Zuda tɩʋ pɛ Amasia taanɩ
25
Amasia dɛɛn jɩgɩ bɩna fiinle-yanu mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm o kɩ bɩna fiinle-nʋgʋ. O nu yɩrɩ mʋ Yewoyadan yɩ o nuŋi Zeruzalɛm. 2 O tɩtʋŋa dɛɛn su Baŋa-Wɛ yi lanyɩranɩ, sɩ kʋ nan daɩ dɩ o wʋʋ maama mʋ o tʋŋɩ. 3 O na yɔɔrɩ o jǝni paarɩ dɩm baŋa nɩ tɩn, o ma gʋ nɔɔna balʋ dɛɛn na jaanɩ o ko ba gʋ tɩn. 4 O nan wʋ pɛ ba gʋ nɔn-gʋra bam kʋntʋ biə bam. O dɛɛn sɛ ni dɩlʋ Baŋa-Wɛ na pɛ Moyisi tɩn. Ni dɩm kʋntʋ brɩ nɩ: «Kwə ba maŋɩ sɩ ba tɩ ba biə kikiə ŋwaanɩ. Biə dɩ nan ba maŋɩ sɩ ba tɩ ba kwə kikiə ŋwaanɩ. Nɔɔnʋ na maŋɩ sɩ o tɩ, kʋʋ́ taa yɩ o tɩtɩ yuu lwarɩm ŋwaanɩ mʋ.»5 Amasia dɛɛn ma la Zuda dwi tiinə dɩ Bɛnzamɛn dwi tiinə bam. O ma pɔɔrɩ-ba pa ba yɩ jar-kərə kɔgɔ dɩ kɔgɔ sɩ kʋ tɔgɩ ba sɔ-yuni tɩm na yɩ te tɩn. O ma pɔɔrɩ-ba nɔɔna mʋrʋ mʋrʋ, dɩ nɔɔna bi bi mʋ, yɩ o daarɩ o kuri dɩdɛɛra sɩ ba taa nii kɔgɔ maama baŋa nɩ. O ma jeeli balʋ na yi bɩna fiinle ba daŋɩ yɩ ba ye najara kǝm tɩn ni. Ba dɛɛn yɩ baara mʋrrʋ biə-yatɔ (300,000) mʋ, ba na maŋɩ sɩ ba zeeri cicwə, dɩ jara-kǝm cɩ-kwɛn tɩn. 6 Amasia ta ma kwe səbu-poŋo kilo mʋrrʋ tɩtɔ dɩ biə-yana (3,400) o ŋwɩ jar-kərə mʋrrʋ bi (100,000) na nuŋi Yisɩrayɛlɩ laŋa kam tɩn sɩ ba ba ba wǝli o tɩtɩ jar-kərə bam wʋnɩ.
7 Wɛ nijoŋnu kadoŋ nan yɔɔrɩ o ba o te o ta dɩd-o o wɩ: «Pɛ, yɩ pa Yisɩrayɛlɩ tiinə jar-kərə bam kʋntʋ tɔgɩ dɩ nmʋ nɔɔna bam ba vu ba kɩ najara yam. Bɛŋwaanɩ, Baŋa-Wɛ dʋlɩ Yisɩrayɛlɩ tiinə bam DƖ yagɩ mʋ. DƖ yɔɔrɩ DƖ vɩn Efrayim dwi tiinə bam maama mʋ. 8 Nmʋ na maŋɩ n vɔ pu-dɩa te maama n vu n kɩ najara yam, nan lwarɩ nɩ Wɛ wʋ́ pa n dʋna bam cwǝŋǝ sɩ ba wanɩ‑m. Dɩntʋ mʋ jɩgɩ dam sɩ DƖ pa nɔɔna di yigə najara wʋnɩ, yɩ DƖ ta waɩ DƖ pa ba tʋɩ dɩ.»
9 Amasia ma bwe Wɛ nijoŋu wʋm o wɩ: «Sɩ kʋ na yɩ səbu-poŋo tɩm a na ŋwɩ Yisɩrayɛlɩ jar-kərə bam ŋwaanɩ tɩn, a nan wʋ́ kɩ tɛ mʋ?» Wɛ tɩntʋŋnʋ wʋm ma ləri o wɩ: «Baŋa-Wɛ wʋ́ wanɩ DƖ pa‑m nyɔɔrɩ dɩlʋ na tiini dɩ dwe kʋntʋ tɩn.»
