Zuda tɩʋ pɛ Zʋzɩasɩ yɩra taanɩ
34
Zʋzɩasɩ dɛɛn jɩgɩ bɩna nana mʋ yɩ o di paarɩ dɩm. O ma jǝni Zeruzalɛm nɩ o di paarɩ dɩm o kɩ bɩna fiintɔ-dɩdʋa. 2 O tɩtʋŋa dɛɛn su Baŋa-Wɛ yi lanyɩranɩ. O yɔɔrɩ o kwe cwe sɩlʋ o nabaarʋ Davidi dɛɛn na tɔgɩ tɩn mʋ, yɩ o wʋ ywəri sɩ wʋnɩ.a3 O na di paarɩ o kɩ bɩna nana tɩn, dɩ o ta yɩ bu-dʋŋʋ mʋ. O ma kwaanɩ sɩ o lwarɩ Wɛ, nɩ o nabaarʋ Davidi dɛɛn na kɩ te tɩn. Bɩna yana na kɛ ya wǝli da tɩn, o ma sɩɩnɩ o yiǝ sɩ o cɔgɩ jwǝnǝ kaanɩm bimbinə yalʋ maama na wʋ Zuda dɩ Zeruzalɛm laŋa kam nɩ tɩn. Kʋ na yɩ Asera nyɩnyʋgʋ dɛ sɩm, dɩ jwǝnǝ nyɩnyʋrʋ tɩlʋ nɔɔna na sarɩ ba zɩgɩ tɩn, dɩ tɩlʋ ba na mɔɔnɩ tɩn, o cɩcʋgɩ tɩ maama mʋ. 4 O ta ma pa ni sɩ ba yigi Baalɩ jwǝnǝ kaanɩm bimbinə yam ba dɩ tɩga nɩ, sɩ ba daarɩ ba cɔgɩ mɛ maama ba ya na zwɛ wo-talooru da ba zuli-ya tɩn. O ta ma pa ba cɩcʋgɩ Asera nyɩnyʋgʋ dɛ sɩm, dɩ jwǝnǝ nyɩnyʋrʋ dwi maama. Ba laan ma daarɩ ba dʋlɩ weeru tɩm ba yagɩ balʋ ya na jɩgɩ jwǝnǝ yam kʋntʋ maama ba zuli tɩn yibeelǝ yam baŋa nɩ. 5 O ta pɛ ba kwe balʋ na yǝni ba kaanɩ jwǝnǝ yam kʋntʋ tɩn kwi mʋ ba zwɛ bimbinə yalʋ ba dɛɛn na zɩgɩ da ba kaanɩ tɩn baŋa nɩ. Zʋzɩasɩ dɛɛn tɔgɩ cwǝŋǝ kam kʋntʋ nɩ mʋ o pa jwǝnǝ kaanɩm ti Zuda dɩ Zeruzalɛm laŋa kam nɩ. 6 O dɛɛn ta ma kɩ kʋntʋ doŋ tɩɩnɩ dɩlʋ wʋnɩ Manasɩ dwi tiinə, dɩ Efrayim dwi tiinə, dɩ Simeyon dwi tiinə na zʋʋrɩ tɩn, sɩ kʋ kɛ kʋ yi Nɛfitali dwi dɩm laŋa kam seeni, dɩdaanɩ di-dwəənu tɩlʋ na wʋ je sɩm kʋntʋ nɩ tɩn. 7 Zʋzɩasɩ dɛɛn tʋlɩ Yisɩrayɛlɩ tɩɩnɩ dɩm maama mʋ o kaagɩ o cɔgɩ jwǝnǝ bimbinə yam, o daarɩ o cɩcʋgɩ Asera nyɩnyʋgʋ dɛ sɩm. O ta ma mumugi ba jwǝnǝ pa ya ji fogo, yɩ o daarɩ o ja bimbinə yalʋ ba na zwɛ wǝǝnu tɩlʋ lwǝm na ywǝmmǝ tɩn da tɩn o cɔgɩ o yagɩ. O laan ma joori Zeruzalɛm.
