Zuda tɩʋ pɛ Zoasɩ taanɩ
2 Wǝǝnu Kɩbarɩ tɔnɔ 24:1-16
12
Yisɩrayɛlɩ tɩʋ pɛ Zehu paarɩ dim bɩna yarpɛ bɩnɩ dɩm wʋnɩ mʋ Zoasɩ di paarɩ Zuda nɩ. O dɛɛn jǝni Zeruzalɛm nɩ o di paarɩ dɩm o kɩ bɩna fiinna mʋ. O nu dɛɛn nuŋi Bɛɛr-Seba, o yɩrɩ mʋ Sibiya. 2 Pɛ Zoasɩ ŋwɩa maama wʋnɩ o tɩtʋŋa dɛɛn su Baŋa-Wɛ yi lanyɩranɩ, Wɛ kaanɩm tu Yehoyada na zaas-o tɩn ŋwaanɩ. 3 Dɩ kʋ dɩ, o wʋ wanɩ o cɔgɩ wara-je bimbinə yalʋ ba na kɩ kaanɩm da tɩn. Nɔɔna dɛɛn ta ma yǝni ba kɩ kaanɩm dɩ zwɛɛm pɛɛra je sɩm kʋntʋ nɩ.4 Zoasɩ ma ta dɩ Wɛ kaanɩm tiinə bam o wɩ: «La-na səbu-poŋo tɩlʋ maama nɔɔna na jaanɩ ba ba ba tiŋi Baŋa-Wɛ digə kam wʋnɩ sɩ ba ma ba zuli‑DƖ tɩn. Kʋ na yɩ Wɛ-digə lampoo səbu kʋm, dɩ ba ni-gonim səbu kʋm, dɩ ba na pɛ səbu kʋlʋ dɩ ba tɩtɩ wʋbʋŋa tɩn dɩ, sɩ á la tɩ maama. 5 Wɛ kaanɩm tu maama laan wʋ́ joŋi sǝbiǝ bam mʋ səbu-tiŋnu maama tee nɩ sɩ ba ma ba fɔgɩ ba kwɛ Wɛ-digə kam nɩ kʋ na maŋɩ te tɩn.»a
6 Zoasɩ dɛɛn na di paarɩ yɩ o kɩ bɩna fiinle-yatɔ tɩn, Wɛ kaanɩm tiinə bam ta wʋ wanɩ ba kwɛ Wɛ-digə kam dɩ fɩnfɩɩn dɩ. 7 Kʋntʋ ŋwaanɩ mʋ, Zoasɩ bəŋi Wɛ kaanɩm nakwɩ tu Yehoyada dɩ kaanɩm tiinə badonnǝ bam o bwe-ba o wɩ: «Bɛɛ mʋ kɩ yɩ abam ta wʋ kwɛ Wɛ-digə kam? Daa á yɩ taá joŋi-na səbu á səbu-tiŋnə bam tee nɩ á di, nɩ kʋ na daɩ Wɛ-digə kam kwɛɛm yɩranɩ ŋwaanɩ.» 8 Kaanɩm tiinə bam ma sɛ nɩ ba daa bá joŋi səbu nɔɔna bam tee nɩ. Ba ma kwe Wɛ-digə kam kwɛɛm tɩtʋŋa yam ba pa nɔɔna badonnǝ.
9 Yehoyada ma kwe daka o puri bɔɔnɩ ka nipugu kʋm yɩra nɩ, o daarɩ o ja-ka o zʋ Baŋa-Wɛ digə kam wʋ. O ma kwe-ka o zɩgɩ kaanɩm bimbim dɩm jazɩm seeni. Wɛ kaanɩm tiinə balʋ na yɩrɩ Wɛ-digə kam ni tɩn wʋ́ joŋi sǝbiǝ balʋ nɔɔna na jaanɩ ba ba sɩ ba pa Wɛ tɩn ba kɩ daka kam wʋnɩ. 10 Maŋa kalʋ maama ba na maanɩ nɩ səbu kʋm su daka kam, pɛ sɔŋɔ tɔn-pʋpʋnnʋ wʋm dɩ Wɛ kaanɩm nakwɩ tu wʋm mʋ wʋ́ kɩ daanɩ ba kwe səbu kʋm ba jeeli kʋ ni ba kwe ba kɩ ywəllu wʋnɩ. 11 Ba na yǝni ba lwarɩ səbu kʋm ni, baá kwe-kʋ ba pa nɔɔna balʋ ba na kuri sɩ ba taa nii Wɛ-digə kam tɩtʋŋɩ baŋa nɩ tɩn mʋ. Bantʋ dɩ maa wʋ́ kwe səbu kʋm ba ma ŋwɩ balʋ maama na tʋŋɩ Wɛ-digə kam kwɛɛm tɩtʋŋa tɩn. Bantʋ dɛɛn yɩ gwarʋ, dɩ lwara, 12 kʋ wǝli dɩ kandwa-cɩrna. Ba maa ta wʋ́ ma səbu kʋm ba yəgi dɛ dɩ kandwa yalʋ ba na yarɩ piu yɩra nɩ tɩn sɩ ba ma ba kwɛ Baŋa-Wɛ digə kam ba daarɩ ba ŋwɩ kwǝrǝ yalʋ maama ta na wʋra tɩtʋŋɩ dɩm ŋwaanɩ tɩn.
