Zuda tɩʋ pɛ Yozɩasɩa taanɩ
26
Zuda tiinə bam maama ma kuri Ozɩasɩ sɩ o ləri o ko Amasia yuu nɩ o ji pɛ, dɩ o na jɩgɩ bɩna fugə-yardʋ tɩn dɩ.b 2 Ozɩasɩ ko tʋʋnɩ kwaga nɩ, o dɛɛn ma joori o joŋi Eyilatɩ tɩʋ kʋm o wǝli Zuda tɩʋ dɩm wʋnɩ, yɩ o fɔgɩ o lɔ-kʋ.3 Ozɩasɩ dɛɛn jɩgɩ bɩna fugə-yardʋ mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm o kɩ bɩna fiinnu-yale. O nu wʋm yɩrɩ mʋ Yekolia yɩ o nuŋi Zeruzalɛm. 4 O tɩtʋŋa dɛɛn su Baŋa-Wɛ yi lanyɩranɩ, nɩnɛɛnɩ o ko Amasia na kɩ te tɩn. 5 Zakari dɛɛn mʋ yǝni o brɩ-o Wɛ cwǝŋǝ na yɩ te tɩn. Zakari ta na ŋwɩ tɩn, Ozɩasɩ yɔɔrɩ o zuli Baŋa-Wɛ mʋ. O maa na zuli Wɛ kʋntʋ tɩn, Wɛ dɩ pɛ o wǝǝnu kɩ lanyɩranɩ mʋ tɩ pa‑o.c
6 Ozɩasɩ ma vu o zaŋɩ najara dɩ Filisi tiinə bam. O ma vu o li Gatɩ, dɩ Yabenɛ, dɩ Asedodi tɩɩnɩ dɩm o yigi dɩ kabri sɩm o dɩ tɩga nɩ. O laan ma lɔ tɩɩnɩ pa dɩ bwələ dɩ Asedodi, dɩdaanɩ Filisi tiinə bam na zʋʋrɩ je sɩdaara nɩ tɩn. 7 Wɛ ma zən‑o pa o wanɩ Filisi tiinə, dɩ Meyunim tiinə, dɩ Arabi tiinə balʋ na zʋʋrɩ Gurɩ-Baalɩ seeni tɩn maama. 8 Amɔn tiinə bam dɩ maa jaanɩ pɛɛra ba tui ba paɩ Ozɩasɩ sɩ ba sɛ ba pa‑o. O yɩrɩ dɛɛn tiini dɩ zaŋɩ je maama nɩ sɩ kʋ vu kʋ yi Ezipi tɩʋ sisəm, o na tiini o jɩgɩ dam tɩn ŋwaanɩ.
9 Ozɩasɩ dɛɛn lɔgɩ di-dɩdwaarʋ Zeruzalɛm tɩʋ kəbrə kam nɩ mʋ o zɩgɩ pa tɩʋ kʋm dana. O kɩ kʋntʋ Gugoro Ni dɩm təŋə nɩ, dɩ Bolo Ni dɩm təŋə nɩ, dɩdaanɩ mɛ seeni kəbrə kam na gugwǝli tɩn nɩ. 10 O ta ma pa ba lɔ di-dɩdwaarʋ ba zɩgɩ kagʋa kam nɩ, yɩ ba daarɩ ba kʋ vʋla zanzan, o na jɩgɩ vara zanzan wa-zʋʋrɩ seeni bwəəlu tɩm nɩ, dɩ tɩ-kamparɩ je sɩm nɩ tɩn ŋwaanɩ. Pweeru laŋa kam nɩ, dɩ tɩ-ywəŋə je sɩm nɩ o tɩntʋŋna maa varɩ tɩga kam ba pa‑o yɩ ba jəri vinyə tweeru, o na soe varɩm dɩ kɔnɔ tɩtʋŋa tɩn ŋwaanɩ.
11 Ozɩasɩ dɛɛn ta jɩgɩ jar-kərə balʋ na ye jara kǝm laŋa lanyɩranɩ tɩn. Ba maa yɩ siri sɩ ba nuŋi kɔgɔ dɩ kɔgɔ ba kɩ najara. Tɔn-pʋpʋnnʋ Yeyiyɛlɩ dɩ o kwaga nɔɔnʋ Maaseya mʋ yǝni ba tigisi-ba ba kɩ daanɩ nɩ ba na jeeli ba ni dɩm sɩ kʋ maŋɩ te tɩn. Pɛ sɔŋɔ dɩdɛɛrʋ Hanania dɛɛn nii jar-kərə kɔgɔ kʋm maama baŋa nɩ mʋ. 12 Sɔ-yuni yigǝ tiinǝ balʋ na te jar-kərə bam kɔgɔ dɩ kɔgɔ tɩn dɛɛn yɩ nɔɔna mʋrrʋ tɩle dɩ biə-yardʋ (2,600) mʋ. 13 Ba nan na jɩgɩ nɔɔna balʋ ba nii tɩn maama yɩ jar-kərə mʋrrʋ biə-yatɔ dɩ yarpɛ dɩdaanɩ biə-yanu (307,500) mʋ. Bantʋ maama yɔɔrɩ ba ye jara-kǝm laŋa lanyɩranɩ, pa ba waɩ ba cʋ pɛ wʋm sɩ o dʋna yɩ wan‑o. 14 Ozɩasɩ ma kwe jara-kǝm cɩ-kwɛn, dɩ cicwə, dɩ yukwələ, dɩ jara-kǝm gwaarʋ, dɩ tɛn, dɩ napana kandwa o pa-ba. 15 O ma pa o tɩntʋŋna badonnǝ kɩ wǝǝnu tɩlʋ na waɩ tɩ taɩ cɩna, yɩ tɩ dʋlɩ kandwa-zana tɩ yaga ba dʋna baŋa nɩ tɩn. O ma zɩgɩ wǝǝnu tɩm kʋntʋ Zeruzalɛm kəbrə di-dɩdwaarʋ tɩm nɩ, dɩ kəbrə gugwəəru tɩm nɩ. Ozɩasɩ yɩrɩ dɩm dɛɛn tiini dɩ zaŋɩ je maama nɩ, Wɛ na tiini DƖ zǝn-o pa o na dam zanzan tɩn ŋwaanɩ.
