Zuda tɩʋ pɛ Azarɩaa taanɩ
2 Wǝǝnu Kɩbarɩ tɔnɔ 26:1-23
15
Yisɩrayɛlɩ tɩʋ pɛ Zeroboam paarɩ dim bɩna fiinle-yarpɛ bɩnɩ dɩm wʋnɩ mʋ Amasia bu Azarɩa dɛɛn di Zuda tɩʋ paarɩ. 2 Azarɩa dɛɛn jɩgɩ bɩna fugə-yardʋ mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm o kɩ bɩna fiinnu-yale. O nu wʋm yɩrɩ mʋ Yekolia yɩ o nuŋi Zeruzalɛm. 3 O tɩtʋŋa dɛɛn su Baŋa-Wɛ yi lanyɩranɩ, nɩnɛɛnɩ o ko Amasia na kɩ te tɩn. 4 Dɩ kʋ dɩ, o wʋ wanɩ o cɔgɩ wara-je sɩlʋ ba na kɩ kaanɩm da tɩn. Nɔɔna dɛɛn yǝni ba kɩ kaanɩm dɩ zwɛɛm pɛɛra je sɩm kʋntʋ nɩ yɩ ba wʋ yagɩ.5 Baŋa-Wɛ dɛɛn ma pa nanyaanʋ yawɩʋ kʋm loŋi Pɛ Azarɩa. O dɛ dɩ yawɩʋ kʋm kʋntʋ mʋ o vu o tɩ.b O dɛɛn zʋʋrɩ sɔŋɔ kʋlʋ na yɩ dáa dáa tɩn wʋnɩ mʋ. O bu Zʋatam ma ləri o nii pɛ sɔŋɔ kʋm dɩ tɩʋ kʋm nɔn-biə baŋa nɩ o pa‑o.
6 Azarɩa dɛɛn na di paarɩ yɩ o kɩ wǝǝnu tɩlʋ tɩn, dɩ o tɩtʋŋa yam maama, ba pʋpʋnɩ-tɩ ba tiŋi Zuda Tɩʋ Pwa Cɩbarɩ tɔnɔ kʋm wʋnɩ.c 7 Azarɩa ma tɩ yɩ o vu o kwə te. Ba ma kwe‑o ba kɩ o kwə bam yibeeli seeni Davidi tɩʋ Zeruzalɛm nɩ. O bu Zʋatam ma ləri o yuu nɩ o ji pɛ.d
Yisɩrayɛlɩ tɩʋ pɛ Zakari taanɩ
8 Zuda tɩʋ pɛ Azarɩa paarɩ dim bɩna fiintɔ-nana bɩnɩ dɩm wʋnɩ mʋ Zeroboam bu Zakari dɛɛn di Yisɩrayɛlɩ tɩʋ paarɩ. O jǝni Samari nɩ mʋ o di paarɩ dɩm canɩ sɩrdʋ. 9 O dɛɛn tʋŋɩ lwarɩm o cɔgɩ Baŋa-Wɛ yigə mʋ nɩnɛɛnɩ o kwə bam dɩ na kɩ te tɩn. O ma yɔɔrɩ o kɩ lwarɩm dwi dɩlʋ Nebatɩ bu Zeroboam dɛɛn na kɩ pa Yisɩrayɛlɩ tiinə dɩ da ba kɩ tɩn.
10 Yabɛsɩ bu Salum dɛɛn kɩ jara dɩ Zakari. O ma vu o li‑o Ibɩleyam nɩ dɩ najara o gʋ. O ma daarɩ o ləri o di paarɩ dɩm. 11 Zakari dɛɛn na di paarɩ yɩ o tʋŋɩ wǝǝnu tɩlʋ maama, tɩn ba pʋpʋnɩ-tɩ ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ. 12 O tʋʋnɩ dɩm kʋntʋ ma pa Baŋa-Wɛ kwǝrǝ kalʋ DƖ na pɛ Zehu tɩn sɩɩnɩ ka kɩ, dɩ o na tagɩ o wɩ: «Nmʋ dwi dɩlʋ na wʋ́ saŋɩ n kwaga tɩn wʋ́ di Yisɩrayɛlɩ tɩʋ paarɩ dɩm sɩ kʋ taa ve dwiə yana wɛɛnɩ.»e
Yisɩrayɛlɩ tɩʋ pɛ Salum taanɩ
13 Zuda tɩʋ pɛ Ozɩasɩ paarɩ dim bɩna fiintɔ-nʋgʋ bɩnɩ dɩm wʋnɩ mʋ Yabɛsɩ bu Salum dɛɛn di Yisɩrayɛlɩ tɩʋ paarɩ. O jǝni Samari nɩ mʋ o di paarɩ dɩm cana dɩdʋa yɩranɩ. 14 Gadɩ bu Menayɛm dɛɛn zaŋɩ Tirisa tɩʋ nɩ o vu Samari. O na yi da tɩn, o ma li Salum dɩ najara o gʋ o daarɩ o ləri o ji pɛ.
