Ezekɩasɩ di Pakɩ candiə kam
30
Ezekɩasɩ dɛɛn tʋŋɩ kwǝrǝ mʋ o pa Yisɩrayɛlɩ dɩ Zuda dwiə yam maama. O ta ma pʋpʋnɩ twannʋ sɩ tɩ yi Efrayim dɩ Manasɩ dwi tiinə bam. O dɛɛn dɛ kʋntʋ baŋa nɩ mʋ o bəŋi ba maama sɩ ba jeeri Baŋa-Wɛ digə kam na wʋ Zeruzalɛm nɩ tɩn ba di Pakɩ candiə kam ba ma zuli Baŋa-Wɛ na yɩ Yisɩrayɛlɩ tiinə Wɛ tɩn. 2 Pɛ wʋm, dɩ o nakwa bam, dɩ Zeruzalɛm tɩʋ kɔgɔ kʋm nan ya jaanɩ wʋbʋŋa mʋ sɩ ba di candiə kam canɩ sɩle cana kam nɩ.a 3 Ba wʋ wanɩ candiə kam ba di pulim cana kam nɩ, nɩ ba na yǝni ba di-dɩ bɩnɩ maama wʋnɩ te tɩn, Wɛ kaanɩm tiinə bam zanzan ta na wʋ kwɛ ba tɩtɩ dɩ cullu tɩm tɩn ŋwaanɩ. Nɔɔna bam zanzan dɩ ya ta maa wʋ tu ba jeeri Zeruzalɛm nɩ. 4 Pɛ wʋm dɩ nɔn-kɔgɔ kʋm maama bʋbʋŋɩ dɩm na jaanɩ dɩ tiŋi kʋntʋ tɩn ma pa ba wʋʋ poli. 5 Ba laan ma tʋŋɩ kwǝrǝ pa ka yi Yisɩrayɛlɩ je sɩm maama, kʋ na zɩgɩ Bɛɛr-Seba nɩ, sɩ kʋ yi Dan laŋa kam seeni tɩn. Ba ma bəŋi nɔɔna bam sɩ ba jeeri daanɩ Zeruzalɛm nɩ ba di Pakɩ candiə kam ba ma zuli Baŋa-Wɛ na yɩ Yisɩrayɛlɩ tiinə Wɛ tɩn. Bɛŋwaanɩ, nɔɔna bam ba yǝni ba tui zanzan zanzan, nɩ Wɛ niə yam na brɩ sɩ ba taa kɩ te tɩn.6 Pɛ wʋm ma pa ni sɩ nɔɔna kwe o kwǝrǝ kam ba ja ba jagɩ ba yi Yisɩrayɛlɩ tɩʋ kʋm dɩ Zuda tɩʋ kʋm ni maama. Pɛ wʋm dɩ o nakwa bam kwǝrǝ na pʋpʋnɩ ka tiŋi yɩ ka brɩ kʋlʋ tɩn mʋ tɩntʋ:
«Abam Yisɩrayɛlɩ tiinə bam, joori-na Baŋa-Wɛ na yɩ á nabaara Abraham, dɩ Yizakɩ, dɩ Yisɩrayɛlɩ Wɛ tɩn te. Abam na kɩ kʋntʋ, DƖ dɩ wʋ́ pipiri DƖ jeeri abam balʋ ta na daarɩ yɩ á lu Asiiri pwa bam jɩŋa nɩ tɩn. 7 Nan yɩ lwəni-na á nabaara bam kikiə, dɩ á cʋrrʋ tɩm kikiə, dɩ ba na nuŋi Baŋa-Wɛ kwaga nɩ tɩn. Abam nan nɛ nɩ ba kǝm dɩm kʋntʋ ŋwaanɩ, Wɛ pɛ lɛɛrʋ ba ba baŋa mʋ.b 8 Nan yɩ pa á bɩcara digili, nɩ á kwə bam dɛɛn na kɩ te tɩn. Sɛ-na á pa Baŋa-Wɛ, sɩ á daarɩ á taá jeeri DƖ digə kam wʋnɩ. Bɛŋwaanɩ, DƖ pɔɔrɩ jǝgǝ kam kʋntʋ sɩ ka taa yɩ lanyɩranɩ fasɩ mʋ sɩ kʋ taa ve maŋa