10 Amasia ma pa jar-kərə balʋ na nuŋi Efrayim laŋa kam nɩ ba ba tɩn ni nɩ: ba joori ba sam. Kǝm dɩm kʋntʋ ma pa ba banɩ tiini dɩ wiirə dɩ Zuda tiinə bam, yɩ ba joori ba viiri dɩ ban-lʋm.a
11 Amasia ma yɔɔrɩ o vɔ pu-dɩa o ja o jar-kərə bam o vu Yɛ bolo kʋm. Dáanɩ mʋ o kɩ najara dɩ Edɔm tiinə, yɩ o gʋ ba jar-kərə mʋrrʋ fugə (10,000). 12 Zuda tiinə bam ta wanɩ ba zi Edɔm jar-kərə mʋrrʋ fugə (10,000) badonnǝ yɩ ba ta ŋwɩ. Ba ma kalɩ-ba ba ja ba din kandwɛ-pulɔrɔ yuu. Ba laan ma zɩgɩ piu kʋm yuu nɩ ba yigi-ba ba dɩ tɩga nɩ pa ba maama tʋ ba tɩ.b
13 Kʋ daarɩ kʋ na yɩ Yisɩrayɛlɩ jar-kərə balʋ Amasia na pɛ ba joori ba sam pa ba wʋ tɔgɩ ba kɩ najara yam tɩn, bantʋ ve ba li ba cɔgɩ Zuda tɩɩnɩ dɩdonnǝ mʋ. Ba zɩgɩ Samari seeni mʋ ba cɔgɩ tɩɩnɩ zanzan ba vu ba yi Bɛte-Horon. Ba ma gʋ nɔɔna mʋrrʋ tɩtɔ (3,000) yɩ ba daarɩ ba vrɩ wǝǝnu zanzan ba ja ba viiri.
14 Amasia na wanɩ Edɔm tiinə bam yɩ o maa joori Zeruzalɛm tɩn, o jaanɩ ba jwǝnǝ mʋ o wǝli da o ba. O dɛɛn ma cwi-tɩ o zɩgɩ yɩ o tiiri ya yigə nɩ, o daarɩ o kɩ kaanɩm o pa-ya. 15 Baŋa-Wɛ banɩ ma tiini dɩ fuli Amasia baŋa nɩ. DƖ ma tʋŋɩ o nijoŋnu Amasia tee nɩ dɩ kwǝrǝ o bwe o wɩ: «Bɛŋwaanɩ mʋ nmʋ jɩgɩ wa-yɔɔrʋ tɩntʋ n zulə, yɩ ya maŋɩ ya wʋ wanɩ ya tɩtɩ nɔɔna ya joŋi n jɩŋa nɩ ya yagɩ?»
16 Wɛ nijoŋu wʋm na jɩgɩ taanɩ dɩm o ŋɔɔnɩ tɩn, mʋ pɛ wʋm goni o zʋ taanɩ dɩm wʋnɩ o wɩ: «Ei! Dɩ́ kuri nmʋ mʋ sɩ n tan tui pɛ wʋm yigə n brɩ-o wǝǝnu na? Nmʋ na wʋ yagɩ taanɩ dɩm, aá pa ba gʋ-m.» Wɛ nijoŋu wʋm ma sɩɩnɩ o yagɩ taanɩ dɩlʋ o ya na jɩgɩ o ŋɔɔnɩ tɩn, yɩ o ta o wɩ: «Amʋ nan lwarɩ jaja nɩ Wɛ jaanɩ wʋbʋŋa mʋ sɩ DƖ cɔgɩ‑m n tɩtʋŋ-balɔrɔ kʋm ŋwaanɩ. N ta ma vɩn sɩ n cəgi a taanɩ dɩm.»
