Zoasɩ na kwɛ Wɛ-digə kam te tɩn
24
Zoasɩ dɛɛn jɩgɩ bɩna yarpɛ mʋ yɩ o di Zuda tɩʋ paarɩ dɩm. O ma jǝni Zeruzalɛm nɩ o di paarɩ bɩna fiinna. O nu yɩrɩ mʋ Sibiya, o na nuŋi Bɛɛr-Seba tɩn. 2 Wɛ kaanɩm tu Yehoyada ta na wʋ o ŋwɩa wʋnɩ maŋa kalʋ tɩn, Zoasɩ tɩtʋŋa su Baŋa-Wɛ yi mʋ. 3 Yehoyada ma kuri kaana bale o pa Zoasɩ sɩ o di o ma o kɩ o kaana. Ba dɩ ma lʋ biə dɩd-o, bəkəri dɩ bɩsankam.4 Kʋ na wʋra kʋ wʋra tɩn, Zoasɩ wʋbʋŋa ma ja sɩ o fɔgɩ o kwɛ Baŋa-Wɛ digə kam. 5 O ma la kaanɩm tiinə bam, dɩ Levi tiinə bam o kɩ daanɩ yɩ o ta dɩ ba o wɩ: «Ve-na á tʋlɩ Zuda tɩɩnɩ dɩm maama wʋnɩ á joŋi bɩnɩ dɩm wʋnɩ lampoo kʋm nɔɔna bam maama tee nɩ, sɩ dɩ́ ma dɩ́ fɔgɩ dɩ́ kwɛ Wɛ-digə kam. Nan yɩ daanɩ-na dɩ tɩtʋŋɩ dɩm.» Levi tiinə bam nan wʋ kɩ ba yigə tɩtʋŋɩ dɩm wʋnɩ.
6 Pɛ wʋm ma da kʋ ŋwaanɩ o tʋŋɩ o bəŋi kaanɩm nakwɩ tu Yehoyada yɩ o bwe‑o o wɩ: «Bɛŋwaanɩ mʋ nmʋ wʋ nii kʋ baŋa nɩ sɩ Levi tiinə bam kaagɩ ba vu Zeruzalɛm dɩ Zuda tɩɩnɩ dɩm maama wʋnɩ ba joŋi lampoo kʋlʋ na yɩ Wɛ ni-gonim vwe dɩm ŋwaanɩ tɩn? Baŋa-Wɛ tɩntʋŋnʋ Moyisi dɛɛn tiŋi ni dɩm kʋntʋ mʋ o pa Yisɩrayɛlɩ kɔ-fɔrɔ kʋm yɩ ba dɩ sɛ.»
7 Nɔn-balɔrɔ Atalia biə bam nan ya ŋɔgɩ ba zʋ Wɛ-digə kam wʋnɩ mʋ ba cɔgɩ-ka. Ba ta brɩ ba vrɩ wǝǝnu tɩlʋ na yɩ lanyɩranɩ fasɩ Baŋa-Wɛ ŋwaanɩ tɩn mʋ ba ja ba nuŋi ba ma ba zuli Baalɩ jwǝnǝ yam.
8 Pɛ wʋm ma pa ni yɩ ba kwe dɛ ba magɩ daka ba daarɩ ba zɩgɩ-ka pooni yigə nɩ, sɩ kʋ maŋɩ dɩ Baŋa-Wɛ digə kam manco-pɩɩna yam. 9 Ba ma tʋŋɩ kwǝrǝ Zeruzalɛm dɩ Zuda tɩɩnɩ dɩm maama wʋnɩ sɩ nɔɔna bam ja lampoo ba ba ba pa Baŋa-Wɛ, nɩ Wɛ tɩntʋŋnʋ Moyisi dɛɛn na pɛ Yisɩrayɛlɩ tiinə bam kɩ te kagʋa yuu nɩ tɩn.a 10 Dɩdɛɛra bam dɩ nɔɔna bam maama ma ja ba sǝbiǝ ba ba Zeruzalɛm dɩ wʋpolo. Ba ma kwe ba pɛɛra yam ba dɩ daka kam wʋnɩ pa ka ba ka su. 11 Dɛ maama wʋnɩ, Levi tiinə bam na kwe daka kam ba ja ba vu pɛ wʋm dɩdɛɛra bam te, yɩ ba na nɛ nɩ sǝbiǝ bam daga, pɛ wʋm tɔn-pʋpʋnnʋ wʋm, dɩ kaanɩm nakwɩ tu zənnu wʋm yǝni ba lo ka wʋʋ səbu kʋm mʋ ba tiŋi, yɩ ba joori ba ja daka kam ba vu ba zɩgɩ ka ya na zɩgɩ mɛ tɩn. Ba yɔɔrɩ ba kɩ kʋntʋ mʋ dɛ maama pa ba ba ba la səbu zanzan. 12 Pɛ wʋm dɩ Yehoyada ma kwe səbu kʋm ba kɩ nɔɔna balʋ na wʋ́ taa nii Baŋa-Wɛ digə kam tɩtʋŋa baŋa nɩ tɩn jɩŋa nɩ. Bantʋ dɩ ma beeri lwara, dɩ gwarʋ, yɩ ba ŋwɩ-ba sɩ ba taa tʋŋa ba kwɛ Baŋa-Wɛ digə kam. Ba dɛɛn ta beeri balʋ na ye luuru dɩ canna tɩtʋŋa tɩn mʋ sɩ ba dɩ taa kwɛ wǝǝnu.
