Zuda tɩʋ pɛ Amasia taanɩ
14
Yisɩrayɛlɩ tɩʋ pɛ Yoahazɩ bu Zoasɩ paarɩ dim bɩna yale bɩnɩ dɩm wʋnɩ mʋ Zoasɩ bu Amasia dɛɛn di Zuda tɩʋ paarɩ. 2 Amasia dɛɛn jɩgɩ bɩna fiinle-yanu mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm o kɩ bɩna fiinle-nʋgʋ. O nu yɩrɩ mʋ Yewoyadan yɩ o nuŋi Zeruzalɛm. 3 O tɩtʋŋa dɛɛn su Baŋa-Wɛ yi lanyɩranɩ, yɩ o tɩtʋŋ-ŋʋna nan wʋ yi o nabaarʋ Davidi dɛɛn na kɩ te tɩn. O dɛɛn yɔɔrɩ o kwe o ko Zoasɩ tɩtʋŋ-naga mʋ. 4 Dɩ kʋ dɩ, Amasia wʋ wanɩ o cɔgɩ wara-je bimbinə yalʋ ba na kɩ kaanɩm da tɩn. Nɔɔna dɛɛn yǝni ba kɩ kaanɩm dɩ zwɛɛm pɛɛra je sɩm kʋntʋ nɩ yɩ ba wʋ yagɩ.5 O na yɔɔrɩ o jǝni paarɩ dɩm baŋa nɩ tɩn, o ma gʋ nɔɔna balʋ dɛɛn na jaanɩ o ko ba gʋ tɩn. 6 O nan wʋ pɛ ba gʋ nɔn-gʋra bam kʋntʋ biə bam. O dɛɛn sɛ ni dɩlʋ Baŋa-Wɛ na pɛ Moyisi tɩn. Ni dɩm kʋntʋ brɩ nɩ: «Kwə ba maŋɩ sɩ ba tɩ ba biə kikiə ŋwaanɩ. Biə dɩ nan ba maŋɩ sɩ ba tɩ ba kwə kikiə ŋwaanɩ. Nɔɔnʋ na maŋɩ sɩ o tɩ, kʋʋ́ taa yɩ o tɩtɩ yuu lwarɩm ŋwaanɩ mʋ.»a
7 Amasia dɛɛn mʋ gʋ Edɔm jar-kərə mʋrrʋ fugə jǝgǝ kalʋ ba na bǝi nɩ ‹Yɛ bolo› tɩn nɩ.b O ta ma di Siloe tɩʋ o joŋi Edɔm tiinə bam tee nɩ. O ma ləri o pa kʋ yɩrɩ nɩ Yoktɛlɩ. Yɩrɩ dɩm kʋntʋ mʋ ba ta bǝi dɩ zɩm maama.
8 Dɛ dɩdwɩ mʋ Pɛ Amasia tʋŋɩ o tɩntʋŋna sɩ ba vu ba gwarɩ Yisɩrayɛlɩ tɩʋ pɛ Zoasɩ na yɩ Yoahazɩ bu yɩ o ta yɩ Zehu naa tɩn sɩ ba ta dɩd-o ba wɩ: «Ba n jeeri-nɩ sɩ dɩ́ kɩ kayiŋu.» 9 Pɛ Zoasɩ ma joori o tʋŋɩ kwǝrǝ o pa Zuda tɩʋ pɛ Amasia o wɩ: «Sabara kadoŋ mʋ zɩgɩ Liban nɩ ka tʋŋɩ kwǝrǝ ka pa Sɛdrɩ tiu Liban nɩ ka wɩ: ‹Kwe n bukɔ wʋm n pa a bu sɩ o di o ma o kɩ kaanɩ.› Kʋntʋ nɛ sɩm ni nɩ mʋ ga-varɩm zɩgɩ Liban nɩ ka nɔnɩ sabara kam ka cɔgɩ. 10 Nmʋ na sɩɩnɩ n wanɩ n di Edɔm tiinə bam tɩn mʋ pɛ n cʋ n vwana kʋntʋ. Nan ya maŋɩ n sɔŋɔ nɩ sɩ n ta n caka. Bɛɛ mʋ yɩ n bʋŋɩ sɩ n vaarɩ lɛɛrʋ n yagɩ nmʋ tɩtɩ yuu nɩ dɩ Zuda tiinə dɩ yuu nɩ?»
