31
Ba na di candiə kam ba ti tɩn, Yisɩrayɛlɩ tiinə balʋ maama na tu ba wʋ Zeruzalɛm nɩ tɩn ma nuŋi ba vu ba tʋlɩ Zuda tɩɩnɩ dɩm maama ba guri kandwa yalʋ ba ya na cugi ba jɩgɩ ba kaanɩ tɩn ba cɩcʋgɩ, ba daarɩ ba goni Asera nyɩnyʋgʋ dɛ sɩm ba dɩ tɩga nɩ. Ba ta ma yɔɔrɩ ba cɔgɩ jwǝnǝ wara-je dɩ sɩ kaanɩm bimbinə yalʋ na wʋ Zuda laŋa kam, dɩ Bɛnzamɛn laŋa kam, dɩ Efrayim laŋa kam, dɩ Manasɩ laŋa kam je maama nɩ tɩn. Kʋ kwaga nɩ nɔɔna bam maama laan ma viiri ba joori ba sam.
Baŋa-Wɛ zulə taanɩ
2 Pɛ Ezekɩasɩ dɛɛn pɔɔrɩ Wɛ kaanɩm tiinə bam, dɩ Levi tiinə bam pa ba maama jɩgɩ pʋpwara mʋ. Ba pɔɔrɩm dɩm wʋnɩ dɩ, kaanɩm tu maama dɩ Levi dwi tu maama jɩgɩ o tɩtʋŋɩ mʋ. Ba badaara wʋ́ taa kɩ zwɛɛm kaanɩm, dɩ yazurə pɛɛra kaanɩm, sɩ babam taa zɩgɩ Baŋa-Wɛ wara-je sɩm niə yam seeni ba tʋŋa. Babam maa wʋ́ taa kɩ Wɛ le yɩ ba leeni ba zuli‑DƖ. 3 Ezekɩasɩ ma kuri o tɩtɩ vara bam wʋnɩ o pa-ba sɩ ba taa kɩ zwɛɛm kaanɩm, nɩ Baŋa-Wɛ niə yam na brɩ sɩ ba yǝni ba taa kɩ te tɩn. Kʋ maa yɩ tɩtɩɩtɩ, dɩ dɩdaan-ni maama nɩ, kʋ wǝli dɩ Wɛ siun da yam nɩ, dɩ can-dʋŋa candi dɩ candi yadonnə nɩ, nɩ kʋ na tɔgɩ kʋ cwǝŋǝ te tɩn. 4 O dɛɛn ta ma pa ni sɩ balʋ maama na zʋʋrɩ Zeruzalɛm nɩ tɩn yǝni ba ja kʋlʋ dɩ kʋlʋ na maŋɩ dɩ kaanɩm tiinə bam, dɩ Levi tiinə bam tɩn ba ba ba pa-ba.a Kʋntʋ na kɩa, ba dɩ wʋ́ cɛ dɩ ba tɩtʋŋa, nɩ Wɛ niə yam na brɩ te tɩn. 5 Nɔɔna bam na yɔɔrɩ ba ni pɛ wʋm kwǝrǝ kam tɩn, mʋ ba pʋrɩ ba wʋrʋ ba ja ba pɛɛra yam ba ba. Ba pɛɛra yam maa yɩ mɩna, dɩ dɩvɛn, dɩ nugə, dɩ tʋʋrʋ, dɩdaanɩ wʋdiiru tɩlʋ maama na loori yigə tɩ kɩ tɩn. Ba yɔɔrɩ ba ja ba wǝǝnu pɔɔrɩm fugə maama wʋnɩ pʋpwara dɩdʋa mʋ ba ba ba kɩ da, pa tɩ tiini tɩ daga. 6 Yisɩrayɛlɩ dɩ Zuda dwi tiinə balʋ na zʋʋrɩ Zuda tɩɩnɩ dɩdonnǝ dɩm wʋnɩ tɩn dɩ ma ja ba Wɛ-təri pɛɛra ba ba ba wǝli da, nɩ kʋ na yɩ ba vara bam, dɩ wǝǝnu tɩlʋ ba ya na maŋɩ ba pɔɔrɩ-tɩ sɩ ba pa Baŋa-Wɛ tɩn. Ba na lagɩ tɩ maama ba tiŋi bwərə dɩ bwərə tɩn, tɩ tiini tɩ daga mʋ sɩ kʋ gaalɩ. 7 Nɔɔna bam puli sɩ ba taa jaanɩ wǝǝnu tɩntʋ maama ba tui canɩ sɩtɔ cana kam wʋnɩ mʋ, yɩ ba laan la tɩ maama ba ti canɩ sɩrpɛ cana kam wʋnɩ. 8 Ezekɩasɩ dɩ o dɩdɛɛra bam na nɛ nɔɔna bam na lagɩ pɛɛra yalʋ maama ba tiŋi bwərə dɩ bwərə tɩn, ba ma kɩ Baŋa-Wɛ le, dɩ DƖ nɔɔna Yisɩrayɛlɩ nɔɔna bam dɩ le.