15 Salum dɛɛn na di paarɩ yɩ o tʋŋɩ wǝǝnu tɩlʋ maama tɩn, dɩ juum kʋlʋ o na kɩ dɩ Zakari tɩn, ba pʋpʋnɩ-tɩ ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ.
16 Menayɛm dɛɛn zɩgɩ Tirisa nɩ o vu Tifisaf o cɔgɩ tɩʋ kʋm dɩ kʋ nawuurə yam maama, kʋ nɔn-biə bam na vɩn sɩ ba sɛ ba pa‑o tɩn ŋwaanɩ. O ta ma lɔ ba kapwi sɩm ba pwi seeni o gʋ.
Yisɩrayɛlɩ tɩʋ pɛ Menayɛm taanɩ
17 Zuda tɩʋ pɛ Azarɩa paarɩ dim bɩna fiintɔ-nʋgʋ bɩnɩ dɩm wʋnɩ mʋ Gadɩ bu Menayɛm dɛɛn di Yisɩrayɛlɩ tɩʋ paarɩ. O jǝni Samari nɩ mʋ o di paarɩ dɩm o kɩ bɩna fugə. 18 O dɛɛn tʋŋɩ lwarɩm o cɔgɩ Baŋa-Wɛ yigə. O paarɩ dim maŋa kam maama wʋnɩ o yɔɔrɩ o kɩ lwarɩm dwi dɩlʋ Nebatɩ bu Zeroboam dɛɛn na kɩ pa Yisɩrayɛlɩ tiinə dɩ da ba kɩ tɩn mʋ.
19 Asiiri tɩʋ pɛ Puulig dɛɛn cəŋi Yisɩrayɛlɩ tɩga kam mʋ. Pɛ Menayɛm ma kwe səbu-poŋo na yi ywəllu mʋrʋ dɩdʋa (1,000) tɩn o pa Pɛ Puuli sɩ o ma o koor‑o sɩ Puuli zən‑o sɩ o wanɩ o fɔgɩ o di dam Yisɩrayɛlɩ tɩʋ kʋm nɩ. 20 Menayɛm dɛɛn goni jɩnɩ mʋ o pa Yisɩrayɛlɩ nadunə bam maama. O ma fɩn ba dɩdʋa dɩdʋa sɩ ba ŋwɩ səbu-poŋo səbu-dala fiinnu. O ma kwe səbu kʋm o pa Pɛ Puuli pa o pipiri o viiri o daarɩ Yisɩrayɛlɩ tiinə tɩga kam.
21 Menayɛm dɛɛn na di paarɩ yɩ o kɩ wǝǝnu tɩlʋ tɩn, dɩ o tɩtʋŋa yam maama ba pʋpʋnɩ-tɩ ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ. 22 Menayɛm ma tɩ yɩ ba kwe‑o ba kɩ. O bu Pekaya ma ləri o di paarɩ dɩm.
Yisɩrayɛlɩ tɩʋ pɛ Pekaya taanɩ
23 Zuda tɩʋ pɛ Azarɩa paarɩ dim bɩna fiinnu bɩnɩ dɩm wʋnɩ mʋ Menayɛm bu Pekaya dɛɛn di Yisɩrayɛlɩ tɩʋ paarɩ. O jǝni Samari nɩ mʋ o di paarɩ dɩm bɩna yale. 24 Pekaya dɛɛn tʋŋɩ lwarɩm o cɔgɩ Baŋa-Wɛ yigə. O ma yɔɔrɩ o kɩ lwarɩm dwi dɩlʋ Nebatɩ bu Zeroboam dɛɛn na kɩ pa Yisɩrayɛlɩ tiinə dɩ da ba kɩ tɩn. 25 Remalia bu Peka dɛɛn mʋ yɩ Pekaya jar-kərə yigə tu wʋm. O ma kwe Galadɩ tiinə baara fiinnu o ja o vu Samari tɩʋ o li Pekaya pɛ sɔŋɔ dam je sɩm wʋnɩ dɩ najara o gʋ. O ta ma gʋ Arɩgɔbɩ dɩ Ariyɛ o wǝli da. O ma daarɩ o ləri o di paarɩ dɩm.
26 Pekaya dɛɛn na di paarɩ yɩ o kɩ wǝǝnu tɩlʋ tɩn, dɩ o tɩtʋŋa yam maama, ba pʋpʋnɩ-tɩ ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ.
