2 Kɩbarɩ tɔnɔ 28

Zuda tɩʋ pɛ Ahazɩ taanɩ

Ahazɩ dɛɛn jɩgɩ bɩna fiinle mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm o kɩ bɩna fugə-yardʋ. O nan wʋ tʋŋɩ o poli Baŋa-Wɛ wʋʋ, nɩnɛɛnɩ o nabaarʋ Davidi na kɩ te tɩn. 2-3 O dɛɛn tusi dɩ o na kwe Yisɩrayɛlɩ tɩʋ pwa bam tɩtʋŋ-naga tɩn mʋ. O ma mɔ kamwarʋ o lwǝni Baalɩ jwǝnǝ yam o zɩgɩ, yɩ o daarɩ o kɩ kaanɩm Bɛn-Hinom bolo kʋm nɩ. O ma zwɛ o tɩtɩ biə o ma o kɩ kaanɩm o pa jwǝnǝ yam. O kǝm dɩm kʋntʋ brɩ nɩ o lwǝni tɩtʋŋ-zɔɔna yalʋ dwi-gɛ tiinə bam na kɩ yɩ Wɛ zəli-ba tɩga kam nɩ DƖ daarɩ DƖ pa Yisɩrayɛlɩ tiinə bam jǝni tɩn mʋ. 4 Kʋ na yɩ wara-je sɩm nɩ, dɩ zwəənu tɩm baŋa nɩ, dɩ tweeru maama kuri nɩ, o dɛɛn yǝni o kɩ kaanɩm dɩ zwɛɛm pɛɛra mʋ je sɩm kʋntʋ maama nɩ.

5 Baŋa-Wɛ ma da kʋ ŋwaanɩ DƖ pa o tʋ Siiri tɩʋ pɛ dam kuri nɩ. Siiri tiinə bam ma wan‑o jara wʋnɩ. Ba ma kalɩ o nɔɔna bam zanzan ba ja ba vu Damasɩ pa ba ji pɩɩna da.

Kʋntʋ kwaga nɩ, Wɛ ta pɛ Yisɩrayɛlɩ tɩʋ pɛ mʋ na cwǝŋǝ o wanɩ Ahazɩ dɩ o nɔɔna bam, pa kʋ zʋ ba yɩra lanyɩranɩ. 6 Remalia bu Peka ma zaŋɩ o gʋ Zuda pamaŋ-bɩbɛ mʋrrʋ bi dɩ fiinle (120,000) dɛ dɩdʋa wʋnɩ. Kʋ yɩ Zuda tiinə bam na mɛ ba kwaga ba ya Baŋa-Wɛ dɩm na yɩ ba nabaara Wɛ tɩn ŋwaanɩ mʋ lɛɛrʋ tɩntʋ maama yi-ba. 7 Efrayim tu Zikiri na yɔɔrɩ o yɩ babɩa tɩn ma gʋ Zuda pɛ wʋm bu Maaseya, dɩ Azerikam wʋlʋ na nii pɛ sɔŋɔ kʋm baŋa nɩ tɩn, dɩ Elikana wʋlʋ wʋm dam na saŋɩ pɛ wʋm kwaga tɩn. 8 Yisɩrayɛlɩ tiinə bam ta fɩn ba cʋrrʋ Zuda tiinə kaana dɩ ba biə mʋrrʋ biə-yale (200,000) mʋ ba kalɩ ba ja ba vu Samari. Ba dɛɛn ta ma vrɩ ba jɩjɩgɩrʋ zanzan ba wǝli da ba zɩŋɩ ba viiri.

9 Wɛ nijoŋnu dɛɛn mʋ wʋra, o yɩrɩ mʋ Odɛdɩ. O maa zʋʋrɩ Samari tɩʋ kʋm wʋnɩ. Yisɩrayɛlɩ jar-kərə bam na joori ba maa zʋʋrɩ Samari tɩʋ tɩn, mʋ o nuŋi sɩ o jeeri-ba. O ma ta dɩ ba o wɩ:

«Kʋ yɩ Baŋa-Wɛ dɩm na yɩ á nabaara Wɛ tɩn banɩ na zaŋɩ dɩ Zuda tiinə bam tɩn ŋwaanɩ mʋ DƖ pɛ abam na cwǝŋǝ á wanɩ-ba. Abam nan tiini á gʋ-ba yɩ ŋwaŋa tǝrǝ, pa kʋ yɔɔrɩ kʋ daanɩ‑DƖ. 10 Abam laan na bʋŋɩ sɩ á pa ba baara bam dɩ ba kaana bam ji á gambɛ kʋntʋ tɩn, á wʋ lwarɩ nɩ abam dɩ tɩtɩ kɩ lwarɩm á cɔgɩ á Tu Baŋa-Wɛ yigə mʋ na? 11 Nan cəgi-na a taanɩ dɩm, sɩ á pa ba joori ba tɩʋ. Ba yɩ abam tɩtɩ cʋrrʋ mʋ. Á na vɩn sɩ á kɩ kʋntʋ, Baŋa-Wɛ ban-lʋm wʋ́ tʋ á baŋa nɩ mʋ.»

12 Efrayim tɩʋ dɩdɛɛra bam bana dɩ dɛɛn ma zaŋɩ ba vu ba bwɛ jar-kərə balʋ na nuŋi najara yam wʋnɩ ba joori ba ba tɩn. Bantʋ maa yɩ Yohanan bu Azarɩa mʋ, dɩ Mesilemɔtɩ bu Berekiya, dɩ Salum bu Ezekɩasɩ, dɩ Hadɩlayɩ bu Amasa. 13 Ba ma ta ba wɩ: «Yɩ ja-na pɩɩna bam kʋntʋ á zʋ Samari tɩʋ wʋ. Dɩ́ na maŋɩ dɩ́ kɩ lwarɩm yalʋ tɩn pɛ Baŋa-Wɛ banɩ zaŋɩ dɩbam Yisɩrayɛlɩ tiinə baŋa nɩ mʋ. Yɩ pa-na sɩ lwarɩm yadonnə taa wʋ dɩbam yuu nɩ ya wǝli da.»

14 Jar-kərə bam ma lɛɛrɩ ba zɩgɩ dɩdɛɛra bam dɩ nɔn-kɔgɔ kʋm yigə nɩ ba kwe pɩɩna bam dɩ jɩjɩgɩrʋ tɩlʋ ba na vrɩ tɩn ba yagɩ. 15 Dɩdɛɛra bana bam ma bwǝli pɩɩna bam ba daarɩ ba lɩ gwaarʋ jɩjɩgɩrʋ tɩm wʋnɩ ba ma ba kwǝli pɩɩna balʋ na zɩgɩ da kalambolo tɩn. Ba ta ma kwe gwaarʋ, dɩ natra, dɩ wʋdiiru ba pa pɩɩna bam maama, yɩ ba daarɩ ba kwe nugə ba ma ba lɛ ba fufwələ. Pɩɩna balʋ ta na bwəmmə tɩn, ba ma kwe-ba ba daŋɩ bɩnɛ baŋa nɩ. Ba laan ma ja pɩɩna bam ba joori ba dwi tiinə te Zeriko nɩ, tɩʋ kʋlʋ ba na bǝi wɩ ‹Kʋrrʋ tɩʋ kʋm› tɩn. Dɩdɛɛra bam laan ma joori Samari.

