Zuda tɩʋ pɛ Ahazɩ taanɩ
16
Remalia bu Peka paarɩ dim bɩna fugə-yarpɛ bɩnɩ dɩm wʋnɩ mʋ Zʋatam bu Ahazɩ dɛɛn di Zuda tɩʋ paarɩ. 2 Ahazɩ dɛɛn jɩgɩ bɩna fiinle mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm o kɩ bɩna fugə-yardʋ. O nan wʋ tʋŋɩ o poli o Tu Baŋa-Wɛ wʋʋ nɩnɛɛnɩ o nabaarʋ Davidi na kɩ te tɩn. 3 O dɛɛn cɔgɩ dɩ o na kwe Yisɩrayɛlɩ tɩʋ pwa bam tɩtʋŋ-naga te tɩn. O ma ja o tɩtɩ bu o zwɛ o ma o kɩ kaanɩm. O kǝm dɩm kʋntʋ brɩ nɩ o lwǝni tɩtʋŋ-zɔɔna yalʋ dwi-gɛ tiinə na kɩ yɩ Wɛ zəli-ba tɩga kam nɩ o daarɩ o pa Yisɩrayɛlɩ tiinə bam jǝni tɩn mʋ. 4 Kʋ na yɩ wara-je bimbinə yam baŋa nɩ, dɩ zwəənu tɩm baŋa nɩ, dɩ tweeru maama kuri nɩ, o dɛɛn yǝni o kɩ kaanɩm dɩ zwɛɛm pɛɛra mʋ je sɩm kʋntʋ maama nɩ.5 Siiri tɩʋ pɛ Resin dɩ Yisɩrayɛlɩ tɩʋ pɛ Peka dɛɛn ma zaŋɩ ba vu Zeruzalɛm sɩ ba zaŋɩ najara dɩ Zuda tiinə bam. Ba ma gilimi tɩʋ kʋm ba pu, yɩ ba wʋ wanɩ Ahazɩ ba di. 6 Kantʋ maŋa kam nɩ mʋ Siiri tɩʋ pɛ Resin dɛɛn zəli Zuda tiinə balʋ na zʋʋrɩ Elatɩ nɩ tɩn o joori o kɩ tɩʋ kʋm o tɩtɩ nɔɔna jɩŋa nɩ. Edɔm tiinə laan ma vu ba zʋʋrɩ Elatɩ nɩ yɩ ba ta wʋra dɩ zɩm maama.
7 Pɛ Ahazɩ ma tʋŋɩ o tɩntʋŋna sɩ ba vu ba ta dɩ Asiiri tɩʋ pɛ Tigila-Pilezarɩ ba wɩ: «Amʋ yɩ nmʋ tɩntʋŋnʋ mʋ yɩ a yɔɔrɩ a sɛ a pa‑m. A nan loori‑m sɩ n ba n joŋi-nɩ n yagɩ Siiri tiinə dɩ Yisɩrayɛlɩ tiinə bam jɩŋa nɩ, ba na tu ba li amʋ dɩ najara tɩn ŋwaanɩ.» 8 Ahazɩ ta ma kwe səbu-poŋo dɩ səbu-sɩŋa wǝǝnu tɩlʋ na wʋ Baŋa-Wɛ digə kam nɩ tɩn dɩdaanɩ tɩlʋ na wʋ pɛ sɔŋɔ kʋm wʋnɩ tɩn o tʋŋɩ o pa Asiiri pɛ wʋm. 9 Asiiri tɩʋ pɛ ma sɛ. O ma vu o zaŋɩ najara dɩ Damasɩa o wanɩ-kʋ. O ma ja kʋ nɔn-biə bam o vu o yagɩ Kiiri tɩʋ nɩ o daarɩ o gʋ Pɛ Resin.