11 Amasia ma sɩn o zwa dɩ taanɩ dɩm kʋntʋ. Kʋ kwaga nɩ Yisɩrayɛlɩ tɩʋ pɛ Zoasɩ ma la o jar-kərə o kɩ daanɩ yɩ ba vu ba zaŋɩ najara dɩ Amasia Zuda tɩʋ Bɛtɩ-Sɩmesa nɩ. 12 Yisɩrayɛlɩ jar-kərə bam ma wanɩ ba di Amasia dɩ o nɔɔna bam pa ba maama duri ba joori ba sam. 13 Yisɩrayɛlɩ tɩʋ pɛ Zoasɩ ma ja Amasia Bɛtɩ-Sɩmesa nɩ. Zoasɩ ta ma daarɩ o vu Zeruzalɛm o bwəri tɩʋ kʋm kəbrə kalʋ na zɩgɩ Efrayim Ni dɩm nɩ sɩ ka vu ka yi Gugoro Ni dɩm tɩn. Ka laŋa kam dɛɛn yɩ kantɩ biə-yana mʋ. 14 O ma vu o zʋ Baŋa-Wɛ digə kam o vrɩ ka səbu-sɩŋa dɩ səbu-poŋo wǝǝnu, dɩ ka lʋnnɩ zɩla yam maama. O ta ma pɛ jɩjɩgɩrʋ tɩlʋ na tigi pɛ sɔŋɔ kʋm nɩ tɩn. O ma ja tɩ maama o joori Samari. O ta ma ja tɩʋ kʋm nɔɔna o ja viiri sɩ kʋ fɩn Zuda tɩʋ pɛ o sɛ o ni.
15 Zoasɩ dɛɛn na di paarɩ yɩ o kɩ wǝǝnu tɩlʋ maama tɩn, dɩ o tɩtʋŋa yam, dɩ o na zaŋɩ najara dɩ Zuda tɩʋ pɛ Amasia te tɩn maama, ba pʋpʋnɩ-tɩ ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ. 16 Zoasɩ ma tɩ yɩ o vu o kwə te. Ba ma kwe‑o ba kɩ mɛ ba na kɩ Yisɩrayɛlɩ tiinə pwa badonnǝ bam Samari nɩ tɩn. O bu Zeroboam ma ləri o yuu nɩ o di paarɩ.
17 Yisɩrayɛlɩ tɩʋ pɛ Zoasɩ tʋʋnɩ dɩm kwaga seeni, Zuda tɩʋ pɛ Amasia dɛɛn ta nɛ bɩna fugə-yanu mʋ yɩ o laan tɩ. 18 Amasia dɛɛn na di paarɩ yɩ o tʋŋɩ wǝǝnu tɩlʋ maama tɩn, ba pʋpʋnɩ-tɩ ba tiŋi Zuda Tɩʋ Pwa Cɩbarɩ tɔnɔ kʋm wʋnɩ.
19 Zeruzalɛm dɩdɛɛra badonnǝ dɛɛn kɩ ni daanɩ mʋ sɩ ba gʋ Pɛ Amasia. O ma duri o vu Lakisi. O dʋna bam ma tʋŋɩ nɔɔna sɩ ba zəg-o. Ba ma yi‑o ba gʋ Lakisi nɩ. 20 Ba ma kwe Amasia yɩra yam ba daŋɩ sisəŋ-nɔɔnʋ baŋa nɩ ba ja joori Zeruzalɛm. Ba ma kwe‑o ba kɩ o kwə bam yibeeli nɩ Davidi tɩʋ nɩ.