8 Pɛ Zʋzɩasɩ paarɩ dim bɩna fugə-nana bɩnɩ dɩm nɩ mʋ o tʋŋɩ Azalɩa bu Safan, dɩ tɩʋ kʋm dɩdɛɛrʋ Maaseya, dɩ Yoahazɩ bu Yoa na yɩ pɛ sɔŋɔ tɔn-pʋpʋnnʋ wʋm tɩn, sɩ ba vu ba kwɛ o Tu Baŋa-Wɛ digə kam, o wʋbʋŋa na jaanɩ sɩ o lɩ digiru o tɩʋ kʋm maama wʋnɩ tɩn ŋwaanɩ.
9 Ba ma vu kaanɩm nakwɩ tu Hilkiya te, yɩ ba kwe səbu kʋlʋ Levi tiinə balʋ na yɩ Wɛ-digə kam ni-yɩrɩna yɩ ba joŋi nɔɔna bam tee nɩ tɩn ba ja ba vu ba pa‑o. Səbu kʋm kʋntʋ ba ya joŋi Manasɩ dwi tiinə bam, dɩ Efrayim dwi tiinə bam, dɩ Yisɩrayɛlɩ dwi tiinə badaara bam tee nɩ, kʋ wǝli dɩ balʋ na wʋ Zuda laŋa kam nɩ, dɩ Bɛnzamɛn laŋa kam nɩ, dɩ Zeruzalɛm tɩʋ wʋnɩ tɩn tee nɩ mʋ, yɩ ba daarɩ ba tiŋi-kʋ Wɛ-digə kam nɩ. 10 Ba na kwe səbu kʋm ba pa Hilkiya tɩn, o laan ma kwe-kʋ o pa balʋ na nii Baŋa-Wɛ digə kam kwɛɛm tɩtʋŋa baŋa nɩ tɩn, sɩ bantʋ joŋi ba ma ŋwɩ tɩntʋŋna balʋ na wʋra ba fɔgɩ ba kwɛ digə kam tɩn. 11 Ba dɩ ma kwe səbu kʋm kʋntʋ ba pa gwarʋ tɩm, dɩ lwara bam, sɩ ba yəgi kandwa yalʋ ba na yarɩ piu yɩra nɩ tɩn, dɩdaanɩ dɛ sɩ ba ma-sɩ ba kɩ be dɩ ywə ba fɔgɩ ba kwɛ di sɩlʋ maama Zuda pwa bam ya na yagɩ pa sɩ cɔgɩ tɩn.
12 Tɩntʋŋna bam dɛɛn ma tʋŋɩ dɩ yawala. Levi tiinə balʋ na nii ba tɩtʋŋa yam baŋa nɩ tɩn dɛɛn yɩ: Yahatɩ, dɩ Abdɩasɩ na yɩ Merari sɔ-yuu kʋm tiinə tɩn, kʋ wǝli dɩ Zakari, dɩ Mesulam na yɩ Keyatɩ sɔ-yuu kʋm tiinə tɩn mʋ. Levi tiinə bam kʋntʋ dɛɛn tiini ba ye kwɛɛra zɩla magɩm lanyɩranɩ mʋ. 13 Ba badaara ma nii tɩntʋŋna bam dɩ ba tɩtʋŋa dwi dwi baŋa nɩ. Ba badaara dɩ maa yɩ twan-pʋpʋnna, dɩ tɩtʋŋa yigǝ tiinǝ, dɩ ni-yɩrɩna.
Wɛ niə tɔnɔ kʋm taanɩ
14 Ba na yɔɔrɩ ba kwe səbu kʋlʋ ba ya na tiŋi Baŋa-Wɛ digə kam nɩ ba maa nuŋi tɩn, mʋ Wɛ kaanɩm tu Hilkiya nɛ Baŋa-Wɛ niə tɔnɔ kʋlʋ Wɛ ya na kɩ Moyisi jɩŋa nɩ tɩn. 15 Hilkiya ma ta dɩ tɔn-pʋpʋnnʋ Safan o wɩ: «Wɛ niə tɔnɔ kʋm mʋ tɩntʋ a na nɛa Baŋa-Wɛ digə kam wʋnɩ.» O laan ma kwe-kʋ o pa Safan.