10 Pɛ Ahazɩ dɛɛn ma vu Damasɩ sɩ o warɩ Asiiri tɩʋ pɛ Tigila-Pilezarɩ. O na wʋ tɩʋ kʋm wʋnɩ kʋntʋ tɩn mʋ o nɛ kaanɩm bimbim ba na lɔgɩ ba zɩgɩ da. O ma kwe bimbim dɩm nyɩnyʋgʋ o tʋŋɩ o pa Wɛ kaanɩm nakwɩ tu Yuri sɩ o wanɩ o lwarɩ kʋ na yɩ te tɩn lanyɩranɩ. 11 Yuri dɩ ma lɔ bimbim dɩm doŋ sɩ dɩ yɔɔrɩ dɩ maŋɩ dɩ nyɩnyʋgʋ kʋm. O ma lɔ-dɩ o ti yɩ Ahazɩ laan zɩgɩ Damasɩ nɩ o joori. 12 Ahazɩ na joori o ba yɩ o na bimbim dɩm tɩn, o maa fʋfɔ o yi-dɩ, o din dɩ baŋa. 13 O dɛɛn kɩ zwɛɛm pɛɛra, dɩ wʋdiu pɛɛra kaanɩm mʋ. O ma lo wo-nyɔɔrʋ pɛɛra o kɩ da yɩ o daarɩ o kwe yazurə kaanɩm jana bam o miisi bimbim dɩm yɩra nɩ. 14 Ahazɩ ma lɩ canna kaanɩm bimbim dɩm na zɩgɩ Baŋa-Wɛ yigə nɩ tɩn o ja o nuŋi Wɛ-digə kam ni dɩm nɩ. Dɩ dɛɛn ya zɩgɩ digə kam ni dɩm dɩ bimbin-dʋʋrɩ dɩm tɩtarɩ nɩ mʋ. O ma kwe-dɩ o zɩgɩ bimbin-dʋʋrɩ dɩm baŋa kam seeni. 15 O ma ta dɩ Wɛ kaanɩm tu Yuri o wɩ: «Kʋ na yɩ bimbin-kamunu kʋlʋ dɩ́ laan na lɔgɩ tɩn, ta n kɩ zɩzɩŋa maama zwɛɛm kaanɩm, dɩ dɩdaan-ni maŋa maama wʋdiu pɛɛra yam dɩ baŋa nɩ. Ta kɩ pɛ wʋm tɩtɩ zwɛɛm kaanɩm dɩm, dɩ o wʋdiu pɛɛra yam, kʋ wǝli dɩ nɔɔna bam maama zwɛɛm kaanɩm, dɩ ba wʋdiu pɛɛra, dɩ ba wo-nyɔɔrʋ pɛɛra yam maama bimbin-dʋʋrɩ dɩm baŋa nɩ. Ta daarɩ n kwe kaanɩm dɩm maama jana bam n miisi bimbim dɩm yɩra nɩ. Kʋ nan na yɩ canna bimbim dɩm, amʋ wʋ́ ta a nii dɩ woŋo.» 16 Yuri ma sɩɩnɩ o kɩ nɩ Pɛ Ahazɩ na tagɩ te tɩn.
17 Pɛ Ahazɩ dɛɛn ma lɩ canna wǝǝnu tɩlʋ na məəli war-zwɩ zɩgɩm tərikooru tɩm sɛn sɩm nɩ tɩn. O ta ma lɩ war-zwɩ sɩm tɩtɩ. Kʋ na yɩ canna war-zʋn-zɔŋɔ kʋlʋ ba na bǝi nɩ ‹Nɩnɩʋ kʋm› tɩn, o ta ma zʋʋrɩ-ka ka na zɩgɩ canna nabɛ sɩlʋ baŋa nɩ tɩn.b O ma daarɩ o kwe-ka o zɩgɩ kandwɛ-pulɔrɔ baŋa nɩ. 18 Ahazɩ ta ma gɔ vwe dɩlʋ ba ya na pugi Wɛ-digə kam nɩ siun dɛ ŋwaanɩ tɩn. O ta ma daarɩ o sɩn manchoŋo ni dɩlʋ ba ya na pʋrɩ sɩ pɛ wʋm taa tɔgɩ da o zʋʋrɩ Wɛ-digə kam wʋnɩ tɩn. Ahazɩ dɛɛn kɩ kʋntʋ maama sɩ kʋ poli Asiiri tɩʋ pɛ wʋm wʋ mʋ.