23
Bɩna yarpɛ na kɛ tɩn mʋ Wɛ kaanɩm tu Yehoyada dɛɛn jaanɩ baarɩ sɩ o kɩ kǝm. O ma kɩ ni-mɔrɔ dɩ dɩdɛɛra balʋ na te jar-kərə bi bi tɩn badonnǝ. Bantʋ maa yɩ Zeroham bu Azarɩa, dɩ Yohanan bu Ismayɛlɩ, dɩ Obɛdɩ bu Azarɩa, dɩ Adaya bu Maaseya, dɩ Zikiri bu Elisafatɩ.2 Dɩdɛɛra bam kʋntʋ ma tʋlɩ Zuda tɩɩnɩ dɩm maama wʋnɩ ba la Levi tiinə bam, dɩ Yisɩrayɛlɩ sɔ-yuni yigǝ tiinǝ bam ba kɩ daanɩ. Ba maama laan ma vu Zeruzalɛm3 ba zʋ Wɛ-digə kam wʋnɩ. Ba ma jeeri Zoasɩ yigə nɩ, yɩ ba daarɩ ba goni ni dɩd-o. Yehoyada ma ta dɩ ba maama o wɩ:
«Pɛ wʋm bu Zoasɩ mʋ tɩntʋ o zɩgɩ á yigə nɩ. O nan maŋɩ sɩ o jǝni o di o ko Davidi paarɩ dɩm, nɩ Baŋa-Wɛ na maŋɩ DƖ goni ni sɩ kʋ taa yɩ te Davidi dwi dɩm seeni tɩn mʋ. 4 Abam na maŋɩ sɩ á kɩ te tɩn mʋ tɩntʋ: Abam balʋ na yɩ Wɛ kaanɩm tiinə dɩ Levi dwi tiinə yɩ á pɔɔrɩ kuni bɩtɔ tɩn, á kɔgɔ kʋlʋ na tui tɩtʋŋa siun dɛ nɩ tɩn cicoro wʋ́ taa yɩrɩ Wɛ-digə kam niə yam. 5 Abam cicoro dɩ wʋ́ taa nii pɛ sɔŋɔ kʋm, sɩ cicoro kʋdoŋ kʋm dɩ taa nii Bri-Bərə ni dɩm. Abam balʋ na daarɩ tɩn laan wʋ́ taa zɩgɩ á yɩrɩ Baŋa-Wɛ digə kam kʋnkwallʋ tɩm. 6 Nɔɔn-nɔɔnʋ daɩ sɩ o zʋ Wɛ-digə kam, kʋ na daɩ kaanɩm tiinə dɩ Levi tiinə balʋ na jɩgɩ tɩtʋŋa sɩ ba tʋŋɩ ka wʋnɩ tɩn yɩranɩ. Bantʋ jɩgɩ cwǝŋǝ sɩ ba zʋ, bɛŋwaanɩ ba kwɛ ba tɩtɩ Wɛ ŋwaanɩ mʋ. Balʋ maama na daarɩ tɩn maŋɩ sɩ ba taa nii tɩtʋŋɩ dɩlʋ Baŋa-Wɛ na pɛ-ba sɩ ba taa kɩ tɩn baŋa nɩ mʋ. 7 Levi tiinə bam maŋɩ sɩ ba fɔgɩ ba zɩgɩ ba gilimi pɛ wʋm mʋ ba kɩ tɩtarɩ nɩ, yɩ ba ze ba jara zɩla. Nɔɔnʋ wʋlʋ na zʋ digə kam, sɩ á yɔɔrɩ á gʋ kʋ tu. Pɛ wʋm nan na wʋ́ vu mɛ maama tɩn, sɩ abam dɩ taá wʋ o tee nɩ.»
8 Levi tiinə bam, dɩ Zuda tiinə bam maama ma sɩɩnɩ ba tɔgɩ ni dɩlʋ maama Wɛ kaanɩm tu Yehoyada na taga tɩn. Ba dɩdʋa dɩdʋa ma ja ba nɔɔna ba ba Yehoyada te, nɩ kʋ na yɩ balʋ na tui tɩtʋŋa siun dɛ nɩ tɩn, dɩ balʋ na ti ba tɩtʋŋa siun dɛ nɩ tɩn dɩ. Bɛŋwaanɩ, Yehoyada wʋ pɛ ba pɔɔrɩm maama cwǝŋǝ sɩ ba yagɩ ba tɩtʋŋa. 9 Yehoyada ma kwe cicwə dɩ jara-kǝm cɩ-kwɛn sɩlʋ dɛɛn na yɩ Davidi nyɩm yɩ tɩ tigi Wɛ Wɛ-digə kam nɩ tɩn o pa jar-kərə dɩdɛɛra bam. 10 O ma pa nɔɔna bam maama vu ba zɩgɩ ba gilimi pɛ wʋm ba kɩ tɩtarɩ nɩ, yɩ ba ze ba jara zɩla. Ba dɛɛn tigisi ba tɩtɩ Wɛ-digə kam je maama nɩ, jagwiə seeni dɩ jazɩm seeni, kʋ zɩgɩ kaanɩm bimbim dɩm tikəri nɩ dɩ digə kam tɩtɩ yigə nɩ. 11 Yehoyada dɩ o biə bam dɛɛn ma ja pɛ wʋm bu Zoasɩ ba ja ba nuŋi. Ba ma kwe paarɩ yipugə kam ba pu o yuu nɩ, yɩ ba daarɩ ba kwe paarɩ tiŋim cɩbarɩ tɔnɔ kʋm ba kɩ o jɩŋa nɩ. Ba ma lo nugə o yuu nɩ ba ma ba tiŋ‑o paarɩ. Nɔɔna bam ma tɔɔlɩ ba wɩ: «Wɛ wʋ́ pa pɛ wʋm mʋmwɛ-dɛɛrɩ!»
