Pɛ Ezekɩasɩ na kwɛ Wɛ-digə kam te tɩn
29
Ezekɩasɩ dɛɛn jɩgɩ bɩna fiinle-yanu mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm o kɩ bɩna fiinle-nʋgʋ. O nu wʋm dɛɛn yɩ Zakari bukɔ Abɩa mʋ. 2 O tɩtʋŋa ma su Baŋa-Wɛ yi lanyɩranɩ, nɩnɛɛnɩ o nabaarʋ Davidi dɛɛn na kɩ te tɩn.a3 Bɩnɩ dɩlʋ wʋnɩ Ezekɩasɩ na jigi pɛ tɩn pulim cana kam wʋnɩ mʋ o joori o pʋrɩ Baŋa-Wɛ digə kam niə yam. O ma pa ba fɔgɩ ba kwɛ bwəəru tɩm ba zɩgɩ. 4 O ma bəŋi Wɛ kaanɩm tiinə bam, dɩ Levi dwi tiinə bam o kɩ daanɩ sɩ ba jeeri Wɛ-digə kam kʋnkɔlɔ kʋlʋ na yɔɔrɩ wa-puli seeni tɩn. 5 O laan ma ta dɩ ba o wɩ:
«Abam Levi tiinə bam, cəgi-na a taanɩ dɩntʋ! Kwɛ-na á tɩtɩ sɩ á maŋɩ dɩ cullu tɩm, sɩ á ta daarɩ á fɔgɩ á kwɛ Baŋa-Wɛ dɩm na yɩ á nabaara Wɛ tɩn digə kam. Lɩ-na wǝǝnu tɩlʋ maama na wʋra yɩ tɩ paɩ ka jɩgɩ digiru tɩn ka wʋnɩ. 6 Dɩbam kwə bam nan wʋ jaanɩ cɩga dɩ dɩ́ Tu Baŋa-Wɛ dɩm. Ba ma vanɩ‑DƖ, pa ba tʋŋɩ lwarɩm ba ma ba cɔgɩ DƖ yigə. Ba dɛɛn mɛ ba kwaga ba ya Baŋa-Wɛ dɩ DƖ wara-je sɩm maama mʋ. 7 Ba ma yɔɔrɩ ba pɩ Wɛ-digə napɔrɔ kʋm niə yam, yɩ ba yagɩ pa min-zwǝǝnu tɩm dwe. Ba ma vɩn sɩ ba zwɛ wo-talooru, naa sɩ ba kɩ zwɛɛm kaanɩm Yisɩrayɛlɩ tiinə Wɛ dɩm wara-je sɩm nɩ. 8 Kʋ ma pa Baŋa-Wɛ ban-lʋm dɩm tʋ Zeruzalɛm dɩ Zuda tɩʋ kʋm maama baŋa nɩ. DƖ na kɩ te DƖ ma DƖ waarɩ-ba tɩn ma sʋ nɔɔna maama pa fʋʋnɩ jɩgɩ-ba, yɩ ba ta jɩgɩ Zuda tiinə bam ba yáala, nɩ abam na nɛa kʋ na yɩ te tɩntʋ tɩn. 9 Kʋntʋ ŋwaanɩ mʋ dɩbam dʋna gʋ dɩ́ kwə bam jara wʋnɩ, yɩ ba daarɩ ba pɛ dɩ́ biə dɩ dɩ́ kaana ba ja ba viiri.b 10 Amʋ wʋbʋŋa nan jaanɩ sɩ dɩ́ joori dɩ́ kɩ ni-mɔrɔ mʋ dɩ Baŋa-Wɛ dɩm na yɩ Yisɩrayɛlɩ tiinə Wɛ tɩn. Kʋntʋ mʋ wʋ́ cɩ sɩ DƖ ban-lʋm daa yɩ taa wʋ dɩbam baŋa nɩ. 11 Kʋntʋ ŋwaanɩ, a biə bam, daa yɩ ja-na á jǝni. Bɛŋwaanɩ, abam mʋ Baŋa-Wɛ kuri sɩ á taá zɩgɩ DƖ yigə nɩ á tʋŋa yɩ á kaanɩ á pa‑DƖ.»