13 Səbu kʋlʋ nɔɔna dɛɛn na jaanɩ ba ba ba tiŋi Wɛ-digə kam nɩ tɩn, ba wʋ sɛ sɩ ba kwe-kʋ ba ma ba mɔ səbu-poŋo zʋn-tanlɛ, dɩ min-zwǝǝnu kwɛɛm fanɩ, dɩ zwɩ dɩ nabwaanʋ, naa səbu-sɩŋa dɩ səbu-poŋo wǝǝnu tɩlʋ maama na maŋɩ sɩ tɩ taa zɩgɩ Wɛ-digə kam nɩ tɩn. 14 Ba nan kwe kʋ maama ba pa tɩntʋŋna bam mʋ sɩ ba ma ba fɔgɩ ba kwɛ Wɛ-digə kam. 15 Kʋ na yɩ balʋ ba na pɛ-ba səbu kʋm sɩ ba ma ŋwɩ tɩntʋŋna bam tɩn, ba wʋ fɩn-ba sɩ ba jeeli səbu kʋm ba brɩ jaja, bantʋ na yɔɔrɩ ba tʋŋɩ dɩ cɩga tɩn ŋwaanɩ. 16 Kʋ daarɩ kʋ na yɩ lwarɩm jɩnɩ pɛɛra yam, dɩ lwarɩm saarɩm pɛɛra yam, ba wʋ jaanɩ yantʋ ba zʋ Baŋa-Wɛ digə kam. Yantʋ maama yɩ Wɛ kaanɩm tiinə bam nyɩm mʋ.
17 Kantʋ maŋa nɩ mʋ Siiri tɩʋ pɛ Azayɛlɩ dɛɛn ve o zaŋɩ najara dɩ Gatɩ tiinə. O ma wanɩ tɩʋ kʋm o di. O ma zɩgɩ daanɩ o daa vu sɩ o zaŋɩ najara dɩ Zeruzalɛm tiinə. 18 Zuda tɩʋ pɛ Zoasɩ ma kwalɩmɩ lʋnnɩ wǝǝnu tɩlʋ maama o kwə Zʋzafatɩ, dɩ Yoram, dɩ Ahazɩa na kwe ba pa Baŋa-Wɛ tɩn, dɩ tɩlʋ o tɩtɩ na kwe o pa Wɛ tɩn, kʋ ta wǝli dɩ səbu-sɩŋa jɩjɩgɩrʋ tɩlʋ na tigi Wɛ-digə kam dɩ pɛ sɔŋɔ kʋm wʋnɩ tɩn. O ma kwe tɩ maama o tʋŋɩ o pa Azayɛlɩ sɩ o ma o war‑o. Azayɛlɩ laan ma yagɩ najara yam o kɛ o daarɩ Zeruzalɛm.
19 Zoasɩ dɛɛn na di paarɩ yɩ o kɩ wǝǝnu tɩlʋ maama tɩn, dɩ o tɩtʋŋa yam maama, ba pʋpʋnɩ-tɩ ba tiŋi Zuda Tɩʋ Pwa Cɩbarɩ tɔnɔ kʋm wʋnɩ.b 20 Pɛ Zoasɩ dɩdɛɛra dɛɛn kɩ ni daanɩ mʋ sɩ ba zaŋɩ o baŋa nɩ. Ba ma gʋ-o Bɛtɩ-Millo nɩ. Jǝgǝ kam kʋntʋ wʋ Sila cwǝŋǝ ni nɩ mʋ. 21 Dɩdɛɛra balʋ na kɩ kʋntʋ tɩn maa yɩ Simeyatɩ bu Yozabadɩ, dɩ Somɛrɩ bu Yehozabadɩ. Ba ma kwe Zoasɩ ba kɩ o kwə bam yibeeli nɩ Davidi tɩʋ Zeruzalɛm nɩ. O tʋʋnɩ dɩm kwaga nɩ o bu Amasia ma ləri o yuu nɩ o ji pɛ.