩn, kʋ ta wǝli dɩ o na nuŋi Wɛ kwaga nɩ o daarɩ o kɩ lwarɩm yalʋ tɩn, dɩdaanɩ jwǝnǝ kaanɩm bimbinə o na lɔgɩ tɩn, dɩ Asera nyɩnyʋgʋ dɛ sɩlʋ o na cwi tɩn, dɩ jwǝnǝ yalʋ maama o na mɔɔna o jɩgɩ o kaana tɩn, o kikiə yam kʋntʋ maama wuu pʋpʋnɩ ya tigi Wɛ nijoŋnǝ twannʋ tɩm wʋnɩ mʋ. 20 Manasɩ ma tɩ yɩ o vu o kwə te. Ba ma kwe‑o ba kɩ o tɩtɩ sɔ-fɔrɔ kʋm wʋnɩ. O bu Amɔn ma ləri o yuu nɩ o di paarɩ.
Zuda tɩʋ pɛ Amɔn yɩra taanɩ
21 Amɔn dɛɛn jɩgɩ bɩna fiinle-yale mʋ yɩ o di paarɩ. O ma jǝni Zeruzalɛm nɩ o di paarɩ dɩm o kɩ bɩna yale. 22 Amɔn dɛɛn tʋŋɩ lwarɩm o cɔgɩ Baŋa-Wɛ yigə mʋ nɩ o ko Manasɩ na kɩ te tɩn. O ma kɩ kaanɩm o pa jwǝnǝ yalʋ maama Manasɩ dɛɛn na kɩ o zɩgɩ tɩn yɩ o zuli-ya. 23 Wʋntʋ ba nyɩ dɩ o ko. O wʋ sɛ sɩ o tu o tɩtɩ Baŋa-Wɛ yigə nɩ. Amɔn brɩ o kɛ o ko yigə mʋ dɩ lwarɩm kikiə.