Atalia di paarɩ Zuda nɩ
11
Pɛ Ahazɩa nu Atalia na maanɩ nɩ o bu wʋm tɩga tɩn, o ma zaŋɩ sɩ o pa ba gʋ paarɩ digə kam nɔn-biə maama. 2 Ba na tu sɩ ba gʋ pɛ wʋm biə bam tɩn, Pɛ Yoram bukɔ Yehoseba na yɩ Ahazɩa nakɔ tɩn ma ŋɔ Ahazɩa bu-sɩsɩŋa kam yɩrɩ na yɩ Zoasɩ tɩn o səgi. O ma kwe bu wʋm dɩ kaanɩ wʋlʋ na jɩg-o o kɔna tɩn o vu o səgi pwəgə jǝgǝ nɩ sɩ Atalia yɩ na‑o. Kʋntʋ ma pa o wʋ tɔgɩ dɩ pabiə badaara bam o tɩ. 3 Zoasɩ dɛɛn maŋɩ Yehoseba tee nɩ bɩna yardʋ mʋ, yɩ ba səg‑o Baŋa-Wɛ digə kam kadoŋ wʋnɩ. Maŋa kam kʋntʋ nɩ Atalia ma jǝni Zuda tɩʋ paarɩ dɩm baŋa nɩ.4 Atalia paarɩ dim bɩna yarpɛ bɩnɩ dɩm nɩ mʋ Wɛ kaanɩm tu Yehoyada bəŋi dɩdɛɛra balʋ na nii pamaŋna bam, dɩ Kariti jar-kərə bam, dɩ pɛ sɔŋɔ yɩrɩna bam baŋa nɩ tɩn sɩ ba ba ba jeeri Baŋa-Wɛ digə kam nɩ. Dáanɩ mʋ o goni ni dɩ ba o daarɩ o pa ba du durə ba pa‑o. O laan ma kwe Ahazɩa bu Zoasɩ o brɩ-ba. 5 O ma pa-ba ni o wɩ: «Abam na maŋɩ sɩ á kɩ te tɩn mʋ tɩntʋ: Á nɔɔna bam na pɔɔrɩ kuni bɩtɔ tɩn, ba kɔgɔ kʋlʋ na tui tɩtʋŋa siun dɛ nɩ tɩn cicoro yǝni ba yɩrɩ pɛ sɔŋɔ kʋm. 6 Cicoro kʋdoŋ dɩ maa nii Suri ni dɩm. Cicoro kʋlʋ na daarɩ tɩn maa zɩgɩ ni dɩm seeni pamaŋna bam kwaga nɩ. Bantʋ maama nan wʋ́ taa yɩrɩ pɛ sɔŋɔ kʋm mʋ. 7 Kʋ daarɩ kwarʋ tɩle tɩm na yagɩ tɩtʋŋa siun dɛ nɩ tɩn dɩ laan maa wʋ́ taa yɩrɩ Baŋa-Wɛ digə kam sɩ kʋlʋkʋlʋ yɩ kɩ pɛ wʋm. 8 Fɔgɩ-na á zɩgɩ á gilimi pɛ wʋm mʋ á kɩ tɩtarɩ nɩ, yɩ á ze á najara zɩla. Nɔɔnʋ wʋlʋ na lɛɛnɩ abam, sɩ á yɔɔrɩ á gʋ kʋ tu. Pɛ wʋm nan na wʋ́ vu mɛ maama tɩn, sɩ abam dɩ taá wʋ o tee nɩ.»
9 Dɩdɛɛra bam ma sɩɩnɩ ba tɔgɩ ni dɩlʋ maama Wɛ kaanɩm tu Yehoyada na taga tɩn. Ba dɩdʋa dɩdʋa ma ja ba nɔɔna ba ba Yehoyada te, nɩ kʋ na yɩ balʋ na tui tɩtʋŋa siun dɛ nɩ tɩn, dɩ balʋ na yagɩ tɩtʋŋa siun dɛ nɩ tɩn maama. 10 Yehoyada ma kwe cicwə dɩ jara-kǝm cɩ-kwɛn sɩlʋ dɛɛn na yɩ Davidi nyɩm yɩ tɩ tigi Baŋa-Wɛ digə kam nɩ tɩn o pa dɩdɛɛra bam. 11 Pamaŋna bam maama ma vu ba zɩgɩ ba gilimi pɛ wʋm ba kɩ tɩtarɩ nɩ, yɩ ba ze ba najara zɩla. Ba dɛɛn tigisi ba tɩtɩ Wɛ-digə kam je maama nɩ, jagwiə seeni dɩ jazɩm seeni, kʋ zɩgɩ kaanɩm bimbim dɩm tikəri nɩ dɩ digə kam tɩtɩ yigə nɩ.