maama. Taá zuli-na á Tu Baŋa-Wɛ dɩm, sɩ DƖ dɩ dwanɩ DƖ ban-lʋm dɩm á baŋa nɩ. 9 Abam nan na joori Baŋa-Wɛ te, balʋ na kalɩ á cʋrrʋ dɩ á biə ba ja ba vu sa-tɩʋ yigə yigə tɩn wʋ́ duri ba ŋwaŋa yɩ ba daarɩ ba yagɩ-ba sɩ ba joori tɩga kantʋ nɩ. Bɛŋwaanɩ, Baŋa-Wɛ tiini DƖ jɩgɩ yibwənə dɩ ŋwaŋa. Abam maa na joori á ba DƖ te, DƖ daa bá ma DƖ kwaga DƖ ya abam.»c
10 Pɛ wʋm tɩntʋŋna dɛɛn ma ja twannʋ tɩm ba jagɩ ba kaagɩ Efrayim dɩ Manasɩ laŋa kam maama nɩ, ba vu ba yi Zabulɔn laŋa kam dɩ. Ba nan na tʋlɩ tɩʋ dɩ tɩʋ kʋntʋ tɩn, nɔɔna bam maama jɩgɩ-ba mʋ ba yáala yɩ ba mwana. 11 Kʋ nan na yɩ te tɩn, Asɛɛrɩ dwi dɩm wʋnɩ, dɩ Manasɩ dwi dɩm wʋnɩ, dɩ Zabulɔn dwi dɩm wʋnɩ nɔɔna badaara dɛɛn tu ba tɩtɩ mʋ yɩ ba vu Zeruzalɛm.d 12 Kʋ wǝli da, Wɛ dɛɛn pɛ Zuda tiinə bam jɩgɩ wʋbʋŋ-dɩdwɩ mʋ nɩ baá taa kɩ ba tɔgɩ kʋlʋ maama Pɛ Ezekɩasɩ dɩ o nakwa bam na tʋŋɩ kwǝrǝ sɩ ba kɩ tɩn, nɩ Baŋa-Wɛ na pɛ bantʋ ni te tɩn.
13 Nɔɔna bam dɛɛn ma nuŋi dɩ kɔ-fɔrɔ ba jeeri Zeruzalɛm nɩ canɩ sɩle cana kam wʋnɩ, sɩ ba di Dɩpɛ dɩlʋ na ba jɩgɩ dabɩlɩ dɩ wʋnɩ tɩn candiə kam.e 14 Ba ma ja kaanɩm bimbin-yɔɔrʋ tɩlʋ na wʋ Zeruzalɛm wʋnɩ tɩn, dɩ yalʋ ba na zwɛ wǝǝnu tɩlʋ lwǝm na ywǝmmǝ tɩn ya baŋa nɩ tɩn ba vu ba dʋlɩ ba yagɩ Sɩdrɔn bolo kʋm nɩ.
15 Ba dɛɛn ma gʋ Pakɩ pəlbiə sɩm canɩ sɩle cana kam da fugə-yana dɛ dɩm nɩ. Kaanɩm tiinə dɩ Levi tiinə badonnǝ dɛɛn wʋ kwɛ ba tɩtɩ dɩ cullu tɩm. Cavɩɩra ma ja-ba pa ba dɩ laan kwɛ ba tɩtɩ ba daarɩ ba ja zwɛɛm pɛɛra ba zʋ Baŋa-Wɛ digə kam wʋnɩ. 16 Ba laan ma vu ba zɩgɩ ba tɩtʋŋa ni nɩ, nɩ Wɛ tɩntʋŋnʋ Moyisi ya na maŋɩ o brɩ sɩ ba taa kɩ te tɩn. Levi tiinə bam dɛɛn ma kwe vara bam jana ba te ba pa kaanɩm tiinə bam yɩ ba dɩ miisi-ba kaanɩm bimbim dɩm yɩra nɩ. 17 Kɔ-fɔrɔ kʋm wʋ nɔɔna zanzan dɛɛn wʋ kwɛ ba tɩtɩ sɩ kʋ maŋɩ dɩ cullu tɩm, yɩ ba ba jɩgɩ cwǝŋǝ sɩ ba kwe Pakɩ pəlbiə sɩm ba gʋ ba pa Baŋa-Wɛ. Kʋntʋ ŋwaanɩ Levi tiinə bam ma gʋ-sɩ ba pa-ba.