12 Levi tiinə bantʋ ma zaŋɩ ba nuŋi sɩ ba tʋŋɩ.
Keyatɩ sɔ-yuu nɔɔna bam wʋnɩ:
Amasayi bu Mahatɩ, dɩ Azarɩa bu Zowɛlɩ.
Merari sɔ-yuu nɔɔna bam wʋnɩ:
Abidi bu Kisi, dɩ Yehaleli bu Azarɩa.
Gɛrsɔnɩ sɔ-yuu nɔɔna bam wʋnɩ:
Zima bu Yoa, dɩ Yoa bu Edɛn.
13 Elizafan dwi dɩm wʋnɩ:
Simiri, dɩ Yeyiyɛlɩ.
Azafɩ dwi dɩm wʋnɩ:
Zakari, dɩ Matanɩa.
14 Hemanɩ dwi dɩm wʋnɩ:
Yehiyɛlɩ, dɩ Simeyi.
Yedutun dwi dɩm wʋnɩ:
Semaya, dɩ Uziyɛlɩ.
15 Nɔɔna bam kʋntʋ dɩ ma vu ba la ba cʋrrʋ tɩm ba kɩ daanɩ. Ba maama ma vu ba kwɛ ba tɩtɩ dɩ cullu tɩm, yɩ ba daarɩ ba fɔgɩ ba kwɛ Baŋa-Wɛ digə kam, sɩ ba pa ka maŋɩ dɩ DƖ cullu tɩm na brɩ te tɩn, nɩnɛɛnɩ Pɛ Ezekɩasɩ na pɛ-ba ni sɩ ba kɩ te tɩn. 16 Kaanɩm tiinə bam ma zʋ Baŋa-Wɛ digə kam tɩtɩ wʋʋ sɩ ba kwɛ-ka. Ba ma zɩŋɩ wǝǝnu tɩlʋ maama ba dɛɛn na nɛ ka wʋnɩ yɩ tɩ digimi-ka tɩn ba ja ba nuŋi pooni ba vu ba zɩgɩ Wɛ-digə kam kʋnkɔlɔ kʋm wʋnɩ. Levi tiinə bam dɩ ma zɩŋɩ-tɩ ba ja ba nuŋi tɩʋ kʋm dáa dáa, yɩ ba dʋlɩ-tɩ ba yagɩ Sɩdrɔn bolo kʋm nɩ. 17 Ba dɛɛn puli ba kwɛɛm tɩtʋŋa yam kʋntʋ pulim cana kam dayigə dɛ dɩm nɩ mʋ. Ba na tʋŋɩ ba kɩ da nana tɩn, dɩ ba kwɛ pooni yigə je sɩm ba vu ba yi Baŋa-Wɛ digə napɔrɔ kʋm. Ba daa ma kwe da nana ba kwɛ Baŋa-Wɛ digə kam tɩtɩ ba wǝli da. Kʋ yɩ pulim cana kam da fugə-yardʋ dɛ dɩm nɩ mʋ ba dɛɛn kwɛ Wɛ-digə kam maama ba ti.
18 Ba ma vu Pɛ Ezekɩasɩ te ba ta dɩd-o ba wɩ: «Dɩbam wanɩ Baŋa-Wɛ wara-je sɩm maama dɩ́ kwɛ dɩ́ ti. Kʋ na yɩ zwɛɛm pɛɛrɩ bimbim dɩm dɩ dɩ yɩra zɩla yam maama, kʋ wǝli dɩ taabʋlʋ kʋlʋ ba na yǝni ba tiŋi dɩpwa kʋ baŋa nɩ Wɛ ŋwaanɩ tɩn dɩ kʋ yɩra wǝǝnu tɩm maama, dɩ́ fɔgɩ dɩ́ kwɛ tɩ maama mʋ. 19 Kʋ ta na yɩ wǝǝnu tɩlʋ Pɛ Ahazɩ na yagɩ o cɩga dɩ Wɛ yɩ o lɩ-tɩ Wɛ-digə kam wʋnɩ o paarɩ dim maŋa nɩ tɩn, dɩ́ ta beeri tɩntʋ maama dɩ́ na, yɩ dɩ́ daarɩ dɩ́ kwɛ-tɩ cullu tɩm seeni. Lele kʋntʋ tɩ maama laan zɩgɩ Baŋa-Wɛ bimbim dɩm yigə nɩ.»
