Zuda tɩʋ pɛ Zʋatam taanɩ
27
Zʋatam dɛɛn jɩgɩ bɩna fiinle-yanu mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm bɩna fugə-yardʋ. O nu wʋm dɛɛn mʋ yɩ Sadoki bukɔ Yerusa. 2 O tɩtʋŋa ma su Baŋa-Wɛ yi lanyɩranɩ, nɩnɛɛnɩ o ko Ozɩasɩ dɛɛn na kɩ te tɩn. O nan wʋ zʋ Baŋa-Wɛ digə kam o cɔgɩ ka cullu tɩm nɩ o ko dɛɛn na kɩ te tɩn. Kʋlʋ na wəli da tɩn, nɔɔna bam maa kɩ tɩtʋŋ-zɔɔna ba cɔgɩ Baŋa-Wɛ yigə. 3 Zʋatam ma fɔgɩ o lɔ Wɛ digə kam ni dɩlʋ na wʋ baŋa seeni tɩn, yɩ o ta tiini o kwɛ tɩʋ kʋm kəbrə kalʋ na bwələ dɩ Ofɛɛlɩ piu kʋm tɩn. 4 O dɛɛn ta lɔgɩ tɩɩnɩ mʋ Zuda pweeru laŋa kam nɩ o zɩgɩ, yɩ o daarɩ o lɔ dam je zanzan o yagɩ kagwɩ sɩm je nɩ.5 Zʋatam dɛɛn ve o kɩ jara dɩ Amɔn tiinə pɛ dɩ o nɔɔna mʋ yɩ o di-ba. O dɛɛn ma kwe bɩna yatɔ o fɩn Amɔn tiinə bam pa bɩnɩ maama wʋnɩ ba maŋɩ sɩ ba taa jaanɩ səbu-poŋo kilo mʋrrʋ tɩtɔ dɩ biə-yana (3,400), dɩ bəniŋəa ywəllu mʋrrʋ fiintɔ (30,000), dɩ caarab ywəllu mʋrrʋ fiintɔ (30,000) ba tui ba pa‑o.
6 Zʋatam dɛɛn tiini o na dam mʋ, o na sɩɩnɩ o yiǝ o tɔgɩ o Tu Baŋa-Wɛ wʋbʋŋa yam tɩn ŋwaanɩ.c 7 Zʋatam dɛɛn na di paarɩ yɩ o kɩ wǝǝnu tɩlʋ tɩn, dɩ o na kwaarɩ jara dɩ tɩɩnɩ dɩlʋ tɩn, kʋ wǝli dɩ cwe sɩlʋ o na tɔgɩ tɩn maama, ba pʋpʋnɩ-tɩ ba tiŋi Yisɩrayɛlɩ dɩ Zuda Pwa Cɩbarɩ tɔnɔ kʋm wʋnɩ. 8 Zʋatam dɛɛn jɩgɩ bɩna fiinle-yanu mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm bɩna fugə-yardʋ. 9 Zʋatam ma tɩ yɩ o vu o kwə te. Ba ma kwe‑o ba kɩ Davidi tɩʋ Zeruzalɛm nɩ. O bu Ahazɩ ma ləri o di paarɩ.