16 Safan ma ja tɔnɔ kʋm o vu o ta dɩ pɛ Zʋzɩasɩ o wɩ: «Pɛ, nmʋ dɩdɛɛra bam kɩ nmʋ na pɛ-ba ni sɩ ba kɩ te maama tɩn. 17 Ba kwe səbu kʋlʋ ya na tigi Baŋa-Wɛ digə kam wʋnɩ tɩn ba pa tɩntʋŋna bam dɩ ba yigǝ tiinǝ bam.» 18 Safan ta ma ta dɩ pɛ wʋm o wɩ: «Kaanɩm tu Hilkiya kwe tɔnɔ mʋ o pa-nɩ.» O ma zɩgɩ pɛ wʋm yigə nɩ o karɩmɩ-kʋ sɩ o taa cǝgǝ.
19 Pɛ wʋm na ni Wɛ niə tɔnɔ kʋm wʋ bɩtarɩ sɩm na yɩ te tɩn, mʋ o jaanɩ o gwaarʋ o kaarɩ, o wʋʋ na cɔgɩ tɩn ŋwaanɩ.b 20 O ma daarɩ o bəŋi Hilkiya, dɩ Safan bu Ahikam, dɩ Mika bu Abedon, dɩ o tɔn-pʋpʋnnʋ Safan, kʋ wǝli dɩ Asaya na yɩ pɛ wʋm yɩra tɩntʋŋnʋ tɩn, yɩ o pa-ba ni o wɩ: 21 «Ve-na Wɛ-digə kam á loori Baŋa-Wɛ kʋlʋ na pʋpʋnɩ tɔnɔ kʋntʋ wʋnɩ tɩn ŋwaanɩ, sɩ dɩ́ wanɩ dɩ́ lwarɩ DƖ wʋbʋŋa. Kɩ-na kʋntʋ á pa amʋ dɩ balʋ maama ta na zʋʋrɩ Yisɩrayɛlɩ dɩ Zuda laŋa kam nɩ tɩn. Baŋa-Wɛ banɩ mʋ yɔɔrɩ dɩ wiirə dɩbam baŋa nɩ, bɛŋwaanɩ dɩ́ nabaara bam wʋ tʋŋɩ ba tɔgɩ Baŋa-Wɛ niə yam, nɩ kʋlʋ maama na pʋpʋnɩ tɔnɔ kʋntʋ wʋnɩ sɩ dɩ́ kɩ tɩn.»
22 Hilkiya, dɩ dɩdɛɛra balʋ na wʋ o tee nɩ tɩn ma zaŋɩ ba vu Zeruzalɛm jə-dʋŋa laŋa kam nɩ sɩ ba na dɩ Wɛ ni-joŋ-kana kalʋ yɩrɩ na yɩ Hulida tɩn. O maa yɩ Tokatɩ bu Salum kaanɩ mʋ. Tokatɩ dɩ dɛɛn yɩ Hasara wʋlʋ na nii pɛ wʋm gwaarʋ baŋa nɩ tɩn bu mʋ. Nɔɔna bam ma vu ba ŋɔɔnɩ dɩ Hulida.
23 O dɩ ma lǝri-ba o wɩ:
«Baŋa-Wɛ dɩm na yɩ Yisɩrayɛlɩ tiinə Wɛ tɩn kwǝrǝ mʋ tɩntʋ: Ve-na a ta dɩ nɔɔnʋ wʋlʋ na tʋŋɩ abam amʋ tee nɩ tɩn wɩ: 24 Baŋa-Wɛ kwǝrǝ mʋ tɩntʋ: ‹Amʋ wʋ́ pa lɛɛrʋ yi n tɩʋ kʋm dɩ kʋ nɔn-biə bam maama, sɩ kʋ maŋɩ dɩ wo-lwaanʋ tɩlʋ maama na pʋpʋnɩ tɔnɔ kʋntʋ wʋnɩ yɩ Zuda tɩʋ pɛ wʋm ni tɩn. 25 Bɛŋwaanɩ, Zuda tiinə bam vɩn amʋ mʋ, yɩ ba daarɩ ba kaanɩ wa-yɔɔrʋ. Ba ma zaŋɩ a banɩ dɩ ba jɩa na kɩ jwǝnǝ yalʋ tɩn. Kʋntʋ ŋwaanɩ a ban-lʋm dɩm wʋ́ tʋ tɩʋ kʋntʋ baŋa nɩ. Dɩ nan bá fɔgɩ dɩ zuri maŋa dɩ maŋa.›