20 Tɩga na pʋʋrɩ tɩtɩɩtɩ tɩn, Ezekɩasɩ ma la tɩʋ kʋm dɩdɛɛra bam o kɩ daanɩ yɩ ba vu Baŋa-Wɛ digə kam. 21 Ba maa jɩgɩ pɛɛra sɩ ba ma ba kɩ lwarɩm saarɩm kaanɩm pɛ sɔŋɔ kʋm tiinə ŋwaanɩ, dɩ Wɛ-digə kam ŋwaanɩ, dɩ Zuda tiinə bam maama ŋwaanɩ. Ba pɛɛra yam dɛɛn yɩ na-balɩ sɩrpɛ, dɩ pi-balɩ sɩrpɛ, dɩ pəlbiə sɩrpɛ, dɩ bʋ-balɩ sɩrpɛ mʋ. Pɛ wʋm ma pa kaanɩm tiinə bam na yɩ Arɔn dwi dɩm tɩn ni sɩ ba kwe vara bam ba ma ba kɩ kaanɩm Baŋa-Wɛ bimbim dɩm baŋa nɩ. 22 Kaanɩm tiinə bam ma gʋ na-balɩ sɩm ba ma ba kɩ kaanɩm, yɩ ba daarɩ ba kwe sɩ jana bam ba miisi ba yagɩ kaanɩm bimbim dɩm yɩra nɩ. Ba ta kɩ kʋntʋ doŋ mʋ dɩ pi-balɩ sɩm, dɩ pəlbiə sɩm dɩ. 23 Kʋ na yɩ bʋnɩ dɩlʋ na wʋra lwarɩm saarɩm ŋwaanɩ tɩn, ba jaanɩ-dɩ ba nuŋi Pɛ Ezekɩasɩ dɩ kɔ-fɔrɔ kʋm maama yigə nɩ mʋ. Ba dɩ ma kwe ba jɩan ba daŋɩ bʋnɩ dɩm baŋa nɩ.c 24 Kaanɩm tiinə bam laan ma gʋ-dɩ, yɩ ba daarɩ ba kwe dɩ jana bam ba lo kaanɩm bimbim dɩm baŋa nɩ sɩ ba kɩ lwarɩm saarɩm kaanɩm ba ma ba lɩ Yisɩrayɛlɩ tiinə bam maama lwarɩm Wɛ yigə nɩ. Bɛŋwaanɩ, Pɛ wʋm ya pɛ ni mʋ sɩ ba kɩ zwɛɛm pɛɛra, dɩ lwarɩm saarɩm pɛɛra Yisɩrayɛlɩ tiinə bam maama ŋwaanɩ.
25 Ezekɩasɩ laan ma kwe Levi tiinə o zɩgɩ ba zɩga je nɩ Wɛ-digə kam wʋnɩ. O ma pa-ba zwɩ dɩ kwaanʋ, dɩ kwɛɛra zɩla dwi dwi, nɩ Pɛ Davidi, dɩ Wɛ nijoŋnu Gadɩ, dɩ o nijoŋnu Natan dɛɛn na brɩ nɩ ba taa kɩ te tɩn.d Baŋa-Wɛ dɛɛn tɔgɩ DƖ nijoŋnǝ bam baŋa mʋ DƖ pa-ba DƖ ni dɩm kʋntʋ. 26 Levi tiinə bam ma yɔɔrɩ ba zɩgɩ ba zɩga je nɩ dɩ Davidi kwɛɛra zɩla yam, yɩ kaanɩm tiinə bam dɩ zɩgɩ dɩ ba nabwaanʋ sɩ ba wu-tɩ.