13 Tɩntʋŋna bam maa yɩ yawalɩ-nyɩna, pa tɩtʋŋa yam yɔɔrɩ ya ve yigə. Ba ma fɔgɩ ba kwɛ Wɛ-digə kam ba ti pa ka tɔgɩ cwǝŋǝ yɩ ka tiini ka dana.b 14 Ba na tʋŋɩ ba ti kʋntʋ tɩn, ba ma ja səbu kʋlʋ ta na daarɩ tɩn ba vu ba pa Pɛ Zoasɩ dɩ Yehoyada. Ba dɩ ma kwe-kʋ ba pa nɔɔna sɩ ba ma ba kɩ səbu-sɩŋa dɩ səbu-poŋo zwɩ dɩ zɩla yadonnə Baŋa-Wɛ digə tɩtʋŋa yam dɩ zwɛɛm pɛɛra kaanɩm dɩm ŋwaanɩ. Maŋa kalʋ Yehoyada ta na wʋ o ŋwɩa wʋnɩ tɩn mʋ nɔɔna dɛɛn yǝni ba kwe zwɛɛm pɛɛra ba kɩ kaanɩm ba pa Baŋa-Wɛ DƖ digə kam nɩ.
15 Yehoyada dɛɛn nan ya tiini o kwɩn mʋ sɩ kʋ maŋɩ dɩ bɩna bi dɩ fiintɔ yɩ o laan tɩ. 16 Ba ma ja-o ba vu ba kɩ Davidi tɩʋ Zeruzalɛm nɩ mɛ ba na yǝni ba kɩ pwa tɩn. Ba kɩ kʋntʋ o na tʋŋɩ wo-laarʋ Yisɩrayɛlɩ tɩʋ kʋm nɩ o pa Wɛ, dɩ Wɛ-digə kam tɩn ŋwaanɩ mʋ.
Ba zuli wa-lɔɔra, yɩ kʋ ba dɩ tʋʋnɩ
17 Kʋ daarɩ, Yehoyada tʋʋnɩ kwaga nɩ, mʋ Zuda nakwan bam zaŋɩ ba ba, ba kuni doonə pɛ Zoasɩ yigə nɩ. Pɛ dɛɛn maa cəgi ba taanɩ dɩm. 18 Kʋntʋ baŋa nɩ mʋ Zuda tiinə bam swe Wɛ-digə kam swiə. Ba ma da ba zuli Asera nyɩnyʋgʋ dɛ, dɩ jwǝnǝ yadonnə, ba daarɩ ba yagɩ ba nabaara Wɛ dɩm zulə. Ba na sagɩ cwǝŋǝ dɩ ba lwarɩm kikiə yam kʋntʋ tɩn, Baŋa-Wɛ banɩ ma zaŋɩ dɩ Zuda tiinə bam, dɩ Zeruzalɛm tiinə bam. 19 Dɩ kʋ dɩ, Baŋa-Wɛ ta tʋŋɩ DƖ nijoŋnə mʋ sɩ ba kaanɩ nɔɔna bam sɩ ba pipiri ba joori DƖ te. Nɔɔna bam ma vɩn sɩ ba cəgi nijoŋnǝ bam taanɩ dɩm.c
20 Baŋa-Wɛ Joro dɛɛn ma cu kaanɩm tu Yehoyada bu Zakari baŋa nɩ. O ma zɩgɩ nɔɔna bam yigə nɩ o ta o wɩ: «Wɛ na tagɩ te tɩn mʋ tɩntʋ: Bɛŋwaanɩ mʋ abam yǝni á vɩn Baŋa-Wɛ niə yam? Abam yɔɔrɩ á beeri cam mʋ á pa á tɩtɩ. Abam na nuŋi Baŋa-Wɛ kwaga nɩ tɩn ŋwaanɩ, DƖ dɩ dʋlɩ abam mʋ DƖ yagɩ.»
