Pɛ Zʋzɩasɩ di Pakɩ candiə kam
35
Zʋzɩasɩ dɛɛn ma pa Zeruzalɛm tiinə bam di Pakɩ candiə kam ba ma ba zuli Baŋa-Wɛ.a Ba ma sɩɩnɩ ba gʋ pəlbiə pulim cana kam da fugə-yana dɛ dɩm nɩ sɩ ba ma ba di candiə kam. 2 O ma kuri kaanɩm tiinə bam dɩdʋa dɩdʋa sɩ ba taa tʋŋɩ ba tɩtʋŋa, yɩ o koori-ba sɩ ba taa jɩgɩ baarɩ ba ma ba tʋŋɩ Baŋa-Wɛ digə kam tɩtʋŋa. 3 Kʋ na yɩ Levi dwi tiinə bam, ba pɔɔrɩ-ba mʋ ba kɩ Baŋa-Wɛ jɩŋa nɩ yɩ ba yǝni ba kwe DƖ niə yam ba brɩ Yisɩrayɛlɩ tiinə bam maama. Pɛ Zʋzɩasɩ ma ta dɩ ba o wɩ:«Abam daa bá taá zɩŋɩ Wɛ ni-gonim daka kam á taá kaagɩ je maama nɩ á veǝ. Nan kwe-na-ka á zɩgɩ Wɛ-digə kalʋ Yisɩrayɛlɩ tɩʋ pɛ Davidi bu Solɔmɔn na lɔgɩ tɩn wʋnɩ sɩ ka maŋɩ dáanɩ. Abam nan wʋ́ taa tʋŋa á pa á Tu Baŋa-Wɛ dɩm dɩ DƖ nɔɔna Yisɩrayɛlɩ tiinə bam. 4 Ti-na á yigə sɩ á taá tʋŋa sɩ kʋ tɔgɩ Pɛ Davidi dɩ o bu Solɔmɔn na pɔɔrɩ á tɩtʋŋa yam ba pa abam sɔ-yuu dɩ sɔ-yuu te tɩn.
5 Á wʋ́ taá jeeri Wɛ digə kam nɩ mʋ, yɩ á yǝni á pɔɔrɩ á tɩtɩ, sɩ pʋpwara maama taa wʋra ka wǝli Yisɩrayɛlɩ tiinə bam sɔ-yuu maama nɔɔna sɩ ba zuli Wɛ. 6 Abam ta wʋ́ gʋ Pakɩ vara bam nɔɔna bam na jaanɩ ba tui tɩn. Kwɛ-na á tɩtɩ sɩ á maŋɩ dɩ cullu tɩm, sɩ á wanɩ á wǝli á cʋrrʋ tɩm sɩ ba kɩ kaanɩm dɩm nɩ Baŋa-Wɛ na dɛ Moyisi baŋa DƖ pa abam ni sɩ á taá kɩ te tɩn.»
7 Pɛ Zʋzɩasɩ ma zʋ o vara bam wʋnɩ o lɩ peeni dɩ bʋnɩ mʋrrʋ fiintɔ (30,000), dɩ naanɩ mʋrrʋ tɩtɔ (3,000). O ma kwe-tɩ o pa nɔɔna balʋ maama na wʋra tɩn sɩ ba ma ba kɩ Pakɩ kaanɩm dɩm.
8 Pɛ wʋm dɩdɛɛra bam dɩ ma tɔgɩ ba tɩtɩ wʋbʋŋa ba pa nɔɔna bam, dɩ kaanɩm tiinə bam, dɩ Levi tiinə bam vara sɩ ba ma kɩ kaanɩm dɩm. Hilkiya, dɩ Zakari, dɩ Yehiyɛlɩ dɛɛn mʋ yɩ dɩdɛɛra balʋ na nii Wɛ-digə kam tɩtʋŋa baŋa nɩ tɩn. Ba dɩ ma lɩ peeni dɩ bʋnɩ mʋrrʋ tɩle dɩ biə-yardʋ (2,600), kʋ wǝli dɩ naanɩ biə-yatɔ (300) ba pa kaanɩm tiinə bam sɩ ba ma ba kɩ kaanɩm dɩm. 9 Konanɩa, dɩ o cʋrrʋ Semaya dɩ Netaneli, kʋ wǝli dɩ Levi yigǝ tiinǝ Hasabia, dɩ Yeyiyɛlɩ, dɩ Yozabadɩ maama ma kwe peeni dɩ bʋnɩ mʋrrʋ tɩnu (5,000), dɩ naanɩ biə-yanu (500) ba pa ba cʋrrʋ Levi dwi tiinə kaanɩm dɩm ŋwaanɩ.
