Yisɩrayɛlɩ tɩʋ pɛ Yoahazɩ taanɩ
13
Zuda tɩʋ pɛ Ahazɩa bu Zoasɩ paarɩ dim bɩna fiinle-yatɔ bɩnɩ dɩm wʋnɩ mʋ Zehu bu Yoahazɩ dɛɛn di Yisɩrayɛlɩ tɩʋ paarɩ. O ma jǝni Samari nɩ o di paarɩ dɩm o kɩ bɩna fugə-yarpɛ. 2 O tʋŋɩ lwarɩm o cɔgɩ Baŋa-Wɛ yigə mʋ dɩ o na kɩ lwarɩm dwi dɩlʋ Nebatɩ bu Zeroboam dɛɛn na kɩ pa Yisɩrayɛlɩ tiinə dɩ da ba kɩ tɩn mʋ. O wʋ sɛ sɩ o yagɩ. 3 Kʋntʋ ŋwaanɩ Baŋa-Wɛ banɩ tiini dɩ zaŋɩ Yisɩrayɛlɩ tiinə baŋa nɩ. DƖ dɛɛn pɛ Siiri tɩʋ pɛ Azayɛlɩ dɩ o bu Bɛn-Hadadɩ di dam ba baŋa nɩ taan.4 Yoahazɩ ma loori yibwənə Baŋa-Wɛ tee nɩ. Baŋa-Wɛ ma sɛ o wɛ-loro kʋm, DƖ na maanɩ nɩ Siiri tɩʋ pɛ mʋ jɩgɩ Yisɩrayɛlɩ tiinə bam o bɛɛsa zanzan tɩn ŋwaanɩ. 5 Baŋa-Wɛ ma lɩ vrɩnʋ o pa Yisɩrayɛlɩ tiinə bam, pa ba vrɩ ba tɩtɩ Siiri tiinə bam dam kuri nɩ. Kʋntʋ kwaga nɩ mʋ Yisɩrayɛlɩ tiinə bam joori ba zʋʋrɩ ba sam dɩm nɩ dɩ yazurə, nɩ faŋa kam nɩ kʋ ya na yɩ te tɩn. 6 Dɩ kʋ dɩ, ba dɛɛn ta kɩ lwarɩm dwi dɩlʋ Zeroboam dwi tiinə dɛɛn na kɩ pa Yisɩrayɛlɩ tiinə dɩ da ba kɩ tɩn mʋ. Ba wʋ sɛ sɩ ba cɔgɩ Asera nyɩnyʋgʋ dɛ sɩm na wʋ Samari nɩ yɩ nɔɔna zuli-sɩ tɩn.
7 Yoahazɩ jar-kərə dɛɛn ta daarɩ fɩɩn, nɩnɛɛnɩ sise diinə fiinnu, dɩ jara-kǝm tərikooru fugə, kʋ wǝli dɩ jar-kərə mʋrʋ fugə yɩranɩ mʋ. Bɛŋwaanɩ, Siiri tɩʋ pɛ wʋm ya yɔɔrɩ o cɔgɩ jar-kərə badaara bam maama pa ba ji nɩ fogo mʋ te.
8 Yoahazɩ dɛɛn na di paarɩ yɩ o kɩ wǝǝnu tɩlʋ maama tɩn, dɩ o tɩtʋŋa yam, dɩ o dɛɛn na yɩ bara tɛ tɩn maama, ba pʋpʋnɩ-tɩ ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ. 9 Yoahazɩ ma tɩ yɩ o vu o kwə te. Ba ma kwe‑o ba kɩ Samari tɩʋ nɩ. O tʋʋnɩ dɩm kwaga nɩ o bu Zoasɩ ma ləri o ji pɛ.
Yisɩrayɛlɩ tɩʋ pɛ Zoasɩ taanɩ
10 Zuda tɩʋ pɛ Zoasɩ paarɩ dim bɩna fiintɔ-yarpɛ bɩnɩ dɩm wʋnɩ mʋ Yoahazɩ bu Zoasɩ dɛɛn di Yisɩrayɛlɩ tɩʋ paarɩ. O ma jǝni Samari nɩ o di paarɩ dɩm o kɩ bɩna fugə-yardʋ. 11 O tʋŋɩ lwarɩm o cɔgɩ Baŋa-Wɛ yigə mʋ dɩ o na kɩ lwarɩm dwi dɩlʋ maama Nebatɩ bu Zeroboam dɛɛn na kɩ pa Yisɩrayɛlɩ tiinə dɩ da ba kɩ tɩn mʋ. O dɛɛn paalɩ o kɩ lwarɩm yantʋ doŋ mʋ.
12 Zoasɩ dɛɛn na di paarɩ yɩ o kɩ wǝǝnu tɩlʋ maama tɩn, dɩ o tɩtʋŋa yam, dɩ o na kɩ baarɩ o zaŋɩ najara dɩ Zuda tɩʋ pɛ Amasia te tɩn maama, ba pʋpʋnɩ-tɩ ba tiŋi Yisɩrayɛlɩ Tɩʋ Pwa Cɩbarɩ tɔnɔ kʋm wʋnɩ. 13 Zoasɩ ma tɩ yɩ o vu o kwə te. Ba ma kwe‑o ba kɩ mɛ ba na kɩ Yisɩrayɛlɩ tiinə pwa badonnǝ bam Samari nɩ tɩn. O tʋʋnɩ dɩm kwaga nɩ o bu Zeroboama ma ləri o di paarɩ dɩm.