26 Kʋ nan na yɩ Zuda pɛ wʋm tɩtɩ na tʋŋɩ abam amʋ tee nɩ sɩ á lwarɩ Baŋa-Wɛ wʋbʋŋa tɩn, Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ dɩd-o tɩn mʋ tɩntʋ: ‹Kʋ na yɩ taanɩ dɩlʋ na wʋ tɔnɔ kʋm wʋnɩ yɩ n ni-dɩ tɩn, 27 amʋ nɛ nmʋ wʋʋ na cɔgɩ yɩ n tu n tɩtɩ amʋ yigə nɩ dɩ n na ni nɩ a banɩ zaŋɩ tɩʋ kʋntʋ dɩ kʋ nɔɔna bam baŋa nɩ tɩn. Nmʋ nan na kaarɩ n gwaarʋ yɩ n keeri amʋ yigə nɩ tɩn ŋwaanɩ, amʋ ni nmʋ loro kʋm. 28 Kʋntʋ ŋwaanɩ amʋ wʋ́ pa‑m cwǝŋǝ sɩ n tɩ n tɩtɩ tʋʋnɩ, sɩ n yɩ na lɛɛrʋ tɩlʋ a na wʋ́ pa tɩ yi tɩʋ kʋntʋ dɩ kʋ nɔn-biə bam tɩn.› »
Tɩntʋŋna bam ma ja Wɛ ni-joŋ-kana kam kwǝrǝ ba joori ba vu ba pa Pɛ Zʋzɩasɩ.
29 Pɛ Zʋzɩasɩ dɛɛn ma pa ni sɩ Zeruzalɛm dɩ Zuda tɩɩnɩ maama nakwa bam la daanɩ o yigə nɩ. 30 O ma ja Zuda tiinə bam maama dɩ Zeruzalɛm nɔn-biə bam maama, kʋ wǝli dɩ Wɛ kaanɩm tiinə bam, dɩ Levi dwi tiinə bam o vu o zʋ Wɛ-digə kam wʋnɩ. Kʋ maa yɩ nɔɔna bam maama, nabwənə dɩ nadunə mʋ. Pɛ wʋm ma zɩgɩ ba yigə nɩ o karɩmɩ Wɛ niə tɔnɔ kʋlʋ ba dɛɛn na nɛ Baŋa-Wɛ digə kam nɩ tɩn o brɩ-ba. 31 Pɛ wʋm ma zɩgɩ o zɩga je nɩ o fɔgɩ o goni ni dɩ Baŋa-Wɛ nɩ: oó kwe o wʋʋ maama o joori o tɔgɩ Baŋa-Wɛ, yɩ o sɛ DƖ niə yam, dɩ DƖ kwiə yam, dɩ DƖ cullu tɩm maama, nɩ kʋ na pʋpʋnɩ Wɛ ni-gonim tɔnɔ kʋm wʋnɩ te tɩn.c
32 Zʋzɩasɩ dɛɛn ma ta dɩ balʋ maama na zʋʋrɩ Zeruzalɛm wʋnɩ tɩn dɩ Bɛnzamɛn dwi tiinə bam sɩ ba tɔgɩ ba sɛ o ni-gonim dɩm kʋntʋ. Zeruzalɛm tiinə bam ma sɩɩnɩ ba kɩ nɩ ba na goni ni te dɩ Wɛ dɩm na yɩ ba nabaara bam Wɛ tɩn.
33 Zʋzɩasɩ ma lɩ jwə-yɔɔrʋ maama ya na wʋ Yisɩrayɛlɩd dwi tiinə laŋa kam je maama nɩ tɩn o yagɩ. O ta ma pa ni sɩ balʋ maama na zʋʋrɩ Yisɩrayɛlɩ nɩ tɩn taa zuli ba Tu Baŋa-Wɛ dɩm. Zʋzɩasɩ ta na wʋ o ŋwɩa wʋnɩ maŋa kalʋ maama tɩn, Yisɩrayɛlɩ tiinə bam yɔɔrɩ ba tɔgɩ Baŋa-Wɛ dɩm na yɩ ba nabaara bam Wɛ tɩn mʋ.e