Yisɩrayɛlɩ tɩʋ pɛ Peka taanɩ
27 Zuda tɩʋ pɛ Azarɩa paarɩ dim bɩna fiinnu-yale bɩnɩ dɩm wʋnɩ mʋ Remalia bu Peka dɛɛn di Yisɩrayɛlɩ tɩʋ paarɩ. O jǝni Samari nɩ mʋ o di paarɩ dɩm bɩna fiinle. 28 O dɛɛn tʋŋɩ lwarɩm o cɔgɩ Baŋa-Wɛ yigə. O ma yɔɔrɩ o kɩ lwarɩm dwi dɩlʋ Nebatɩ bu Zeroboam dɛɛn na kɩ pa Yisɩrayɛlɩ tiinə dɩ da ba kɩ tɩn.
29 Maŋa kalʋ Peka dɛɛn na yɩ Yisɩrayɛlɩ tɩʋ pɛ tɩn, mʋ Asiiri tɩʋ pɛ Tigila-Pilezarɩ tu o zʋ tɩga kam o wanɩ Yisɩrayɛlɩ tɩɩnɩ dɩdonnǝ o joŋi o te. Tɩɩnɩ dɩm kʋntʋ dɛɛn yɩ: Iyɔn, dɩ Abɛlɩ Bɛtɩ-Maaka, dɩ Yanoa, dɩ Kedɛsɩ, dɩ Hazɔrɩ. O dɛɛn ta wanɩ Galadɩ, dɩ Galile, dɩ Nɛfitali laŋa kam maama. O ma daarɩ o ja je sɩm kʋntʋ nɔn-biə bam o vu o yagɩ Asiiri tɩʋ nɩ.h 30 Kʋntʋ na kɩ tɩn, Ela bu Oze ma vu o kɩ jara dɩ Remalia bu Peka. O ma li‑o dɩ najara o gʋ o daarɩ o ləri o di paarɩ dɩm. Ozɩasɩ bu Zʋatam paarɩ dim bɩna fiinle bɩnɩ dɩm wʋnɩ mʋ kʋntʋ.
31 Peka dɛɛn na di paarɩ yɩ o kɩ wǝǝnu tɩlʋ tɩn, dɩ o tɩtʋŋa yam maama, ba pʋpʋnɩ-tɩ ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ.
Zuda tɩʋ pɛ Zʋatam taanɩ
32 Yisɩrayɛlɩ tɩʋ pɛ Peka wʋlʋ na yɩ Remalia bu tɩn paarɩ dim bɩna yale bɩnɩ dɩm wʋnɩ mʋ Ozɩasɩ bu Zʋatam dɛɛn di Zuda tɩʋ paarɩ. 33 Zʋatam dɛɛn jɩgɩ bɩna fiinle-yanu mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm bɩna fugə-yardʋ. O nu wʋm dɛɛn mʋ yɩ Sadoki bukɔ Yerusa. 34 O tɩtʋŋa ma su Baŋa-Wɛ yi lanyɩranɩ, nɩnɛɛnɩ o ko Ozɩasɩ dɛɛn na kɩ te tɩn. 35 Dɩ kʋ dɩ, o wʋ wanɩ o cɔgɩ wara-je sɩlʋ ba na kɩ kaanɩm da tɩn. Nɔɔna bam dɛɛn yǝni ba kɩ kaanɩm dɩ zwɛɛm pɛɛra je sɩm kʋntʋ nɩ. Kʋ yɩ Zʋatam mʋ fɔgɩ o lɔ Baŋa-Wɛ digə kam ni dɩlʋ na wʋ baŋa seeni tɩn.
36 Zʋatam dɛɛn na di paarɩ yɩ o kɩ wǝǝnu tɩlʋ tɩn, dɩ o tɩtʋŋa yam maama, ba pʋpʋnɩ-tɩ ba tiŋi Zuda Tɩʋ Pwa Cɩbarɩ tɔnɔ kʋm wʋnɩ. 37 Kʋ yɩ o paarɩ dim maŋa kam nɩ mʋ Baŋa-Wɛ sɩŋɩ sɩ DƖ tʋŋɩ Siiri tɩʋ pɛ Resin, dɩ Remalia bu Peka sɩ ba li Zuda tɩʋ dɩ najara.i 38 Zʋatam ma tɩ yɩ o vu o kwə te. Ba ma kwe‑o ba kɩ o kwə yibeeli nɩ o nabaarʋ Davidi tɩʋ Zeruzalɛm nɩ. O bu Ahazɩ ma ləri o di paarɩ.