14 Yisɩrayɛlɩ tɩʋ pɛ Zoasɩ dɛɛn ta na ŋwɩ tɩn, yawɩʋ ya mʋ jaanɩ Wɛ nijoŋnu Elisa yɩ kʋ ga fɩɩn sɩ o tɩ. O yawɩʋ kʋm maŋa nɩ Zoasɩ ma vu o te sɩ o war‑o. O ma zɩgɩ Elisa yigə nɩ o kan yi-na yɩ o wɩ: «Amʋ ko! Amʋ ko! Yisɩrayɛlɩ jar-kərə tərikooru tɩm dɩ tɩ sise diinə bam laan wʋ́ kɩ tɛ mʋ?»b
15 Elisa ma ta dɩ pɛ wʋm o wɩ: «Kwe taŋa dɩ ka cɩna.» O ma sɩɩnɩ o kwe-tɩ o ziǝ. 16 Elisa ma ta dɩd-o sɩ o saŋɩ taŋa kam. O na lagɩ o ta kʋntʋ tɩn mʋ Elisa jaanɩ pɛ wʋm jɩa. 17 Elisa ma ta dɩ pɛ wʋm o wɩ: «Pʋrɩ takoro ni dɩlʋ na yɔɔrɩ wa-puli seeni tɩn.» O ma sɩɩnɩ o kɩ kʋntʋ. Elisa ma ta dɩd-o sɩ o ta cɩnɩ, yɩ o sɩɩnɩ o kɩ kʋntʋ. Elisa ma ta o wɩ: «Baŋa-Wɛ wɔnɔ cɩnɩ dɩm mʋ kʋntʋ! Kʋ brɩ nɩ Siiri tiinə bam wʋ́ tʋ najara wʋnɩ. Bɛŋwaanɩ, nmʋ wʋ́ yɔɔrɩ n cɔgɩ Siiri jar-kərə bam maama Afɛkɩ nɩ.»
18 Elisa daa ta ma ta dɩ pɛ wʋm o wɩ: «Kwe cɩna yalʋ na daarɩ tɩn.» Pɛ wʋm ma kwe-ya. Elisa ma ta dɩd-o o wɩ: «Fɩrɩ-ya tɩga nɩ.» Pɛ wʋm ma magɩ cɩna yam tɩga nɩ kuni bɩtɔ yɩ o yagɩ. 19 Wɛ tɩntʋŋnʋ Elisa banɩ ma zaŋɩ dɩd-o yɩ o wɩ: «Nmʋ yaá fɩrɩ-ya tɩga nɩ kuni bɩnu naa bɩrdʋ mʋ. Kʋntʋ mʋ yaá pa n wanɩ n cɔgɩ Siiri tiinə bam maama nyɔ. Kʋ nan na yɩ te tɩn, nmʋ lagɩ n di-ba kuni bɩtɔ yɩranɩ mʋ.»
20 Elisa dɛɛn ma tɩ yɩ ba kwe‑o ba kɩ.
Bɩn-dʋʋrɩ maama wʋnɩ Moabɩ tɩʋ vɩrra jiləjuru mʋ yǝni ba zʋ Yisɩrayɛlɩ tɩga kam ba vuvugi nɔɔna bam. 21 Dɛ dɩdwɩ Yisɩrayɛlɩ tiinə badonnǝ dɛɛn mʋ jaanɩ ba tʋʋ ba vu sɩ ba kɩ. Ba ma na Moabɩ tiinə vɩrra jiləjuru na bɩɩnɩ dɩ kɔgɔ te tɩn. Ba ma kɩ lɩla ba kwe tʋʋ wʋm ba dʋlɩ ba yagɩ Elisa yibeeli dɩm nɩ yɩ ba daarɩ ba duri. Tʋʋ wʋm yɩra na yɔɔrɩ ya dwe Elisa kwi sɩm tɩn, mʋ o joori o bi o zaŋɩ o zɩga.
22 Maŋa kalʋ maama Yoahazɩ dɛɛn na yɩ pɛ tɩn mʋ Siiri tɩʋ pɛ Azayɛlɩ tiini o bɛɛsɩ Yisɩrayɛlɩ tiinə bam. 23 Baŋa-Wɛ yigə nan wʋ Yisɩrayɛlɩ tiinə bam wʋnɩ pa DƖ duri ba yibwənə, DƖ na goni ni dɩlʋ dɩ ba nabaara Abraham, dɩ Yizakɩ, dɩ Zakɔbɩ tɩn ŋwaanɩ. Dɩ zɩm maama Baŋa-Wɛ wʋ sɛ sɩ DƖ cɔgɩ-ba DƖ ti, naa sɩ DƖ zəli-ba DƖ tee nɩ.