9 Ezekɩasɩ ma bwe kaanɩm tiinə bam dɩ Levi tiinə bam sɩ o lwarɩ bwərə na tigi ya kɩ kʋlʋ tɩn. 10 Wɛ kaanɩm nakwɩ tu Azarɩa na nuŋi Sadoki sɔ-yuu kʋm nɩ tɩn ma lǝr-o o wɩ: «Kʋ na zɩgɩ maŋa kalʋ nɔɔna bam na jaanɩ ba pɛɛra ba tui Baŋa-Wɛ digə kam nɩ tɩn, dɩbam yɔɔrɩ dɩ́ di dɩ́ sui mʋ, yɩ dɩ́ daarɩ dɩ́ tiŋə. Bɛŋwaanɩ, kʋ yɩ Baŋa-Wɛ mʋ kɩ DƖ nɔɔna bam yu-yoŋo pa tɩntʋ maama ta daarɩ tɩ tigə zanzan.»
11 Pɛ wʋm dɛɛn ma pa ni sɩ ba fɔgɩ ba kwɛ di-biə bam na wʋ Baŋa-Wɛ digə kam wʋnɩ sɩ ba taa zɩgɩ zɩla da. Ba maa sɩɩnɩ ba kwɛ-ba ba ti. 12 Ba laan ma sɩɩnɩ yiǝ ba ja Wɛ-təri pɛɛra yam, dɩ pɛɛra yadonnə yam, dɩ wǝǝnu tɩlʋ ba ya na pɔɔrɩ ba pa Wɛ tɩn ba zɩgɩ di sɩm kʋntʋ wʋnɩ. Wʋlʋ ba na kuri sɩ o taa nii di sɩm kʋntʋ baŋa nɩ tɩn yɩrɩ mʋ yɩ Konanɩa. O dɛɛn yɩ Levi dwi tu mʋ. O cʋrʋ Simeyi dɛɛn saŋɩ o kwaga o zən‑o tɩtʋŋa yam wʋnɩ. 13 Balʋ dɩ maa na wʋ bantʋ bale dam kuri nɩ ba nii di sɩm baŋa nɩ tɩn dɛɛn yɩ Yehiyɛlɩ, dɩ Azazia, dɩ Nahatɩ, dɩ Azayɛlɩ, dɩ Yerimoti, dɩ Yozabadɩ, dɩ Eliɛlɩ, dɩ Yisimakia, dɩ Mahatɩ, kʋ wǝli dɩ Benaya mʋ. Kʋ nan yɩ Pɛ Ezekɩasɩ, dɩ Wɛ kaanɩm nakwɩ tu Azarɩa dɛɛn mʋ kuri-ba sɩ ba taa tʋŋɩ tɩtʋŋa yam kʋntʋ.
