Zuda tɩʋ pɛ Yoahazɩ taanɩ
36
Zuda tiinə bam ma kuri Zʋzɩasɩ bu Yoahazɩ sɩ o ləri o ko wʋm yuu nɩ o di paarɩ Zeruzalɛm nɩ. 2 Yoahazɩ dɛɛn jɩgɩ bɩna fiinle-yatɔ mʋ yɩ o di paarɩ dɩm. O ma jǝni Zeruzalɛm nɩ o di paarɩ dɩm o kɩ canɩ sɩtɔ. 3 Ezipi tɩʋ pɛ wʋm dɛɛn ma ja Yoahazɩ o nuŋi Zeruzalɛm nɩ, sɩ o daa yɩ na cwǝŋǝ o di paarɩ dɩm. O ma daarɩ o fɩn Zuda tiinə sɩ ba ŋwɩ lampoo na yɩ səbu-poŋo kilo mʋrrʋ tɩtɔ dɩ biə-yana (3,400), kʋ wǝli dɩ səbu-sɩŋa kilo fiintɔ-tɩna (34) tɩn ba pa‑o. 4 Ezipi pɛ wʋm ma kwe Eliyakɩm wʋlʋ na yɩ Yoahazɩ nyaanɩ tɩn o tiŋ‑o sɩ o ləri Yoahazɩ yuu nɩ o di paarɩ o taa te Zuda dɩ Zeruzalɛm. O ma ləri Eliyakɩm yɩrɩ dɩm pa dɩ yɩ Yeoyakim. O ma daarɩ o ja Yoahazɩ o vu o yagɩ Ezipi nɩ.aZuda pɛ Yeoyakim taanɩ
5 Yeoyakim dɛɛn jɩgɩ bɩna fiinle-yanu mʋ yɩ o di paarɩ. O ma jǝni Zeruzalɛm nɩ o di paarɩ dɩm o kɩ bɩna fugə-dɩdʋa. O dɩ dɛɛn tʋŋɩ lwarɩm o cɔgɩ o Tu Baŋa-Wɛ dɩm yigə. 6 Babilɔnɩ tɩʋ pɛ Nebukadnɛtsarɩ dɛɛn ma ba o li Zuda tɩʋ maama dɩ jara. O ma ja Yeoyakim o daarɩ o pa ba kwe canna capʋnnʋ ba vɔ‑o ba vaŋɩ ba ja ba vu Babilɔnɩ.b 7 Nebukadnɛtsarɩ dɛɛn ta vrɩ Baŋa-Wɛ digə kam wʋʋ zɩla mʋ o ja o vu Babilɔnɩ. O ma kwe-tɩ o zɩgɩ o sɔ-fɔrɔ kʋm wʋnɩ.c
8 Yeoyakim dɛɛn na di paarɩ yɩ o kɩ wǝǝnu tɩlʋ tɩn, dɩ o na tusi o kɩ tɩtʋŋ-zɔɔna yalʋ tɩn maama, ba pʋpʋnɩ-tɩ ba tiŋi Yisɩrayɛlɩ dɩ Zuda Pwa Cɩbarɩ tɔnɔ kʋm wʋnɩ. Yeoyakim ma tɩ yɩ o bu Yehoyakini ləri o yuu nɩ o di paarɩ.