21 Zuda tiinə bam maama ma kuri Azarɩa sɩ o ləri o ko Amasia yuu nɩ o ji pɛ. Ba na tiŋ‑o paarɩ kʋntʋ tɩn, Azarɩa dɛɛn jɩgɩ bɩna fugə-yardʋ mʋ. 22 O ko Amasia tʋʋnɩ dɩm kwaga seeni mʋ Azarɩa fɔgɩ o lɔ Elatɩ tɩʋ pa Zuda tiinə bam te-kʋ.c
Yisɩrayɛlɩ tɩʋ pɛ Zeroboam Ii taanɩ
23 Zuda tɩʋ pɛ Zoasɩ bu Amasia paarɩ dim bɩna fugə-yanu bɩnɩ dɩm wʋnɩ mʋ Zoasɩ bu Zeroboam dɛɛn di Yisɩrayɛlɩ tɩʋ paarɩ. O ma jǝni Samari nɩ o di paarɩ dɩm o kɩ bɩna fiinna-dɩdʋa. 24 O dɛɛn tʋŋɩ lwarɩm o cɔgɩ Baŋa-Wɛ yigə mʋ. O wʋ sɛ sɩ o yagɩ lwarɩm dwi dɩlʋ Nebatɩ bu Zeroboam dɛɛn na kɩ pa Yisɩrayɛlɩ tiinə dɩ da ba kɩ tɩn. 25 Zeroboam dɛɛn mʋ joori o joŋi tɩga kalʋ na zɩgɩ Lebo-Hamatɩ nɩ ka tʋlɩ ka yi Yɛ nɩnɩʋ kʋmd tɩn o pa Yisɩrayɛlɩ tiinə bam. Kǝm dɩm kʋntʋ tɔgɩ kwǝrǝ kalʋ Yisɩrayɛlɩ tiinə Tu Baŋa-Wɛ dɩm na wuuri DƖ pa Amitayi bu Zonasɩ tɩn. Wʋntʋ dɛɛn yɩ Wɛ nijoŋnu wʋlʋ na nuŋi Gata-Hefera tɩn.e
26 Baŋa-Wɛ dɛɛn ya maanɩ Yisɩrayɛlɩ tiinə bam maama na nɛ cam te tɩn. Ba maama tiini ba yaarɩ zanzan, kʋ na yɩ balʋ na yɩ gambɛ, dɩ balʋ na te ba tɩtɩ tɩn maama dɩ. Nɔɔn-nɔɔnʋ dɛɛn tǝrǝ sɩ o wǝli-ba. 27 Baŋa-Wɛ nan tɔgɩ Zoasɩ bu Zeroboam baŋa nɩ mʋ sɩ DƖ joŋi-ba DƖ yagɩ. Bɛŋwaanɩ Baŋa-Wɛ wʋ tagɩ nɩ: DƖ wʋ́ saarɩ Yisɩrayɛlɩ tiinə bam yɩrɩ lʋgʋ baŋa maama nɩ.
28 Zeroboam dɛɛn na di paarɩ yɩ o kɩ wǝǝnu tɩlʋ maama tɩn, dɩ o tɩtʋŋa yam, dɩ o dɛɛn na jigi bara tɛ o cɩ-tɔrʋ tɩm wʋnɩ tɩn, kʋ wǝli dɩ o na joori o joŋi Damasɩ dɩ Hamatɩ tɩɩnɩ dɩm o kɩ Yisɩrayɛlɩ tiinə bam jɩŋa nɩ te tɩn maama, ba pʋpʋnɩ-tɩ ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ. 29 Zeroboam ma tɩ yɩ ba kwe‑o ba kɩ mɛ ba na kɩ Yisɩrayɛlɩ tiinə pwa badonnǝ bam tɩn. O bu Zakari ma ləri o ji pɛ.