27 Ezekɩasɩ dɛɛn ma pa ni sɩ ba kɩ zwɛɛm kaanɩm Wɛ-digə kam bimbim dɩm baŋa nɩ. Ba na wʋra ba kɩ kaanɩm dɩm tɩn, nɔɔna bam maa leeni le, yɩ ba jɩgɩ Yisɩrayɛlɩ tɩʋ Pɛ Davidi kwɛɛra zɩla yam, dɩdaanɩ nabwaanʋ tɩm ba ma ba zuli Baŋa-Wɛ. 28 Nɔn-kɔgɔ kʋm maama ma tiiri ba zuli Baŋa-Wɛ, yɩ lən-leenə bam dɩ leeni ba le sɩm, yɩ nɔɔna dɩ wui ba nabwaanʋ tɩm. Ba yɔɔrɩ ba kɩ kʋntʋ mʋ taan sɩ zwɛɛm kaanɩm dɩm maama vu dɩ ti.
29 Ba na kɩ kaanɩm dɩm ba ti tɩn mʋ Pɛ Ezekɩasɩ dɩ o kwaga nɔɔna bam maama tiiri tɩga nɩ ba zuli Baŋa-Wɛ. 30 Pɛ wʋm dɩ o nakwa bam ma ta dɩ Levi tiinə bam sɩ ba kwe lǝŋ-ŋwɩ le sɩlʋ Davidi dɩ Wɛ nijoŋnu Azafɩ dɛɛn na puli tɩn ba ma ba zuli Baŋa-Wɛ. Ba maama ma sɩɩnɩ ba leeni le sɩm dɩ ywəəni zanzan yɩ ba tiiri tɩga nɩ ba zuli Baŋa-Wɛ.
31 Ezekɩasɩ ma ta dɩ nɔɔna bam o wɩ: «Abam laan na sɩɩnɩ á kwɛ á tɩtɩ Baŋa-Wɛ yigə nɩ tɩn ŋwaanɩ, nan ja-na kaanɩm dɩ le-kǝm pɛɛra á ba á zʋ Baŋa-Wɛ digə kam nɩ.» Ba ma sɩɩnɩ ba kɩ kʋntʋ. Ba badaara ta ma ja zwɛɛm pɛɛra ba wǝli da, sɩ kʋ tɔgɩ dɩ ba wʋbʋŋa na jaanɩ te tɩn.
32 Nɔɔna bam dɛɛn jaanɩ na-bɛ fusɩrpɛ (70) mʋ, dɩ pi-balɩ bi (100), dɩ pəlbiə biə-yale (200) mʋ ba ma ba kɩ zwɛɛm kaanɩm dɩm ba pa Baŋa-Wɛ. 33 Ba ta ma ja naanɩ biə-yardʋ (600), dɩ peeni mʋrrʋ tɩtɔ (3,000) sɩ ba kwe-tɩ ba kɩ Wɛ jɩŋa nɩ. 34 Kaanɩm tiinə bam kɔgɔ ni dɛɛn nan ya muri sɩ ba wanɩ vara bam kʋntʋ maama ba pwəni ba daarɩ ba zwɛ. Kʋntʋ ŋwaanɩ ba cʋrrʋ Levi dwi tiinə bam wǝli-ba pa ba tʋŋɩ tɩtʋŋɩ dɩm ba vu ba guri, yɩ kʋ maŋɩ dɩ kaanɩm tiinə badonnǝ dɩ laan kwɛ ba tɩtɩ pa ba maŋɩ dɩ cullu tɩm. Bɛŋwaanɩ, Levi tiinə bam wʋbʋŋa dɛɛn jaanɩ sɩ ba kwɛ ba tɩtɩ Wɛ ŋwaanɩ, sɩ kʋ dwǝni kaanɩm tiinə bam na kɩ te tɩn. 35 Vara balʋ nɔɔna bam na jaanɩ ba ba sɩ ba kɩ zwɛɛm kaanɩm tɩn dɛɛn daga zanzan. Ba ta maa jɩgɩ lara kalʋ na yɩ yazurə pɛɛra yam nyɩm tɩn, dɩdaanɩ wo-nyɔɔrʋ pɛɛra yalʋ na wǝli zwɛɛm pɛɛra yam wʋnɩ tɩn.