12 Yehoyada dɛɛn ma ja pɛ wʋm bu Zoasɩ o ja o nuŋi. O ma kwe paarɩ yipugə kam o pu o yuu nɩ, yɩ o daarɩ o kwe paarɩ tiŋim cɩbarɩ tɔnɔ kʋm o kɩ o jɩŋa nɩ. Ba ma lo paarɩ nugə o yuu nɩ ba ma ba tiŋ‑o paarɩ. Nɔɔna bam ma magɩ ba jɩa yɩ ba tɔɔlɩ ba wɩ: «Wɛ wʋ́ pa pɛ wʋm mʋmwɛ-dɛɛrɩ!»
13 Atalia na ni pamaŋna bam dɩ nɔɔna bam maama na kɩ sɔɔ kʋm tɩn, o ma kɩ lɩla o nuŋi o vu Baŋa-Wɛ digə kam o daarɩ o na nɔn-kɔgɔ kʋm. 14 O ma na pɛ wʋm na zɩgɩ Wɛ-digə kam ywe dɩm təŋə nɩ, nɩ ba na yǝni ba kɩ te ba tiŋi pɛ tɩn.a Dɩdɛɛra bam dɩ balʋ na wui nabwaanʋ tɩn maa zɩgɩ pɛ wʋm tikəri nɩ. Tɩʋ kʋm nɔn-biə bam maama maa caka dɩ wʋpolo yɩ ba badonnǝ wui nabwaanʋ. Atalia na nɛ tɩn, o ma ja o gwaarʋ tɩm o vaŋɩ o kaarɩ yɩ o wɩ: «Ba joori amʋ kwaga nɩ mʋ! Ba joori amʋ kwaga nɩ mʋ!»
15 Yehoyada ma pa jar-kərə dɩdɛɛra bam ni o wɩ: «Ja-na Atalia á nuŋi Wɛ-digə kam wʋnɩ á kɩ-o pamaŋna bam gɩna tɩtarɩ nɩ. Nɔɔnʋ na kwaanɩ sɩ o zən‑o, sɩ á kwe sʋ-lɔŋɔ á gʋ kʋ tu.» Bɛŋwaanɩ, Yehoyada ya maŋɩ o ta nɩ: ba yɩ gʋ Atalia Baŋa-Wɛ digə kam wʋnɩ. 16 Ba ma zi Atalia ba ja ba nuŋi ba vu pɛ sɔŋɔ kʋm. Ba ma pa o tɔgɩ manchoŋo ni mɛ sise na tɔgɩ da sɩ zʋʋrɩ naboo kʋm tɩn, yɩ ba daarɩ ba gʋ-o je sɩm kʋntʋ nɩ.
17 Wɛ kaanɩm tu Yehoyada ma pa pɛ wʋm dɩ nɔɔna bam maama goni ni dɩ Baŋa-Wɛ nɩ: baá taa yɩ Baŋa-Wɛ tɩtɩ nɔɔna. O ta ma pa pɛ wʋm dɩ nɔɔna bam goni ni ba pa daanɩ. 18 Zuda nɔn-biə bam dɛɛn ma vu ba zʋ Baalɩ jwəm digə kam ba yigi ka maama ba dɩ tɩga nɩ, ba daarɩ ba cɩcʋgɩ kaanɩm bimbinə yam dɩ jwəm kamwarʋ tɩm maama. Kʋ ta na yɩ Baalɩ kaanɩm tu Matan, ba jaan‑o bimbinə yam tikəri nɩ mʋ ba gʋ.
Yehoyada dɛɛn ma pa nɔɔna zɩgɩ ba yɩrɩ Baŋa-Wɛ digə kam. 19 O laan ma tɔgɩ dɩ pamaŋna bam yigǝ tiinǝ, dɩ Kariti jar-kərə bam, dɩ pɛ sɔŋɔ yɩrɩna bam, kʋ ta wǝli dɩ tɩʋ kʋm nɔn-biə bam maama, sɩ ba vu ba ja pɛ Zoasɩ ba ja ba nuŋi Baŋa-Wɛ digə kam wʋnɩ. Ba ma ja-o ba vu ba tɔgɩ nɔn-babɛ ni dɩm ba zʋ pɛ sɔŋɔ kʋm. Zoasɩ ma vu o jǝni paarɩ jangɔŋɔ kʋm baŋa nɩ. 20 Nɔn-biə bam maama maa caka dɩ wʋpolo. Kʋ kwaga nɩ tɩʋ kʋm maama ma jɩgɩ yazurə, ba na gʋ Atalia pɛ sɔŋɔ kʋm wʋnɩ tɩn ŋwaanɩ.
21 Zoasɩ dɛɛn jɩgɩ bɩna yarpɛ mʋ yɩ o di Zuda tɩʋ paarɩ dɩm.