16 Pɛ Ahazɩ ma tʋŋɩ o tɩntʋŋna sɩ ba vu Asiiri tɩʋ pɛ te ba loori‑o sɩ o tʋŋɩ jar-kərə sɩ ba ba ba zən‑o. 17 Bɛŋwaanɩ, Edɔm tiinə bam ya daa tu ba zaŋɩ najara dɩ Zuda tiinə bam mʋ ba di-ba, yɩ ba daarɩ ba zi nɔɔna ba ja ba viiri. 18 Filisi tiinə bam dɩ ma vu Zuda wa-zʋʋrɩ seeni bwəəlu tɩm, dɩ kagʋa kalʋ na wʋ jagwiə seeni tɩn ba li tɩɩnɩ dɩdonnǝ da. Tɩɩnɩ dɩlʋ ba na vrɩ tɩn maa yɩ Bɛtɩ-Sɩmesa, dɩ Ayalɔn, dɩ Gederɔtɩ, dɩ Soko, dɩ Timna, dɩ Gimizo, dɩdaanɩ dɩ nawuurə yam maama. Ba ma lɛɛrɩ ba zʋʋrɩ dɩ wʋnɩ. 19 Baŋa-Wɛ nan yɔɔrɩ DƖ pa Zuda dwi tiinə bam tu tɩga mʋ Pɛ Ahazɩ kikiə yam ŋwaanɩ. Bɛŋwaanɩ, wʋntʋ mʋ pɛ cwǝŋǝ sɩ lwarɩm puli Zuda tɩʋ kʋm maama nɩ, yɩ o wʋ kɩ o cɩga dɩdaanɩ Baŋa-Wɛ. 20 Asiiri tɩʋ pɛ Tigila-Pilezarɩ ma ba Ahazɩ te. O nan wʋ tu sɩ o zən‑o. O ma joori o pa kʋ tiini kʋ cɛ Ahazɩ yɩra. 21 Ahazɩ ta ma kwe lʋnnɩ wǝǝnu tɩlʋ na wʋ Baŋa-Wɛ digə kam nɩ tɩn dɩdaanɩ tɩlʋ na wʋ pɛ sɔŋɔ kʋm wʋnɩ, dɩ tɩʋ kʋm nakwa sam dɩm nɩ tɩn o tʋŋɩ o pa Asiiri pɛ wʋm. Kʋntʋ nan ta wʋ wan‑o kʋ zǝni.

22 Cam na tu Pɛ Ahazɩ baŋa kʋntʋ tɩn, o yɔɔrɩ o tʋŋɩ o cɔgɩ Baŋa-Wɛ yigə sɩ kʋ dwǝni o ya na kɩ te tɩn mʋ. 23 O kɩ kaanɩm mʋ o pa Siiri tɩʋ Damasɩ jwǝnǝ yam, o na bʋŋɩ nɩ ya jɩgɩ dam ya pa Siiri tiinə sɩ ba wan‑o ba di tɩn ŋwaanɩ. O ya bʋŋɩ o tɩtɩ nɩ mʋ o wɩ: «Kʋ yɩ Siiri tiinə jwǝnǝ yam mʋ wǝli-ba. Amʋ dɩ nan wʋ́ zuli-ya mʋ sɩ ya zəni-nɩ.» O kǝm dɩm kʋntʋ nan pɛ lɛɛrʋ ba o baŋa, dɩdaanɩ o tɩʋ kʋm maama baŋa mʋ.

24 Ahazɩ dɛɛn ta zʋ Wɛ-digə kam wʋnɩ mʋ o la ka zɩla yam o ja o nuŋi. O ma cɩcʋgɩ-ya o yagɩ. O ma fɔgɩ o pɩ Baŋa-Wɛ digə kam ni, yɩ o daarɩ o cwi kaanɩm bimbinə Zeruzalɛm tɩʋ ni maama nɩ. 25 Zuda tɩɩnɩ dɩm maama wʋnɩ dɩ, o ta lɔgɩ wara-je kaanɩm bimbinə mʋ, sɩ ba taa ve da ba kaanɩ wa-yɔɔrʋ. Kikiə yam kʋntʋ ŋwaanɩ o ma ciŋi Baŋa-Wɛ dɩm na yɩ o nabaara Wɛ tɩn banɩ o yagɩ.

26 Ahazɩ dɛɛn na di paarɩ yɩ o kɩ wǝǝnu tɩlʋ tɩn, dɩ o tɩtʋŋa yam maama, kʋ zɩgɩ o paarɩ dɩm pulim nɩ sɩ kʋ yi dɩ na kweeli maŋa kalʋ tɩn, ba pʋpʋnɩ-tɩ ba tiŋi Zuda dɩ Yisɩrayɛlɩ Pwa Cɩbarɩ tɔnɔ kʋm wʋnɩ. 27 Ahazɩ ma tɩ yɩ o vu o kwə te. Ba ma kwe‑o ba kɩ Zeruzalɛm tɩʋ wʋnɩ, sɩ kʋ za daɩ pwa yibeelǝ yam wʋnɩ mʋ ba kɩ-o. O bu Ezekɩasɩ ma ləri o yuu nɩ o ji pɛ.