17 Dɛ dɩdʋa mʋ Zuda tɩʋ pɛ Amasia banɩ dɩ o nɔɔna bam yɩ o daarɩ o tʋŋɩ o tɩntʋŋna sɩ ba vu ba gwarɩ Yisɩrayɛlɩ tɩʋ pɛ Zoasɩ na yɩ Yoahazɩ bu yɩ o ta yɩ Zehu naa tɩn. Amasia ma ta dɩd-o wɩ: «Ba sɩ dɩ́ jeeri daanɩ dɩ́ kɩ jara.» 18 Pɛ Zoasɩ ma joori o tʋŋɩ kwǝrǝ o pa Zuda tɩʋ pɛ Amasia o wɩ: «Sabara kadoŋ mʋ zɩgɩ Liban nɩ ka tʋŋɩ kwǝrǝ ka pa Sɛdrɩ tiu Liban nɩ ka wɩ: ‹Kwe n bukɔ wʋm n pa a bu sɩ o di o ma o kɩ kaanɩ.› Kʋntʋ nɛ sɩm ni nɩ mʋ ga-varɩm zɩgɩ Liban nɩ ka nɔnɩ sabara kam ka cɔgɩ. 19 Nmʋ brɩ n tɩtɩ n wɩ: n wanɩ n di Edɔm tiinə bam mʋ pa n cʋ n vwana kʋntʋ. Nan ya maŋɩ n sɔŋɔ nɩ sɩ n joŋi zulə. Bɛɛ mʋ yɩ n bʋŋɩ sɩ n vaarɩ lɛɛrʋ n yagɩ nmʋ tɩtɩ yuu nɩ, dɩ Zuda tiinə dɩ yuu nɩ?»
20 Amasia ma sɩn o zwa dɩ taanɩ dɩm kʋntʋ. Bɛŋwaanɩ, kʋ yɩ Wɛ wʋbʋŋa mʋ sɩ DƖ tɔgɩ dáanɩ DƖ waarɩ Amasia dɩ o na lɛɛnɩ o zuli Edɔm tiinə jwǝnǝ yam tɩn. 21 Kʋ kwaga nɩ Yisɩrayɛlɩ tɩʋ pɛ Zoasɩ ma la o jar-kərə o kɩ daanɩ yɩ ba vu Zuda tɩʋ Bɛtɩ-Sɩmesa ba zaŋɩ najara dɩ Amasia. 22 Yisɩrayɛlɩ jar-kərə bam ma wanɩ ba di Amasia dɩ o nɔɔna bam pa ba maama duri ba joori ba sam. 23 Pɛ Zoasɩ ma zi Amasia Bɛtɩ-Sɩmesa nɩ. O ma ja-o o vu Zeruzalɛm. Dáanɩ mʋ o bwəri tɩʋ kʋm kəbrə kalʋ na zɩgɩ Efrayim Ni dɩm nɩ sɩ ka vu ka yi Gugoro Ni dɩm tɩn. Ka laŋa kam dɛɛn yɩ kantɩ biə-yana mʋ. 24 O ma vu o zʋ Wɛ-digə kam o vrɩ ka səbu-sɩŋa dɩ səbu-poŋo wǝǝnu maama, dɩ ka lʋnnɩ zɩla yalʋ Obɛd-Edɔmi dwi dɩm na yɩrɩ tɩn. O ta ma pɛ jɩjɩgɩrʋ tɩlʋ na tigi pɛ sɔŋɔ kʋm nɩ tɩn. O ma ja tɩ maama o joori Samari. O ta ma ja tɩʋ kʋm nɔɔna o ja viiri sɩ kʋ fɩn Zuda tɩʋ pɛ o sɛ o ni.
25 Yisɩrayɛlɩ tɩʋ pɛ Zoasɩ tʋʋnɩ dɩm kwaga seeni, Zuda tɩʋ pɛ Amasia dɛɛn ta nɛ bɩna fugə-yanu mʋ yɩ o laan tɩ. 26 Amasia dɛɛn na di paarɩ yɩ o kɩ wǝǝnu tɩlʋ maama tɩn, kʋ zɩgɩ o paarɩ dɩm pulim nɩ sɩ kʋ yi dɩ na kweeli maŋa kalʋ tɩn, ba pʋpʋnɩ-tɩ ba tiŋi Zuda dɩ Yisɩrayɛlɩ Pwa Cɩbarɩ tɔnɔ kʋm wʋnɩ. 27 Kʋ dɛɛn na zɩgɩ maŋa kalʋ Amasia na mɛ o kwaga o ya Baŋa-Wɛ tɩn, Zeruzalɛm dɩdɛɛra badonnǝ kɩ ni daanɩ mʋ sɩ ba gʋ-o. O ma duri o vu Lakisi. O dʋna bam ma tʋŋɩ nɔɔna sɩ ba zəg-o. Ba ma yi‑o ba gʋ Lakisi nɩ. 28 Ba ma kwe Amasia yɩra yam ba daŋɩ sisəŋ-nɔɔnʋ baŋa nɩ ba ja ba joori Zeruzalɛm. Ba ma kwe‑o ba kɩ o kwə bam yibeeli nɩ.c