21 Nɔɔna bam ma kɩ bana sɩ ba gʋ Zakari. Pɛ Zoasɩ ma pa ni pa ba dʋl-o dɩ kandwa ba gʋ Baŋa-Wɛ digə kam kʋnkɔlɔ kʋm wʋnɩ.d 22 Pɛ wʋm swe Yehoyada ya na kɩ-o lanyɩranɩ te tɩn mʋ pa o gʋ o bu Zakari. Zakari na wʋra o tʋ tɩn, mʋ o taga o wɩ: «Baŋa-Wɛ wʋ́ nii DƖ na kʋlʋ á na jɩgɩ á kɩ tɩn sɩ DƖ mɔ jɩm DƖ pa-nɩ.»
23 Bɩnɩ dɩm kʋntʋ maa na yɔɔrɩ dɩ wʋra dɩ ti tɩn, mʋ Siiri tiinə jar-kərə tu ba kwaarɩ jara dɩ Zoasɩ. Jara yam ma yi Zeruzalɛm dɩ Zuda tɩɩnɩ dɩm maama. Siiri jar-kərə bam ma yɔɔrɩ ba gʋ Zuda yigǝ tiinǝ bam maama, yɩ ba daarɩ ba pɛ ba jɩjɩgɩrʋ tɩm maama ba ja ba joori Damasɩ sɩ ba kɩ-tɩ ba pɛ wʋm jɩŋa nɩ. 24 Siiri jar-kərə bam dɛɛn sɩɩnɩ ba yɩ fɩnfɩɩn yɩranɩ mʋ. Dɩ kʋ dɩ, Baŋa-Wɛ yagɩ cwǝŋǝ mʋ pa ba wanɩ Zoasɩ jar-kərə kɔ-fɔrɔ kʋm ba di. Zuda tiinə bam dɛɛn na lɔgɩ Baŋa-Wɛ dɩm na yɩ ba nabaara Wɛ kwaga nɩ tɩn ŋwaanɩ mʋ DƖ waarɩ Zoasɩ. 25 Najara yam na kɩ ya ti yɩ Siiri jar-kərə bam maa viiri tɩn, dɩ Zoasɩ tiini o na zʋnnɩ mʋ. O tɩtɩ dɩdɛɛra ma bwɛ daanɩ sɩ ba gʋ-o, o na gʋ kaanɩm tu Yehoyada bu Zakari tɩn ŋwaanɩ. Ba ma li‑o ba gʋ yɩ o tigi o pwəgə je nɩ. Zoasɩ na tɩgɩ tɩn, ba ma kɩ-o Zeruzalɛm nɩ, yɩ kʋ daɩ yibeelǝ yalʋ ba na yǝni ba kɩ pwa ya wʋnɩ tɩn nɩ.
26 Kʋ dɛɛn yɩ Zabadɩ wʋlʋ nu na yɩ Amɔn tiinə bukɔ Simeyatɩ tɩn, dɩ Yehozabadɩ wʋlʋ nu na yɩ Moabɩ tiinə bukɔ Simiriti tɩn mʋ kɩ bana ba vu ba gʋ Zoasɩ. 27 Kʋ nan na yɩ Zoasɩ biə bam yɩra taanɩ, dɩ Wɛ nijoŋnǝ bam na ŋɔɔnɩ wǝǝnu tɩlʋ kʋ vu o tɩtɩ seeni tɩn, dɩ o na fɔgɩ o kwɛ Wɛ-digə kam te tɩn mɩmaŋa, tɩ maama pʋpʋnɩ tɩ tigi Pwa Cɩbarɩ tɔnɔ kʋm wʋnɩ. Zoasɩ bu Amasia ma ləri o yuu nɩ o ji pɛ.