14 Imina bu Kʋrɩ dɛɛn yɩ Levi dwi tu mʋ yɩ o yɩrɩ Wɛ-digə kam wa-puli seeni ni dɩm. Ba ma kwe‑o ba zɩgɩ sɩ o taa joŋi nɔɔna wʋ-yoŋo pɛɛra yalʋ ba na pɔɔrɩ ba pa Wɛ tɩn. O ma yǝni o kwe pɛɛra yam kʋntʋ, dɩdaanɩ wǝǝnu tɩlʋ maama nɔɔna bam na kɩ Baŋa-Wɛ jɩŋa nɩ tɩn o pɔɔrɩ o pa kaanɩm tiinə bam dɩ Levi tiinə bam nɩ kʋ na maŋɩ te tɩn. 15 Balʋ dɩ na zən‑o tɩtʋŋa yam wʋnɩ tɩn maa yɩ: Edɛn, dɩ Miniamin, dɩ Zozwe, dɩ Semaya, dɩ Amari, dɩdaanɩ Sekanɩa. Bantʋ ma sɩɩnɩ ba yiǝ ba zən‑o tɩɩnɩ dɩlʋ maama Wɛ kaanɩm tiinə na zʋʋrɩ dɩ wʋnɩ tɩn. Ba dɛɛn yǝni ba pɔɔrɩ pɛɛra yam ba pa ba cʋrrʋ kaanɩm tiinə bam, sɩ kʋ tɔgɩ dɩ ba tɩtʋŋa pɔɔrɩm sɩm mʋ, nɔn-kwɩɩrʋ dɩ nɔn-dʋnnʋ maama.
16 Ba ma pɔɔrɩ pɛɛra yam ba pa baara balʋ na yi bɩna yatɔ ba daŋɩ yɩ ba yɩra pʋpʋnɩ ya tigi dwi natɔga twannʋ tɩm wʋnɩ tɩn mʋ. Kʋ maa yɩ balʋ na wʋ́ zʋ Baŋa-Wɛ digə kam wʋnɩ ba taa tʋŋɩ ba dɛ wʋnɩ tɩtʋŋa, sɩ kʋ maŋɩ dɩ ba na pɔɔrɩ-ba sɩ ba taa kɩ te pʋpwara dɩ pʋpwara tɩn mʋ. 17 Kaanɩm tiinə bam na pɔɔrɩ te tɩtʋŋa yam ŋwaanɩ tɩn dɛɛn tɔgɩ ba kwə yɩra na pʋpʋnɩ ya tigi dwi natɔga twannʋ tɩm wʋnɩ te tɩn mʋ. Levi tiinə balʋ na yi bɩna fiinle ba daŋɩ tɩn dɩ maa jɩgɩ ba tɩtʋŋa ba tʋŋa sɩ kʋ maŋɩ dɩ ba pɔɔrɩm sɩm na yɩ te tɩn. 18 Bantʋ maama yɩra pʋpʋnɩ ya tigi mʋ, kʋ wǝli dɩ ba bu-sɩsɩn, dɩ ba kaana, dɩ ba biə, dɩ ba kɔgɔ kʋm maama. Bɛŋwaanɩ, ba tiini ba jɩgɩ cɩga dɩ ba na pɔɔrɩ ba tɩtɩ sɩ ba taa yɩ lanyɩranɩ fasɩ Wɛ ŋwaanɩ tɩn.
19 Kʋ ta na yɩ Arɔn dwi dɩm na yɩ Wɛ kaanɩm tiinə yɩ ba zʋʋrɩ tɩɩnɩ dɩlʋ maama wʋnɩ, naa dɩ pwəli sɩm nɩ tɩn, ba dɛɛn lɩ nɔɔna mʋ sɩ ba yǝni ba pɔɔrɩ pɛɛra yam ba pa ba baara balʋ maama na wʋra tɩn. Ba dɛɛn ta pɔɔrɩ pɛɛra yam ba pa Levi dwi tiinə balʋ yɩra na pʋpʋnɩ ya tigi dwi natɔga twannʋ tɩm wʋnɩ tɩn mʋ.
20 Tɩtʋŋ-ŋʋna tɩlʋ Pɛ Ezekɩasɩ dɛɛn na kɩ Zuda laŋa kam maama nɩ tɩn mʋ kʋntʋ. O tʋŋɩ kʋlʋ na yɩ cɩga yɩ kʋ su o Tu Baŋa-Wɛ yi tɩn mʋ. 21 Kʋ na yɩ Wɛ-digə kam tɩtʋŋa, dɩ o na tɔgɩ Wɛ niə yam dɩ DƖ kwiə yam te tɩn, o dɛɛn yɔɔrɩ o kɩ o cɩga dɩdaanɩ Wɛ mʋ, yɩ o tʋŋɩ dɩ o wʋʋ maama. Kʋntʋ tɩn, wǝǝnu dɛɛn kɩ lanyɩranɩ tɩ pa‑o.b