18 Nɔn-kɔgɔ kʋm wʋ nɔɔna zanzan dɛɛn wʋ wanɩ ba tɩtɩ sɩ ba kwɛ cullu tɩm seeni, yɩ ba nan tɔgɩ ba di candiə kam. Bantʋ zanzan ya zɩgɩ Efrayim nɩ, dɩ Manasɩ nɩ, dɩ Yisakaarɩ nɩ, dɩ Zabulɔn nɩ ba ba Zeruzalɛm. Ba maa wʋ tɔgɩ kʋ cwǝŋǝ kam nɩ ba di Pakɩ candiə kam. Ezekɩasɩ na maanɩ ba kikiə yam kʋntʋ ni nɩ tɩn, o ma loori Wɛ o pa-ba o wɩ: «Baŋa-Wɛ lana. DƖ nan wʋ́ ma nɔɔnʋ maama kikiə DƖ cɛ-o, 19 nɩ kʋntʋ tu na kɩ o wʋbʋŋa nɩ sɩ o yɔɔrɩ o zuli Yuutu Baŋa-Wɛ dɩm na yɩ o nabaara Wɛ tɩn. Wɛ wʋ́ duri kʋ tu ŋwaŋa, dɩ o na maŋɩ o wʋ tɔgɩ Wɛ wara-je sɩm cullu tɩm na brɩ te tɩn dɩ.» 20 Baŋa-Wɛ ma sɛ Ezekɩasɩ na loori‑DƖ kʋlʋ tɩn yɩ DƖ wʋ waarɩ nɔɔna bam.
21 Yisɩrayɛlɩ tiinə balʋ maama dɛɛn na jeeri Zeruzalɛm nɩ tɩn kwe da yarpɛ mʋ ba di Dɩpɛ dɩlʋ na ba jɩgɩ dabɩlɩ dɩ wʋnɩ tɩn candiə kam dɩ wʋpolo. Wɛ kaanɩm tiinə bam dɩ Levi tiinə bam ma leeni ba tee Baŋa-Wɛ dɛ maama wʋnɩ, yɩ ba ta jɩgɩ gɩgana kwɛɛra zɩla ba magɩ dɩ dam.
22 Ezekɩasɩ ma yɔɔrɩ o ŋɔɔnɩ bɩcar-zuru taana dɩ Levi tiinə bam maama, ba na tʋŋɩ ba pa Baŋa-Wɛ dɩ yǝno tɩn ŋwaanɩ. Nɔɔna bam ma kwe da yarpɛ yam ba di candiə kam. Ba ma kwe yazurə pɛɛra ba kɩ kaanɩm ba pa Baŋa-Wɛ, yɩ ba kɩ DƖ le DƖ na yɩ ba nabaara Wɛ tɩn ŋwaanɩ. 23 Nɔɔna bam maama daa ma kɩ ni daanɩ sɩ ba taa di candiə kam da yarpɛ ba wǝli da. Ba ma sɩɩnɩ ba kɩ kʋntʋ dɩ ywəəni zanzan. 24 Zuda tɩʋ pɛ Ezekɩasɩ ma kwe na-balɩ mʋrʋ (1,000), dɩ peeni mʋrrʋ tɩrpɛ (7,000) o pa nɔɔna bam sɩ ba ma ba di candiə kam. Tɩʋ kʋm dɩdɛɛra dɩ ma pa-ba na-balɩ mʋrʋ (1,000), dɩ peeni mʋrrʋ fugə (10,000). Kaanɩm tiinə zanzan ma kwɛ ba tɩtɩ sɩ ba maŋɩ dɩ cullu tɩm. 25 Zuda nɔn-kɔgɔ kʋm maama, dɩ Wɛ kaanɩm tiinə bam, dɩ Levi dwi tiinə bam dɛɛn di ywəəni mʋ. Balʋ na zɩgɩ Yisɩrayɛlɩ je maama nɩ ba ba ba jeeri da tɩn, dɩdaanɩ vərə balʋ maama na zʋʋrɩ Zuda dɩ Yisɩrayɛlɩ tɩɩnɩ dɩm nɩ tɩn dɩ wʋrʋ dɛɛn ma poli. 26 Wʋpolo kʋlʋ nɔɔna bam dɛɛn na jɩgɩ Zeruzalɛm nɩ tɩn tiini kʋ gaalɩ. Kʋ na zɩgɩ Davidi bu Solɔmɔn na di Yisɩrayɛlɩ tɩʋ paarɩ maŋa kalʋ nɩ tɩn, sɩ kʋ yi zɩm, Zeruzalɛm tɩʋ daa ta wʋ nɛ kʋ doŋ.f 27 Wɛ kaanɩm tiinə bam dɩ Levi tiinə bam ma zaŋɩ sɩ ba loori Wɛ sɩ DƖ kɩ-nɔɔna bam lanyɩranɩ. Ba wɛ-loro kʋm ma di wɛyuu kʋ tʋ Wɛ zwa nɩ. DƖ ma zɩgɩ Wɛ-sɔŋɔ nɩ mɛ na yɩ lanyɩranɩ fasɩ yɩ DƖ zʋʋrɩ da tɩn DƖ cəgi ba loro kʋm.