12 Atalia na ni nɔɔna bam na kɩ sɔɔ yɩ ba tee pɛ wʋm tɩn, o ma kɩ lɩla o nuŋi o vu Baŋa-Wɛ digə kam o daarɩ o na nɔn-kɔgɔ kʋm. 13 O ma na pɛ wʋm na zɩgɩ ywe dɩlʋ na wʋ Wɛ-digə kam ni nɩ tɩn təŋə nɩ, nɩ ba na yǝni ba kɩ te ba tiŋi pɛ tɩn. Dɩdɛɛra bam dɩ balʋ na wui nabwaanʋ tɩn maa zɩgɩ pɛ wʋm tikəri nɩ. Tɩʋ kʋm nɔn-biə bam maama maa caka dɩ wʋpolo yɩ ba badonnǝ wui nabwaanʋ. Lən-leenə bam dɩ maa zɩgɩ da dɩ ba kwɛɛra zɩla ba mɔɔnɩ le ba zuli pɛ wʋm. Atalia na nɛ kʋntʋ tɩn, o ma ja o gwaarʋ tɩm o vaŋɩ o kaarɩ yɩ o wɩ: «Bɩbarɩ-nyɩna mʋ zaŋɩ a baŋa nɩ!»
14 Yehoyada ma ta dɩ jar-kərə dɩdɛɛra bam o wɩ: «Ja-na Atalia á nuŋi Wɛ-digə kam wʋnɩ á kɩ-o pamaŋna bam gɩna tɩtarɩ nɩ. Nɔɔnʋ na kwaanɩ sɩ o zən‑o, sɩ á kwe sʋ-lɔŋɔ á gʋ kʋ tu.» Bɛŋwaanɩ, Yehoyada ya maŋɩ o ta nɩ ba yɩ gʋ Atalia Baŋa-Wɛ digə kam wʋnɩ. 15 Ba ma zi Atalia ba ja ba nuŋi ba vu pɛ sɔŋɔ kʋm. Ba ma pa o tɔgɩ manchoŋo ni mɛ sise na tɔgɩ da sɩ zʋʋrɩ naboo kʋm tɩn, yɩ ba daarɩ ba gʋ-o je sɩm kʋntʋ nɩ.a
16 Wɛ kaanɩm tu Yehoyada ma pa o dɩ pɛ wʋm dɩ nɔɔna bam maama goni ni dɩ Baŋa-Wɛ nɩ: baá taa yɩ Baŋa-Wɛ tɩtɩ nɔɔna. 17 Nɔɔna bam maama dɛɛn ma vu ba zʋ Baalɩ jwəm digə kam ba yigi ka maama ba dɩ tɩga nɩ, ba daarɩ ba cɩcʋgɩ kaanɩm bimbinə yam dɩ jwəm kamwarʋ tɩm maama. Kʋ ta na yɩ Baalɩ kaanɩm tu Matan, ba jaan‑o bimbinə yam tikəri nɩ mʋ ba gʋ.
18 Yehoyada ta ma kuri balʋ na yɩ kaanɩm tiinə dɩ Levi dwi tiinə tɩn sɩ ba taa nii Baŋa-Wɛ digə kam tɩtʋŋa yam baŋa nɩ, nɩ Pɛ Davidi dɛɛn na pɔɔrɩ ba tɩtʋŋa yam te tɩn. Bantʋ maŋɩ sɩ ba taa zwɛ vara ba kɩ kaanɩm ba pa Baŋa-Wɛ, ba daarɩ ba taa leeni le dɩ wʋpolo, nɩ Moyisi niə yam dɩ Davidi kwiə yam dɛɛn na yɩ te tɩn. 19 O ta ma kwe nɔɔna o zɩgɩ Baŋa-Wɛ digə kam manco-pɩɩna yam nɩ, sɩ ba taa cʋ sɩ nɔɔna balʋ maama na wʋ kwɛ ba tɩtɩ dɩ cullu tɩm tɩn yɩ zʋ ka wʋnɩ.
20 O laan ma tɔgɩ dɩ jar-kərə dɩdɛɛra bam, dɩ nakwa bam, dɩ yigǝ tiinǝ bam, kʋ ta wǝli dɩ tɩʋ kʋm nɔn-biə bam maama, sɩ ba vu ba ja pɛ Zoasɩ ba ja ba nuŋi Baŋa-Wɛ digə kam wʋnɩ. Ba ma ja-o ba vu ba tɔgɩ ka ni dɩlʋ na wʋ baŋa seeni tɩn ba vu ba zʋ pɛ sɔŋɔ kʋm. Ba ma ja Zoasɩ ba pa o jǝni paarɩ jangɔŋɔ kʋm baŋa nɩ. 21 Nɔn-biə bam maama maa caka dɩ wʋpolo. Kʋ kwaga nɩ tɩʋ kʋm maama ma maŋɩ da yirr, ba na gʋ Atalia tɩn ŋwaanɩ.