Zuda tɩʋ pɛ Yehoyakini taanɩ
9 Yehoyakini dɛɛn jɩgɩ bɩna fugə-nana mʋ yɩ o di paarɩ. O ma jǝni Zeruzalɛm nɩ o di paarɩ dɩm o kɩ canɩ sɩtɔ dɩ da fugə. Yehoyakini dɛɛn tʋŋɩ lwarɩm o cɔgɩ Baŋa-Wɛ yigə. 10 Bɩn-dʋʋrɩ maŋa na yi tɩn, Pɛ Nebukadnɛtsarɩ ma tʋŋɩ nɔɔna sɩ ba ja Yehoyakini ba vu Babilɔnɩ. O ta ma pɛ Baŋa-Wɛ digə kam lʋnnɩ wǝǝnu o wǝli da o ja o viiri. O laan ma pa Yehoyakini cʋrʋ Sedesɩasɩ ləri o yuu nɩ o ji pɛ o taa te Zuda dɩ Zeruzalɛm.d
Zuda tɩʋ pɛ Sedesɩasɩ taanɩ
11 Sedesɩasɩ dɛɛn jɩgɩ bɩna fiinle-dɩdʋa mʋ yɩ o ji Zuda tɩʋ pɛ. O ma jǝni Zeruzalɛm nɩ o di paarɩ dɩm o kɩ bɩna fugə-dɩdʋa. 12 Sedesɩasɩ dɛɛn tʋŋɩ lwarɩm mʋ o cɔgɩ o Tu Baŋa-Wɛ dɩm yigə. O dɛɛn ta wʋ tu o tɩtɩ o pa Wɛ nijoŋnu Zeremi, dɩ wʋntʋ na jɩgɩ Baŋa-Wɛ taanɩ o tɛa te maama tɩn dɩ.e 13 Sedesɩasɩ dɛɛn nan lɔgɩ durə dɩlʋ Pɛ Nebukadnɛtsarɩ ya na pɛ o du Wɛ yɩrɩ ŋwaanɩ tɩn kwaga nɩ mʋ. O ma pa o bɩcarɩ digili yɩ o vɩn sɩ o zuli Baŋa-Wɛ dɩm na yɩ Yisɩrayɛlɩ tiinə Wɛ tɩn. 14 Kʋ wǝli da, Wɛ kaanɩm yigǝ tiinǝ bam, dɩ Zuda tiinə bam maama dɛɛn ba jɩgɩ cɩga dɩ Wɛ. Ba ma yɔɔrɩ ba kaagɩ ba kɩ wo-zɔɔna kikiə yalʋ dwi-gɛ tiinə bam na kɩ tɩn mʋ. Ba ta maa jɩgɩ Baŋa-Wɛ digə kam ba cɔga, yɩ Wɛ ya pɔɔrɩ-ka DƖ pa DƖ tɩtɩ Zeruzalɛm tɩʋ wʋnɩ.
Zeruzalɛm tɩʋ na cɔgɩ te tɩn
15 Baŋa-Wɛ dɛɛn yɔɔrɩ DƖ tʋŋɩ DƖ tɩntʋŋna Zuda dwi tiinə bam tee nɩ mʋ kuni zanzan, DƖ na yɩ ba nabaara bam Wɛ tɩn ŋwaanɩ. Bɛŋwaanɩ, DƖ jɩgɩ DƖ nɔɔna bam ŋwaŋa, dɩ DƖ tɩtɩ digə kam ŋwaŋa zanzan. 16 Nɔɔna bam dɛɛn nan joori ba jɩgɩ Wɛ tɩntʋŋna bam ba mwanɩ mʋ. Ba maa wʋ kwe DƖ taana yam ba kɩ ba bɩcara nɩ. Ba na jɩgɩ Wɛ nijoŋnǝ bam ba yáala kʋntʋ tɩn, Baŋa-Wɛ ban-lʋm ma lɛɛrɩ dɩ tʋ ba baŋa nɩ, yɩ DƖ wʋ duri ba yibwənə.f 17 DƖ ma pa Babilɔnɩ tɩʋ pɛ ba o kɩ jara