10 Ba ma ti woŋo maama yigə sɩ ba kɩ Pakɩ candiə kaanɩm dɩm. Kaanɩm tiinə bam, dɩ Levi tiinə bam ma vu ba zɩgɩ ba tɩtʋŋa je nɩ mɛ dɩ mɛ pɛ wʋm na brɩ nɩ ba taa zɩga tɩn. 11 Levi tiinə bam ma gʋ Pakɩ vara bam yɩ ba daarɩ ba pwəni-ba. Ba laan ma kwe vara bam kʋntʋ jana ba pa kaanɩm tiinə bam, yɩ ba kɩ ba miisi miisi Wɛ kaanɩm bimbim dɩm yɩran nɩ. 12 Ba laan ma pɔɔrɩ zwɛɛm kaanɩm vara bam, sɩ ba kwe ba pa nɔɔna bam sɔ-yuu dɩ sɔ-yuu, pa digə maama wanɩ ba kɩ kaanɩm ba pa Baŋa-Wɛ, nɩ Moyisi tɔnɔ kʋm na brɩ te tɩn. Ba ta kɩ kʋntʋ mʋ dɩ naanɩ dɩm dɩ. 13 Ba ma wɔ Pakɩ vara bam mim wʋnɩ, nɩ kʋ na maŋɩ dɩ cullu tɩm te tɩn. Ba ma saŋɩ pɛɛra yadonnə nwana yam kambiə nɩ, dɩ nakənə nɩ, dɩ zwɩ dwi dwi wʋnɩ, ba daarɩ ba lɩ-ya ba pɔɔrɩ ba pa nɔɔna bam maama lɩla. 14 Levi tiinə bam na kɩ kʋntʋ ba ti tɩn, ba ma pɔɔrɩ nwana ba tiŋi ba tɩtɩ ŋwaanɩ, dɩ Wɛ kaanɩm tiinə bam na yɩ Arɔn dwi tiinə tɩn ŋwaanɩ. Bɛŋwaanɩ, kaanɩm tiinə bam yiǝ dɛɛn yɔɔrɩ ya sɩɩnɩ mʋ dɛ dɩm kʋntʋ maama wʋnɩ, pa ba jɩgɩ zwɛɛm pɛɛra yam, dɩ vara lara kam ba zwɛ taan ba vu ba yi tɩga. Kʋntʋ ŋwaanɩ Levi tiinə bam mʋ kwɛ kaanɩm dɩm pa ba ba tɩtɩ dɩdaanɩ kaanɩm tiinə bam.
15 Lən-leenə bam na yɩ Azafɩ dwi nɔɔna tɩn dɩ dɛɛn zɩgɩ ba zɩga je nɩ, nɩnɛɛnɩ Pɛ Davidi, dɩ Azafɩ, dɩ Hemanɩ, dɩ pɛ wʋm sampwərə Yedutun dɛɛn na brɩ nɩ ba taa kɩ te tɩn. Levi tiinə balʋ na zɩgɩ ba yɩrɩ Wɛ-digə kam niə yam tɩn maŋɩ ba zɩga je sɩm nɩ taan, ba cʋrrʋ tɩm na kwɛ kaanɩm dɩm ba pa-ba tɩn ŋwaanɩ mʋ.
16 Ba ma sɩɩnɩ ba kwɛ Pakɩ kaanɩm dɩm ba ti dɛ dɩm kʋntʋ nɩ, sɩ ba ma ba zuli Baŋa-Wɛ. Ba ma zwɛ pɛɛra yam Baŋa-Wɛ kaanɩm bimbim dɩm baŋa nɩ, nɩ Pɛ Zʋzɩasɩ na pɛ-ba ni sɩ ba kɩ te tɩn. 17 Yisɩrayɛlɩ tiinə balʋ maama na wʋra tɩn ma di Pakɩ candiə kam maŋa kam kʋntʋ nɩ, yɩ ba daarɩ ba kwe da yarpɛ ba di dɩpɛ dɩlʋ na ba jɩgɩ dabɩlɩ dɩ wʋnɩ tɩn candiə kam dɩ. 18 Ba wʋ fɔgɩ ba di candiə kantʋ doŋ Yisɩrayɛlɩ laŋa kam nɩ kʋ zɩgɩ maŋa kalʋ Wɛ nijoŋnu Samowɛlɩ na wʋra tɩn. Yisɩrayɛlɩ tɩʋ pwa bam wʋlʋwʋlʋ nan ya ta wʋ di candiə kam, nɩ Zʋzɩasɩ na di-dɩ te tɩn. O dɛɛn pɛ kaanɩm tiinə bam, dɩ Levi dwi tiinə bam, dɩ Zuda tiinə bam, kʋ wǝli dɩ Yisɩrayɛlɩ tiinə balʋ na wʋ Zeruzalɛm nɩ tɩn mʋ wəl‑o pa ba di candiə kam. 19 Kʋ nan yɩ Zʋzɩasɩ paarɩ dim bɩna fugə-nana bɩnɩ dɩm nɩ mʋ ba daa joori ba di Pakɩ candiə kam.