16 O nan na tu o na dam tɩn, mʋ o brɩ o tɩtɩ kamunni. Kʋntʋ nan mʋ yɔɔrɩ kʋ pa o tʋ tɩga nɩ. Dɛ dɩdʋa: o ma tusi o cɔgɩ o Tu Baŋa-Wɛ yigə yɩ o zʋ Wɛ-digə kam wʋnɩ sɩ o zwɛ wǝǝnu tɩlʋ lwǝm na ywǝmmǝ tɩn ka bimbim dɩm baŋa nɩ. 17 Baŋa-Wɛ kaanɩm tu Azarɩa ma tɔgɩ dɩ kaanɩm tiinə funɔnɔ ba na jɩgɩ pu-dɩa tɩn, pa ba zʋ o te. 18 Ba ma yɔɔrɩ ba ta dɩd-o ba wɩ: «Pɛ Ozɩasɩ, kʋ daɩ kʋ cwǝŋǝ nɩ sɩ n zʋ yo n zwɛ wo-talooru n pa Baŋa-Wɛ. Kʋ yɩ Arɔn dwi dɩm mʋ Baŋa-Wɛ pɔɔrɩ DƖ zɩgɩ sɩ ba taa yɩ kaanɩm tiinə ba zwɛ wo-talooru tɩm ba pa‑DƖ. Nuŋi da DƖ digə kantʋ nɩ. Nmʋ sagɩ cwǝŋǝ mʋ, pa Yuutu Baŋa-Wɛ daa bá kɩ-m lanyɩranɩ.»
19 Ozɩasɩ nan ya ze min-cala zʋŋa mʋ o ti o yigə sɩ o zwɛ wǝǝnu tɩlʋ lwǝm na ywǝmmǝ tɩn. O banɩ ma zaŋɩ. O ma zɩgɩ Baŋa-Wɛ digə wo-talooru zwɛɛm bimbim dɩm yigə nɩ o bagɩ kaanɩm tiinə bam. O na jɩgɩ-ba o bagɩ tɩn, mʋ nanyaanʋ yawɩʋ kʋm puli kʋ zaŋɩ o tri seeni. 20 Kaanɩm nakwɩ Azarɩa dɩ kaanɩm tiinə badaara bam ma maanɩ nɩ nanyaanʋ mʋ tʋ pɛ wʋm yɩra nɩ. Ba na nɛ kʋntʋ tɩn, ba ma zǝl-o pa o nuŋi lɩla. O tɩtɩ dɩ ma kɩ lɩla sɩ o nuŋi da, Baŋa-Wɛ na pɛ lɛɛrʋ yi‑o tɩn ŋwaanɩ.
21 Nanyaanʋ yawɩʋ kʋm dɛɛn wʋ yagɩ Ozɩasɩ yɩra maŋa dɩ maŋa. O dɛ dɩ yawɩʋ kʋm kʋntʋ mʋ o vu o tɩ. O dɛɛn zʋʋrɩ sɔŋɔ kʋlʋ na yɩ dáa dáa tɩn wʋnɩ mʋ, yawɩ-cɛɔ na waɩ kʋ loŋi nɔɔna tɩn na jɩg-o tɩn ŋwaanɩd. O maa ba jɩgɩ cwǝŋǝ sɩ o zʋ Baŋa-Wɛ digə kam nɩ. O bu Zʋatam ma ləri o nii pɛ sɔŋɔ kʋm dɩ tɩʋ kʋm nɔn-biə baŋa nɩ o pa‑o.
22 Ozɩasɩ dɛɛn na di paarɩ yɩ o kɩ wǝǝnu tɩlʋ maama tɩn, kʋ zɩgɩ o paarɩ dɩm pulim nɩ sɩ kʋ yi dɩ na kweeli maŋa kalʋ tɩn, mʋ Wɛ nijoŋnu Ezayi na yɩ Amɔtɩ bu tɩn pʋpʋnɩ-tɩ o tiŋi. 23 Ozɩasɩ ma tɩ yɩ o vu o kwə te. Ba ma kwe‑o ba kɩ pwələ kalʋ na yɩ pwa bam nyɩm tɩn wʋnɩ. Ba nan wʋ kɩ-o o kwə yibeeli wʋnɩ, Bɛŋwaanɩ, ba dɛɛn tagɩ mʋ ba wɩ: «Nanyaanʋ yawɩʋ kʋm mʋ jɩg-o.» O bu Zʋatam ma ləri o yuu nɩ o ji pɛ.e