dɩ ba. O nɔɔna bam ma zʋ Wɛ digə kam ba kwe ba sʋ-lwaanʋ ba gʋ ba nɔn-dʋnnʋ maama. Kʋ na yɩ nɔn-babɛ, dɩ bɩsankam, dɩ nɔn-kwɩn maama, Nebukadnɛtsarɩ wʋ duri ba wʋlʋwʋlʋ ŋwaŋa. Bɛŋwaanɩ, Baŋa-Wɛ mʋ kwe ba maama DƖ kɩ o jɩŋa nɩ. 18 Pɛ Nebukadnɛtsarɩ ta ma pɛ Baŋa-Wɛ digə kam yɩra zɩla maama, kʋ na yɩ wo-kamunə dɩdaanɩ wo-balwa dɩ, dɩ ka lʋnnɩ wǝǝnu tɩm, kʋ wǝli dɩ Zuda tɩʋ pɛ dɩ o dɩdɛɛra bam jɩjɩgɩrʋ o ja o viiri. O vrɩ tɩ maama mʋ o ja o vu o tɩtɩ tɩʋ Babilɔnɩ. 19 Babilɔnɩ tiinə bam ma kwe mim ba zwɛ Wɛ-digə kam, dɩ tɩʋ kʋm sɔ-fwaarʋ tɩm maama. Ba ma yigi Zeruzalɛm tɩʋ kabri sɩm ba dɩ tɩga nɩ, yɩ ba daarɩ ba cɔgɩ lʋnnɩ wǝǝnu tɩm maama tɩʋ kʋm wʋnɩ.g
20 Pɛ Nebukadnɛtsarɩ ma kalɩ nɔɔna balʋ na wʋ tɩgɩ najara yam wʋnɩ tɩn o ja o vu Babilɔnɩ tɩʋ kʋm pa ba ji o dɩ o biə tɩntʋŋna. Ba dɛɛn ma kɩ kʋntʋ taan sɩ kʋ yi Pɛrsɩ tɩʋ paarɩ dɩm na jǝni maŋa kalʋ nɩ tɩn.h 21 Kʋntʋ ma pa Zuda tɩga kam na siun, nɩ kʋ ya na maŋɩ sɩ ka na bɩna yarpɛ maama wʋnɩ tɩn. Maŋa kalʋ maama tɩga kam na yɩ di-dwəənu yɩranɩ tɩn, kʋ sin mʋ sɩ kʋ vu kʋ yi bɩna fusɩrpɛ, nɩ Baŋa-Wɛ na dɛ DƖ tɩntʋŋnʋ Zeremi baŋa nɩ DƖ ta kʋlʋ na maŋɩ sɩ kʋ kɩ tɩn.i
22 Pɛrsɩ tɩʋ pɛ Sirusi paarɩ pulim bɩnɩ dɩm nɩ mʋ Baŋa-Wɛ pɛ kwǝrǝ kalʋ DƖ dɛɛn na tɔgɩ Zeremi baŋa nɩ DƖ ŋɔɔnɩ tɩn sɩɩnɩ ka kɩ. Kʋ na kɩ te tɩn, DƖ pɛ Pɛ Sirusi wʋbʋŋa ja sɩ o tʋŋɩ kwǝrǝ sɩ ka yi o tɩʋ kʋm tɩɩnɩ yam maama. Ba ta ma pʋpʋnɩ o kwǝrǝ kam ba kɩ tɔnɔ nɩ ka wɩ:
23 «Pɛrsɩ tɩʋ pɛ Sirusi ni dɩm mʋ tɩntʋ:
Wɛyuu Tu Baŋa-Wɛ mʋ kwe tɩga baŋa tɩɩnɩ maama DƖ pa-nɩ sɩ a taa te. DƖ nan kuri amʋ mʋ sɩ a lɔ Wɛ-digə Zuda tɩʋ Zeruzalɛm wʋnɩ a pa‑DƖ. Abam balʋ maama na wʋ Baŋa-Wɛ nɔɔna bam wʋnɩ tɩn jɩgɩ cwǝŋǝ sɩ á vu Zeruzalɛm á tʋŋɩ tɩtʋŋɩ dɩm kʋntʋ. Baŋa-Wɛ wʋ́ taa wʋ á tee nɩ.»j