Zʋzɩasɩ tʋʋnɩ
20 Kʋntʋ maama kwaga nɩ yɩ Pɛ Zʋzɩasɩ fɔgɩ o kwɛ Wɛ-digə kam o ti tɩn, mʋ Ezipi tɩʋ pɛ Neko zaŋɩ dɩ o jar-kərə bam o vu Karekemisi na wʋ Efratɩ bugə kam seeni tɩn. Zʋzɩasɩ dɩ ma nuŋi sɩ o jeeri Neko dɩ jara sɩ o cɩ o yigə. 21 Neko dɩ dɛɛn ma tʋŋɩ nɔɔna Zʋzɩasɩ te dɩ kwǝrǝ kantʋ o wɩ: «Zuda tɩʋ pɛ, taanɩ tǝrǝ kʋ na wʋ dɩbam tɩtarɩ laŋa nɩ tɩn. Amʋ nuŋi sɩ a zaŋɩ najara dɩ a dʋna mʋ, sɩ kʋ daɩ dɩ nmʋ. Wɛ nan zɩgɩ a kwaga nɩ mʋ sɩ a kɩ najara yam, yɩ DƖ wɩ: a kɩ lɩla a kɩ-ya. Nan yɩ cɩ Wɛ yigə, sɩ DƖ wʋ́ cɔgɩ nmʋ dɩ.»
22 Zʋzɩasɩ ma sɩn o zwa dɩ Neko ni-kaana yam, dɩ kʋ na yɩ Wɛ mʋ dɛ Neko baŋa DƖ ta taanɩ dɩm tɩn dɩ. O ma ləri o yibiyə sɩ Neko yɩ lwar-o yɩ o vu Megido tɩ-kamparɩ nɩ sɩ o dɩ o jar-kərə bam jeer-o dɩ najara. 23 Najara yam na cɛ tɩn, mʋ Ezipi cɩ-tara tɔ Zʋzɩasɩ dɩ cɩna pa kʋ zʋ o yɩra. O ma ta o dɩdɛɛra bam o wɩ: «Ja-nɩ-na á lagɩ je á vu, sɩ kʋ tiini kʋ cɛ a yɩra nɩ mʋ.»
24 Zʋzɩasɩ nɔɔna bam ma lɩ-o o tɩtɩ təriko kʋm nɩ, yɩ ba kwe‑o ba kɩ təriko kʋdoŋ nɩ, kʋ dɩ na yɩ o nyɩm tɩn. Ba ma ja-o ba joori Zeruzalɛm. Dáanɩ mʋ o tɩga. Ba ma kɩ-o o kwə yibeelǝ yam nɩ. Zuda dɩ Zeruzalɛm tiinə bam maama ma keeri o luə. 25 Wɛ nijoŋnu Zeremi dɛɛn ma panɩ Zʋzɩasɩ luə nagʋrʋ ləŋə. Kʋ maa na zɩgɩ maŋa kam kʋntʋ nɩ sɩ kʋ taa ve tɩn, lən-leenə bam maama, baara dɩ kaana, yǝni ba leeni ləŋə kam kʋntʋ mʋ ba ma ba guli Pɛ Zʋzɩasɩ gulə. Yisɩrayɛlɩ tɩʋ wʋnɩ ba yǝni ba leeni lusəm sɩm kʋntʋ doŋ, nɩ kʋ na pʋpʋnɩ kʋ tigi Nagʋrʋ le sɩm tɔnɔ kʋm wʋnɩ te tɩn.b
26 Zʋzɩasɩ dɛɛn na di paarɩ yɩ o kɩ wǝǝnu tɩlʋ tɩn, dɩ o na sɛ o tɔgɩ kʋlʋ na pʋpʋnɩ Baŋa-Wɛ niə tɔnɔ kʋm wʋnɩ tɩn pa o tʋŋɩ o poli Wɛ wʋʋ te tɩn, 27 dɩ o tɩtʋŋ-naga maama kʋ zɩgɩ o paarɩ dɩm pulim nɩ sɩ kʋ yi dɩ na kweeli maŋa kalʋ tɩn, tɩntʋ maama pʋpʋnɩ mʋ tɩ tiŋi Yisɩrayɛlɩ dɩ Zuda Pwa Cɩbarɩ tɔnɔ kʋm wʋnɩ.